‘Wahupisilue Kumwe Novanthu Epanduvali’

NOE nombunga yae ankho vekahi kumwe puetyi ombila yahimbika okuloka. Pahe soka Noe nombunga yae, vekahi mowato muanthikovela muna vala okandiyelo katema, kavapoila vatehelela vala omeva atoka kombanda yowato nokuveta monomphati mbowato. Tyafuile ankho yaviela unene.

Tyina Noe atala movipala viombunga yae, omukai wae wekolelo, novana vae vetatu vaundapa nombili novakai vavo, tyotyili uhambukwa unene. Momuvo oo wepuiya, Noe uvasa epameko okutala okuti ukahi novanthu ehole unene. Aveho ankho vahupa. Nonthumbi alingi elikuambelo liokupandula kumwe nombunga yae, okupopila peulu mokonda yomuyuelo.

Noe ankho omulume wokuna ekolelo enene. Mokonda yekolelo olio, Jeova Huku yae, wemuyakulilile kumwe nombunga yae. (Hebreus 11:7) Mahi okuti ankho kavesukisile vali okukala nekolelo etyi ombila yahimbika okuloka? Ankho mavesukisa ekolelo olio pala ovitateka maviya komutwe. Tupu nonthue tuesukisa otyituwa otyo mononthiki mbuno mbepuiya. Moluotyo, tutalei oityi tupondola okulilongesila kekolelo lia Noe.

Ombila yatuaileko okuloka “ovitenya omakwi ekuana novinthiki omakwi ekuana.” (Gênesis 7:4, 11, 12) Omeva atuaileko nokuliyawisa, okuliyawisa aakala omanyingi. Putyina omeva eliyawisa, Noe ankho upondola okutala okuti Jeova Huku yae, ukahi nokuyakulila ovaviuki nokuhanyako onondingavivi.

Ombila Onene yamaneneko oumphuki waetelueko no noandyu. Nelungavi, Satanasi wahongiliyile onoandyu ononyingi okusapo “omphangu yambo yaviuka” keulu, ambuya okunepa ovakai avakala novana ankho vaihanwa okuti Omakihi. (Judas 6; Gênesis 6:4) Satanasi wahambukilue unene noumphuki oo, mokonda ankho unyona ovanthu pano pohi vatungwa na Jeova.

Mahi, putyina omeva ankho eliyawisa, onoandyu onomphuki mbelipola omalutu ovanthu ambuende keulu, tunde opo nalumwe vali mbelipilululile omalutu ovanthu. Mbasapo ovakai vambo novana opo vankhile momeva, kumwe novanthu ovakuavo.

Okupolelela kononthiki mba Enoke, omanima ovityita epanduvali konyima, Jeova walondolele ovanthu okuti mahanyaunako ovanthu onondingavivi. (Gênesis 5:24; Judas 14, 15) Tunde pomuvo opo, ovanthu ankho vekahi vali nokuvilapo, okunyona ohi, nokuiyulisa oungangala. Pahe ankho mavahanyuako. Okuti Noe nombunga yae vahambukilwe nehanyauno olio?

Au! Tupu Huku yavo yokankhenda kahambukilwe. (Ezequiel 33:11) Jeova walingile atyiho opo ayovole ovanthu ovanyingi. Waavelele Enoke otyilinga tyokulondola ovanthu, nokutuma Noe atunge owato. Noe nombunga yae vaundapele motyilinga otyo omanima omanyingi, otyo ovanthu vetyiete. Haunene, Jeova watumine Noe akale “omuivisi wouviuki.” (2 Pedro 2:5) Ngetyi ankho tyalingile Enoke, Noe walondolele ovanthu konthele yekoyeso ankho likahi nokuya mouye. Iya oñgeni vakumbululile? Jesus ankho utyilwete kuna keulu, wahinangelesile ovanthu ononthiki mba Noe okuti: “Kavasukile, alo ombila onene yeya aivekomboko aveho.”—Mateus 24:39.

Soka oñgeni Noe nombunga yae vakalele mokueenda kuononthiki ombo omakwi ekuana etyi Jeova aika epito liowato. Putyina ombila ankho itualako okuloka kese nthiki, ovanthu etyinana mowato ankho valinga ovilinga vimwe, okulikuatesako, okukomba apa valala, nokuavela okulia ovinyama movinyongo viavio. Pakala vala katutu, owato aupikita, omeva aahimbika okuuyelula alo “wayalala kombanda yomeva.” (Gênesis 7:17) Olio elekeso limwe lihuvisa liounene wa Huku Wepondolo Aliho, Jeova!

Noe kapandulile vala mokonda oe nombunga yae vayovolelwe, mahi tupu omokonda yokankhenda ka Jeova mokuveundapesa opo valondole ovanthu vankhila kondye yowato. Ovilinga ovinene ankho valinga momanima oo ankho vimoneka ngoti onomphuila nkhono vala. Ovanthu ankho kavesukile! Nkhele soka, Noe ankho una onondenge, nonomphange, novimphumba vena omuenyo etyi Ombila Onene nkhele iheneye. Mahi nawike puvo wemutehelelele. (Gênesis 5:30) Pahe, ovanthu ovo etyinana vahupa mowato, vavasa epameko tyina vasoka konyima omuvo auho vakala nokulondola ovanthu opo vakale nomphitilo yokuhupa.

Jeova kapilulukile tunde pononthiki mba Noe. (Malaquias 3:6) Jesus Kristu wapopile okuti ononthiki mbetu hono mbelifwa unene “nononthiki mba Noe.” (Mateus 24:37) Omuvo wetu wapakua otyilimbo, omuvo umwe wononkhumbi ononene maukamanuhuka nehanyauno liouye uno wovivi. Hono, ovanthu va Huku vekahi nokuivisa onondaka mbulondola aveho vahanda okutehelela. Okuti motavela onondaka ombo? Inkha wetavelale otyili konthele yonondaka mbuavela omuenyo, okuti mopopila vakuenyi? Noe nombunga yae vaava ongeleka pala onthue atuho.

Putyina owato ankho uyalala kombanda yomeva, vana ankho vekahi mokati veiva omuyuelo womavai elikueka. Okuti Noe ankho wasukalala nomanyonda ine omakufikufi nokusoka okuti hamwe owato mauteke? Au. Vokuehetavela Huku hono vapondola okusukalala, mahi Noe ankho utavela ku Huku. Ombimbiliya yati: “Mokonda yekolelo, Noe . . . watungile owato.” (Hebreus 11:7) Ekolelo mutyi? Jeova walingile omphango yokuyovola Noe naaveho ankho enavo Kombila Onene. (Gênesis 6:18, 19) Okuti Una watunga eulu, nohi, novipuka aviho vina omuenyo ankho kapondola okuyunga nawa owato opo wahateke? Tyotyili upondola! Noe ankho una onthumbi onene yokuti Jeova mafuisipo omulao Wae. Tyotyili, Noe nombunga yae ‘vahupile komeva.’—1 Pedro 3:20.

Konyima yovitenya 40 novinthiki 40, ombila aityiko. Mokuvalula kuetu, ombila yatyako mu Kayovo yo 2370 P.K.E. Mahi, ankho nkhele kuakamba unene opo ombunga itunde mowato. Owato oo weyula ovinyama novanthu, oo vala ankho wayalala kombanda yomeva alambapo onomphunda. (Gênesis 7:19, 20) Tusokei Noe wonganeka ovilinga vialema novana vae Sem, na Cã, na Jafé opo vetyivile okuavela okulia ovinyama aviho, nokukomba apa vilala, nokuvitala ankho vikahi nawa. Tyotyili, Huku walinga ovinyama ovio aviho ovikalavi opo vikale ovindalawa, avinyingila mowato, wetyivila okuviyunga nawa mokueenda Kuombila Onene.a

Noe wahonekele ovipuka aviho viaendeleko. Etyi ahonekele tyilekesa onalupi ombila yahimbika okuloka netyi yatyako. Tupu tyilekesa okuti omeva akalele kombanda yohi aiho ononthiki 150. Okuhulilako, omeva ahimbika okutepuluka. Onthiki imwe, owato autalama “konomphunda mbo Ararate,” hono o ko Turquia. Otyo tyaendeleko mu Tyikukutu yo 2369 P.K.E. Onomphunda mbahimbika okumoneka etyi palamba ononthiki 73, mu Pepo Linene. Etyi palamba onohanyi ononthatu, mu Tungonkhe, Noe ayambulula pokanthele. Tyotyili, Noe wahambukilue unene etyi eiva okamutenya nokapempho kafila mowato. Konyima, ahimbika okutala ohika inkha itavela okukala. Walupulamo ekuaila, aliende iya alikondola, aliende vali aliya alilapela kombanda yowato. Iya alupulamo vali opomba, yakondaukile ovikando ovinyingi ku Noe alo yavasa omphangu yokulapela.—Gênesis 7:24–8:13.

Ononthiki ambuho ankho Noe utetekela okufenda Jeova konyima alingi ovilinga ovikuavo. Tusokei ombunga aiho kumwe apeho ilikuambela nokutomphola konthele yoñgeni Tate yavo eveyovola. Noe ankho uyumba onthumbi mu Jeova pokulinga omatokolo aeho akolela. Alo umwe etyi Noe amona okuti ohi pahe “yakukuta,” konyima yomuvo omunyingi akala mowato, kaikulile epito opo alupukemo. (Gênesis 8:14) Wakevelele Jeova emupopile!

Ononkhalamutwe mbo nombunga hono, vapondola okulilongesila unene komulume oo wekolelo. Ankho wonganeka nawa ovipuka, una ombili, wapua elundo, nokuamena aveho vomeumbo liae. Haunene, ankho utala okuti okulinga ehando lia Jeova Huku otyo tyakolela vali kovipuka aviho. Inkha tuhetekela ekolelo lia Noe konthele oyo, matuetela ononkhano onongwa aveho tuhole.

Okuhulililako, Jeova wapopila Noe okuti: “Lupuka mowato, ove nomukai wove, novana vove, novakai vovana vove.” Ombunga yetavela avatundumo, iya ovinyama aviho avivekuame. Viatundilemo ñgeni? Okuti viatundilemo vala nokuhateka? Au! Ovihonekwa vipopia okuti “viatundile mowato okulilandula omihoko nomihoko.” (Gênesis 8:15-19) Etyi Noe nombunga yae valupuka pondye, okutehelela omphepo yatenda nawa itunda momphunda nokutala onomphunda mbo Ararate, vamona okuti ohi ankho yasukuka nawa. Omakihi, noungangala, no noandyu onomphuki, novanthu aveho onondingavivi ankho kaveko vali!b Ovanthu ankho vena omphitilo yokuhimbika omuenyo omupe.

Noe ankho utyii etyi malingi. Wahimbikile okufenda. Watunga omutala wovilikutila iya povinyama vina vaetele “epanduvali” Huku ankho atala okuti viasukuka, wapolapo vimwe opo alinge otyilikutila pala Jeova. (Gênesis 7:2; 8:20) Okuti Jeova wahambukilue nefendelo olio?

Ombimbiliya ikumbulula nonondaka ombu onongwa okuti: “Jeova ahimbika okuiva omuniko omuwa.” Oluihamo Huku akalele nalo etyi ovanthu vayulisile ohi noungangala luapingwa nombembwa, nehambu liokutala ombunga imwe yovafendi vekolelo pano pohi ankho vatokola okulinga ehando liae. Jeova ankho kakevelela valinge ovipuka ngatyina vehena onkhali. Oversikulu itualako okuti: “Eyembelo liomutima womunthu, eevi tunde pouna.” (Gênesis 8:21) Tala oñgeni Jeova alekesile ovanthu okankhenda noumphua-lundo.

Huku wapola onkhano ombi ankho ikahi pohi. Etyi Andau na Eva vakala onomphuki, Huku wapopile onkhano ombi okuti mavekepuila nokulima mahi ohi ayahaave ovikuna. Tate ya Noe, Lameke, waluka omona wae okuti Noe, tyafuile tyihangununa “Okupululukwa,” ine “Eungumaneso” iya waulile okuti omona wae mahongolela ovanthu komuvo wokutunda monkhano oyo ombi. Noe wahambukilwe etyi anoñgonoka okuti pahe matale okufuisuapo kueulo olio iya ohi mayaave vali nawa ovikuna tyina vamalimi. Otyo Noe ahasetelele okukala omulimi!—Gênesis 3:17, 18; 5:28, 29; 9:20.

Tupu, Jeova waavelele ombunga aiho ya Noe ovitumino vimwe viayandyuluka nawa opo vivehongolele, okukutikinyamo okuhaipaa, noñgeni vena okuundapesa ohonde. Tupu, Huku walingile omphango novanthu, okulaa okuti kamaetako vali ombila onene pala okuhanyako ovanthu pano pohi. Opo alekese okuti mafuisipo omulao wae, Jeova waavela ovanthu omuvia wonkhongolo. Tunde monthiki oyo, omuvia wonkhongolo tumona utuavela ehinangeleso lipameka liomulao wa Jeova woliembia.—Gênesis 9:1-17.

Inkha ehipululo konthele ya Noe haliotyotyiliko ñgeno kutupu vali omuvia wonkhongolo. Mahi Noe tyilityili waliko, iya omuenyo wae ankho kawapepukile. Mokonda pomuvo opo, ovanthu ankho vakalako omanima omanyingi, omulume oo wekolelo wakaleleko vali omanima 350, iya omanima oo emuetelele ovitateka ovinyingi. Wapengesile unene etyi onthiki imwe akolelwe, mahi otyivi otyo tyeliyawisile vali unene etyi omutekula wae Kanaa alingile onkhali imwe onene vali, onkhali imwe yaetelele ombunga ya Kanaa ovitateka. Noe wakaleleko omanima omanyingi iya amono ovatekula vae velipakele mefendelo liovilolo, noungangala wopononthiki mba Nirode. Mahi, Noe wahambukilwe vali etyi amona omona wae Sem waava ongeleka ongwa yekolelo mombunga yae.—Gênesis 9:21-28; 10:8-11; 11:1-11.

Nga Noe, tuesukisa okutualako nekolelo namphila tumona ononkhumbi. Tyina vakuetu vatomba Huku yotyotyili ine vayekapo okumuumbila, onthue tuesukisa okutualako okumuumbila ngetyi tyalingile Noe. Jeova upanda unene vana vatualako nekolelo. Ngetyi Jesus Kristu apopia, “una wakoleleya alo konthyulilo, oe makayovolwa.”—Mateus 24:13.