Ndaniyele

11 “Menima lyo tete Ndaliu+ omu Mendia eli kovipundi, ame andyikatuka ndyimupameke, ndyimuyakulile.* 2 Etyi mandyikupopila pahetyino otyili:

“Tala! Mo Pelesa mamukakatuka* onohamba ononthatu, ya kwana maikelipakela olumono olunene vali ku vakwavo aveho. Tyina pahe yamapamena molumono lwayo, maikakatula atyiho ilwise ouhamba wo Ngelesia.+

3 “Mamukakatuka ohamba imwe yapama unene, aikatumina nononkhono ononene,*+ maikalinga atyiho yahanda. 4 Mahi tyina yamakatuka, ouhamba wayo mautoko, autepaulilwa onomphepo ononkhwana mbo meulu,+ kamaukapewa vokwatuka mwe,* nii kaukalinga ngoutumini wae; ouhamba wae mekeutukulwa aupewa ovanthu vakwavo, ovanthu vahatukile mwe.

5 “Ohamba yo kombwelo maikalinga ohamba yapama, oo, o umwe povanene vatyo vae; mahi umwe pu ovo mekeilwisa eitilisa, outumini wae auhahana vali* aulingi vali omunene koutumini wayo.

6 “Tyina pamakala omanima, mavekelikwatapo, ou omona omuhikwena wohamba yo kombwelo mekeya kohamba yo kombanda valinge omphango yombembwa.* Mahi omuhikwena oo, ononkhono ena-mbo kamambukaenda-ko; ohamba kamaikaenda-ko, nokuvoko kwayo kakukaenda-ko; Matyiti nomuhikwena oo no vokwemweetele no wokwemutyitile, no wokwemupele ononkhono ononene pomivo opo, aveho mavakapakulwa. 7 Momii viae mamukatumba ondyovo ikatalama apa ali, aende kovita, akalwisa ovimato viapama viohamba yo kombanda, ekevelwisa, avahavete-ko evetilisa. 8 Mekehika umwe no ko Isitu novika-huku viavo novilolo viavo viotyivela,* novipuka viavo oviwa viatyo* vioolu no viopalata, nononkhwatwa. Makakala umwe omanima tyelitandela nohamba yo kombanda, 9 ohamba oyo maikeya ailwisa ouhamba wohamba yo kombwelo mahi aikakondoka kotyilongo tyayo.

10 “Ava ovana vae, mavakamaneka vakatule ovita, avakaongiya ovita ovinene. Makahunga umwe vala oku apilukila akakombolola atyiho ngomaande omanene. Mahi makakondoka, akaenda nokulwa atee ekehika kovimato viae viokwapama.

11 “Mahi ohamba yo kombwelo, maikeya nonyengo onene aikalwisa ohamba yo kombanda. Ohamba yo kombanda maikaongiya ovanthu ovanyingi-nyingi, mahi ovanthu ovo mavakapakulwa peke liohamba yo kombwelo. 12 Ovanthu ovo mavakatyindwa-po. Omutima wae maukelipaka kounene, akaipaesa ovanthu ovanyingi-nyingi; mahi wahula okuna ononkhono, utupu etyi makalinga.

13 “Ohamba yo kombanda maikaongiya vali ovanthu ovanyingi valamba po votete; konthyulilo yomivo tyina pamakakala umwe omanima, maikeya novita vimwe ovinene, aiya nolumono olunene. 14 Pononthiki opo, ovanyingi mavakakatuka valwise ohamba yo kombwelo.

“Ovalume vamwe pokati kovanthu vove, ovakalavi,* mavakakatuka vahetekele okulinga etyi tyapopiwa movililenya tyilinge otyili, mahi mavakatoka.

15 “Ohamba yo kombanda maikeya aikatula ondondelo, aikombolako epunda-umbo limwe liokwapama. Omavoko* o kombwelo kamakakala-kala tyitai, nii ovalume vae ovitevo; kamavakamona omafa okukala tyitai. 16 Ou meya meveendela makalinga atyiho ahanda, nawike meketyivila okukala tyitai komutwe wae. Ngwe makatalama Motyilongo Tyouwa,*+ ounongo wokwiipa ukakala peke liae. 17 Mekelipa* umwe okuya nomafa ovita viae aviho viouhamba wae, mahi mapakalingwa omphango* nae; etyi malingi metyivili umwe. Ou omona omukainthu womukai, makapewa otyilinga tyokumuhanya-ko. Omona oo kamakakala tyitai, kamakalinga wae apeho. 18 Makakondoloka apake otyipala movilongo vyo konthele kelunga, apolo-ko ovinyingi. Mahi omunene umwe wovita mekelipola olukundo emweetelele, olukundo olo aluvombo-ko. Mekemukondolela-lo. 19 Ngwe makakondoka kovimato viokwapama kotyilongo tyae, mekelipunduka atoko, kamakavasiwa vali.

20 “Apa ali, pena ou makakatuka makapinga-po makatuma omutanthi welilimu,* akaende-ende mouhamba auho wankhimana, mahi makala vala ononthiki mbehehi akahanywa-ko, mahi ha-nonyengo, nii ha novilwa.

21 “Apa ali, pena ou makakatuka mapakapinga umwe watombuwa,* oo yatyo, kamavekemupa omunkhima upewa ohamba; mekeya mononthiki mbetuliyo* elivialeka mouhamba nounkhembi.* 22 Omavoko okukombolola* ngomeva, maakatyindwa-po kombanda yae, aakateywa-teywa; nao Nohongoi+ yomphango.+ 23 Mahi mokonda mavekelikwata-po nae, ngwe makakemba, makakatuka, akakala umwe tyapama otyo ena vala ovanthu vehehi. 24 Momuvo wetuliyo* ngwe makanyingila monohika mbotyilongo* mbokuna olumono olunene,* alingi etyi ovohe no vohe-mbwale vahalingile. Evi apunda mekevitepaulila pokati kavo, navio nolumono lwatyo; makapanga okulwisa onomphangu mbokwapama mahi o momuvo umwe vala.

25 “Mekelilunda amone ononkhono apameka umwe omutima akalwise ohamba yo kombwelo novita vimwe ovinene, ei ohamba yo kombwelo maikamaneka imulwise novita vimwe ovinene-nene, ovitevo. Ngwe kamakakala tyitai mokonda vapanga okumuhanya-ko. 26 Ava vokulia okulia kwae, ovo umwe mavekemutokesa.

“Evi ovita viae, mavikatyindwa-po,* ovanyingi mavakatoka, mavakankhia.

27 “Onohamba ombo onombali, omitima viambo mavikatekela vala kokulinga ovivi. Mambukapumphama komesa ike ambulikemba-kemba vala. Mahi natyike mambukevila mokonda onthyulilo maikeya momuvo wanakwa.+

28 “Ngwe maikakondoka kotyilongo tyayo nolumono olunene, omutima wayo maukapilukila-po omphango ikola. Etyi maikalinga maiketyivila, aikakondoka kotyilongo tyayo.

29 “Momuvo wanakwa, maikakondoka aikalwisa wo kombwelo. Mahi pahe opo, kamatyeende vali ngeetyi tyaendele, 30 mokonda onombaluku mbo ko Kitii+ mambukeya, ambwiilwisa, ambwiikundisa.

“Ngwe maikakondoka ainkhila-mo ononyengo* omphango ikola,+ aiketyivila etyi yapanga; maikakondoka aikakatukila vokwayeka-po omphango ikola. 31 Omavoko ayo* maakakatuka aakasilisa omphangu ikola+ notyimato tyapama, avapolo-ko otyilikutila tyokulingwa apeho.*+

“Mavakapaka-ko otyipuka tyitoyesa tyihanyauna.+

32 “Ovo vokwapilukila-po omphango, ngwe maikevetwala umwe no mounkhembi nonondaka mbuyondya.* Mahi ovanthu vokwii Huku yavo kamaikevevila, maveketyivila okulinga etyi vapanga. 33 Ava vokuna ekungunyiko+ povanthu votyilongo mavakapaka ekungunyiko movanyingi. Ovo yatyo mavakatokeswa nomutunga, notupia mononthiki mbehehi, mavakakwatwa, mavakapundwa. 34 Mahi tyina vamatokeswa, mavakapewa etyi tyiveyaka katutu; ovanyingi mavekeliwaneka kumwe navo avaendela monondaka mbuyondya.* 35 Vamwe po vokutyivila okupunga nawa ovipuka mavakatokeswa opo kulingwe otyilinga tyokukangula nokusukula, nokutwelesa+ atee komuvo wonthyulilo; otyo, matyikalingwa vala momuvo wanakwa.

36 “Ohamba maikalinga etyi yahanda ailipake kounene, ailipake kombanda yono huku ambuho; maikapopia omapita Huku yono huku.+ Maiketyivila etyi yahanda atee omphela pahe ivituka; otyotyo tyatolwa, tyina umwe okumoneka. 37 Kamaikesuka na Huku yovohe; kamaikesuka neetyi ovakai vahanda, nii kaikesuka no huku naike, maikelipaka kombanda ya aveho. 38 Mahi* maikankhimaneka o huku yovimato viokwapama; o huku ovohe vahamwene-ale, oyo umwe maikahilivikila moolu, mopalata, momamanya omawa, movipuka oviwa viatyo.* 39 Etyi yahanda maiketyivila, tyokulwisa ovimato viokwapama vali, no huku imwe* yovilongo. Maikankhimaneka unene ava veipanda, * aikevepaka kounene vatumine pokati kovanthu ovanyingi; maikateta-teta* eheke, aikelilandesa.

40 “Komuvo wonthyulilo, mambukapambeka nohamba yo kombwelo avelitahaula,* ei ohamba yo kombanda maikemukatukila lwotyipepe nomatemba ovilwa no vokweendela kononkhambe, nonombaluku ononyingi; maikanyingila movilongo aikombolola atyiho lwomeva omanene. 41 Maikanyingila umwe no Motyilongo Tyouwa,*+ ovilongo ovinyingi mavikatokeswa. Mahi mavakahupa peke liae ovava: O Endoo na Moambe nomwii watyo wova Amoo. 42 Maikakala vala nokuvoko kwatandavela aikalwisa ovilongo; etyi otyilongo tyo Isitu katyikahupa. 43 Ngwe maikatumina olumono lwaholama, oolu no palata novipuka aviho oviwa viatyo* vyo Isitu. Ova Limbia nova Etiopia mavakalandula monomphai mbayo.*

44 “Mahi oku koutundilo,* no kombanda makukatunda onondaka mbwiinkhindula, maikakatuka nononyengo inyime-ko ovanthu ovanyingi, ivehanye-ko. 45 Maikatunga onohinge mbayo mbonohamba* pokati okuti oku elunga enene oku omphunda ikola Yotyilongo Tyouwa;*+ maikehika kombitukilo yayo, kaikamona ou wiikwatesako.