Ndaniyele

7 Menima lyo tete ohamba Mbelesasale+ eli kovipundi, ohamba yo Mbambilonia, Ndaniyele ate ondyoi, amono ovilelenya pokulangi koula wae.+ Ondyoi oyo pahe eihoneka;+ ahoneka umwe atyiho. 2 Ndaniyele wati:

“Movilelenya nakala navio kounthiki, tala! namona onomphepo ononkhwana mbo keulu mbupuka-puka elunga enene.+ 3 Melunga amutundu omanyama ekwana omanene,+ tyati eli likahi ñgaa, eli likahi ñgaa.

4 “Enyama lyo tete, uti onkhulika+ ina omavava onkhombe.+ Nelitala atee omavava alio lieetukulwa, pohi alikatulwa-po, alitalamekwa alitalama umwe konomphai onombali ngomunthu, alipewa omutima womunthu.

5 “Ndyikati ñgaa, enyama ekwavo, lya vali, olio uti engalanga.+ Okuvoko kumwe liekuyelulapo, liatyinda omankhipa etatu olupati komayo; alitiwa: ‘Katuka, lia ohitu onyingi.’+

6 “Pahe, pokuli opo nokutala, tala! ndyikati ñgaa enyama ekwavo lilinga ngonkhapi,+ mahi lina omavava ekwana pomwongo alinga ngo otyiila. Enyama olio, lina omitwe vikwana,+ alipewa ounene litumine.

7 “Pokuli opo nokutala memonekelo lyo kounthiki, pahe andyimono enyama lya kwana, litilisa unene owoma, lilingisa omatwenyonga, ononkhono mbatyo noove-ale, lina omayo omanene otyivela. Lilia, likokota, etyi tyihupa-po alityiliata-liata.+ Olio kalielifwile nomanyama omakwavo o tete, lina onombinga 10. 8 Pokuli opo nokutala, tala! onombinga mbatyo pokati kambo, apatumbu onkhwavo, onthutu,+ po mbotete apatukuka ononthatu. Tala! Kombinga oko kuna omaiho ekahi ngo ovanthu, kuna omulungu upopia nomakamo.*+

9 “Otyo ndyitala atee kwakapakwa ovipundi viounene, ou Omukulu Wononthiki+ apumphama.+ Omuvalo wae utwela uti omeva elikwata,+ onohuki mbae mbutunda too uti omainya ongi asukuka. Otyipundi tyae tyounene, omutemo wotupia; omalola atyo, otupia twatema.+ 10 Ponthele yae apatundu ondongi yotupia ihateka.+ Ovityita-novityita, veli nokumulingila, ovityita omakwii-nomakwii, vetai komutwe wae.+ Ombonge+ aipumphama, apaikulwa omikanda.

11 “Ame andyitale umwe nawa, mokonda yonondaka mbokulipakako* ndyiivite ombinga ili nokupopia;+ andyitale umwe atee enyama olio liaipawa, endindi liatyo aliyumbwa motupia twatokota, alipi. 12 Omanyama omakwavo+ aetyipolwa tyao tyokutumina, aakala-ko umwe omuvo nomwenyo, aakala ononthiki.

13 “Pokuli opo nokutala memonekelo lyo kounthiki, tala! ndyikati ñgaa omakaka meulu, umwe ulinga ngoti omona womulume+ uli nokuya; wayekwa ehike Pomukulu Wononthiki,+ atwalwa no Pomukulu opo. 14 Apewa ounene,+ nomunkhima,+ nouhamba opo ovanthu, omihoko nomihoko, omalaka nomalaka, vemulingile.+ Outumini wae, outumini wahapu wahapolwa-ko, ouhamba wae kaukanyimwa-ko.+

15 “Ame Ndaniyele, mokati kange omu andyiteketa, mokonda ovilelenya viakwata momutwe wange, vianthilisa unene owoma.+ 16 Andyifwene pu umwe utai-po, andyimupulu oityi mwene-mwene ovipuka ovio vipopia. Ngwe ankhumbulula, amphopila etyi ovipuka ovio vipopia, ati:

17 “‘Omanyama oo omanene, akalinga ekwana,+ onohamba ononkhwana mambukakulama kombanda yohi.+ 18 Mahi, ovasukuki Vomukulami+ mavakatambula ouhamba,+ mavakanyingila mouhamba,+ aukalinga-linga wavo apeho, yoo, aukalinga wavo apeho.’

19 “Mahi ame pahe andyisuku nokunoñgonoka vali enyama lya kwana lielikalela unene nomakwavo; enyama limwe litilisa unene owoma, lina omayo otyivela nonohoka mbotyitasu, lilia, likokota, etyi tyihupa-po alityiliata-liata;+ 20 andyisuku nokunoñgonoka onombinga 10+ mbuli komutwe walio, nombinga onkhwavo yokwatumba konyima, yokwatokesa-po onombinga ononthatu,+ ombinga yokuna omaiho nomulungu upopia nomakamo,* ilinga ngoti onene vali kononkhwavo.

21 “Otyo ndyitala umwe na tyina ombinga oyo ilwisa ovakwa-ukola, aivetilisa umwe avahaveteko,+ 22 atee Omukulu Wononthiki+ eya, atete omphela aamena ovakwa-ukola Vomukulami,+ omuvo wanakwa ovakwa-ukola mavatambula ouhamba, auhiki-po.+

23 “Etyi otyo apopia wati: ‘Enyama lya kwana, ouhamba wa kwana maukeya kombanda yohi. Oo, maukelikalela nomauhamba omakwavo, maukalia ohi, awiiliata-liata, awiimiangaula.+ 24 Onombinga 10, onohamba 10 mambukatunda mouhamba omo; konyima yonohamba ombo makukatumbuka vali ohamba onkhwavo, maikelikalela no mbotete, aikatokesa-po onohamba ononthatu.+ 25 Ohamba oyo maikapopia omapita Omunene,+ otyo maikakalela tyokukwela ovakwa-ukola Vomunene. Ohamba oyo maikahanda okupilulula omivo notyitumino, ngwe mavikayekelwa peke liayo omuvo wike, omivo, notyinthimbu tyomuvo.*+ 26 Mahi Ombonge aipumphama, aveipolo-ko kovipundi opo veihanye-ko, aveinyimi-ko umwe aivombo-ko.+

27 “‘Ouhamba, noutumini, nounene womauhamba aeho eli mombwelo yeulu, wapewa ovanthu Vomukulami,+ ovakwa-ukola vae. Ouhamba wavo ouhamba wa apeho,+ omautumini aeho, ovo vala maakalingila, maeketavela vala kuvo.’

28 “Opo tyehulila opo. Ame Ndaniyele, omutima aunthundu, andyipaalala;* mahi ovipuka ovio, ame andyivipake komutima.”