Ame Ankho Ndyisoka Okuti Omuenyo Natyinda Omuwa Unene

Ame natyitilwa mepundaumbo limwe etutu mo Polonia, popepi nonondimbu mbo Alemanha. Ankho ndyina ombembwa, mokonda ankho ndyikala pokati komapia no nohika. Ovo tate ankho vena oluembia, ankho vankhuatesako okukala nomuenyo omuwa, nokulilongesa nawa mosikola, opo ndyivase ovilinga viomunkhima.

Ovitateka viange viahimbika, etyi nekelilongesa konthele yovitumino mosikola onene mepundaumbo lio Wrocław. Mokonda ankho ndyikahi kokule no tate, andyilingi oupanga na vana valinga ovivi. Ame, apeho ankho ndyihole okutala vokusana ombola. Mahi, mokonda yokuhongiliyua nomapanga omape, ohole yange ailiyawisa. Otyikundyi tyokusana ombola ankho ndyihole unene, otyo ko Warsaw. Mo Vityasapalo no Vityalumingu, ankho ndyivelandula kese oku vakayumbila. Iya momaungendi oo, ankho tunwa, tusipa omapangwe, pamwe tulwa na vana vaama kotyikundyi otyikuavo. Iya kuamwe, otyo ankho ngoti ovitalukiso vala viokulipola epuila ine epuilo. Mahi, ankho ndyityii okuti okukuatwa tyipondola okunyona ovilinga ndyiovola.

Ame nomapanga ange, ankho tukatalela-po onondyuo mbovipito no mbokuhikisila. Ovikando ovinyingi tyina tuamehiki-mo, tulwisa ovanthu. Moluotyo, andyikuatwa ovikando ovinyingi no pulisa, mahi pamwe ankho ndyivepa onombongo, opo vahamphake mokaleya. Ame ankho ndyisoka okuti omuenyo natyinda omuwa unene. Mahi, momutima wange ankho ndyityii okuti etyi ndyikahi nokulinga tyapenga. Ankho ndyienda kokapela mo Vityalumingu okuovola okutulisa omutima wange.

Mo 2004, Onombangi mba Jeova vevali, aveya okutotola pepito liange, iya andyitavela okutomphola navo konthele Yombimbiliya. Iya etyi natualako okunoñgonoka vali nawa oñgeni Omukristau wotyotyili ena okukala, atyinkhalesa omapita. Ankho ndyityii okuti ndyina okuyekapo okunwa unene, nokupuena omapangwe, nomapanga ahaendela monondonga mbo Mbimbiliya. Tupu, andyiimbuka okuti nesukisa okuyekapo okukala omukalavi novituwa ovikuavo ovivi. Namphila ankho ndyityii okuti nesukisa okupiluluka, mahi ankho hapilulukile ni vala katutu.

Nahimbika vala okupiluluka motyinthiki nalwa novalume etyinana. Iya avanthokesila pohi metapalo, vamwe vasana, ovakuavo vaveta no nonyongo momutwe. Etyi nelitehelela okuti mandyinkhi, andyilikuambela okuti: “Ndyevele-vo Jeova, mokonda halingile ononkhono mbokuendela Mondaka yove. Inkha unkhuatesako andyihupu, mandyililongesa Ombimbiliya no Nombangi mbove, andyipilulula onkhalelo yomuenyo wange.” Kehuviso, andyihupu umwe. Iya andyililongesa Ombimbiliya ngetyi nalaa.

Mo 2006, andyiilukila ko Inglaterra. Ankho ndyihanda okumona onombongo mbutuuka opo ndyikondoke ko Polonia, ndyikamanuhule okulilongesa ovitumino. Putyina ankho ndyitualako okulongeswa Ombimbiliya, otestu imwe aihiki unene komutima wange. Apostolu Paulu wahoneka okuti: ‘Tupu ovipuka aviho ame ndyivitala ngatyina vihasilivila, mokonda yenoñgonoko liavilapo lia Tatekulu Jesus Kristu. Mokonda yae netavela okuyeka-po ovipuka aviho, nokuvitala ngatyina vihasilivila, opo ndyikale noupanga omuwa na Kristu.’ (Filipenses 3:8) Apostolu Paulu nae waendele mosikola yovitumino nga ame. Tupu nae wali ongangala onene. (Atos 8:3) Mahi, waimbukile okuti kuna onkhalelo ongwa yokutyinda omuenyo: okuumbila Huku nokulinga atyiho apondola opo ahetekele Jesus. Etyi nasokolola nawa ongeleka ya Paulu, andyiimbuka okuti okuovola ovilinga vionombongo ononyingi, nokukala omukalavi, katyieta ehambu. Iya andyikala nonthumbi yokuti inkha Paulu wetyivilile okupiluluka, name mandyityivili. Moluotyo, andyitokola okukala mo Inglaterra, iya andyiyeke-po okutualako okulilongesa ovitumino.

Putyina ankho ndyitualako okulilongesa vali konthele ya Jeova, andyilitehelela okuti nafuena vali kwe. Omilao viae viokuevela vana vahanda okupiluluka tyotyili, avihiki unene komutima wange. (Atos 2:38) Nasokolola nawa konondaka mba 1 João 4:16, mbati “Huku oluembia.” Andyihimbika okunoñgonoka oityi Huku eyelele okuliipaa.

Tupu, nahuvile unene novituwa vio Nombangi mba Jeova. Kuame, ankho tyayandyuluka nawa okuti valinga ononkhono mbokuendela monondonga mbo Mbimbiliya. Name ankho nahanda okukala meongano lio Nombangi mba Jeova, lina ehambu. Andyilingi ononkhono, nomapiluluko momuenyo wange. Iya mo 2008 andyimbatisalwa, andyikala Ombangi ya Jeova.

Ombimbiliya yamphilulula. Nayeka-po elungavi, noungangala, nokusipa omapangwe, nokunwa unene, nokuhole unene okutala ombola. Pahe ndyimuumbili wa Huku, ndyina ohole yokulongesa vakuetu konthele Yombimbiliya. Nkhele ndyihole okutala vana vasana ombola, mahi hipesela vali unene omuvo motyitalukiso otyo.

Pahe ndyina ehambu, kumwe nomukai wange omuwa Esther, tufenda nae Jeova. Tuna ehambu enene liokulongesa Ombimbiliya ovanthu vapopia elaka lio va Polonia, kokulio kwo Inglaterra. Etyi, otyikando tyo tete, ndyilitehelela okuti ndyina ehambu liotyotyili momuenyo wange. Pahe ndyina omutima wasukuka, nomuenyo una esilivilo enene.