Enima lio 1914 Liakolela Unene Momaulo Ombimbiliya

PUETYI ankho kuakamba omakwi omanima pala enima lio 1914, vana ankho vokulilongesa Ombimbiliya, ankho vapopila vakuavo okuti menima olio, makukaenda ovipuka vihuvisa unene. Ovipuka patyi ankho mavikaendako? Oityi tyilekesa okuti 1914 ankho enima liakolela unene?

Mu Lucas 21:24 Jesus wati: “Jelusalei maikaliatwa novanthu vovilongo, alo ‘omuvo wovanthu vomouye’ ufuisuapo.” O Jelusalei ankho ombala yelongo lio va Judeu. Ankho omo mukala otyipundi tyoutumini wo nohamba mbombuto Yohamba David. (Salmo 48:1,2) Onohamba ombo, ankho mbelikalela unene novatumini vomouye. Mokonda onohamba ombo, ankho mbukahi polukalo lwa Huku. Ankho mbupumphama ‘kotyipundi tyoutumini wa Jeova’. (1 Crônicas 29:23) O Jelusalei ankho otyilekeso tyoutumini wa Jeova.

Onalupi outumini wa Huku wahimbika ‘okuliatwa novanthu vovilongo’? Wahimbika mo 607 P.K.E.. Oñgeni waliatua? Waliatua puetyi o Jelusalei yahanyaunuapo no Vambambilonia. Tunde opo, nawike vali ankho upumphama ‘kotyipundi tyoutumini wa Jeova. Onohamba ankho mbokuatuka ku David, mbapolwa koutumini. (2 Reis 25:1-26) Okuti o Jelusalei ankho maitualako okuliatwa apeho novanthu ovo? Au. Ezekiele waula konthele ya Zedekia ohamba yahulililako yo Jelusalei okuti: ‘Polamo ombuya younene nekolowa. . . . Kamalikala liomunthu nawike, alo una watokala okulipewa eya, iya ngae ndyiliavela’. (Ezequiel 21:26, 27) Una ‘watokala’ okupewa ekolowa lia David o Kristu Jesus. (Lucas 1:32, 33) Ngotyo, ‘okuliatwa’ kuo Jelusalei ankho makupu tyina Jesus amakala Ohamba.

Ankho onalupi Jesus makalinga Ohamba? Jesus walekesa okuti outumini Wovanthu ovo vomouye, ankho maukapwa. Onondaka mbuvasiwa mu Daniel kapitulu 4, mbutukuatesako okunoñgonoka onalupi omuvo oo ankho maupu. Kapopia konthele yondyoi yo Hamba yo Mbambilonia Nambukondonosole. Ohamba oyo, yamona omuti umue omunene watetuapo. Iya otyihingi tyatyo ankho katyipondola okuyova mokonda tyakutwa no maualuku ovivela. Iya oandyu imue aiti: ‘Omivo epanduvali vimulambe’.—Daniel 4:10-16

Mombimbiliya pamue omiti vilekesa outumini. (Ezequiel 17:22-24; 31:2-5) Ngotyo, okutetwapo kuomuti mondyoi ya Nambukondonosole, tyilekesa okuti outumini wa Huku ankho utuminwa na vana vakalelapo Jeova mo Jelusalei, mautetuako. Mahi, ondyoi oyo yalekesa okuti ‘okuliatwa kuo Jelusalei’ kamakukala ehimbwe, makukala vala ‘omivo epanduvali.’ Iya omivo viatyo ovio, ankho omanima eñgapi?

Omukanda wa Revelação [Apocalipse] 12:6, 14 ulekesa okuti omivo vitatu nomeya, ononthiki 1.260. Ngotyo, ‘omivo epanduvali’ tupaka kumue o 1.260 + 1.260 tyituuka ononthiki 2.520. Mahi, Ovanthu vomouye kavamanene ‘okuliata’ outumini wa Huku mononthiki 2.520 konyima yehanyauno lio Jelusalei. Otyo, tyilekesa okuti eulo olio ankho lipopia omuvo omunyingi vali. Omukanda wa Números 14:34 no wa Ezequiel 4:6, vipopia okuti kese ‘nthiki enima,’ otyo tyitukuatesako okunoñgonoka okuti ‘omivo epanduvali’, omanima 2.520.

Omanima 2.520 ahimbika mohanyi ya Kulindi yo 607 P.K.E., puetyi o Jelusalei yahanyaunuapo no Vambambilonia. Tunde opo onohamba mbombuto ya David mbapolwa koutumini. Iya omuvo oo, wapua vala mohanyi ya Kulindi yenima 1914. Menima olio, otyo ‘omuvo Wovanthu vomouye’ wapua, iya Jesus Kristu avialekwa Kouhamba wa Huku keulu.a—Salmo 2:1-6; Daniel 7:13, 14.

Ngetyi Jesus etyipopile, ‘okuya’ kuae ankho makuimbukilwa kovitateka ovinene. Ovita, nondyala, novinimawe, nomauvela omanene. (Mateus 24:3-8; Lucas 21:11) Ovipuka viatyo ovio, viava oumbangi omunene wokuti menima lio 1914, opo tyili Ouhamba wa Huku keulu wahimbika okutumina. Tupu, menima olio otyo tyahimbika ‘ononthiki mbahulako’ mbouye uno.—2 Timóteo 3:1-5.