Omilao Viouhamba wa Huku Ovipuka Aviho Mavilingwa Ovipe

SOKA ñgeno wanyanga epelu limwe enene liapia nawa. Tyina nkhele uhenelipake mokambwe kekahiale nokuyula, ofimbulako. Ukahiale nokuundapa onoola ononyingi, mahi kuempuilile, nkhele wafuapo pala okuundapapo vali katutu. Me yove ukahi pomuti omukuavo, uundapa nehambu otyo atomphola nonondenge mbove, nomapanga vekahi nokumukuatesako okunyanga omapelu. Me yove omuhikuena vala, mahi uhinangela etyi ankho nkhele umututu. Pahe, tyikupuiya okutavela okuti oe umwe wamuene ankho wakulupa mouye wokuapua. Una ankho wavela unene, ankhila pomaoko ove, iya walilile unene putyina apakwa. Mahi pahe umuluete, uli opo novanthu ovakuavo, una omuenyo iya ukahi nawa!

Tyotyili, tuna onthumbi yokuti otyo matyikamoneka mokonda omilao via Huku apeho vifuisuapo. Monthele ei matulilongesa oñgeni omilao vimwe Viouhamba mavikafuisuapo apa katutu, tyina nkhele ovilwa vio Armagedom vieheneye. Tupu matupitulula omilao vimwe Viouhamba vihambukiswa mavikafuisuapo konyima yo Armagedom. Matukahambukwa unene tyina Ouhamba wa Huku wamahimbika okutumina ohi aiho, iya ovipuka aviho avilingwa ovipe!