Nokankhenda Wahakula Omunthu Una Otyilundu

Putyina Sesusi novalongwa vae vekuana vaivisila “monondyuo mbokufendela mo Ngalileya aiho,” onondaka onongwa konthele yomahuviso Sesusi ankho ekahi nokulinga ambutualako okuliyandyana. (Maluku 1:39) Onondaka ombo, ambuhiki kepunda-umbo ankho mukala omulume una otyilundu. Luka wapopia okuti ankho omulume oo ‘weyula otyilundu.’ (Luka 5:12) Ouvela oo tyina wamakala ehimbwe, katutu-katutu unyona ononthele ononyingi mbolutu.

Ngotyo, omulume oo wotyilundu ankho ukahi omapita unene iya ankho una okukala kokule novanthu. Tupu, ankho una okupopila peulu okuti “Nasila, nasila!” tyina ovanthu ankho veli popepi, opo ehevetambulise. (Levítico 13:45, 46) Mahi oityi omulume oo pahe alinga? Weya pu Sesusi, anyongamena pohi, aiti okuti: “Tatekulu, inkha uhanda upondola okunthyakula.” — Mateusi 8:2.

Omulume oo ankho una ekolelo enene mu Sesusi! Ouvela wae ankho wemukalesa unene omapita! Sesusi malingi ñgeni? Oityi ove ñgeno walinga inkha wali-po? Mokonda yokankhenda, Sesusi atandaveka okuvoko, akuate omulume oo. Sesusi emupopila okuti: “Ame nahanda! Veluka.” (Mateusi 8:3) Ku vamwe tyipuiya okutyitavela, mahi liwa-liwa omulume oo, otyilundu atyimutundu.

Kuhambukwa okukala nohamba una okankhenda nepondolo nga Sesusi? Onkhalelo Sesusi avelula omulume una, itukalesa nonthumbi yokuti tyina Sesusi amakala Ohamba yohi aiho, makafuisapo eulo Liombimbiliya liati: “Makalingila okankhenda una uhena tyae, nomuhepi, nokukayovola omienyo viovahepi.” (Salmo 72:13) Tyotyili, Sesusi makafuisapo ehando liomutima wae liokukuatesako aveho vamona ononkhumbi.

Hinangela okuti no pu etyi nkhele ehenevelule omulume una wotyilundu, ovilinga vya Sesusi ankho vikahi nokuetela ovanthu ehambu enene. Pahe ovanthu ankho maveivi ehuviso olio Sesusi alinga. Mahi Sesusi ankho kahande ovanthu vakale nekolelo mwe mokonda vala yetyi veiva ku vakuavo. Sesusi ankho wii eulo liati: “Nawike mekeiva ondaka yae momatapalo,” opo elinkhimaneke. (Isaías 42:1, 2) Moluotyo, Sesusi apopila omulume oo okuti: “Uhetyipopile nawike, mahi enda kelilekese komunakwa oave otyilikutila Moisesi apopile, opo ovanakwa vetyimone okuti waveluka.” — Mateusi 8:4.

Mahi, omulume oo nehambu enene mokonda waveluka, ketyivilile okukala tyihapopi konthele yetyi tyemumonekela. Aende, akapopila ovanthu aveho otyipuka otyo. Iya otyo atyikalesa ovanthu nesuko enene, nolumbwe. Atyiliyandyana unene, iya Sesusi ankho kapondola vali okunyingila mepunda-umbo otyo ovanthu vemuete, moluotyo akala ponomphangu ankho pahakala ovanthu. No ngotyo, ovanthu ankho veya kwe opo valongeswe nokuvelulwa nae.