Susuwee

6 O Selikoo aiho ankho yaikwa mokonda yokwatila owoma ova Isilayeli. Ankho kamulupuka nawike, kamunyingila nawike.+

2 Siovaa apopila Susuwee okuti: “Tala, ame nekupakulila o Selikoo, nohamba yatyo, novakwa-vita vatyo vokwapama.+ 3 Onwe amuho ovakwa-vita, muna okuliseta nepunda-umbo olio, muliseta nalio like. Otyo mamulingi otyo mononthiki epandu. 4 Ovola ovanakwa epandu-vali, vatyinde ononkhwino epandu-vali mbonombinga mbonongi, avakala komutwe Wotyikasa. Mahi monthiki yapandu-vali, lisetei-setei nepunda-umbo, amutyiwana-wana atee mepandu-vali, ovanakwa avahiki ononkhwino.+ 5 Tyina ononkhwino mbonombinga mbonongi mbamahikwa,* onwe nga mwembwiiva, ovanthu aveho vena okuulula onkhwo. Otyimato tyepunda-umbo matyitokela pohi.+ Tyina tyamatoko, munthu na munthu aye no komutwe, okuviuka vala komutwe wae.”

6 Etyi Susuwee omona wa Nuu atunda opo, akaongiya ovanakwa, evepopila okuti: “Tyindei otyikasa tyomphango, ovanakwa vena epandu-vali vena okutyinda ononkhwino epandu-vali mbonombinga mbonongi, avakala komutwe Wotyikasa tya Siovaa.”+ 7 Pahe apopila ovanthu, ati: “Endei, amulisete nepunda-umbo, ovakwa-vita vokwamaneka+ vena okukala komutwe Wotyikasa tya Siovaa.” 8 Ngeetyi Susuwee apopila ovanthu, ovanakwa epandu-vali ankho vokwatyinda ononkhwino epandu-vali mbonombinga mbonongi komutwe wa Siovaa, avaende komutwe otyo vahika ononkhwino, otyikasa tyomphango tya Siovaa atyikala monyima yavo. 9 Ovakwa-vita vokwamaneka, avakala komutwe wovanakwa vokuhika ononkhwino, ovakwavo avakala monyima Yotyikasa, otyo oku ononkhwino mbuhikwa vala.

10 Susuwee wevepopila okuti: “Mwahaululei, nii ondaka yenyi iheivale. Momulungu wenyi mwahatunde ondaka naike, atee ame mwene ndyimuti: ‘Ululei!’ Pahe amuulula.” 11 Pahe elisetesa Otyikasa tya Siovaa nepunda-umbo, atyilisete vala like, etyi veliseta, avakondoka monthanda, ngamo valala.

12 Etyi kwatya, Susuwee apinduka-po komuhuka-huka, ovanakwa avatyindi Otyikasa+ tya Siovaa. 13 Ovanakwa vokwatyinda ononkhwino mbonombinga mbonongi, avapiti komutwe Wotyikasa tya Siovaa, otyo vahika ononkhuino. Ovakwa-vita vokwamaneka, tyati vamwe veli komutwe wavo, ovakwavo veli monyima Yotyikasa tya Siovaa, otyo oku ononkhwino mbuhikwa. 14 Monthiki ya vali, velisetele vala like nepunda-umbo, avakondoka monthanda. Valingile ngootyo ononthiki epandu.+

15 Monthiki ya pandu-vali, avapinduka-po komuhuka-huka, tyina kuhimbika okwandyuluka, avalingi ngeetyi valinga-lingale. Avelisete nepunda-umbo, okuwana-wana atee vatuukisa epandu-vali. Omonthiki oyo vala velisetele nepunda-umbo, aveliwana-wana atee vehika mepandu-vali.+ 16 Mo lya pandu-vali, etyi ovanakwa vahika ononkhwino, Susuwee apopila ovanthu okuti: “Ululei,+ mokonda Siovaa wemupakulila epunda-umbo eli! 17 Epunda-umbo lina okuhanywa, atyiho novipuka vili-mo,+ mokonda atyiho o tya Siovaa. Laambe+ omukai ekunga oe vala una okuhupa, novanthu aveho veli mondywo yae. Waholekele ovalavi vetu.+ 18 Tupu mwahakwatei natyike povipuka viatiwa vina okuhanywa+ opo mwehetyifweve, amutyityindi-po. Mokonda ine mulinga ngootyo,+ mamweetela ovihuna ova Isilayeli, onthanda yavo aihanywapo.*+ 19 Mahi, opalata yatyo aiho, noolu, novipuka aviho vialingwa notyitasu, novivela, aviho ovio vikola, ovia Siovaa.+ Vina okwenda polumono lwa Siovaa.”+

20 Pahe etyi ovanthu veiva ononkhwino mbahika avaulula.+ Vati vala mbwivee, avaulula onkhwo imwe onene yovita, otyimato atyitokela pohi.+ Etyi tyatoka, munthu na munthu aende no komutwe, aviuku vala komutwe, avapundu ovipuka mepunda-umbo. 21 Vahanyene-po ovipuka aviho ankho vili mepunda-umbo, ovalume, novakai, novana, nonombwale, nonongombe ononthwei, nonongi, novimbulu,+ aviho ankho vili mepunda-umbo aveviipaa nomutunga.

22 Susuwee apopila ovalume vana vevali vokwalavele otyilongo ati: “Nyingilei mondywo yomukai ekunga, amumulupula-mo, tupu amulupula-mo ombunga yae aiho, ngeetyi mwemutolelele.”+ 23 Ovalume ovo ovalavi avanyingila, avalupula-mo Laambe, na he, na ina, naava velikwai navo, novo momaumbo avo. Valupulile pondye ombunga yae aiho,+ avevetwala na pamwe, kondye yonthanda yova Isilayeli.

24 Pahe avayoko epunda-umbo, novipuka aviho ankho vili-mo. Mahi, opalata, noolu, novipuka aviho vialingwa notyitasu, novivela, avevitwala polumono lwo mondywo ya Siovaa.+ 25 Susuwee+ wahupisile vala Laambe ekunga, no vomeumbo lya he, nombunga yae aiho. Laambe no hono ukala mo Isilayeli,+ mokonda waholekele ovalume Susuwee atumine vakalave o Selikoo.+

26 Pononthiki opo, Susuwee apopi umwe aane, ati:* “Omunthu ulipa otyilinga tyokupindula-po epunda-umbo eli lyo Selikoo makatengala, matengalela umwe kotyipala tya Siovaa. Mati vala tyina akatunga omahina alio, apankhila omona wae wotyiveli, tyina ati pokulipaka onombundi,+ apankhila omona wae onkhelo.”

27 Siovaa wali na Susuwee,+ omunkhima wae auhahana kombanda yohi aiho.+