Wo Tete ku Timotiu

4 Ngwe mwene, ondaka yafiminwa* yapopia umwe etyi tyapotoyoka yati, komutwe oku tuhungi vamwe mavakatunda metavelo, avayembe konondaka mbafiminwa* mbuyondya,+ no kondongeso yovilulu, 2 avatyindwa nomaandambeyo ovalume vokukemba,+ vomitima vialinga ngatyina uti viapakwa elia* notyivela tyatokota. 3 Ngwe vailika ovanthu opo vahanepe,+ vevetuma veliyunge kovikulia+ Huku aetako+ viliwe nolupandu lwa ava vayumba-ko onthumbi,+ ava vanoñgonoka umwe nawa otyili. 4 Mokonda ovipuka aviho Huku atunga vikahi nawa,+ kavisukisa okuviaanya+ ine viatambulwa nolupandu, 5 vina viakohwa nondaka ya Huku, nelikwambelo vialingilwa.

6 Tyina ulondola ovataveli vakwenyi, ove molingi omuundapi wa Kilisitu Sesusi ukahi nawa, welitekula nawa nonondaka mbonthumbi, wanwa ondongeso ongwa ei uli nokulandulila popepi.+ 7 Mahi anya onoñgano mbounkhembi,+ ngo ombu mbokutompholwa novakulukai. Tupu otyo oku ulilongesa ulipakule umwe, tyokufenda Huku tyilinge tyove. 8 Okunana-nana monongolo,* oviwa tyeeta kavihi, mahi okulipaka mokufenda Huku tyipa omunthu oviwa movipuka aviho, mwati umwe omo muna omwenyo pahetyino, omo muna omwenyo ukeya.+ 9 Ondaka oyo yata mokuyumbwa onthumbi, ihiwa umwe okutavelwa. 10 Otyo otyo onthwe tututumbila umwe, tulikwatehila umwe+ mokonda tukevelako tupu o mu Huku twapamena, Huku womwenyo, Omuyovoli+ wovanthu vatyo aveho,+ haunene ava vakakatela umwe mwe.

11 Wahayekeko okuvepa ovitumino ovio, otyo uvelongesa. 12 Wahayeke nawike atombe eti liove tyeetyi umututu. Mahi vonthyole yotyili vatalele kwoove, evi upopia, evi ulinga, onthyole yove, eyumba-nthumbi liove, no mounthate wo monondunge.* 13 Wahayekeko lipaka umwe mo tyokutangela povaunyingi,+ nokulondola,* nokulongesa, atee ame ndyiya. 14 Wahalinge omusenyo otyali tyili mwoove, otyali wapelwa meulo pweetyi otyikundyi tyovakulu tyekuyambeka omavoko.+ 15 Tungulula* umwe nawa kovipuka ovio; lipaka-mo umwe muvio, tyimoneke umwe kovanthu aveho okuti uli nokukula. 16 Uti okala olitale, otale oñgeni uli nokulongesa.+ Movipuka ovio wahatunde-mo, okutyilinga otyo, matyiti umwe noove mwene moyovoka, naava vekutehelela mavayovoka.+