Sesusi Ulekesa Okuti Ova Faliseu Vapengesa

Ovahoneki vovitumino nova Faliseu vokuaanya okuti Sesusi utaata ovilulu kononkhono mba Huku, ankho vekahi nokupopia omapita ononkhono mba Huku. Ngotyo, okuti mavahulu ku Siovaa ine mavahulu ku Satanasi? Sesusi wati: “Inkha onwe mutuika omuti omuwa mawaave ovinyango oviwa, inkha mutuika omuti uhekahi nawa mawaave ovinyango vihekahi nawa, mokonda omuti utalelwa kovinyango viao.” — Mateusi 12:33.

Okusoka okuti otyilinga Sesusi alinga tyokutaata ovilulu, otyinyango tyatunda ku Satanasi, ouwova. Ngetyi Sesusi apopile Melongomona liae Komphunda, inkha otyinyango tyikahi nawa, nomuti watyo ukahi nawa, kawavolele. Ngotyo, etyi ova Faliseu vapopia omatutu konthele ya Sesusi, valekesa ovinyango patyi? Valekesa viomuti wavola. Sesusi wevepopia okuti: “Vana vonombuta, oñgeni mamupopi ovipuka oviwa, tyina onwe munondingavivi? Mokonda omunthu upopia etyi tyeyula momutima.” — Mateusi 7:16, 17; 12:34.

Onondaka tupopia mbulekesa etyi tyikahi momutima wetu iya mbulekesa oñgeni tuna okukoyeswa. Moluotyo, Sesusi ati: “Ame ndyimupopila okuti Monthiki Yekoyeso ovanthu mavakapulwa ovipuka vihasilivila vapopia. Mokonda inkha onondaka mbove onongwa motavelwa okuti umuviuki, inkha onondaka mbove onombi mokala ondingavivi.” — Mateusi 12:36, 37.

Namphila Sesusi ankho ekahi nokulinga omahuviso, ovahoneki vovitumino nova Faliseu vemuita vali okuti: “Mulongesi tuhanda okutala enyingilikilo lilekesa okuti ove watumwa na Huku.” Tyilinge vamuene omahuviso Sesusi alingile, tyilinge kaveemuene, mahi kuna ovanthu ovanyingi vamuene ovipuka alingile. Ngotyo, Sesusi apopila ononkhalamutwe mbova Sundeu okuti: “Ovanthu vomuvo uno, onondingavivi, vokulinga oumbalehi, vaovola okumona enyingilikilo, mahi kamavapewa vali nalike, mavapewa vala liomuuli Sona.” —Mateusi 12:38, 39.

Sesusi evepopila nawa etyi onondaka ombo mbuhangununa, ati: “Ngetyi Sona akalele meimo liombisi ovitenya vitatu novinthiki vitatu, Omona womulume nae makakala melangalo ovitenya vitatu novinthiki vitatu.” Sona wanyininue-po nombisi onene, mahi konyima aimuhandye-mo, akala ngatyina atutiliswa. Ngotyo, Sesusi ankho ukahi nokupopia okuti maipawa, atutiliswa monthiki ya tatu. Konyima, etyi atutiliswa, ononkhalamutwe mbova Sundeu avaanye “enyingilikilo lya Sona,” avehelivele, nii avahalingi omapiluluko. (Mateusi 27:63-66; 28:12-15) Tyelikalela navo, etyi Sona aivisa ekoyeso lya Huku “kovanthu vomo Ninive,” velivelele. Ngotyo, otyituwa otyo tyova Ninive tyilekesa okuti ovanthu Sesusi apopia, vavelwa onombei. Sesusi tupu apopi ongeleka yonkhai-hamba ine omukai wohamba wo ko Sambaa, mailekesa okuti vavelwa onombei. Onkhai-hamba yaovolele okutehelela ounongo wa Salomau mokonda ankho weihuvisa. Pahe Sesusi apopi okuti: “Pano pena umwe wapona pu Salomau.” — Mateusi 12:40-42.

Sesusi aeleka onkhalelo yovanthu vo pomuvo wae nomunthu umwe wali notyilulu, konyima atyimutundu. (Mateusi 12:45) Mokonda omunthu oo kapakele ovipuka oviwa pomphangu apa tyatunda, otyilulu atyimukondokela atyietelela ovikuavo epandu-vali, ovikalavi vali kutyo. Tyelifwa notyo, ovanthu velongo lyo Isilayeli ankho vasukukiswa avapiluluka, ngatyina omunthu watundua notyilulu. Mahi ovanthu velongo olio avaanye ovauli va Huku, konyima avaanye alo umwe Sesusi, ankho umoneka nawa okuti una ononkhono mba Huku. Otyo tyilekesa okuti ovanthu velongo olio vakala vali omapita tyipona ponthyimbi.

Putyina Sesusi ankho ekahi nokupopia, me yae nonondenge mbae aveya, avakala vala kondye. Ovanthu vamwe ankho vepumphi ponthele yae avati: “Me yove nonondenge mbove veli pondye, vahanda mulimone.” Sesusi alekesa okuti, ovanthu ankho ena navo oupanga wapama vali ovalongwa vae, vekahi ngonondenge mbae no vo me yae. Alekesa ovalongwa vae nokuvoko, ati: “Me yange nonondenge mbange ovava vekahi nokutehelela ondaka ya Huku avaendela-mo.” (Luka 8:20, 21) Namphila oupanga nombunga yae ankho wakolela, mahi walekesa okuti oupanga novalongwa vae wakolela vali. Tyitupameka unene okukala noupanga ngoo novakuatate vetu meongano, haunene tyina ovanthu vehetutavela ine vetupopia omapita, nokupopia omapita ovilinga vietu!