Omukanda wo Tete wa Samuwele

14 Nthiki imwe Sonataa+ omona wa Saulu, apopila omukwatesiko wokutyinda ovihongati viae okuti: “Twende atee komphangu yomafwalali o komutwe ova Filisitiya.” Mahi ehetyipopila he. 2 Saulu uli monohika mbo Simbeaa,+ mombwelo yomuti omulomaa wo ko Mingoloo, una ovalume 600.+ 3 (Wokuvala otyikutu tyounakwa+ o Aiya omona wa Aitumbe+ velilandula na Ikambonde,+ Ikambonde omona wa Fineya,+ Fineya omona wa Elii+ wali omunakwa wa Siovaa ko Silo.)+ Ovanthu kavetyii okuti Sonataa wapita. 4 Ponomphangu mbumwe Sonataa ahanda okukwata ehike komphangu yomafwalali o komutwe ova Filisitiya, pena emanya likahi ngeyo nthele imwe, nemanya likahi ngeyo konthele onkhwavo; enyina lya limwe o Mbosesi, enyina liekwavo o Senee. 5 Emanya limwe okulitala uti omphandyi ikahi kombanda, okuviuka ko Mikimasi, emanya ekwavo lili kombwelo, okuviuka ko Semba.+

6 Sonataa apopila wondyakulilo yae okuti: “Omako, twende komphangu yomafwalali o komutwe, yovalume ovo vahapitile ekwendye.+ Hamwe Siovaa metukwatesako, mokonda petupu natyike tyipondola okutyilika Siovaa okuyovola, tyilinge onomafwalali omanyingi, tyilinge onomafwalali ehehi.”+ 7 Wondyakulilo yae emupopila okuti: “Linga etyi wasoka okuti tyikahi nawa. Enda oku wahanda, ame mandyilandula oku omutima wove ukutwala nako.” 8 Sonataa ati: “Twende-ko kovalume oko, opo vetumone. 9 Ine vetupopila okuti: ‘Kalelei oko matuya no oko!’ oko matukala atwahaende no kuvo. 10 Mahi, ine vati: ‘Endywei tulwe!’ matwende, mokonda Siovaa mevepakula pomavoko etu. Oko, oko onthwe matutalela.”+

11 Avayeke ova Filisitiya veli komphangu yo komutwe yomafwalali ova Filisitiya vevemone. Ova Filisitiya avati: “Talei! Ova Hembeleu vakaholamene, pahe veli nokutunda momatoto.”+ 12 Pahe, ovalume vo komutwe, avapopila Sonataa no wondyakulilo yae avati: “Endywei na kuno tumulongese onondunge!”+ Sonataa apopila wondyakulilo yae ati: “Ndandule, mokonda Siovaa mevepakula pomavoko ova Isilayeli.”+ 13 Sonataa akwatesa nonomphai nomavoko alondo, wondyakulilo yae emulandula; Sonataa ahimbika okulwisa ova Filisitiya evetokesa, wondyakulilo yae otyo eveipaa monyima. 14 Sonataa no wondyakulilo yae pokwevelwisa lyo tete, avaipaa ovalume 20 motyikambo tyo onkhu ike.*

15 Ovanthu aveho monthanda yavo avatili owoma, na ava veli komphangu yo komutwe womafwalali ova Filisitiya; atee umwe otyikundyi tyomafwalali okulwa nao aateketa.+ Ohi aihimbika okuteketa, ovanthu avatili unene owoma Huku. 16 Ovayungi va Saulu vo ko Simbeaa+ ko Mbesamii avamono okuti ovanthu konomphangu ambuho vekahi nokuhangayala.+

17 Saulu apopila ava ena-vo ati: “Mbambavo valulei, talei olie wakamba-po.” Etyi vavalula, vakati ñgaa na Sonataa no wondyakulilo yae kave-po. 18 Pahe Saulu apopila Aiya ati:+ “Eta kuno Otyikasa tya Huku yotyotyili!” (Mokonda pononthiki opo* Otyikasa tya Huku yotyotyili tyina ova Isilayeli.) 19 Tyina oku Saulu eli nokupopia nomunakwa, oku ovanthu monthanda yova Filisitiya vankhindula otyimbulukutu. Saulu apopila omunakwa okuti: “Yeka vala, wehetyilinge vali.”* 20 Atyiti na Saulu novanthu aveho ena-vo veliongiya, avaende no kovilwa. Tyina vehika oko, avavasi ova Filisitiya velipilukila-mo velilwisa nomitunga, vankhindula otyimbulukutu tyimwe otyinene. 21 Tupu ova Hembeleu vokwekeliwaneka nova Filisitiya, vaile konthanda yavo, avakondoka kova Isilayeli vena Saulu na Sonataa. 22 Etyi ovanthu aveho vo Isilayeli vokwaholama+ motyilongo tyo nomphunda tyoko Efalaii vetyiiva okuti ova Filisitiya vaya-nkholo, navo avelipake movilwa, avevetaata. 23 Ngootyo, Siovaa ayovola ova Isilayeli monthiki oyo,+ ovilwa aviende atee ko Mbete-Ave.+

24 Mahi monthiki oyo, ovanthu vo Isilayeli vaponwa mokonda Saulu wevepopilile valinge omphango yokuti: “Nawike upondola okulia natyike* tyina nkhele kuhenenthikovele na tyina nkhele nehenelwise onondyale mbange!” Ovanthu avahali umwe.+

25 Ovanthu aveho avanyingila* motyiteta, avavasi-mo owiki pohi. 26 Etyi ovanthu vanyingila motyiteta, avavasi owiki ukahi nokumoma, mahi nawike walile mokonda vatila owoma omphango valingile. 27 Mahi, Sonataa ketyiivile etyi tate yae alingisa ovanthu omphango oyo,+ apolo otyimuti tyae ena-tyo pomavoko etyitomo mehila liowiki. Etyi atyepa-ko akala vali nononkhono.* 28 Umwe pomaswalali emupopila okuti: “Tate yove wetulingisa omphango yalema unene, wati: ‘Nawike hono upondola okulia natyike!’+ Otyo ovanthu vaponenwa unene ñgaa.” 29 Mahi Sonataa ati: “Tate waeta otyitateka otyinene motyilongo. Talei ononkhono nakala nambo* etyi namakela vala katutu kowiki. 30 Ine ovanthu hono valile etyi vapola konondyale mbavo,+ ñgeno hahe! Ñgeno ova Filisitiya vankhia vali ovanyingi.”

31 Onthiki oyo avatwalako okwipaa ova Filisitiya, okutuka ko Mikimasi atee ko Aisaloo,+ ovalume avaponwa unene. 32 Avaende atee povipuka viavo; avapolo-po onongi, nonongombe nononthane, avembwipaa avali ohitu nohonde yatyo.+ 33 Saulu avemupopila-tyo avati: “Ovanthu vekahi nokulinga onkhali ku Siovaa, okulia ohitu nohonde yatyo!”+ Saulu ati: “Kamwakalele ovakwatyili. Kanyaukei! Kulungutisei emanya enene atee pano.” 34 Tupu ati: “Liyandyanei movanthu, amuvepopila okuti: ‘Munthu na munthu aete ongombe yae nongi yae, eiipaela pano ngapo eilila. Mwahalingei onkhali ku Siovaa okulia ohitu nohonde yatyo.’”+ Munthu na munthu aeta ongombe yae motyinthiki otyo eiipaa. 35 Saulu atungila Siovaa omutala.+ Oo, omutala wo tete atungilile Siovaa.

36 Konyima Saulu evepopila okuti: “Twendei tukalwise ova Filisitiya otyinthiki atyiho otyo tuvepola tyavo atee kutya. Kamatuhupisa nawike.” Ngwe avati: “Linga etyi tyaviuka komaiho ove.” Omunakwa ati: “Tupulei ku Huku yotyotyili pomphangu ino.”+ 37 Saulu apulu ku Huku okuti: “Ndyipondola okulwisa ova Filisitiya?+ Okuti movepakula pomavoko ova Isilayeli?” Mahi, monthiki oyo Huku ehemukumbulula. 38 Saulu ati: “Endywei kuno, onwe amuho nonkhalamutwe, ovolei onkhali patyi twalinga hono. 39 Na Siovaa umwe una omwenyo una wayovola ova Isilayeli, wokwalinga onkhali, atee umwe omona wange Sonataa, una okunkhia.” Mahi nawike wemupopilile natyike. 40 Pahe ngwe apopila ova Isilayeli okuti: “Onwe mamukala nthele imwe, onthwe na Sonataa omona wange matukala konthele onkhwavo.” Ovanthu avapopila Saulu okuti: “Linga etyi tyaviuka komaiho ove.”

41 Saulu apopila Siovaa okuti: “Huku yova Isilayeli kumbulula-vo menyina lyo Tumii!”+ Sonataa na Saulu ngavo vakoywa-po, mahi ovanthu avaende. 42 Pahe Saulu ati: “Yumbei owela*+ mutale pwoonthwe, naame nomona wange Sonataa.” Atyimoneka okuti o Sonataa walinga onkhali. 43 Saulu apopila Sonataa okuti: “Mphopile oityi walinga?” Sonataa ati: “Ame namakela vala katutu owiki kondungu yotyimuti tyange.+ Ndyikahi pano ndyipondola okunkhia!”

44 Saulu ati: “Huku amonese ononkhumbi, etyindinge umwe noonya, ine ove kwankhile Sonataa.”+ 45 Mahi ovanthu avapopila Saulu okuti: “Okuti Sonataa wakwatesileko ova Isilayeli okutilisa onondyale,*+ upondola okwipawa? Nii kapondola okwipawa! Na Siovaa umwe una omwenyo, nii umwe vala oluhuki lwike kamalutokela pohi, mokonda wakwateswako na Huku hono.”+ Ngootyo ovanthu avahupisa* Sonataa ahaipawa.

46 Pahe Saulu ayeke-po okulwisa ova Filisitiya, ova Filisitiya avakondoka kotyilongo tyavo.

47 Saulu apameka outumini wae ko Isilayeli, alwisa onondyale mbae ambuho mbeliseta nae, ova Moambe,+ nova Amoo,+ nova Endoo,+ no nohamba mboko Sombaa+ nova Filisitiya.+ Oku amai onondyale avasako umbulwisa ambutiliko. 48 Alu nokwakola omutima, atilisa ova Amaleke,+ ayovola ova Isilayeli pomavoko onondyale mbavo.

49 Ovana va Saulu tyati o Sonataa, o Isivi, na Malikisuwa.+ Wali novana vevali ovakainthu; omukulu watyo utiwa o Melambe,+ omututu watyo o Mikale.+ 50 Omukai wa Saulu utiwa Ainowa, omona wa Aimaasi. Onkhalamutwe yomafwalali ae utiwa o Ambinele,+ omona wa Nele, una ulandula ku tate ya Saulu. 51 Kisi+ o he ya Saulu, Nele+ he ya Ambinele, omona wa Ambiyeli.

52 Kononthiki ambuho mba Saulu+ kwali ovilwa vimwe ovinene nova Filisitiya. Tyina Saulu amamono omulume umwe wapama, wakola omutima umupaka pomaswalali ae.+