Tavela Tyina Onkhuino Ihika

ATUHO tutavela okuti Siovaa ukahi nokuhongolela ovanthu vae ‘mononthiki mbuno mbahulilila.’ Tupu uveavela etyi vesukisa opo vatualeko noupanga omuwa nae. (2 Tim. 3:1) Mahi onthue muene tutyii inkha matutavela ovipuka Siovaa etuavela ine kamatutavela. Omuenyo wetu ukahi ngo wova Isilayeli puetyi ankho veli moluhandya. Tyina onkhuino yamahiki, ankho vena ovipuka vimwe vesukisa okulinga.

Siovaa watumine Moisesi alinge ononkhuino onombali notyivela tyimwe tyitiwa o palata. Ononkhuino ombo ankho ‘opala okuihana ova Isilayeli veliongiye, no pala okuvepopila okuti oola yokuenda yehikapo.’ (Núm. 10:2) Ovanakwa ankho vena okumbuhika mononkhalelo mbelikalaila opo ovanthu vanoñgonoke etyi tyihandwa. (Núm. 10:3-8) Hono, ovanthu va Huku navo vapopilwa etyi mavalingi mononkhalelo ononyingi. Monthele ei, matulilongesa ononkhalelo ononthatu, mbutuhinangelesa etyi ankho tyilingwa pomuvo wova Isilayeli. (1) Tyina tukongwa komaliongiyo omanene, (2) tyina ovakulu vewaneno valongeswa, (3) tyina pamoneka omapiluluko.

Tyina Siovaa ankho ahanda ovanthu veliongiyile kombundi yekaka liefendelo, ovanakwa ankho vahika ononkhuino ambuho onombali. (Núm. 10:3) Ova Isilayeli aveho ankho vetyiiva. Vana ankho vokukala popepi yekaka liefendelo ankho vehika liwa. Ovakuavo ankho vaenda-po vali okahimbwe. Tyilinge vana vakala popepi, tyilinge vana vakala katutu kokule, aveho ankho vetyii okuti Siovaa uvehandela pekaka liefendelo na valongeswe.

Hono, onthue katuihanwa opo tuende pekaka liefendelo. Mahi tuihanwa opo tuende komaliongiyo omanene. Omaliongiyo oo, ovionge nomaliongiyo omakuavo, omu tulongeswa ovipuka vitukuatesako unene. Mouye auho, ovanthu va Huku valongeswa vala otyipuka tyike. Vana vokuhole okuenda komaliongiyo oo, vetyii oñgeni otyiwa okulongesilwa kumwe na vakuavo! Vamwe vaenda ehimbwe, ovakuavo vaenda-po vala katutu. Tyilinge vokuhole okuenda unene, tyilinge vokukala popepi, nawike ulitehelela okuti welipuilisa vala.

Ovakuatate vamwe vakala unene kokule. Okuti navo vehole umwe okukala pomaliongiyo omanene? Yoo. Onomakina, ngetyi o televisau novikuavo vali, mbuhole okukuatesako ovakuatate ovo okulandula omaliongiyo omanene. Katee umwe, vamwe velitehelela ngoti navo opo vekahi. Otyo tyaendele-po etyi omukuatate umwe watunda kombala yetu ko Estados Unidos, akatalelapo Ombetele yo ko Beni. Akulingwa eliongiyo lialandulwa novakuatate vena 44.131. Ovakuatate vo ko Beni avalikala onomakina opo ovakuatate vo kotyilongo tyimwe tyitiwa Niger valandule eliongiyo olio. Ko Niger kuna epunda-umbo etutu likala kokule litiwa Arliti. Ovakuatate vo oko vena 21 no valongwa vavo vena 16, navo avalandula eliongiyo olio motelevisau. Omukuatate umwe wahoneka okuti: “Tuapandula unene etyi muetulingila! Etyi muetulikalela-ko onomakina tyilekesa nawa okuti mutuhole.”

Tyina ovanakwa ankho vahika vala onkhuino ike, “ovakulu nononkhalamutwe mbovityita,” ovo vala vena okuenda pekaka liefendelo. (Núm. 10:4) Ankho vena okuenda opo valongeswe na Moisesi etyi vesukisa okulinga opo vetyivile okufuisapo nawa ovilinga viavo. Inkha no ove wali pomuvo opo, okuti ñgeno walinga ononkhono mbokuenda komaliongiyo oo?

Hono, ovakulu vomawaneno, ha nonkhalamutwe-ko. Otyo tumonena okuti velityilika okutumina onongi mba Huku. (1 Pet. 5:1-3) Mahi valinga ononkhono mbokumbunthita ngetyi Huku ahanda. Otyo vetavelela tyina vaihanwa opo valongeswe Mosikola Yovilinga Viouhamba (Osikola Yovakulu Vewaneno.) Mosikola oyo, ovakulu vewaneno valongeswa okukala ovanthita vekahi vali nawa. Oityi tyihole okutundililako? Aveho mewaneno vakala noupanga wapama na Siovaa. Hamwe kuneende mosikola oyo, mahi tutyii okuti ukahi nokulilongesila kovakuatate vailemo.

Tyina ovanakwa ankho vahika okuteketesa ondaka, ankho tyilekesa okuti Siovaa uhanda ova Isilayeli vailuke. (Núm. 10:5, 6) Ankho vailuka tyaongana nawa. Mahi ku vamwe, ankho katyapepukile. Tyina ankho vasoka umwe okuiluka, vaponwa. Omokonda yatyi?

Vamwe ankho velitehelela okuti vailuka vala liwa, napa ankho vehetyikevelela. Ombimbiliya ipopia okuti “pamwe ekaka ankho litalama vala kongulohi atee komuhuka.” Mahi “pamwe ankho likala ononthiki onombali, pamwe ohanyi, pamwe likala vali ehimbwe.” (Núm. 9:21, 22) Tuñgapi vailukile? Omukanda wa Números okapitulu 33, upopia onomphangu 40 ova Isilayeli vakalaile.

Pamwe ankho vailukila ponomphangu mbukahi nawa, mbafila nawa omphepo. Soka oñgeni ankho velitehelela ponohika ngombo, ngwe Ombimbiliya ipopia okuti ankho veli ‘mohika itilisa owoma.’ (Deut. 1:19) Tyafuile pamwe ankho katyapepukile okuhasoko okuti okuiluka ongatyina vekahi nokukondoka kovinkhombo.

Tyina oola yokuiluka yamehikipo, vamwe ankho vena okukevelela ovesi yavo. Aveho ankho veiva onkhuino, mahi ha aveho ankho venda. Tyina ankho vahika onkhuino, aveho ankho vetyii okuti tyilekesa okuti omihoko vikala koutundilo, vina okuenda; omuhoko wa Sundaa, no wa Isakale, no wa Sebulau. (Núm. 2:3-7; 10:5, 6) Tyina omihoko ovio viamaende, ovanakwa avahiki vali. Ankho tyilekesa okuti omihoko vitatu vikala kokumbili kuekumbi, navio vina okuenda. Otyo ovanakwa ankho valinga atee aveho vapuapo okuiluka.

Hamwe no ove tyikupuiya okutavela omapiluluko amwe eongano lihole okulinga. Hamwe ulitehelela okuti eongano lina nokupilulula ovipuka ovinyingi. Ine hamwe ankho wetyiliya umwe onkhalelo ovipuka ankho vilingwa, iya kuahandele ipiluluke. Tyilinge otyo ine hatyo, hamwe wesukisile okupwa-elundo mokonda okutyiliya omapiluluko, otyipuka tyihapepukile. Mahi inkha tutavela, atulingi ononkhono, matutale okuti omapiluluko oo, muaina opala ouwa wetu.

Etyi ova Isilayeli ankho veli moluhandya pononthiki mba Moisesi, Siovaa wevehongolelele. Ankho ovanyingi-nyingi, ovalume, novakai, novana. Inkha ha Siovaa, ñgeno vankhile. Weveavelele etyi vesukisa, evehongolela. No onthue tukahi ngova Isilayeli. Ankho ha Siovaa utuhongolela mononthiki mbuno mbonthyulilo, ñgeno tutupu ekolelo liapama, noupanga omuwa nae. Ova Isilayeli vehole Siovaa, ankho vetavela tyina ovanakwa vahika onkhuino. No onthue tutavelei tyina Siovaa ametuihana!