Wo Tete Wahonekelwa Ova Tesalonika

5 Pahe okuyemba kononthiki no komivo vanthu vetu, otyo onwe kamutyihonekelwa vali. 2 Mokonda onwe mutyii umwe nawa okuti, onthiki ya Siovaa*+ oyoo iya umwe lwotyimphulu tyiya kounthiki.+ 3 Tyina veli umwe nokuti: “Ombembwa, etuliyo!” opo opo umwe ehanyauno malivetokela,+ matyeende umwe lwonongembia mbomukai omulemi, kamavahupu na katutu vala. 4 Mahi onwe, vanthu vetu, kamuli menthiki onthiki oyo imuhupule vali lwotyimphulu tyahupulwa notyitei, 5 mokonda onwe amuho muvana votyitei, muvana votyitenya.+ Onthwe twati vala atwehe-votyinthiki atwehe-venthiki.+

6 Naina, onthwe twahalalei lwovanthu vamwe,+ mahi onthwe tupahukei,+ tukonkhenyei umwe nawa ovipuka.+ 7 Mokonda vokulala, valala kounthiki, no vokukolwa, vakolwa kounthiki.+ 8 Mahi onthwe, onthwe votyitenya, tukonkhenyei umwe nawa ovipuka, tuvalei ondyakulilo monthulo, yeyumba-nthumbi, yonthyole, etyi tyokukevela eyovo atyilingi ekapasete,+ 9 mokonda Huku ketuholovonene tulinge vonyengo, mahi wetuholovonena eyovo+ mu Tatekulu yetu, Sesusi Kilisitu. 10 Ngwe wankhila onthwe,+ opo tyitie tyilinge tupahi tyilinge tulele,* tukakale nae.+ 11 Naina lipamekei* apeho na vakwenyi, litungei,+ ngeetyi mukahi-ale nokulinga.

12 Pahe onthwe vanthu vetu, tumwiita mulinge onthilo ovo vokuundapa unene muna-vo, ava vemululika mu Tatekulu, vemupakaila-mo; 13 velingei umwe onthilo unene tyokuvehole mokonda yovilinga valinga.+ Lingei vombembwa, vokulivila na vakwenyi.+ 14 Mahi ngwe tupu, vanthu vetu, onthwe tumuti londolei* vokuna ombwandya,+ amupopila konkhenda pokupopia naava velinyengwa,* yakei vokwayengenga, pwilei umwe elundo aveho.+ 15 Talei nawa pahamone ou uti okulingwa otyivi nae etyilingi mukwavo,+ mahi onwe apeho taindyilei oviwa vakwenyi, taindyilei oviwa ovanthu aveho.+

16 Hambukwei apeho.+ 17 Likwambelei apeho.+ 18 Ovipuka aviho pandulei.+ Otyo otyo Huku emuhandela onwe va Kilisitu Sesusi. 19 Mwahanyimei otupia twomphepo ikola.+ 20 Omaulo mweheetombei.+ 21 Sukei umwe novipuka aviho;+ kakatelei motyiwa. 22 Liyungei kovipuka aviho ovivi.+

23 Huku yombembwa mwene emukohe musukuke umwe nawa. Momukalelo wenyi vanthu vetu, no mohande yenyi,* no molutu lwenyi, kongokei umwe nawa, mwahakale notyikelei pokweya kwa Tatekulu yetu Sesusi Kilisitu.+ 24 Ou umwiihana, uyumbwa umwe onthumbi, metyilingi umwe.

25 Vanthu vetu, apeho tulingilei omalikwambelo.+

26 Kukunyei vakwetu oko aveho nombesu yasukuka.

27 Ame mu Tatekulu, ndyimuti umwe mbaa omukanda ou vakwetu oko aveho veutangelwe.+

28 Okankhenda okanene ka Tatekulu yetu Sesusi Kilisitu kakale noonwe.