Siovaa Wandyavela Vali Tyipona Etyi Ankho Ndyikevelela

Pahe etyi nakala omukokoli-ndyila, omuenyo wange aupiluluka monkhalelo ankho nahakevelela. (Efe. 3:20) Mahi hamwe ukahi nokulipula okuti: ‘Ñgeni ngotyo?’ Kevelei ndyimupopile atyiho.

Natyitilwa kepunda-umbo lyo Berlin ko Alemanha. Etyi natyitwa ankho palamba vala onohanyi mbuhehi etyi Ovilwa Vya Vali Viouye Auho viahimbika mo 1939. Pahe etyi ovilwa ovio ankho vikahi nokupwa mo 1945, omafualali ahimbika okutokesa onombomba mepunda-umbo lyo Berlin. Onthiki imwe onombomba ambututanena ponthele yondyuo yetu. Onthue atukaholama mondyuo imwe yatungwa novatumini opo iyakulile ovanthu konombomba. Iya konyima atuende kepunda-umbo omu me atyitilwa ko Erfurt.

Me ankho ukahi nokuovola otyili. Ankho utanga omikanda viahonekwa novanongo iya aovola okunoñgonoka onongeleya ononyingi, mahi nii ehetyivasi. Mo 1948 Onombangi mba Siovaa vevali aveya meumbo lietu. Me evepopila vanyingile iya evelingi omapulo omanyingi. Apahalambe oola, me etupopila kumwe nomphange yange okuti: “Navasa otyili!” Konyima, atuho atuhimbika okuenda komaliongiyo mo Erfurt.

Mo 1950 atukondoka ko Berlin iya ankho tuli mewaneno lyo Berlin-Kreuzberg. Konyima atuilukila konthele onkhuavo yepunda-umbo iya pahe ankho tuli mewaneno lyo Berlin-Tempelhof. Mokueenda kuomuvo, me ambatisalwa mahi ame ankho ndyilitehelela okuti hafuilepo. Omokonda yatyi?

Ankho tyimphuilisa okuundapa vali unene movilinga vya Huku mokonda ankho ndyina ohonyi. Nakala omanima evali nokuenda movilinga viokuivisa mahi nii anahapopi nomunthu nawike. Ovipuka viapiluluka vala etyi nanoñgonoka ovakuatate ovanyingi no nomphange vakoleleyile etyi ankho vekahi motyipembe tyo nonkhuatwa ko Alemanha. Ovakuavo ankho vetyii okuti vapondola okukuatwa avapakwa mokaleya, mahi no ngotyo valingile atyiho opo vatuale omikanda konthele onkhuavo yo Alemanha. Ovakuatate ovo ankho vakola omutima iya ankho vehole unene Siovaa. Onongeleka mbavo mbanthyuvisile unene! Andyisoko okuti inkha ovakuatate ovo vapaka omuenyo wavo motyiponga mokonda yohole vena na Siovaa novakuatate vavo, opo nthainyo na ame ndyina okulinga ononkhono mbokuyekapo okukala nohonyi.

Andyihimbika okufinda ohonyi etyi naundapa mo kambanya kalingwa mo 1955. Omukuatate Nathan Knorr apopi konthele yokambanya mo Informante.a Wapopia okuti oko, okamwe povikambanya ovinene vali eongano liaonganeka. Tupu wapopile okuti inkha ovaivisi vaundapa nombili mokueenda kuohanyi yokambanya ankho mavahambukwa unene. Iya otyo umwe tyaendelepo! Konyima yokambanya, andyilipakula ku Siovaa, iya andyimbatisalwa onthiki ike na tate yange nomphange yange mo 1956. Mahi apahalambe omuvo omunyingi, andyilingi etokolo ekuavo liakolela unene.

Ame ankho ndyityii umwe okuti ovilinga vioukokoli-ndyila ankho mavinkhalesa nehambu, mahi no ngotyo ankho ndyilikondola. Tete, andyililongesa okulanda nokulandesa ovipuka kovilongo ovikuavo. Konyima andyiovola ovilinga opo ndyikale omunongo movitanda. Ngotyo, mo 1961 andyihimbika okuundapa mepunda-umbo lyo Hamburg ko Alemanha. Andyilikondola okukala omukokoli-ndyila mokonda ankho ndyihole unene ovilinga viange. Pahe, oityi ankho mandyilingi?

Ndyipandula unene Siovaa etyi aundapesa ovakuatate vena ohole opo vankhuateseko okupaka ovilinga viae pomphangu yo tete. Ovanyingi pomapanga ange avakala ovakokoli-ndyila iya avakala ongeleka ongwa pala ame. Tupu omukuatate umwe wali motyipembe tyo nonkhuatwa utiwa o Erich Mundt, amphe ondundo yokuyumba onthumbi mu Siovaa. Wamphopila okuti motyipembe tyo nonkhuatwa, vana vayumbile onthumbi mononkhono mbavo muene konyima vasoyele. Mahi vana vayumbile onthumbi mu Siovaa nomutima auho, vatuaileko okukala ovakuatyili iya avakala onomphandyi meongano.

Tupu Omukuatate Martin Poetzinger, wali umwe Pononkhalamutwe mbo Nombangi mba Siovaa, watuaileko okupameka ovakuatate vae motyipembe tyo nonkhuatwa okuti: “Kolei omutima! Otyipuka tyakolela vali mupondola okukala natyo, omutima wakola.” Etyi nasokolola nawa konondaka ombo, andyiyekepo ovilinga viange iya andyikala omukokoli-ndyila mu Junho yo 1963. Olio, etokolo ewa vali nalinga momuenyo wange! Apakala vala onohanyi onombali andyikongwa opo ndyikale omukokoli-ndyila wavilapo. Etyi palamba enima, Siovaa andyavela vali tyipona etyi ankho ndyikevelela. Andyikongwa opo ndyende Kosikola 44 yo Gileade.

“Uhayekepo liwa-liwa otyilinga tyove.” Otyo, otyimwe povipuka nelilongesa. Haunene nelilongesila otyipuka otyo komukuatate Nathan Knorr na Lyman Swingle. Vetuavela ondundo yokutualako notyilinga tyetu alo umwe tyina tyihapepukile. Omukuatate Nathan Knorr nthiki imwe wetupulile okuti: “Opi mamutale vali? Okuti mamusoyo mokonda yesilo, nomauvela, noluhepo? Ine mamuhambukilwa omiti omiwa, no nonthemo, novanthu vekahi nawa mamuvasi? Kalei nohole novanthu!” Onthiki imwe Omukuatate Lyman Swingle apopi omokonda yatyi vamwe vayekelapo liwa-liwa ovilinga viavo. Mokueenda kuelongomona, atokesa ononkhuka. Mokonda yotyo, atalamapo katutu iya konyima amanuhula! Atyinthyiki unene komutima iya andyitokola okuhayeke natyike tyinthyilike okukuatesako Kilisitu no nondenge mbae. — Mat. 25:40.

Etyi tuapewa otyilinga tyetu, ovakuatate vamwe vaundapa mo Mbetele avahimbika okutupula opi ankho matukaundapa. Avapopi ovipuka oviwa konthele yovilongo vakuetu ankho mavakaundapa. Mahi etyi nevepopila okuti mandyiende ko Congo (Kinshasa), avatalama-po katutu iya avati: “Oo, oko Congo! Siovaa ekuyambe!” Pomuvo opo mo Congo ankho muna ovilwa iya ovanthu ankho vekahi nokuliipaa unene. Mahi andyitualako okusoka ku etyi nelilongesa mosikola yo Gileade. Mu Setembro yo 1967, ame na Heinrich Dehnbostel na Claude Lindsay atukaundapa mepunda-umbo lyo Kinshasa ko Congo.

Etyi tuehika ko Kinshasa, atukala onohanyi ononthatu nokulilongesa o Frances. Konyima atueende ko Lubumbashi. Kohale otyilongo otyo ankho tyitiwa Elisabethville iya tyikala popepi no Zambia. Atuundapa mepunda-umbo olio.

Mepunda-umbo olio ankho petupu ou uneivise-mo. Moluotyo onthue tuatetekela okuivisa onondaka onongwa ovanthu ovanyingi ankho vakalamo. Tuakala-ko vala katutu, atukala novalongwa ovanyingi vo Mbimbiliya. Tupu atuave oumbangi kovanthu vamwe ankho vaundapa ku kaputu no nopulisa. Ovanyingi ankho vena onthilo Nondaka ya Huku novilinga vietu viokuivisa. Mokonda ovanthu ovanyingi vapopia o Suaíli, ame na Claude Lindsay atulilongesa elaka olio. Konyima atutumwa opo tukaundape mewaneno lyo Suaíli.

Namphila tualingile ovipuka ovinyingi oviwa, mahi tupu tuakalele novitateka. Apeho ankho tulivasa nomafualali akolwa no nopulisa mbututendeleya ovipuka ankho tuahalingile. Nthiki imwe otyikundyi tyo nopulisa atyiya meliongiyo lietu ankho lilingilwa meumbo lyo nomisionaliu, avetutyindi-po avetutuala kombonge. Atukala-ko alo kounthiki.

Mo 1969, andyipewa otyilinga tyokutalelapo omawaneno. Ovilinga ovio viampha omphitilo yokutala oñgeni ovipuka mo Afrika vikahi. Mongeleka, ankho ndyenda ovikambo ovile iya pamwe ankho ndyikuata mohika yeyula onthata neholi. Meumbo limwe nehikilile, otyuufwa tyimwe tyina ovipiona ankho tyilala mombuelo youla wange. Kombimba, ankho tyiviela iya ankho tyimphahula-po. Otyo nalumwe mandyityilimbwi. Nkhele ndyihinangela nawa etyi ankho ndyikala novakuatate potyoto kongulohi otyo tutomphola konthele yo Mbimbiliya.

Otyitateka tyimwe otyinene tuakalele natyo, okukala mewaneno novanthu ankho veliti ovakuatate mahi naina ankho vahula kotyikundyi tyo pulitika tyitiwa Kitawala.b Vamwe velilingisile avakala umwe Onombangi mba Siovaa. Alo umwe vamwe avehiki kokukala ovakulu vomawaneno. Mahi ovakuatate ovakuatyili avahimbika okulekesa ovanthu ovo ankho vekahi ngo “nonkhanda mbaholama kohi yomeva.” (Sunda 12) Konyima, Siovaa evepolo meongano liae iya ovanthu ovanyingi avahimbika okuya motyili.

Mo 1971 andyikaundapa ko Mbetele yo ko Kinshasa. Mo Mbetele, naundapele movilinga ovinyingi, ngetyi okutambula nokutuma omikanda kovakuatate, nokuonganeka omikanda, novilinga ovikuavo. Mo Mbetele nelilongesa okuonganeka ovilinga motyilongo otyinene tyihena ovipuka ovinyingi. Pamwe, omikanda tutuma ovakuatate ankho vikala onohanyi ononyingi opo vihike. Tete omikanda ankho vipakwa mo aviau, konyima avipolwa-mo avipakwa mo nowato iya pamwe owato ihaka mo nonthemo mbukala momaande, aikala-mo onosimanu ononyingi. Namphila ankho tuna ovitateka ovio novikuavo vali, mahi no ngotyo ankho tufuisapo nawa ovilinga.

Ankho ndyityihole unene okutala ovakuatate vaonganeka ovionge ovinene nonombongo mbuhehi. Ankho vaundapesa omiti, neholi opo valinge opaluku. Tupu ankho vawinga nawa eholi opo vapumphame-ko. Ankho vatunga nomimbungu ovitunge no nomesa. Iya mokonda ankho vetupu ono peleko ankho vahonga nawa omakakava opo vapapele. Namphila ame ankho nehetyivili okuvekuatesako, mahi ankho ndyihuva unene nounongo wavo. Ankho ndyivehole unene. Etyi natumwa kotyilongo otyikuavo andyiveivaluka unene!

Mo 1974 andyitumwa ko Kenia opo ndyikapundape mo Mbetele yo ko Nairobi. Ankho tuna ovilinga ovinyingi mokonda o Mbetele yo ko Kenia ankho yonganeka ovilinga movilongo ovikuavo vikala popepi. Iya vimwe povilongo ovio, ovilinga vietu ankho viailikwa. Apeho ankho vanthuma ndyikatalele-po ovakuatate kovilongo ovio, haunene ko Etiopia. Pomuvo opo, ovakuatate wo ko Etiopia ankho vekahi nokuhataikiswa iya ankho vena ovitateka ovinyingi. Vamwe ankho vavetwa avapakwa mokaleya. Ovakuavo alo umwe vaipaelwe. Mahi no ngotyo ovakuatate ovo vakoleleyile mokonda ankho vena oupanga wapama na Siovaa no pokati kavo.

Mo 1980, omuenyo wange aukala vali nawa etyi nanepa Gail Matheson. Gail watyitilwa ko Canada iya tuakalele nae mosikola yo Gileade. Etyi osikola yapwa, atumwa opo akakale omisionaliu ko Bolivia. Iya onthue ankho tulituma omikanda. Etyi palamba omanima 12, atulivasi vali mo Nova York. Apahalambe omuvo omunyingi, atulinepela ko Kenia. Gail omukai wapama motyili iya uhambukilwa ovipuka ena. Ovituwa ovio ndyivihole unene. Alo hono omundyila yange, nomukuatesiko wange.

Mo 1986 pahe ankho ndyina ovilinga vivali: Okutalelapo omawaneno, nokuundapa Mokomisau Yofiliyale. Ankho tutalelapo omawaneno movilongo ovinyingi omu ovilinga vionganekwa no Mbetele yo ko Kenia.

Ndyihinangela etyi ankho tukahi nokufuika otyonge kepunda-umbo lyo Asmara ko Eritreia, mo 1992. Pomuvo opo ovilinga vietu motyilongo otyo ankho kaviailikilwe. Atuvasi vala omphangu ihekahi nawa opo tulinge otyonge. Mahi monthiki yotyonge, andyihuvu unene nonkhalelo ovakuatate vaviukisa nawa omphangu ina. Ankho yasukuka nawa opo tufende Siovaa. Onombunga ambueta ovipuka viokuhiwiswa iya avahiki ovipuka ankho vihekahi nawa. Otyonge atyiende nawa iya kueile ovanthu vena 1.279.

Ovilinga viokutalelapo omawaneno ankho epiluluko limwe momuenyo wetu, mokonda pahe ankho tuna okuiluka onosimanu ambuho. Onthiki imwe tualele meumbo limwe likahi nawa ankho liatungilwa konthele yelunga. Onthiki onkhuavo, atulala mondyuo yatungwa no nosapa iya okandyuo kokutalamena ankho kekahi kokule. Mahi ankho katyesukisile oku tuundapa, otyipuka ankho tuhole vali, okuundapa movilinga viokuivisa novakokoli-ndyila novaivisi. Pahe etyi tuapewa vali otyilinga otyikuavo, atulisipo nomapanga etu. Ankho tutyii okuti matuveivaluka unene.

Konthyulilo yo 1980 alo konthyimbi yo 1990, ovatumini avayekepo okuilika efendelo lietu movilongo ovinyingi omu ovilinga ankho vionganekwa no Mbetele yo Kenia. Ngotyo, movilongo ovio amutungwa ono Mbetele. Mo 1993, atutumwa tukaundape ko Mbetele yo ko Addis Ababa, Etiopia. Tuaundapele omanima omanyingi tyaholama, mahi pahe ovilinga vietu ankho kaviailikilwe vali.

Siovaa ukahi nokuyamba unene ovilinga ko Etiopia. Ovakuatate ovanyingi no nomphange vakala ovakokoli-ndyila. Tunde mo 2012, ovaivisi ovanyingi vaundapa ngo vakokoli-ndyila vapola pokati kese enima. Tupu, kulingwa onosikola Mbouhamba, iya kuatungwa-le Onondyuo mbo Maliongiyo mbulamba po 120. Mo 2004 ombunga yo Mbetele aiilukila ko Mbetele omphe, iya konthele yo Mbetele akutungwa Ondyuo Yovionge. Ovipuka ovio aviho, oviawa vya Siovaa!

Mokueenda kuomanima, ame na Gail tuakala noupanga omuwa novakuatate no nomphange vo ko Etiopia. Onthue tuvehole unene mokonda vehole ovanthu iya vena okankhenda. Mokonda pahe tukahi nokuvela, tuatumwa opo tukaundape mo Mbetele yo ko Europa Central. Namphila kuno tukahi nokutekulwa nawa, mahi no ngotyo tueivaluka omapanga etu o ko Etiopia.

Tuamona oñgeni Siovaa ekahi nokukulisa ovilinga viae. (1 Kol. 3:6, 9) Mongeleka, etyi naivisa otyikando tyo tete kovanthu vatundile ko Ruanda opo vakaheye o kobre ko Congo, ko Ruanda ankho kutupu ovaivisi. Mahi pahe kuna ovaivisi valamba po 30.000. Mo 1967 ko Congo ankho kuna vala ovaivisi vehungi po 6.000. Pahe kuna ovaivisi vena 230.000, iya ovanthu ovanyingi-nyingi veile Pehinangelo Liononkhia mba Tatekulu mo 2018. Ovilongo aviho ankho vihongolelwa no Mbetele yo Kenia, vina ovaivisi valamba po 100.000.

Palambale omanima 50 tunde apa Siovaa aundapesa ovakuatate opo vankhuateseko okunyingila movilinga viomuvo auho. Namphila nkhele ndyina ohonyi mahi nelilongesa okuyumba onthumbi mu Siovaa. Ovipuka viaenda momuenyo wange etyi ankho ndyili mo Afrika, viankhuatesako okupwa-elundo nokuhambukilwa ovipuka ndyina. Ame nomukai wange tupandula unene ovakuatate no nomphange vetutambulile nawa momaumbo avo. Ovakuatate ovo ankho vakoleleya movitateka ovinyingi iya ankho vayumba onthumbi mu Siovaa. Ndyipandula unene atyiho Siovaa andingila mokonda yokankhenda kae. Siovaa wandyamba monkhalelo ankho nahakevelela! — Sal. 37:4.