ELONGESO 6

Noñgonokesa Ovanthu Otesitu Watanga

Swau 10:33-36

ETYI UNA OKULINGA: Wahatange vala otesitu, opopi otyipuka otyikwavo. Noove mwene tyimona ine ovateheleli vetyinoñgonoka etyi watangela otesitu, no onkho vetyimona oñgeni yelikwata neetyi uli nokulongesa.

OÑGENI MOTYILINGI:

Hoka-po onondaka mbesukisa. Tyina wamatange otesitu, pola-po onondaka mbelikwata neetyi uli nokulongesa, ngambo utoneka. Upondola okulinga ngootyo mokumbuwana, okuti hatyo olingi epulo linanena ovanthu ponondaka mbesukisa vali.

Ine etyi uli nokulongesa utyipopia monondaka mbove mwene, tyiivale nawa kovateheleli okuti etyi uli nokulongesa tyelikwata neetyi Ombimbiliya ipopia.
Potoyola nawa etyi tyesukisa. Popia nawa etyi motangela o tesitu, ovateheleli avetyinoñgonoka nawa otyityi tyili motesitu tyilikwata neetyi uli nokulongesa.

Tyina upopia etyi otesitu ilongesa, p’Ombimbiliya wahaike-po. Otyo matyikwatesako ovateheleli okutala oñgeni etyi uli nokupopia, tyelikwata notesitu watanga.
Etyi mulilongesila-ko tyipepukisa. Wahapopie ovipuka viehesukisile, ovipuka vihena-le etyi mavipopi tyiyemba kweetyi uli nokulongesa. Talela kweetyi ovateheleli veyale, pahe otale ovipuka patyi viesukisa mopopi maviyandyulula etyi walongesa, avetyinoñgonoka.