Etyi Tyahonekwa na Luka

22 Otyipito Tyonombolo Mbahapakelwe Onkhiso, tyitiwa Opasikwa,+ ankho pahe tyili nokuhika-po.+ 2 Ononkhalamutwe mbovanakwa novahoneki vovitumino, ankho veli nokutala etyi mavalingi velipole-e,+ mokonda ankho vatila owoma ovanthu.+ 3 Satanasi alinyingila mu Sunda, utiwa o Sunda Isikaliyote, umwe Pekwii na Vevali,+ 4 aende akapopia no nonkhalamutwe mbovanakwa novalulikwa vo mondywo ya Huku, evetolela oñgeni apondola okumupakula kuvo.+ 5 Okwiiva otyo avahambukwa, avatomphola nae vemupe onombongo mbopalata.+ 6 Ngwe etavela, pahe ahimbika okwovola etyi malingi etyivile okumupakula kuvo tyahamonwa novanthu.

7 Onthiki yo tete Yotyipito Tyonombolo Mbahapakelwe Onkhiso aihiki-po, onthiki yokulinga otyilikutila tyo Pasikwa.+ 8 Sesusi atumu oo Petulu na Swau, ati: “Endei, kafwiikei ovipuka tulie Opasikwa.”+ 9 Avemupulu avati: “Opi wahanda ñgeno tukeilingila?” 10 Evepopila ati: “Tala! Mamuti tyina munyingila mepunda-umbo, mamuhonyena nomulume watyinda omulindi womaande. Onwe mulandulei vala, amunyingila meumbo amanyingila.+ 11 Popilei hekulu yeumbo muti: ‘Omulongesi wati: “Ondywo yovaenda ili-pi ndyilile-mo Opasikwa novalongwa vange.”’ 12 Ngwe memulekesa ondywo imwe onene kosapalalo keulu, ina-le atyiho, omo muviukisa omo ngamo tulila.” 13 Pahe avaende, ovipuka avevivasi umwe ngeetyi evepopila, avaviukisa umwe atyiho Tyopasikwa.

14 Etyi pahe oola yehika-po, akapumphama avakalia novatumwa.+ 15 Evepopila ati: “Ankho ndyityihanda-le etyi tyokulia noonwe Opasikwa ei tyina nkhele nehenemone emone; 16 mutyii vakwe, ame ñgaa ndyiihula umwe apa, hikeilia vali atee etyi yalingilwa tyilifwilapo Mouhamba wa Huku.” 17 Atambula omphindo, elikwambela, ati: “Umei, itie umwe aikwate kwou aikwate kwou, 18 ame ndyimuti, okutuka hono, hinwa-anwa vali natyike tyitunda komuti wonouva atee Ouhamba wa Huku uya.”

19 Akwate vali ombolo elikwambela,+ eivembula, eveavela-yo, ati: “Etyi tyilekesa olutu lwange,+ malwaavelwa onwe.+ Tyilingei-lingei munthyinangele.”+ 20 Akwate vali okopo etyi vamana okulia ondalelo, ati: “Okopo ei ilekesa omphango+ omphe mailingwa nohonde+ yange maimomesilwa onwe.+

21 “Mahi tala! enkhanya lya una mamphakula lili umwe nokulia naame.+ 22 Mwene Omona womulume, maende umwe ngeetyi tyatolelwe;+ mahi omunthu memupakula ngongo yae!”+ 23 Etyi vetyiiva, avelipula-pula opo okutala olie hamwe wapanga okulinga otyipuka ngootyo.+

24 Mahi apakala onondyaya, okulipomba, tyiti ou uti ame ndyilinga omunene, ou uti ame.+ 25 Ngwe eveti: “Onohamba movilongo novilongo, mbukolonyeka ovanthu, ava vokutumina, ovanthu veveti Onohongoi.+ 26 Mahi onwe, onwe otyo tyahalinge tyenyi.+ Omunene vali pwoonwe alinge omututu vali, ou ululika vakwavo alinge omuundapi.+ 27 Olie ulinga omunene ku vakwavo, oyou upumphi ulia* ine oyou waava?* Hayou upumphi ulia?* Mahi ame tuna onwe pano tala ndyili nokuundapa.*+

28 “Mahi onwe, mwakala umwe naame+ no pononkhumbi mbange;+ 29 ame ndyimulingila omphango, omphango Youhamba, ngeetyi Tate andingila omphango,+ 30 onwe matukalia atuho, matukanwa atuho Mouhamba wange,+ mamukapumphama kovipundi,+ mwoongele omphela omihoko 12 vya Isilayeli.+

31 “Simau, Simau, tala! Satanasi wahanda onwe amuho mupungwe ngotiliku.+ 32 Mahi ame ndyili nokukulingila omalikwambelo, eyumba-nthumbi liove liahatepuluke;+ ove tyina wamakondoka kapameke vakwenyi.”+ 33 Ngwe ati: “Tatekulu ame nafwapo, tyilinge wenda mokaleya, tyilinge ukaipawa, ame twenda vala atuho.”+ 34 Mahi ngwe emuti: “Petulu, ame ndyikupopila umwe, hono apa ekwandambolo liakapopila, ove mondyanye tutatu moti kundyi.”+

35 Evepopila vali ati: “Etyi nemutumine mwende tyehena tyipapo tyonombongo, tyehena osaku yokulia nii nononkhaku,+ muna etyi mwakambele?” Avati: “Au!” 36 Eveti: “Mahi pahe, ou una otyipapo tyonombongo atyinde, ou una osaku yokulia atyinde, ou wehena omutunga alandese otyikutu tyae alande wike. 37 Ame ndyimupopila, etyi tyahonekwa matyilingwa umwe, ame mandyityilingwa etyi tyatilwe: ‘Wavalulilwa ko vokwatomba ovitumino.’+ Otyo ame ndyili nokutyilingwa.”+ 38 Ngwe avati: “Tatekulu tala! apa tuna omitunga vivali.” Eveti: “Viatuuka.”

39 Etyi atunda opo, alingi ngeetyi alinga-linga-le ai no Komphunda Yomindyambi, ovalongwa vae avemulandula.+ 40 Etyi vehika oko, eveti: “Likwambelei mwahayekei-ko opo mwahatokele mokuyondywa.”+ 41 Evehondovoka katutu, aikila konongolo elikwambela, 42 ati: “Tate, ine wetyihanda, mphole olufo olu. Mahi tyahaende ngeetyi ame nahanda, tyeende ngeetyi ove wahanda.”+ 43 Pahe, keulu akutundu oandyu, aiya no pwe, aimupameka omutima.+ 44 Ngwe ankho waihamenwa unene, elikwambela unene; epwila metukuta, omatukuta otyo amoma uti vala ohonde.+ 45 Akatuka pahe etyi amana okulikwambela, aende no povalongwa, evevasi velele, tyeveihama umwe nononkhono ankho vetupu vali.+ 46 Eveti: “Onwe ñgaa mulele? Katukei, likwambelei mwahatalamei, opo mwahatokele mokuyondywa.”+

47 Kamanene-ale okupopia, kuna kuya onthumbo yovanthu, vena Sunda umwe Pekwii na Vevali oe wevekalela komutwe, eya no pu Sesusi emuhipi ombesu.+ 48 Sesusi emuti: “Sunda, Omona womulume uyondya nombesu?” 49 Etyi ava ankho vena-vo vetyimona tyahanda okulingwa-po, avati: “Tatekulu, tuvevange nomutunga?” 50 Kuna umwe wautuka-le, unamo umwe omupika womunene-nakwa emutipula okutwi kwo kokulio.+ 51 Mahi Sesusi emuti: “Wahalinge.” Ayame kokutwi kwatyo, emuhakula. 52 Sesusi apopila ononkhalamutwe mbovanakwa novalulikwa vo mondywo ya Huku novakulu ankho vemweendela, ati: “Onwe muya kuno nomitunga, novimuti mwati mweya okukwata otyimphulu?+ 53 Ononthiki+ ambuho apa ankho hina onwe mondywo ya Huku, etyi ankho mwahankhwatele?+ Mahi ei oola yenyi umwe, oola youtumini wenthiki.”+

54 Pahe avemukwate avemutyindi opo, avemutwala keumbo liomunene-nakwa;+ mahi Petulu alandula-ko, evekalela kokule.+ 55 Avanthiakana otupia mepata, avapumphama, Petulu nae apumphama opo navo.+ 56 Omuhikwena umwe ulingilila-mo, etyi emumonena kotupia upumphi, afweneko emutale umwe nawa, ati: “Omulume ou nae ankho vena-e.” 57 Mahi ngwe ehetavela, ati: “Ame oo himwii, himwiya-le mee.” 58 Pakala vala katutu, apeya vali umwe, emuti: “Ove noove wali puvo.” Mahi Petulu emuti: “Au ame hame-ko tate.”+ 59 Etyi pakala-pakala, omulume umwe etyinamenena umwe ati: “Hitavela nii omulume ou ankho nae vena-e, umoneka umwe, nae omu Ngalileya!” 60 Mahi Petulu ati: “Ame no otyo uli nokupopia tate, hityi-ale.” Kamanene-ale okupopia kuna ekwandambolo lipopia umwe. 61 Tatekulu apiluluka atale ku Petulu, Petulu ahinangela etyi Tatekulu emutolelele, etyi atile: “Ekwandambolo kalikehika kokupopia, ove mondyanye tutatu.”+ 62 Alupuka no kondye alili, alili umwe unene.

63 Pahe, ovalume ankho vokwakwata Sesusi avahimbika okumukwengesa+ otyo vemuveta.+ 64 Avemuhiki motyipala, otyo vemupula vati: “Pahe tapesa! Olie wekuveta?” 65 Avemupopia-popia opo ovipuka ovinyingi viokwatomba umwe Huku.

66 Etyi kwatya, ovakulu votyilongo, nononkhalamutwe mbovanakwa novahoneki vovitumino aveliongiya,+ avemutwala Mombonge Onene, avati: 67 “Ine ove Kilisitu, popia.”+ Ngwe eveti: “Nga ndyimupopila vala, onwe kamamutyitavela-le. 68 Ine ndyiti ndyimupule, onwe kamamukumbulula-le. 69 Mahi Omona womulume+ okutuka hono, mapumphama kokulio kwa Huku, kokuvoko kwapama.”+ 70 Etyi vetyiiva, aveho avelipiane-po avati: “Ove naina Umona wa Huku?” Ngwe eveti: “Otyo umwe otyo muli nokupopia.”* 71 Ngwe avati: “Vakwe ñgaa nkhele tyahanda vali onombangi etyi? Mwene twetyiiva tyatunda umwe momulungu wae.”+