Muesukisa Okukala Ovanthu Patyi

1, 2. Opo tupandwe na Huku tuesukisa okukala ovanthu patyi?

OVANTHU ovanyingi vesuka unene netyi vakuavo vasoka konthele yavo. Mahi mokonda Tuvakristau, etyi Jeova asoka konthele yetu tyakolela vali. Mokonda oe Omunthu omunene vali mouye auho, iya “ondyivindyivi yomuenyo.”—Salmo 36:9.

² Apostolu Petulu wapopile okuti opo tupandwe na Jeova, tuesukisa okukala “novituwa viasukuka novilinga vilekesa onthilo na Huku.” (Tanga 2 Pedro 3:11.) ‘Ovituwa vietu oviwa’ mavisukuka inkha tukala nomuenyo wasukuka mononkhalelo ambuho. Otyo tyakutikinya onkhalelo tusoka, nokulinga ovipuka, nokufenda Huku. Tupu tuesukisa okulinga “ovilinga vilekesa onthilo na Huku” vilundwa nohole onene tuna na Huku. Ngotyo, Huku ketupande vala mokonda yetyi tulinga, mahi tupu omokonda yetyi tukahi momutima. Mokonda Jeova “utala nawa momutima,” utyii inkha tuna ovituwa viasukuka iya inkha oe vala tukahi nokuumbila.—1 Crônicas 29:17.

 3. Omapulo patyi tuesukisa okulilinga?

³ Satanasi Eliapu, kahande tupandwe na Huku. Tyotyili, ukahi nokulinga ononkhono opo tuyekepo oupanga wetu na Jeova. Satanasi uundapesa ounkhembi opo aovole okutuyondya opo tuyekepo okufenda Huku. (João 8:44; 2 Coríntios 11:13-15) Moluotyo, tuesukisa okulipula okuti: ‘Oñgeni Satanasi ayondya ovanthu? Oityi ndyipondola okulinga opo ndyiyakulile oupanga wange na Jeova?’

 4. Oityi Satanasi alinga opo anyone oupanga wetu na Huku? Omokonda yatyi?

⁴ Omulongwa Tiagu wahoneka okuti: “Kese munthu uyondyua mokonda yokuhongiliyua nokulundwa nehando liae muene. Tyina ehando liamalingi enene, lityita onkhali, iya tyina onkhali yamafuisuapo, ayeeta ononkhia.” (Tiago 1:14, 15) Opo anyone oupanga wetu na Huku, Satanasi wovola okuhongiliya omutima wetu, mokonda omo mutunda omahando etu.

5, 6. (a) Oñgeni Satanasi aovola okuhongiliya omutima wetu? (b) Ovipuka patyi vitatu Satanasi aundapesa opo tukale nomahando omavi momutima? Okuti utyivila umwe okuviundapesa nawa?

⁵ Oñgeni Satanasi aovola okuhongiliya omutima wetu? Ombimbiliya yati: “Ouye auho ukahi pomaoko ondingavivi.” (1 João 5:19) Omauta a Satanasi akutikinya “ovipuka viomouye.” (Tanga 1 João 2:15, 16.) Mokueenda kuomanima omanyingi, Eliapu likahi nokuundapesa ouye uno opo liyondye ovanthu. Mokonda tukahi mouye uno, tuesukisa okuliyakulila komaliva ae.—João 17:15.

⁶ Satanasi wovola okupaka omahando omavi momutima wetu. Opo alinge ngotyo, uundapesa ‘ovipuka vitatu viomouye’ viapopiwa na apostolu João: (1) “epeleyo liolutu,” (2) “epeleyo liomaiho,” (3) “nokulisapa mokonda yomalumono omunthu ena.” Satanasi waundapesile omaliva oo etatu opo akengelele Jesus moluhandya. Mokonda Satanasi ukahi nokuundapesa omaliva oo omanima omanyingi, wakala omunongo wokueundapesa, iya wii eliva patyi maundapesa pala kese munthu. Tyina nkhele tuhenelilongese oñgeni matuliyakulila, tutalei oñgeni Eliapu lietyivilile okuyondya Eva mahi alihetyivili okuyondya Omona wa Huku.

 7. Oñgeni Satanasi aundapesile “epeleyo liolutu” opo ayondye Eva?

⁷ Ovanthu aveho vesukisa okulia opo vakale nomuenyo. Omutungi watunga ohi opo yaave okulia okunyingi. Satanasi upondola okuundapesa epeleyo lietu liokulia opo etuhongiliye okulinga otyipuka tyimwe tyinumanesa Huku. Tutalei oñgeni etyilingile Eva. (Tanga Gênesis 3:1-6.) Satanasi wapopila Eva okuti inkha alia kotyinyango “tyomuti wenoñgonoko liotyiwa notyivi,” kamankhi. Wati inkha utyilia, makala nga Huku. (Gênesis 2:9) Eliapu liapopila Eva okuti kesukisile okutavela ku Huku opo atualeko nomuenyo. Otyo ankho ounkhembi! Etyi Eliapu liapaka olusoke olo momutima wae, Eva ankho una ovipuka vivali pala okuholovona: Ankho upondola okuanya olusoke olo, ine okutualako okusoka kuotyo alo ehando liae konthele yotyinyango likula. Namphila ankho apondola okulia komiti omikuavo vikahi motyikunino, Eva waholovona okutualako okusoka konthele yomuti ankho ukahi pokati kotyikunino, iya moluotyo “atokolako otyinyango ali.” Satanasi wapakele momutima wa Eva ehando liotyipuka tyimwe ankho tyailikwa Nomutungi wae.

 8. Oñgeni Satanasi aundapesa “epeleyo liolutu” opo ayondye Jesus? Satanasi ketyivilile mokonda yatyi?

⁸ Satanasi waundapesile eliva ngolio opo ayondye Jesus. Etyi Jesus akala moluhandya ovitenya 40 novinthiki 40 tyahali, Satanasi waovolele okumuyondya pokuundapesa ehando liokulia. Satanasi wati: “Inkha umona wa Huku, popila omamanya aa akale onombolo opo ulie.” (Lucas 4:1-3) Jesus ankho una okuholovona povipuka vivali: Ankho upondola okuholovona okuhaundapesa ine okuundapesa epondolo liae opo ahambukiswe ehando liae konthele yokulia. Jesus ankho utyii okuti kesukisile okuundapesa epondolo liae opo alinge ehando liae. Namphila ankho ankhia ondyala, oupanga wae na Jeova ankho wakolela vali tyipona okulia. Jesus wakumbululile okuti: “Tyahonekwa okuti: ‘Omunthu kakala vala nomuenyo mokonda yombolo, mahi omokonda yatyiho tyitunda momulungu wa Jeova.’”—Lucas 4:4, okatoi.

 9. “Epeleyo liomaiho” oityi? Oñgeni Satanasi aundapesile eliva olio ku Eva?

⁹ Eliva ekuavo Satanasi aundapesa liapopiwa na João, “epeleyo liomaiho.” Omunthu upondola okuhimbika okupeleya tyimwe mokutyitala vala. Satanasi waundapesile epeleyo olio pala okuyondya Eva iya ati: “Omaiho enyi maaikuka.” Putyina Eva ankho atala komuti, ehando liae liokuliako aliliyawisa vali. Eva atale okuti omuti “ankho weetesa epeleyo liokuutala.”

10. Oñgeni Satanasi aundapesile “epeleyo liomaiho” ku Jesus? Oñgeni Jesus akumbululile?

¹⁰ Oñgeni Satanasi aundapesile “epeleyo liomaiho” ku Jesus? Satanasi “walekesile [Jesus] omautumini aeho o kombanda yohi. Iya Eliapu alimupopila okuti: ‘Mandyikuavela outumini ou auho, nenkhimano liao.’” (Lucas 4:5, 6) Jesus kamuene omauhamba aeho a pano pohi, mahi emonekelo liomunkhima wao. Satanasi ankho usoka okuti Jesus mayondyua netyi amona. Wapopilile Jesus okuti: “Inkha ufenda vala otyikando tyike kuame, atyiho etyi matyikala tyove.” (Lucas 4:7) Tyotyili, Jesus kalingile etyi Satanasi ahandele alinge. Wakumbulula liwa-liwa okuti: “Tyahonekwa okuti: ‘O Jeova Huku yove, una okufenda iya oe vala una okuumbila.’”—Lucas 4:8.

11. Oñgeni Eva ayondyelwe na Satanasi?

¹¹ Okuhulako, João wapopia “okulisapa mokonda yomalumono omunthu ena.” Etyi Andau na Eva ankho ovo vala vekahi pano pohi, ankho kavapondola okulipanda kuvakuavo mokonda yovipuka ankho vena. Mahi vakalele nelungavi. Satanasi walingisile Eva okutavela okuti pena otyipuka tyimwe ankho atokala okupewa mahi Huku kahandele okumuavela tyo. Eliapu liemupopila okuti inkha ulia “komuti wenoñgonoko liotyiwa notyivi,” “makala nga Huku, okunoñgonoka otyiwa notyivi.” (Gênesis 2:17; 3:5) Satanasi wahandele Eva asoke okuti kesukisile okutavela ku Jeova. Eva wetavelele kounkhembi oo mokonda yelungavi. Walia otyinyango tyailikwa iya asoko okuti kamankhi. Mahi ankho wasoka omapita!

12. Onkhalelo patyi Satanasi aovolele okuyondya Jesus? Oñgeni Jesus akumbululile?

¹² Jesus waava ongeleka ongwa yokuliola omutima, kalingile nga Eva! Satanasi wemuhongiliyile okulinga tyimwe ankho tyipondola okuhuvisa vakuavo mahi ankho tyipondola okulola Huku. Mahi, Jesus aanye okulinga otyipuka ngotyo mokonda otyo ankho elungavi! Ekumbululo liae liaviuka nokuayandyuluka, wati: “Tyapopiwa okuti: ‘Uhalole Jeova, Huku yove.’”—Tanga Lucas 4:9-12.

13, 14. Oñgeni Satanasi hono aovola okutuyondya?

¹³ Hono, Satanasi uundapesa omaliva aundapesile ku Eva na Jesus. Uundapesa “epeleyo liolutu” opo ayondye ovanthu okulinga oundalelapo ine okulia nokunwa unene. Uundapesa “epeleyo liomaiho” opo ayondye ovanthu okutala ovipuka vihongiliya ovanthu okulinga otyihola, haunene mo Internete. Tupu uundapesa epeleyo “liokulisapa mokonda yomalumono omunthu ena,” opo alingise ovanthu okukala nelungavi, nokuhanda vali unene omalumono, nounene, nomunkhima!

¹⁴ Satanasi uundapesa “ovipuka viomouye” ngetyi omufui aundapesa ovinyoka-nyoka ine ohitu opo akuate ombisi. Ovipuka ovio, oviwa pala ombisi, mahi mokati muna ondyolo. Tupu, Satanasi uundapesa ovipuka ovinyingi vimoneka ngoti viaviuka, nokuesukisa opo etuhongiliye okulinga etyi tyehelikuatele novitumino via Huku. Satanasi uhanda tutavele okuti omasuka-suka etu, nokutyinda omuenyo omuwa, viakolela vali tyipona okulinga ehando lia Huku. Okuti moyeke Satanasi ekuyondye?

15. Nga Jesus, oñgeni tupondola okulityilika okuyondyua na Satanasi?

¹⁵ Eva wayondyelue na Satanasi, mahi Jesus kayondyelwe. Apeho Satanasi aovolele okumuyondya, Jesus wakumbululile Novihonekwa okuti: “Tyahonekwa,” ine “Tyapopiwa.” Inkha tulilongesa Ombimbiliya nombili, matunoñgonoka nawa Ovihonekwa nokutyivila okuhinangela onoversikulu mbupondola okutukuatesako tyina tukahi nokulolwa. (Salmo 1:1, 2) Okuhinangela onongeleka mbovaumbili va Huku vekolelo matyitukuatesako okuvehetekela. (Romanos 15:4) Okukala nonthilo yotyotyili na Jeova, tyilekesa okukala nohole netyi ehole nokuyala etyi eyele, matyituyakulila.—Salmo 97:10.

16, 17. Oñgeni “onondunge” mbetu mbupondola okutukalesa?

¹⁶ Apostolu Paulu wetuavela ondundo tuundapese “onondunge” mbetu opo tusoke ngetyi Huku asoka, atuhasoko ngetyi ouye usoka. (Romanos 12:1, 2) Paulu utuhinangelesa okuti tuesukisa okutala nawa kuetyi tusoka. Wati: “Tukahi nokuhanya omalusoke novipuka aviho viliyela pombanda yenoñgonoko lia Huku. Atukuate omalusoke aeho ngatyina ononkhuatwa, opo etavele ku Kristu.” (2 Coríntios 10:5) Omalusoke etu ena epondolo enene kuonthue, moluotyo, tuesukisa apeho okuovola okusoka kovipuka vihambukiswa Huku.—Filipenses 4:8.

¹⁷ Inkha tuhanda okukala ovanthu vasukuka, tuna okuanya omalusoke nomahando omavi. Tuna okukala nohole na Jeova “nomutima wasukuka.” (1 Timóteo 1:5) Mahi mokonda omutima omukengeleli, tupondola alo umwe okuhaimbuka oñgeni “ovipuka viomouye” vikahi nokutukalesa. (Jeremias 17:9) Moluotyo, tyakolela tulandule elondolo lia Paulu liati: “Tualeiko okutala nawa inkha mukahi mekolelo, tualeiko okulinoñgonoka oñgeni onwe muene mukahi.” Putyina tulilongesa Ombimbiliya, tuesukisa okulipula: ‘Okuti omalusoke nomahando ange ahambukiswa Huku?’—2 Coríntios 13:5.

18, 19. Omokonda yatyi tuesukisila okulinga ononkhono opo tukale ovanthu vahambukiswa Jeova?

¹⁸ Otyipuka otyikuavo tyipondola okutukuatesako okuanya “ovipuka viomouye,” okuhinangela onondaka mba João mbokuati: “Ouye ukahi nokulamba, kumwe nepeleyo liao, mahi una ulinga etyi Huku ahanda makalako apeho.” (1 João 2:17) Ouye wa Satanasi umoneka ngoti maukalako apeho. Mahi, nthiki imwe maukapwa. Okuhinangela okuti ovipuka aviho mouye uno apa katutu mavikapuako, matyitukuatesako okuhayondyua Neliapu.

¹⁹ Apostolu Petulu wahoneka okuti tuesukisa okukala ovanthu vapandwa na Huku putyina “tukevelela nokunoñgonoka nawa okuya kuonthiki ya Jeova, muna eulu maliya okusengululwa notupia iya ovipuka maviya okusenguluka nomutokotwe omunene!” (2 Pedro 3:12) Apaka katutu, onthiki oyo maiya, iya Jeova makahanyako ouye auho wa Satanasi. Tyina nkhele onthiki oyo yehenehikepo, Satanasi matualako okuundapesa “ovipuka viomouye,” opo etuyondye, ngetyi alolele Eva na Jesus. Tuhakalei nga Eva atuovola okuhambukiswa omahando etu. Okulinga ngotyo matulekesa okuti Satanasi o huku yetu. Tuesukisa okukala nga Jesus waanyene omakengelelo oo, namphila Satanasi alinga ngoti ovipuka ovio oviwa. Kese umwe puonthue alinge ononkhono opo akale omunthu uhambukiswa Jeova.