Ovilinga Viovatumwa

13 Vomewaneno lyo ko Andiokiya,+ ankho pati novauli novalongesi: ovo Mbalanambee, na Simiyau ou ankho vati o Nisele, na Lusiu wo ko Silene, na Manaee walongesilwe na Helonde omutumini wotyilongo, na Saulu. 2 Hono pokuli opo nokulinga ovilinga vya* Siovaa,* otyo vahali, omphepo ikola aiveti: “Mpholelei-po Mbalanambee na Saulu,+ valinge otyilinga neveihanena.”+ 3 Etyi pahe tyapwa otyo tyokwahali no otyo tyokulikwambela, aveveyambeka omavoko, avevetumu vaye.

4 Ovalume ovo ankho vatumwa nomphepo ikola, avalauka no ko Seleusia, avatundu-ko oko avakaya no ko Sipele. 5 Etyi vehika mo Salamina, avahimbika okupopia ondaka ya Huku, ankho vapopila monondywo mbokufendela mbova Sundaa. Ankho pati na Swau uvekwatesako.+

6 Avaende okalongo akeho kakala pokati kelunga avekehika ko Pafu, oko avavasi-ko omulume umwe omu Sundaa ankho utiwa o Mbala-Sesusi watambula, otyo tupu omuuli womatutu. 7 Omulume oo ankho vena omutumini Selesiu Paulu, omulume umwe ankho omunongo. Aihana ovo Mbalanambee na Saulu, mokonda ankho wesuka nokutehela ondaka ya Huku. 8 Ou Elima wetambu (enyina liae okulipitiya otyo lipopia ngootyo) ahimbika okuvelwisa, ankho wahanda atyike-po omutumini ehetavele. 9 Saulu ou vati o Paulu eyulwa nomphepo ikola, emutale okapanena, 10 ati: “Mulume, ove momutwe wove mweyula vala omatutu, mweyula umwe ovivi viatyo aviho, mona w’Eliapu,+ undyale yovipuka aviho viaviuka, otyo mokalaila vala etyi tyokupengesa onondyila mbaviuka mba Siovaa?* 11 Tala! Okuvoko kwa Siovaa* kuli kombanda yove, molingi omumphoki, mokala ononthiki tyahamono otyitei tyekumbi.” Kuna akuti umwe puki akala vala menthiki, ahimbika okuhihita aovola ou memukwate mokuvoko. 12 Omutumini etyi etyimona, etavela, ngwe ondongeso ya Siovaa* ankho yemuhuvisa.

13 Ou Paulu naava aenda navo, avalondo mowato, ko Pafu avatundu-ko, avaende no ko Pelenga mo Pafilia. Mahi Swau+ evesi-po akondoka ko Selusalei.+ 14 Ngwe pahe ko Pelenga avatundu-ko, avaende no ko Andiokiya mo Pisindia. Hikee, avanyingila mondywo yokufendela+ monthiki Yotyasapalo, avapumphama. 15 Etyi patangwa Ovitumino,+ apatangwa Ovauli, ovakulu vo mondywo yokufendela pahe aveveyumbu, avati: “Vanthu vetu, ine muna ondaka ipameka ovanthu, ipopiei.” 16 Paulu akatuka, ayele okuvoko, apopi ati:

“Onwe va Isilayeli noonwe amuho mutila Huku, tehelei kuno. 17 Huku yovanthu ava ova Isilayeli, oe waholovonene onombwale mbetu; evelingi ovanthu vamwe vankhimana pweetyi veli kotyilongo tyehe-tyavo ko Isitu, oko evepolo-ko nokuvoko kutai.+ 18 Momanima 40, aliatela-ko vala kovivi valinga moluhandya omu vali.+ 19 Etyi ahanya-ko vomihoko epandu-vali votyilongo tyo Kanaa, otyilongo otyo pahe evetetaila-tyo tyilinge tyavo.+ 20 Otyo atyiho tyaendele ngootyo momanima 450.

“Pahe evepe ovakoyi vonomphela, ngavo vakala navo atee pomuuli Samuwele.+ 21 Ngwe pahe avaiti vapewe ohamba,+ Huku evepe Saulu omona wa Kisi, omulume umwe womuhoko wa Mbesamii,+ avakala nae omanima 40. 22 Etyi emupola-ko, evevialekela Ndaviti alingi ohamba,+ ou Huku apopile ati: ‘Navasa Ndaviti omona wa Sesee,+ omunthu uhambukiswa omutima wange;+ malingi ovipuka aviho ame nahanda.’ 23 Mwene ngeetyi Huku apopile umwe, o mombuto yomulume oo, apolela Isilayeli omuyovoli, Sesusi.+ 24 Pweetyi omuyovoli oo ehenehike, Swau wapopile movanthu aveho ova Isilayeli ombatisimu, otyimo tyokwelivela.+ 25 Mahi Swau etyi pahe ondyila yae ihungi kokupwa, ankho uti: ‘Onwe mwati hamwe ame ame-lie? Ame hame-ko oo. Tala! Oyoo uya, ou ame nehehiwa-le okukutulula ononkhaku mbae konomphai.’+

26 “Vakwe, vanthu vetu, onwe vokwatuka mombunga ya Ambalayau, noonwe amuho mutila Huku, ondaka ei yeyovo yatumwa kwoonthwe.+ 27 Mokonda ovanthu vomo Selusalei, novatumini vavo oo kavemunoñgonokele, mahi etyi vakoya omphela yae, valinga etyi tyapopile Ovauli,+ etyi tyitangelwa umwe peulu Movityasapalo aviho. 28 Soka ankho kavavahile umwe etyi tyimwiipaesa,+ mahi avatumu Pilatu emwipae.+ 29 Etyi valinga-linga aviho apopaiwa movihonekwa, pahe momuti* avemupolo-mo avekemupaka melangalo.+ 30 Mahi Huku wemupindula-po kovokwankhia,+ 31 akala umwe ononthiki ononyingi, tyeetuwe novanthu, amoneka ku ava aendelele kumwe navo etyi vatunda ko Ngalileya, ankho vainduka no ko Selusalei. Ovo yatyo ovo onombangi mbae pahe vetyipopia umwe movanthu.+

32 “Onthwe tuli nokumupopila oviwa ovipe evi viapopililwe onombwale mbetu. 33 Huku wetulingila-vio umwe aviho, onthwe vana vavo, mokwatutilisa Sesusi;+ walinga umwe etyi tyahonekwa momukanda wa vali Woviimbo: ‘Ove umona wange; hono ame nalinga ho.’+ 34 Ngwe tyili, wemututilisa kovokwankhia atunde-ko, ahakondoka umwe vali kokuvola. Ngwe mwene wetyipopia wati: ‘Ame mandyikupe onondaka mbolwembia olunene ngeetyi natolelele Ndaviti, mbuyumbwa onthumbi.’+ 35 Tupu momukanda omukwavo woviimbo mwatiwa: ‘Ove kumayeke omunthu wove ukakatela kotyili ekehike kokuvola.’+ 36 Mahi ngwe Ndaviti pononthiki mbae, walingile umwe ovilinga vya Huku,* etyi ankhia akalangala konombwale mbavo, ehiki kokuvola.+ 37 Mahi pahe ou Huku apindula-po, oo kehikile-ale kokuvola.+

38 “Noonwe tyinoñgonokei vakulu vange, muli tupu nokutyipopilwa etyi tyokweevelwa ononkhali, oyoo yatyo,+ 39 omunthu oo onwe mwahavelelwa vali onombei movipuka aviho ankho ñgeno muvelelwa onombei Novitumino vya Mwisesi,+ pahe ou utavela kavelwa vali onombei ondyambi oe.+ 40 Mahi onwe lungukei, tyatolele Ovauli tyahalinge onwe: 41 ‘Tala vala, onwe vomukwele, huvei umwe amwoombo-ko, mokonda ndyili nokulinga otyilinga tyimwe pononthiki mbenyi, otyilinga onwe mwahametavela-le ngamutyitolelwa umwe nawa.’”+

42 Tyina pahe vaya, ovanthu aveveti mbaa haa endywei vali mupopie ovipuka ovio Motyasapalo etyi tyiya. 43 Etyi pahe ovaunyingi ankho veli mondywo yokufendela vapita-pita, atyiti nova Sundaa vamwe ovanyingi no vokwetavela pahe vafenda Huku, avalandula ovo Paulu na Mbalanambee, ngwe otyo vevepopila, aveveti mwahatundei-vo mbaa mokankhenda okanene ka Huku.+

44 Tyina tyiti Motyasapalo otyikwavo, ovanthu aveho mepunda-umbo avakongoloka-mo aveya okutehela ondaka ya Siovaa.* 45 Ova Sundaa etyi vamona onthumbo yovanthu veya, avevelu onkhi avahimbika okupopia nomutomba ovipuka Paulu eli nokupopia.+ 46 Pahe ovo Paulu na Mbalanambee avevepopila umwe, avahatili owoma avati: “Onwe onwe umwe ankho ondaka ya Huku ina okupopilwa tete.+ Mahi etyi pahe muli nokuyaanya, ine mwene mwati kamuhiwa omwenyo wahapu, tala! onthwe pahe matukondoka kovanthu vovilongo.+ 47 Siovaa* wetutuma wati: ‘Ame nemunaka mulinge otyimimi tyovanthu vovilongo, mulinge eyovo liovanthu atee oku kwakaoyela ohi.’”+

48 Ava ovanthu vovilongo etyi vetyiiva otyo, avahambukwa avahilivika ondaka ya Siovaa,* aveho ankho vesuka umwe natyo vehiwa omwenyo wahapu avetavela. 49 Ngwe ondaka ya Siovaa* ankho yahahana motyilongo atyiho. 50 Mahi ova Sundaa avahindila ovakai vokwankhimana ankho vatila Huku, novanene vatyo vo mepunda-umbo, avankhindula umwe olwau,+ ovo Paulu na Mbalanambee avataatwa umwe motyilongo. 51 Ngwe avelilaumuna ombuma konomphai vetyimone okuti mwene ombei ili kuvo, pahe avaende no ko Ikoniu.+ 52 Ovalongwa otyo vena vala ehambu limwe enene,+ veyulwa nomphepo ikola.