Olie Watunga Huku?

Soka ku he, ukahi nokutomphola nomona wae womanima epandu vali. Oe wati, “Kohale-hale, Huku watunga ohi, novipuka aviho vikahimo, tupu watunga ekumbi, nohanyi no nonthungululu.” Omona asoko konthele yotyo iya pahe apulu okuti, “Tate, olie watunga Huku?”

He akumbulula okuti, “nawike watunga Huku.” “Oe apeho oko ekahiale.” Ehangununo olio lihehi omona elitavela. Mahi tyina ekula epulo olio litualako okumungwangwanesa. Oe utualako okulipula okuti oñgeni omunthu apondola okukalako ehena onthyimbi. Mokonda alo umwe ouye una onthyimbi. Oe ulipula okuti, ‘Opi Huku atuka?’

Oñgeni Ombimbiliya ikumbulula epulo olio? Haunene muna ononthele mbelifwa no ya he wapopiwa pombanda. Moisesi wahoneka okuti: “Ove Jeova, . . . etyi nkhele onomphunda mbehenetungwe, ine etyi nkhele uhenelinge ohi, ‘enga, tunde komuvo uhapu alo komuvo uhapu, ove vala Huku.’” (Salmo 90:1, 2) Tupu, omuuli Isaías wahoneka okuti: “Kamuetyinoñgonokele ine kamuetyiivile? Jeova, Omupakeko wohi aiho, oe Huku omuvo uhapu”! (Isaías 40:28) Tyelifwa notyo, konyima Juda wapopia Huku okuti ukahiko “tunde komavonge-vonge aeho omanima o konyima.”​—Judas 25.

Ono testu ombo mbutulekesa okuti Huku “Ohamba yapeho” ngetyi apostolu Paulu apopia. (1 Timóteo 1:17) Otyo tyilekesa okuti Huku ukahiko omuvo watyo auho, omuvo umwe tuhavalula. Iya apeho makalakalako. (Revelação 1:8) Ngotyo, mokonda ukalako apeho, tyaviuka okumuihana okuti o Wepondolo aliho.

Omokonda yatyi otyo tyitupuiya okunoñgonoka? Omokonda yetyi omuenyo wetu omusupi, onkhalelo tusoka omuvo yelikalela no ya Jeova. Mokonda Huku ukalako omuvo uhapu, kwe omanima 1.000 ongatyina onthiki ike vala. (2 Pedro 3:8) Mongeleka: Otyimphunia-mphunia tyikalako vala ononthiki 50, okuti tyipondola okulieleka nonthue tukala omanima 70 ine 80? Katyitavela! Anthi, Ombimbiliya ipopia okuti onthue tukahi ngotyimphunia-mphunia tyina itueeleka Nomutungi wetu Omunene. Alo umwe ounongo wetu kauhi okuweleka no wae. (Isaías 40:22; 55:8, 9) Katyihuvisa okuti kuna ovipuka ovinyingi konthele yo ñgeni Jeova ekahi, ovanthu vahanoñgonoka nawa.

Namphila onkhalelo yokukalako apeho ya Jeova itupuiya okuinoñgonoka, tupondola okuti otyo otyili. Inkha pena munthu watunga Huku, omunthu oo ñgeno oe wakala Omutungi. Anthi, ngetyi Ombimbiliya ipopia, Jeova oe “watunga ovipuka aviho.” (Revelação 4:11) Tupu, onthue tutyii okuti ouye ankho kauko. (Gênesis 1:1, 2) Opi watunda? Omutungi wao ankho ulikoale tete. Tupu ankho oko ekahiale tyina kuhenekale ovanthu ovakuavo, ngetyi Omona wae wongunga no noandyu. (Jó 38:4, 7; Colossenses 1:15) Tyotyili, ngotyo, ankho ukahiko aike tete. Huku katungilwe; natyike ankho tyikahikoale tyipondola okumutunga.

Okukahiko kuetu novipuka aviho viatungwa vilekesa nawa okuti kuna Huku ukahiko apeho. Una ukahi nokuendesa ovipuka aviho viatungwa, Una wapakako ovitumino vihongolela ouye auho, una okukalako apeho. Tupu oe vala wavela omuenyo ovipuka aviho.​—Jó 33:4.