Tala Koviwa Vakuenyi Valinga

Okulipaka-ko, tyikalesa nokapungulula. Omunthu wokulipaka-ko, ulihole unene, ulitala ngatyina omunene vali kovanthu aveho. Atuho tupondola okuhimbika okusoka ngotyo. Omukanda umwe utiwa Encyclopædia Britanica wati: “Tyina ovanthu ovanyingi vatala ovikulia viavo, nomivalo viavo, noviso viavo, novipuka valongeswa, nonontheto mbavo, novipuka ovikuavo vali valinga, vasoka okuti vikahi vali nawa ko viomihoko omikuavo.” Oñgeni onthue tupondola okulityilika olusoko olo luahaviukile?

“Nomutima weliola, talei vakuenyi ngatyina ovanene vali ku onwe.” — OVA FILIPU 2:3.

Otyo tyitulongesa-tyi? Opo tuhelipake-ko, tuna okuliola omutima. Okuliola omutima tyitukuatesako okunoñgonoka okuti, kuna ovipuka vakuetu vevila okulinga, onthue tuehevili okulinga. Kutupu ovanthu vomuhoko nawike vena vala ovituwa oviwa.

Tala ongeleka ya umwe utiwa o Stefan. Stefan wetyivila okulipola omalusoko okulinga okapungulula ovanthu vomihoko omikuavo. Wati: “Ine uhanda okulipola okapungulula, otyiwa okutala vakuenyi ngatyina ovanene vali ku ove. Pena ovipuka ovinyingi nehevili. Kovanthu aveho tupondola okulilongesila-ko otyipuka tyimwe otyiwa.”

Ovola okunoñgonoka nawa evi uvila okulinga ne evi wehevili, ne evi uhole okupengesa. Noñgonoka okuti kuna evi vakuenyi vevila okulinga ove wehevili. Ine umona omunthu womuhoko umwe ulinga otyipuka tyimwe tyapenga, uhasoke okuti ovanthu aveho vomuhoko oo otyo valinga.

Ine umona omunthu womuhoko umwe ulinga otyipuka tyimwe wahahande, wehemupole-po vala omapita, nkhele lipula okuti:

• ‘Ovipuka evi omunthu alinga ame nahahande, okuti ovivi umwe, ine omokonda vala tuelikalela?’

• ‘Okuti na ame ndyitupu evi ndyilinga ngwe ahahande?’

• ‘Ovipuka patyi omunthu ou evila vali nawa tyipona ame?’

Kumbulula omapulo oo, mahi popia umwe otyili. Ine upopia otyili, kumayeke-po vala okukala nokapungulula, mahi tupu momono ovipuka oviwa omunthu oo alinga.