Jeova Kamayekepo Vana Vemuyumba Onthumbi — OMBIMBILIYOTEKA ONLINE yo Watchtower

Jeova Kamayekepo Vana Vemuyumba Onthumbi

“[Jeova] kamayekepo vana vemuyumba onthumbi. Meveyungu apeho.”—⁠SALMO 37:⁠28.

1, 2. (a) Oñgeni ekolelo liovaumbili va Huku lialolelwe motyita 20 P.K.E.? (b) O movitateka patyi vitatu Jeova aamenene ovaumbili vae vekolelo?

PUETYI ankho kuakamba omanima 1000 opo Kristu atyitwe, ovaumbili va Jeova ankho vena okutokola. Ovita ankho viahandele okukatuka, vevityilika. Omihoko vio Kokulio kuekumbi ankho vikahi nokupindula ovilwa, viayekwa velitumine. Ohamba yavo omphe Jeroboau vavialeka, wahinda ongeleya yae opo apameke outumini wae. Atumu ovanthu aveho vetavele vala kwe. Oityi ovaumbili va Jeova vekolelo ankho vena okulinga? Okuti ankho mavatualako nekolelo liavo okufenda Huku? Ovanyingi vatuaileko nekolelo liavo, iya Jeova eveamena.—⁠1 Reis 12:1-33; 2 Crônicas 11:13, 14.

² Hono ovaumbili va Huku vekolelo tupu vekahi nokulolwa. Ombimbiliya ilondola okuti: “Lungukei, no kutala nawa, mokonda ondyale yenyi Eliapu, ikahi nokuenda-enda ngatyina onkheyama ikoma, okuovola ou maili.” Okuti matutyivili ‘okuilwisa, nokupama mekolelo’? (1 Pedro 5:8, 9) Tutalei ovipuka viaendele potyipito tyokuvialeka o Hamba Jeroboau menima 997 P.K.E., atutale oityi tupondola okulilongesilako. Mokueenda kuomanima oo okuepuiya, ovaumbili va Jeova vekolelo vamuene ononkhumbi. Ankho vena ovitateka viokutualako nekolelo liavo, nehongiliyo lia vana vayekapo okufenda Huku. Movitateka ovio aviho, Jeova waamenene ovanthu vae vekolelo. Tupu, hono maamena vana vemuyumba onthumbi.—⁠Salmo 37:⁠28.

Putyina Vamoneswa Ononkhumbi

3. Omokonda yatyi Mouhamba wa David ovanthu ankho kavamono ononkhumbi?

³ Tete tutalei oñgeni Jeroboau akala ohamba. Omukanda wa Provérbios 29:2 wati: “Putyina ondingavivi ikahi nokutumina, ovanthu vakema.” Mouhamba wa David, Ohamba yo Isilayeli kohale, ovanthu ankho kavakeme. David ankho omukuankhali, mahi ankho wali nekolelo mu Huku nokuyumba onthumbi mue. Mouhamba wa David ovanthu ankho kavamono ononkhumbi. Jeova walingile omphango na David ati: “Ondyuo yove, noutumini wove mavitualako apeho. Outumini wove maukalako apeho.”—⁠2 Samuel 7:⁠16.

4. Opo Salomau novanthu vae vatualeko nombembwa, ankho vena okulinga tyi?

⁴ Outumini wa Salomau omona wa David, potete ankho wali wombembua nomalumono. Moluotyo, ankho upondola okuelekwa Noutumini wa Kristu Jesus womanima Ovityita Ekui. (Salmo 72:1, 17) Nawike pomihoko 12 vio Isilayeli ankho una ehunga liokutyitukilapo outumini wa Salomau. Mahi, opo Salomau novanthu vae vatualeko nombembwa oyo, ankho vena okutavela apeho ku Huku. Jeova wapopilile Salomau okuti: “Inkha wendela movitumino viange, nokutavela omatokolo ange novitumino viange aviho, nokuendela muvio, tupu naame mandyifuisapo ondaka yange na popia na ho David, konthele yove. Mandyikala pokati ko va Isilayeli, himayekepo ovanthu vange ova Isilayeli.”—⁠1 Reis 6:11-13.

5, 6. Etyi Salomau ayekapo okufenda Huku, atyieta tyi?

⁵ Etyi Salomau akulupa, katuaileko nekolelo liae mu Jeova, mahi welipakele mefendelo liomatutu. (1 Reis 11:4-6) Salomau wayekapo katutu-katutu okutavela ovitumino via Jeova, akala omukalavi unene. Oukalavi wae wali omunene unene, alo konyima yononkhia mbae ovanthu ankho veliyava komphinga yae Roboau. Avaiti Roboau opo evetepulule ononkhumbi. (1 Reis 12:⁠4) Oityi Jeova alingile etyi Salomau ayekapo okumuumbila?

⁶ Ombimbiliya itupopila okuti: “Jeova anumana na Salomau, mokonda omutima wae wayekapo okutavela ku . . . Huku yo Isilayeli una wemumonekelele tuvali.” Iya Jeova apopila Salomau okuti: “Mokonda . . . kuatuaileko okutavela omphango yange, no movitumino viange nekupele, mandyikupolo ouhamba, andyiupe omuundapi wove.—⁠1 Reis 11:9-11.

7. Namphila Jeova ayalele Salomau, oñgeni akuatesileko ovaumbili Vae vekolelo?

⁷ Jeova atumu omuuli Aija opo akanake una mayovola ovanthu vae. Omuyovoli watyo ankho o Jeroboau, omulume ankho wokuafuapo waundapele moutumini wa Salomau. Namphila Jeova kayekelepo omphango Youhamba alingile na David, mahi, wetavelele okuyapula pokati outumini womihoko 12 vio Isilayeli. Omihoko ekwi viapelwe Jeroboau, iya vivali avisala no Hamba Roboau ombunga ya David. (1 Reis 11:29-37; 12:16, 17, 21) Iya Jeova apopila Jeroboau okuti: “Inkha utavela atyiho ndyikupopila, nokuendela monondyila mbange, nokulinga etyi tyaviuka komaiho ange, mokuendela movitumino viange, ngetyi ankho tyilinga omuumbili wange David, tupu naame mandyikala nove, mandyikuikila eumbo lia apeho, ngetyi naikila David eumbo, iya andyikupe o Isilayeli.” (1 Reis 11:38) Jeova wakuatesileko ovanthu vae, mokuvepa omunthu meveyovola mononkhumbi.

8. Hono ovanthu va Huku vamona ononkhumbi patyi?

⁸ Hono ononkhumbi novivi vieliyawisa unene. Eclesiastes 8:9 yati: “Omunthu uviala omunthu mukuavo pala okulimonesa ononkhumbi.” Ovakuavitanda nomautumini ovanthu vokuna elungavi, vaetela ovanthu oluhepo. Ononkhalamutue momautumini, no monondando no monongeleya, ovikando ovinyingi vaava ongeleka ombi movipuka valinga. Ngetyi omuviuki Lote tyemuihamene, na hono ovaumbili va Huku vekolelo “vaihamenwa unene, mokonda yovivi vipopiwa nokulingwa na vana vapatana ovitumino, nokulipakula movituwa ovivi.” (2 Pedro 2:⁠7) Mokonda tutavela ovitumino via Huku, ovikando ovinyingi tumoneswa ononkhumbi novatumini ovakalavi.—⁠2 Timóteo 3:1-5, 12.

9. (a) Oityi Jeova alingale opo ayovole ovanthu vae? (b) Onthumbi patyi tuna yokuti Jesus makala apeho nekolelo mu Huku?

⁹ Mahi, tupondola okukala nonthumbi yokuti: Jeova kamayekepo ovanthu vae vekolelo! Nkhele soka kuetyi alinga opo anyimeko omautumini omavi ouye. Huku wavialeka Ouhamba wa Mesiya mautuminwa na Kristu Jesus. Jesus Kristu ukahiale nokutumina keulu omanima afuena kotyita. Apa katutu makayovola vana vokuna onthilo nenyina lia Huku. (Tanga Revelação [Apocalipse] 11:15-18.) Jesus wakalele nekolelo mu Huku alo pononkhia. Kamasoyesa ovalongwa vae, ngetyi tyalingile Salomau.—⁠Hebreus 7:26; 1 Pedro 2:⁠6.

10. (a) Oñgeni matulekesa okuti tuapanda Ouhamba wa Huku? (b) Tyina tuvasiwa novitateka, tupondola okukala nonthumbi yatyi?

¹⁰ Ouhamba wa Huku, outumini wotyotyili maukanyimako ononkhumbi ambuho. Onthue tuna okutavela vala ku Jeova Huku nouhamba wae. Nonthumbi onene Mouhamba wa Huku, onthue tuanya ovivi vilingwa mouye. Mahi, tutualako okulinga nombili ovilinga oviwa. (Tito 2:12-14) Tulinga ononkhono mbokutualako tyihena esilo liouye uno. (2 Pedro 3:14) Kese vitateka tupita navio hono, tupondola okukala nonthumbi yokuti Jeova metuamena opo tutualeko nekolelo lietu. (Tanga Salmo 97:10.) O Salmo 116:15 itupameka okuti: “Ononkhia mba vana vokuna ekolelo, mbakolela unene komaiho a Jeova.” Komaiho a Jeova ovaumbili vakolela unene, moluotyo kamayeke vahanyaunueko aveho.

Putyina Vahongiliyua no Vokuayapuka Motyili

11. Oñgeni Jeroboau ayekapo okuendela movitumino via Huku?

¹¹ Ohamba Jeroboau ankho upondola okutepulula ononkhumbi mbovanthu va Huku. Mahi, ovipuka evelingile ankho vialolele vali unene ekolelo liavo mu Huku. Enkhimano nelao liokukala ohamba, Jeroboau apelwe, ankho kaviemutuukile. Moluotyo, ahimbika okuovola ononkhalelo mbokupameka outumini wae. Jeroboau wasoka okuti, “Inkha ovanthu ava vatualako okukalinga ovilikutila mondyuo ya Jeova ko Jelusalei, omutima wavo mautekela ku Roboau ohamba yo Judaa. Iya ame mavandyipaa, avakondoka ku Roboau ohamba yo Judaa.” Ngotyo, Jeroboau waonga ongeleya omphe yokufenda ononthane onombali mbotyivela. “Iya tyimue etyipake ko Mbetele, otyikuavo etyipake ko Dan. Otyo, tyalingisile ovanthu onkhali, avahimbika okukafenda otyilolo tyo ko Dan. Jeroboau atungisa ondyuo yokufendela, aholovona ovanthu vahatundile mombunga ya Levi, evepake kounakwa. Tupu, Jeroboau waholovona oe muene onthiki “yotyipito tyo va Isilayeli,” atualako “okuyoka ovilikutila ko altale.”—⁠1 Reis 12:26-33.

12. Etyi Jeroboau aonga enfendelo lio tyilolo tyonthane mo Isilayeli, oityi ovaumbili va Huku vekolelo valingile?

¹² Ngotyo, oityi ovanthu va Huku vekolelo mouhamba wa Jeroboau ankho vena okulinga? Ngetyi tyalingile ovakuaukulu vavo vekolelo kohale, vombunga ya Levi ankho vakala momapundaumbo vapelwe motyilongo tyouhamba wa Jeroboau, kavasetele okutokola. (Êxodo 32:26-28; Números 35:6-8; Deuteronômio 33:8, 9) Vasapo omalumono avo, availukila no nombunga mbavo ko Judaa, kuna ankho vapondola okutualako okufenda Jeova tyihena vitateka. (2 Crônicas 11:13, 14) Ova Isilayeli ovakuavo ankho vokuakapilile ko Judaa, avatokola okuhakondoka vali komaumbo avo. (2 Crônicas 10:17) Jeova ankho wafuapo pala okuyakula vana vahanda okukondoka mefendelo liotyotyili. Ankho uhanda vayekapo okufenda ovilolo vionthane, avakondoka ko Judaa.—⁠2 Crônicas 15:9-15.

13. Oñgeni hono vokuayekapo otyili vaovola okuhongiliya nokunyona ekolelo liovanthu va Huku?

¹³ Vokuayekapo otyili nomahongiliyo avo, ankho vaovola okunyona ekolelo liovanthu va Huku. Ovatumini vamue vaonga ongeleya yavo ya Kaputu, avakuluminya ovanthu kefendelo olio. Ononkhalamutue mbo Vakristau mouye no vonongeleya ononkhuavo, vehole okulipaka kounakwa. Mahi, ovanakwa votyili, vavasiwa vala pokati ko Vakristau votyotyili, vokukahi “mounakwa wotyotyili.”—⁠1 Pedro 2:9; Revelação 14:1-5.

14. Oityi tuna okulinga konthele yomalusoke a vana vayapuka motyili?

¹⁴ Ngetyi vombunga ya Levi vekolelo valingile kohale motyita 10 P.K.E., tupu hono ovanthu va Huku vekolelo, kavakembwa nomalusoke a vana vayapuka motyili. Ovakristau ovanakwa no vakuatate vavo, kavasete okulityilika, nokuanya omalusoke a vana vayapuka motyili. (Tanga Romanos 16:17.) Ngotyo, onthue tutavela kovatumini votyilongo, nokuhelipake povilwa viouye. Mahi, tuyumba vala onthumbi Mouhamba wa Huku. (João 18:36; Romanos 13:1-8) Katutavela onondaka mba vana vapopia okuti vaumbila Huku, mahi ovituwa viavo vipenyesa Huku.—⁠Tito 1:⁠16.

15. Omokonda yatyi tuesukisila okuyumba onthumbi “momupika wekolelo nokualunguka”?

¹⁵ Tupu soka, Jeova ukahi nokukuatesako ovanthu vomutima waviuka okutunda mouye wovivi, nokuveta meongano liae muna ombembwa. (2 Coríntios 12:1-4) Nolupandu olunene, tutavelei “komupika wekolelo nokualunguka, waholovonua nomuhona, opo aavele ovanthu vae okulia kuopaspilitu momuvo wanakua.” Kristu waavela omupika wae, otyilinga “tyokuyunga omalumono ae aeho.” (Mateus 24:45-47) Moluotyo, pamue onthue katuanoñgonokele nawa etokolo lialingwa nomupika wekolelo. Otyo, katyituavela ehunga liokuanya etokolo olio, ine okukondoka mouye wa Satanasi. Anthi, okukala nonthumbi tyitukuatesako okutavela nomutima wapoleya, nokukevelela Jeova etyiyandyulule nawa.

Putyina Valinga Ovilinga Vapewa na Huku

16. Otyilinga patyi omuuli umue wo ko Judaa apelwe?

¹⁶ Jeova wayalele Jeroboau, mokonda ankho wayekapo okumufenda. Jeova watumine omuuli wae okutunda ko Judaa alo ko Mbetele, avasi Jeroboau ukahi nokuava ovilikutila ko altar yae. Omuuli watuminue okukapopila Jeroboau okuti Huku memukoyesa. Otyilinga otyo, ankho tyepuiya.—⁠1 Reis 13:1-3.

17. Oñgeni Jeova aamenene omutumwa wae?

¹⁷ Jeroboau anumana unene etyi apopilwa ekoyeso lia Jeova. Nonyengo onene Jeroboau ayulika omutumwa wa Huku, ati: “Mukuatei!” Mahi, liwa-liwa etyi nkhele vehemukuatele, “okuvoko kuae akukuta ehetyivili vali okukukondolako. O altale aivambuka pokati, etwe liokueyula ovilenga alinengukila pohi.” Moluotyo, Jeroboau aiti komuuli oo, emuitileko ku Jeova melikuambelo, opo okuoko kuae kukale nawa. Omuuli emuitilako, iya okuoko kuae akukala nawa. Ngotyo, Jeova waamena omutumwa wae.—⁠1 Reis 13:4-6.

18. Oñgeni Jeova etuamena tyina tutualako okulinga ovilinga viae tyihena owoma?

¹⁸ Putyina tutualako okuivisa nekolelo onondaka Mbouhamba wa Huku nokulinga ovalongwa, pamue tuvasa oundyale, na vana vahahande okutehelela. (Mateus 24:14; 28:19, 20) Anthi, tuhayekei owoma na vana vahahande okutehelela, vitusoyese okuivisa nombili. Ngomuuli una kononthiki mba Jeroboau, nonthue tuna “elao liokuumbila tyihena owoma [Jeova] nokuna onthumbi.”a (Lucas 1:74, 75) Hono katukevela okuyakulilwa komahuviso. Mahi, nononkhono mbae, no noandyu mbae, Jeova nkhele ukahi nokuyunga nokuamena Onombangi mbae. (Tanga João 14:15-17; Revelação 14:⁠6.) Huku nalumue mayeke vana vatualako okuivisa ondaka yae tyihena owoma.—⁠Filipenses 1:14, 28.

Jeova Maamena Ovanthu Vae Vekolelo

19, 20. (a) Omokonda yatyi tuna onthumbi yokuti Jeova nalumue metuyeke? (b) Omapulo patyi matukelilongesa monthele mailandulako?

¹⁹ Jeova o Huku yetu wokuayumbua onthumbi. (Revelação 15:4; 16:⁠5) Jeova “wayumbua onthumbi movilinga viae aviho.” (Salmo 145:17) Ombimbiliya itupameka okuti: “Jeova makayunga ondyila yovanthu vae vekolelo.” (Provérbios 2:⁠8) Putyina tuvasiwa novitateka ine omahongiliyo a vana vayapuka motyili, ine o putyina tuna etyi tyepuiya motyilinga tyetu, ovanthu vekolelo va Huku vena onthumbi yokuti Jeova mevehongolela nokuvekuatesako.

²⁰ Kese umue puonthue wesukisa okulipula okuti: Oityi matyimbatela okutualako okuyumba onthumbi mu Jeova, na tyina ndyivasiwa novitateka no nonkhumbi? Ine, oñgeni mandyipameka onthumbi yange mu Huku?

[Onondaka Poutoi]

a Tyilinge omuuli una watuaileko okutavela ku Jeova, ine katuaileko, netyi tyaendela nae, aviho mavikapopiwa monthele mailandulako.

[Ehangununo liolutalatu pefo 8]

Opo Salomau novanthu vae vatualeko nombembwa ankho vena okutualako okutavela Huku