Esitala

8 Ava onohongoi kumwe na vana vahonekwa nonombunga mbavo, twatundile navo ko Mbambilonia, mokweenda kwoutumini Wohamba Alitaselesi:+ 2 komuhoko wa Fineya,+ o Seleso; komuhoko wa Itamale,+ o Ndaniyele; komuhoko wa Ndaviti, o Hatusi; 3 komuhoko wa Sekaniya, no komuhoko wa Pateesi, o Sakaliya, kumwe novalume 150 vahonekelwe; 4 komuhoko wa Paate-Moambe,+ o Eliyonai omona wa Selaiya, kumwe novalume 200; 5 komuhoko wa Satu,+ o Sekaniya omona wa Saasiyele, kumwe novalume 300; 6 komuhoko wa Andimi,+ o Embende omona wa Sonataa, kumwe novalume 50; 7 komuhoko wa Elau,+ o Sesaiya omona wa Ataliya, kumwe novalume 70; 8 komuhoko wa Sefatiya,+ o Sembandiya omona wa Mikaeli, kumwe novalume 80; 9 komuhoko wa Sowambe, o Ombandiya omona wa Seyeli, kumwe novalume 218; 10 komuhoko wa Mbani, o Selomite omona wa Sosifiya, kumwe novalume 160; 11 komuhoko wa Mbembai,+ o Sakaliya omona wa Mbembai, kumwe novalume 28; 12 komuhoko wa Asingande,+ o Soanaa omona wa Hakataa, kumwe novalume 110; 13 omanyina a vana vokwesaililwa kokukondoka momuhoko wa Andonikau,+ oyaa: o Elifelete, o Seyele na Semaiya kumwe novalume 60; 14 komuhoko wa Mbingivai,+ o Utai na Sambunde, kumwe novalume 70.

15 Andyiveongiya popepi nondongi ikwata ko Aava,+ ngapo twonga onthanda mononthiki ononthatu. Mahi etyi naovola povanthu, no povanakwa, anahavasi-po omunthu nawike womuhoko wa Levii. 16 Ngootyo, andyiihana ononkhalamutwe Eliyesele, na Aliyeli, na Semaiya, na Elenataa, na Salimbe, na Elenataa, na Nataa, na Sakaliya, na Mesulau onkhalamutwe ya vakwavo, novalongesi Soyalimbe na Elenataa. 17 Andyivetumu ku Indu, onkhalamutwe yo potyilongo tyitiwa Kasifia. Andyivepopila opo vakaite ku Indu no ku vana elilandula navo, ombunga yovaundapi vo mondywo ya Huku* vekahi mo Kasifia, vetwetele ovanthu mavaundapa mondywo ya Huku. 18 Mokonda okuvoko okuwa kwa Huku yetu kuna onthwe, avetwetela omulume wokwalunguka, womuhoko wa Mali,+ omutekula wa Levii, omona wa Isilayeli, utiwa o Selembiya,+ kumwe nomuhoko wae, na vana elilandula navo, vena 18; 19 na Hasambiya, na Sesaiya womuhoko wa Melali,+ kumwe na vana velilandula navo, novana vavo, vena 20. 20 Pali ovaundapi vo mondywo ya Huku* 220, vana Ndaviti kumwe novatumini vapele otyilinga tyokukwatesako vomuhoko wa Levii motyilinga tyavo, vana vahonekelwe omanyina avo.

21 Pahe andyipopila ovanthu aveho opo tukale ononthiki mbumwe tyahali, konthele kondongi Aava opo tulivondele ku Huku yetu, atumwiti etuhongolele moungendi matulingi novana vetu, nomalumono etu matutyindi. 22 Ngwe tyankhundisa okwiita kohamba omaswalali no vokwenda nononkhambe vetwamene konondyale mbetu tyina twenda, mokonda twapopilile-ale ohamba okuti: “Okuvoko okuwa kwa Huku yetu kukahi na aveho vemwovola,+ mahi umonesa ononkhumbi vana vemuyeka-po.”+ 23 Mokonda yotyo, atukala ononthiki mbumwe tyahali, atwiti ku Huku yetu konthele yotyo, atehelela etyi twemwita.+

24 Pononkhalamutwe mbovanakwa andyiholovona-po 12: Selembiya,+ na Hasambiya na vana velilandula navo, 10. 25 Andyiveelekela opalata, noolu, novityuma — ovipuka ovio viaawa nohamba, novapakeli-mo vayo, novatumini, nova Isilayeli aveho vali-po valingilile oviawa ondywo ya Huku.+ 26 Andyieleka onotalendu* 650 mbopalata, novityuma 100 vyo palata vituuka onotalendu 2, nonotalendu 100 mboolu, andyiveavela-mbo. 27 Tupu andyivepe ovilindo 20 vioolu vituuka onombongo 1000 mbondaliku* novityuma 2 viotyitasu vianthilwa nawa, vialaima otyivala tyikuhuka, ngoolu ongwa unene.

28 Andyivepopila andyiti: “Onwe muvanthu vakola va Siovaa,+ ovityuma ovipuka vikola oolu nopalata, otyiawa mwalingila Siovaa, Huku yovakwaukulu venyi. 29 Yungei nawa ovipuka evi atee muvihikiya monondywo mbokulila mondywo ya Siovaa, amuvieleka, ononkhalamutwe mbovanakwa, no vomuhoko wa Levii, novatumini vomaumbo o Isilayeli mo Selusalei,+ otyo vatala.” 30 Ovanakwa, no vomuhoko wa Levii avatambula opalata, noolu, novityuma vapelwe opo vevitwale ko Selusalei, mondywo ya Huku yetu.

31 Monthiki 12 yohanyi yo tete,+ atutundu kondongi Aava+ atwende no ko Selusalei. Okuvoko kwa Huku yetu kwakalele noonthwe etuyovola pomavoko onondyale mbetu, no kovifwanga mondyila. 32 Atuhiki mo Selusalei+ atukala-mo ononthiki ononthatu. 33 Monthiki ya kwana, atweleka opalata noolu, novityuma vikahi mondywo ya Huku yetu,+ atuviavela Melemote+ omona womunakwa Uliyasi. Vena Eliyasale omona wa Fineya, no vomuhoko wa Levii Sosambande,+ omona wa Sesuwa, na Noandiya omona wa Mbinwi.+ 34 Aviho viavalulwa, avielekwa otyifwe tyatyo atyihonekwa. 35 Vokwatundile koupika, vayovokele koukonde avaave ovilikutila evi ku Huku yo Isilayeli: onondume-tane 12,+ nonongi ononthwei 96,+ nonondyona 77, novinkhombo ovitwei 12,+ opo vilingwe otyiawa tyononkhali; ovipuka ovio aviho avilingilwa Siovaa otyiawa tyayokwa.+

36 Atwavela ovitumino vyo Hamba+ ovakwatesiko vayo,* novatumini vomapunda-umbo otyilongo tya Himba lina Ondongi*+ ngwe avakwatesako ovanthu va Huku avaave etyi tyesukisa mondywo ya Huku yotyotyili.+