“Ame Ndyikahi Nonwe”

“Ovanyingi mavekeuovola, iya enoñgonoko liotyotyili malikakala enyingi.” —DANIEL 12:4.

OÑGENI MOKUMBULULA?

Oñgeni “enoñgonoko liotyotyili” liakala enyingi mononthiki mbetu?

Oñgeni vokuetavela otyili vakala “ovanyingi”?

Omononkhalelo patyi enoñgonoko liafuapo liakala “enyingi”?

1, 2. (a) Oñgeni tutyii okuti Jesus una onthue hono ya makakala nonthue komutwe? (b) Ngetyi tyipopia Daniel 12:4, ouwa patyi utuka kokulilongesa Ovihonekwa nounkhengela?

SOKA ñgeno ukahi Momphangu Yombembwa. Ononthiki ambuho tyina upindukapo ulitehelela nawa, nokuhimbika onthiki nehambu. Kuivite napeke peihama. Omauvela ove aeho alamba. Pahe omaiho ove atala nawa, utehelela nawa, nokuiva omuniko omuwa, nokumakela. Una ononkhono ononyingi, ulinga ovilinga vihambukiswa, nokuna omapanga omanyingi, nokuhasukalala notyipuka natyike. Ovio ovipuka oviwa upondola okukamona Mouhamba wa Huku. Ohamba yetu, Jesus Kristu, makaavela ovanthu ovipuka ovio oviwa, nokuvelongesa enoñgonoko lia Jeova.

² Jeova makakuatesako ovaumbili vae vekolelo movilinga ovio viokulongesa ovanthu ouye auho. Tyotyili, Huku Nomona wae, apeho vakuatesako ovaumbili vekolelo tunde kohale. Etyi eheneende keulu, Jesus wapopilile ovalongwa vae vekolelo okuti makala navo. (Tanga Mateus 28:19, 20.) Opo tupameke ekolelo lietu momulao oo, tutalei eulo Daniele ahonekela Mombambilonia, omanima alamba po 2.500 konyima. Wahoneka konthele yomuvo wetu okuti: “Ovanyingi mavekeuovola, iya enoñgonoko liotyotyili malikakala enyingi.” (Daniel 12:4) Pahe tuanoñgonoka moversikulu oyo okuti, ondaka “mavekeuovola” ihangununa okulilongesa nounkhengela. Eulo lilekesa okuti vana velilongesa Ovihonekwa nounkhengela mavayambwa unene mokuvasa otyili, ine enoñgonoko liafuapo Liondaka ya Huku. Eulo tupu lilekesa okuti “enoñgonoko liotyotyili malikakala enyingi.” Vana vavasa enoñgonoko olio velitavela nokulongesa vakuavo otyili otyo. Putyina tulilongesa oñgeni eulo olio likahi nokufuisuapo, matutale okuti Jesus ukahi novalongwa vae hono iya Jeova makafuisapo atyiho alaa.

OVAKRISTAU VOMBILI VAVASA “ENOÑGONOKO LIOTYOTYILI”

 3. Oityi tyamonekele konyima yononkhia mbono apostolu?

³ Ngetyi tyaulilwe, konyima yononkhia mbono apostolu, ovanyingi vayapuka motyili, iya otyo atyiliyandyana liwa-liwa ngotupia. (Atos 20:28-30; 2 Tessalonicenses 2:1-3) Mokueenda kuomanima omanyingi, alo umwe vana veliti Ovakristau ankho vetupu “enoñgonoko liotyili.” Namphila ononkhalamutwe mbonongeleya vapopia okuti vetavela Ovihonekwa, mahi valongesa omatutu, “omalongeso ovilulu” apenyesa Huku. (1 Timóteo 4:1) Moluotyo, ovanthu ovanyingi kavei otyili konthele ya Huku. Omalongeso omatutu akutikinya ounkhembi wokuti Huku Outatu Ukola, ohande kainkhi, iya vamwe mavakayokwa apeho moifelunu yotupia.

 4. Oñgeni otyikundyi tyo Vakristau vahimbika okuovolola “enoñgonoko liotyili” mo 1870?

⁴ Mahi, mo 1870 ovipuka viapiluluka. Etyi nkhele kuakamba omanima 40 opo “ononthiki mbahulililako” mbuhimbike, otyikundyi tyehehi tyo Vakristau vombili ko Pensilvânia, EUA, veliongiya opo velilongese nombili Ombimbiliya, nokuovolola “enoñgonoko liotyili.” (2 Timóteo 3:1) Ankho veliihana okuti Ovalilongesi Vombimbiliya. Ovanthu ovo vomutima weliola, ankho vahanda tyilityili okulinga ehando lia Huku. Ankho “havanongoko no vokualunguka,” Jesus apopile okuti kamavetyivili okuvasa enoñgonoko liotyotyili. (Mateus 11:25) Ovalilongesi Vombimbiliya, ankho vatanga nawa, nokutomphola, nokusokolola konthele Yovihonekwa, nokulikuambela okuita ehongolelo lia Huku. Tupu, ankho vaeleka onoversikulu mbelikalaila Mbombimbiliya, nokulilongesa omikanda viovanthu ovakuavo ankho vaovolola otyili Tyombimbiliya. Katutu-katutu, Ovalilongesi ovo Vombimbiliya vanoñgonoka otyili ankho tyaholekwa omanima omanyingi.

 5. Oityi Ovalilongesi Vombimbiliya valingila ono tratadu Elongeso Ekulu Konthele ya Huku?

⁵ Namphila Ovalilongesi Vombimbiliya ankho vahambukwa unene novipuka velilongesa, kavayekele enoñgonoko olio livekalese nomalityindailo, tupu kavelipandele, okupopila ovanthu okuti vavasa otyipuka otyipe. (1 Coríntios 8:1) Anthi, valinga ono tratadu ankho mbuihanwa okuti The Old Theology (Elongeso Ekulu Konthele ya Huku) opo vakuateseko ovanthu okunoñgonoka otyili Tyombimbiliya. O tratadu yotete, yakuatesako ovanthu okulilongesa Ombimbiliya opo vaanye “oviso aviho viovanthu,” avetavela omalongeso otyotyili a Jesus, nono apostolu, ine “elongeso ekulu konthele ya Huku.”—The Old Theology, No. 1, Abril yo 1889, pefo 32.

6, 7. (a) Otyili patyi Onombangi mba Jeova velilongesa tunde mo 1870? (b) Otyili patyi welilongesa tyekuhambukiswa vali?

⁶ Tunde mo 1870, Onombangi mba Jeova, velilongesa otyili otyinyingi tyihuvisa!a Tyina tulilongesa otyili otyo, katulilongesa ovipuka vihena esilivilo. Tulilongesa ovipuka oviwa vitukalesa nomuenyo omuwa, nehambu, nekevelelo. Tyitukuatesako okunoñgonoka Jeova, Huku yetu woluembia, nevangelo liae. Tupu, tyitukuatesako okunoñgonoka otyilinga tya Jesus, nomokonda yatyi eile pano pohi, nokuipawa, netyi ekahi nokulinga hono. Otyili otyo tyakolela, tyilekesa omokonda yatyi Huku ayekelela ovivi, nomokonda yatyi tunkhila, noñgeni tuna okulikuambela, nokuvasa ehambu liotyotyili.

⁷ Pahe tupondola okunoñgonoka omaulo ankho “aholekwa” mokueenda kuomanima omanyingi ekahi nokufuiswapo momuvo uno wonthyulilo. (Daniel 12:9) Omaulo oo, omanyingi ekahi mono Evandyeliu, no momukanda wa Revelação. Jeova wetukuatesako okunoñgonoka alo umwe ovipuka tuhapondola okumona nomaiho etu, ngetyi okuvialekwa kwa Jesus, novilwa keulu, netyi Satanasi atahelwa pano pohi. (Revelação 12:7-12) Tupu, Huku wetuavela ehangununo liovipuka tuete, ovilwa, novinimawe, nomauvela, nondyala, nonondingavivi vayawisa kemone lietu ‘momuvo uno wokuepuiya.’—2 Timóteo 3:1-5; Lucas 21:10, 11.

 8. Olie wetukuatesako okunoñgonoka otyili?

⁸ Jesus watolela ovalongwa vae okuti: “Omaiho ekahi nokutala ovipuka onwe mukahi nokutala, ena ehambu. Ame ndyimupopila okuti, ovauli Ovanyingi no nohamba vahandele okutala ovipuka onwe mukahi nokutala, mahi kavevimuene, nokutehelela ovipuka onwe mukahi nokutehelela, mahi kavevitehelele.” (Lucas 10:23, 24) Tupandula Jeova Huku mokonda wetukuatesako okutala, nokutehelela ovipuka ovio. Tupu, tupandula mokonda “omukuatesiko,” ospilitu sandu ya Huku, yatumwa opo ihongolele ovalanduli va Jesus “kotyili atyiho!” (Tanga João 16:7, 13.) Apeho tupandei “enoñgonoko liotyotyili,” nokulipopila vakuetu!

“OVANYINGI” VETAVELA “ENOÑGONOKO LIOTYOTYILI”

 9. Omutala Womulavi wa Tyikukutu yo 1881 waitile tyi?

⁹ Etyi palamba omanima evali tunde etyi Omutala Womulavi wotete walingua, Momutala Womulavi wa Tyikukutu yo 1881, ankho muna onthele yati, “Tuovola Ovaivisi 1.000.” Onthele oyo ankho iita vana vapondola okuundapa omuvo umwe ine auho movilinga viokuivisa opo vakale ono Colportor ine ovakokoli-ndyila. Vaitwa vaye konomphangu ambuho okukaovola Ovakristau vombili vehole Huku mahi vehena enoñgonoko liafuapo, nokuvelongesa otyili konthele ya Huku, Nombimbiliya.

10. Oityi ovanthu valinga etyi vaitwa vakale ovaivisi vomuvo auho?

¹⁰ Ovalilongesi Vombimbiliya vakonga vakuavo opo vaivise mokonda vaimbuka okuti Ovakristau votyotyili vena okuivisa onondaka onongwa. Pomuvo opo, ovanthu vaya komaliongiyo Ovalilongesi Vombimbiliya, ankho kavehi, ankho kavasoko okuti ovanyingi mavetavela. Mahi, etyi vatanga o tratadu ine Omutala Womulavi, ovanyingi vaimbuka okuti vavasa otyili, avahimbika liwa-liwa okukuatesako vakuavo. Mongeleka, konyima yokutanga Omutala Womulavi no mbrochula, vialingwa Novalilongesi Vombimbiliya, mo 1882 omulume umwe mo Londres ko Inglaterra, wahoneka okuti: “Mbambavo, ndongesei oñgeni, netyi mandyiivisa opo ndyilinge ovilinga oviwa Huku ahanda tulinge.”

11, 12. (a) Ovakokoli-ndyila ankho vahanda okulinga tyi? (b) Oñgeni ovakokoli-ndyila ankho vaonganeka omawaneno omape?

¹¹ Mo 1885, ankho kuna ovakokoli-ndyila 300. Ovilinga viavo vielifwa novietu hono, okulinga ovalongwa va Jesus Kristu. Mahi, onkhalelo ankho vaivisa yelikalela noyetu. Hono, tulilongesa Ombimbiliya nomunthu momuvo umwe, konyima atumukongo eye komaliongiyo ewaneno. Mahi, kohale, ovakokoli-ndyila ankho vaava omikanda, avaonganeka ovanthu aveho valekesa esuko opo velilongese navo Ovihonekwa. Ankho kavelilongesa na kese munthu, ankho veveonganeka aveho, avakala omawaneno.

¹² Mongeleka, mo 1907, otyikundyi tyimwe tyovakokoli-ndyila, vaovola mepundaumbo limwe ovanthu venale omukanda Aurora do Milênio, (mo Ingelesi), (tupu ankho utiwa Estudos das Escrituras). Konyima, ovakokoli-ndyila vevekonga opo Tyalumingu veye keliongiyo malilingwa meumbo lia umwe walekesa esuko. Motyalumingu otyo, umwe Povakokoli-ndyila wapopia konthele yosapi yati O Plano Divino das Eras, (mo Ingelesi) onthiki aiho. Motyalumingu tyalandulako, waavela ondundo aveho ankho veile, opo vatualeko okuliongiya apeho. Mo 1911, ovakuatate vaovola onkhalelo onkhuavo yokulinga ovalongwa. Ovakuatate 58, ankho vaya kononthele mbelikalaila mbo Estados Unidos no Canadá, opo valinge omalongomona. Ovakuatate ovo, vahoneka omanyina nomaumbo ovanthu vokuesuka veile okutehelela omalongomona, nokuveonganeka pomaumbo vakale “omawaneno” omape. Mo 1914 ankho kuna omawaneno 1.200, Ovalilongesi Vombimbiliya ouye auho.

13. Oityi tyikuhuvisa konthele yovilinga viokuivisa?

¹³ Hono, mouye auho muna omawaneno 109.400, iya ovakuatate no nomphange 895.800, ovakokoli-ndyila. Hono, ovanthu vehika ponomiliau etyinana vetavela “enoñgonoko liotyotyili,” nokuliundapesa momuenyo wavo. (Tanga Isaías 60:22.)b Otyo tyihuvisa unene mokonda Jesus wapopile okuti ovalongwa vae “mavayalwa novanthu aveho” mokonda yenyina liae. Ayawisako okuti, ovalanduli vae mavahataikiswa, nokupakwa mokaleya, nokuipawa. (Lucas 21:12-17) Namphila veyelwe na Satanasi, novilulu viae, novanthu ovanyingi, ovanthu va Jeova vatualako novilinga viokulinga ovalongwa, iya vekahi nokuliyawisa monkhalelo ihuvisa. Hono, vekahi nokuivisa “kombanda yoohi aiho,” kovilongo vitokota unene, nevi vitenda unene, konomphunda, no monohika, no momapundaumbo omanene, nomatutu. (Mateus 24:14) Ovilinga ovio vevilinga vala nombatelo ya Jeova.

“ENOÑGONOKO LIOTYOTYILI” LIAKALA “ENYINGI”

14. Oñgeni omikanda viakuatesako okuyawisa enoñgonoko liotyotyili?

¹⁴ “Enoñgonoko liotyotyili” liakala enyingi mokonda onondaka onongwa mbukahi nokuiviswa novanthu ovanyingi. Tupu liakala enyingi mokonda yomikanda ominyingi vialingwa. Mu Kakwenye yo 1879, Ovalilongesi Vombimbiliya, valinga omukanda wotete, ankho utiwa A Torre de Vigia de Sião no Arauto da Presença de Cristo, (mo Ingelesi). Vafeta eongano ankho lina onomakina, avalingi omikanda 6.000 vio Mutala Womulavi wotete mo Ingelesi. Charles Taze Russell, ankho wokuna omanima 27, waholovonwa opo ahongolele ovilinga ovio, kumwe novakuatate vetano valongoka ankho vahoneka ononthele mbo Mutala Womulavi. Hono, ukahi nokulingwa momalaka 195 iya, kese tyikando kulingwa Omitala Viomulavi vihika po 42.182.000 pala okuawa mouye auho. Omukanda wavali wavua vali ouye auho, o Despertai! ilingwa 41.042.000, momalaka 84. Tupu, kese enima kulingwa omikanda no Nombimbiliya mbuhika ponomiliau 100.

15. Opi kutunda onombongo mbokulinga omikanda vietu?

¹⁵ Ovilinga ovio, vivatelwa no nombongo mbuawa novanthu votyali. (Tanga Mateus 10:8.) Vana valinga ovilinga ngovio, vahuva, mokonda vetyii okuti onomakina, no nopapelo, no tinta, novikuavo vali, vialia unene okalu. Omukuatate uhole okulanda ovipuka viundapeswa pala okulinga omikanda mo Mbetele, wapopia okuti tyina ovanthu vovitanda vatalelapo Ombetele, vahuva netyi tukahi nokulinga no nombongo mbuawa novanthu votyali. Tupu vahuva no nomakina ononene tuna mbupondola okulinga omikanda ominyingi. Tupu, vahuva tyina vamona ovakuendye vaundapa nehambu mo Mbetele.

OOHI MAIKEYULA ENOÑGONOKO LIA HUKU

16. Jeova walingisa “enoñgonoko liotyotyili” likale enyingi mokonda yatyi?

¹⁶ Jeova walingisa “enoñgonoko liotyotyili” likale enyingi mokonda uhanda “ovanthu vatyo aveho vayovolwe iya avakala nenoñgonoko liafuapo konthele yotyili.” (1 Timóteo 2:3, 4) Jeova uhanda ovanthu vanoñgonoke otyili opo vemufende monkhalelo yaviuka, nokupewa ononkhano onongwa. Novilinga viokuivisa, ukahi nokuongiya Ovakristau ovalembulwa vekolelo. Tupu, ukahi nokuonganeka “otyinyingi tyovanthu” “tyatunda movilongo aviho, no momihoko, nomalongo, no momalaka aeho,” vena ekevelelo liokukala apeho pano pohi.—Revelação 7:9.

17. Ovafendi votyotyili vekahi nokuliyawisa, tyilekesa tyi?

¹⁷ Momanima 130 okualamba, ovafendi votyotyili kononthele ambuho mboohi vekahi nokuliyawisa unene. Otyo tyilekesa nawa okuti Jeova Huku, Nohamba yae aholovona, Jesus Kristu, vekahi novaumbili vae pano pohi, opo vevehongolele, nokuveamena, nokuveonganeka, nokuvelongesa. Eliyawiso liavo tupu lilekesa okuti tyotyili Jeova makafuisapo omilao viae komutwe wandyila. “Oohi aiho tyotyili maikeyula enoñgonoko lia Jeova, ngetyi omeva eyula melunga.” (Isaías 11:9) Tyotyili, pomuvo opo ovanthu mavakakala no nonkhano ononyingi onongwa!

[Onondaka Poutoi]

[Olutalatu pefo 14]

Ovalilongesi Vombimbiliya ankho ovanthu vomutima weliola, vahanda tyilityili okulinga ehando lia Huku

[Olutalatu pefo 15]

Jeova upanda ononkhono ulinga opo uyandyanese “enoñgonoko liotyotyili” lia Huku