Wa Vali Wahonekelwa Ova Tesalonika

2 Mahi vanthu vetu, okuyemba kokweya kwa Tatekulu yetu Sesusi Kilisitu,+ pokuwanekwa kwetu nae,+ tumwiita tuti, 2 mwahatuñgunywei vala amutundu monondunge mbenyi, hamwe amuhimapaleswa vala, tyilinge o nonondaka mbafiminwa,*+ tyilinge o nondaka yapopiwa, tyilinge o nomukanda ulinga ngatyina watunda kwoonthwe, amutiwa onthiki ya Siovaa*+ yeya-le.

3 Mwahayekei nawike emutwale nohika,* ina onthiki oyo kamaiya nkhele akwehenetumbuke etyi tyokutyitukilapo otyili,+ omunthu wokwehetavela ovitumino eheneholololwe,+ omona wehanyauno.+ 4 Oo ukatuka umwe ulwa, ulipaka-ko alambe-po atyiho tyitiwa o huku, atyiho tyifendwa,* apumphama mondywo ya Huku, elitalesa kovanthu ati ndyi huku. 5 Onwe kamuhinangela okuti etyi ankho nkhele tuna onwe oko, ankho ndyimupopaila ovipuka ovio?

6 Onwe pahe mutyii etyi tyemutyika, akahololoke umwe vala mononthiki anakelwa. 7 Otyili, etyi tyokwehetavela ovitumino o kotyili-ale lwomaelema vala,+ matyikala vala ngootyo atee ou walinga omutyiko utyikelela atunda mondyila. 8 Haa pahe wokwehetavela ovitumino mahololoka, Tatekulu Sesusi ekemunyima-ko nomphepo itunda momulungu wae,+ ekemunyima-ko tyina okweya kwae kuhololoka.+ 9 Mahi okwatumbuka kwomunthu wokwehetavela ovitumino tyaendela movilinga vya Satanasi,+ movilinga ovinene, movilekesa viounkhembi, momaelema,+ 10 no mokuyondya kwonya,+ ovio vieendela umwe ava veli nokuvomba-ko kombanda yokwehetavelele, avahahumbu otyili, etyi ñgeno ankho tyiveyovola. 11 Otyo Huku eveyekelela momphepo younkhembi iveyondye, na veye mokutavela mounkhembi,+ 12 opo aveho vakwate momphela ikeveipaesa mokonda yokwahambukilwa ovivi, avehetavela otyili.

13 Mahi, apeho onthwe tuna okupandula Huku, onwe tupandulila, onwe vanthu vetu Siovaa* ehole, mokonda Huku wemukoya-le ponthyimbi,+ wemukoyela eyovo etyi emusukula+ nomphepo yae tyo onwe mwayumba onthumbi motyili. 14 Otyo emwiihanena otyo noviwa ovipe onthwe tupopia, opo onwe muvase omunkhima wa Tatekulu yetu Sesusi Kilisitu.+ 15 Naina pahe vanthu vetu, pamekei,+ kakatelei moviso mwalongeswa,+ tyilinge mweviivila mondaka yapopiwa, tyilinge o omomukanda watunda kwoonthwe. 16 Ngwe hatyo vala otyo, tyitie umwe na Tatekulu yetu Sesusi Kilisitu, na Huku, Tate yetu wokutuhole,+ wapa ovanthu omphamekelo yahapu,+ ekevelelo ewa mokankhenda kae okanene, 17 vapameke omitima vienyi, vemupumphike* mwahatunde movilinga aviho oviwa, no mondaka ongwa.