Otyili “Katyieta Ombembwa, Mahi Tyieta Omutunga”

1, 2. (a) Ombembwa patyi tupondola okukala nayo pehepano? (b) Omokonda yatyi nkhele tyehetavelela okukala nombembwa mononkhalelo ambuho? (Tala olutalatu pefo pahimbikila onthele.)

ONTHUE atuho tuhanda okukala nombembwa, atuhakala notyiho. Moluotyo, tupandula unene Jeova wetuavela “ombembwa Yae.” Ombembwa oyo itukalesa nawa tupu itukuatesako okuhakala nomalusoke omavi. (Filipenses 4:6, 7) Mokonda tuelipakula ku Jeova, tupu “tuna ombembwa na Huku.” Otyo tyilekesa okuti tuna oupanga omuwa na Jeova.​—Romanos 5:1.

² Mahi nkhele tutupu ombembwa ya Huku mononkhalelo ambuho. Onthue tukahi kononthiki mbahulilila iya tuvasiwa novitateka ovinyingi vituetela otyiho, tupu tuli pokati kovanthu ovakalavi. (2 Timóteo 3:1-4) Tupu tukahi nokulwa na Satanasi nomalongeso ae omatutu. (2 Coríntios 10:4, 5) Mahi tyituetela vali otyiho otyinene, okuyalwa nombunga yetu ihaumbila Jeova. Tyipondola vamwe puvo vapopia omapita omatavelo etu nokutupopia okuti tuhanda okuyapuka kombunga. Iya vamwe vapopia okuti, inkha tutualako okuumbila Jeova kamatukala vali ombunga yavo. Oñgeni tupondola okutala otyitateka otyo? Iya oñgeni tupondola okutualako okukala nombembwa tyina tuvasiwa notyitateka otyo?

3, 4. (a) Oityi tyitundilila kokukala omulongwa wa Jesus? (b) Omonkhalelo patyi tyipuilisa okukala omulongwa wa Jesus?

³ Jesus ankho utyii okuti haveho mavetavela etyi alongesa. Ankho utyii okuti vamwe mavatyitukila-po ovalongwa iya ovalongwa ankho vesukisa omutima wakola. Iya oundyale oo ankho upondola okunyona ombembwa yo nombunga mbavo. Jesus wati: “Muhasokei okuti naeta ombembwa pano pohi. Haetele ombembwa, mahi naeta omutunga. Mokonda ame neya okuyapula omukuendye na tate yae, omuhikuena na ina, ine o ina ivi nomuhikuena wanepua. Ngotyo, onondyale mbomunthu, ovanthu vombunga yae muene.”​—Mateus 10:34-36.

⁴ Oityi Jesus ankho ahanda okupopia etyi ati: “Muhasokei okuti naeta ombembwa”? Wahandele ovanthu vanoñgonoke okuti tyipondola okuveetela ovitateka inkha vakala ovalongwa vae. Moluotyo, ehando lia Jesus ankho okulongesa ovanthu otyili tya Huku hakuveyapula ko nombunga mbavo. (João 18:37) Mahi ovalongwa vae ankho vesukisa okunoñgonoka okuti hapeho tyapepuka okulandula Jesus, haunene tyina omapanga avo ine onombunga mbavo vahaumbila Jeova.

 5. Ovitateka patyi ovalanduli va Jesus ankho vesukisa okukoleleya?

⁵ Jesus wapopia okuti okuyalwa nombunga, otyipuka ovalongwa vae ankho vena okukoleleya. (Mateus 10:38) Opo ovalongwa vae vemuhambukiswe, ankho vena okukoleleya tyina onombunga mbavo vevelinga omukuele ine okuveyala. Mahi vapolako ouwa omunene uhaelekwa notyipuka natyike.​—Tanga Marcos 10:29, 30.

 6. Oityi tuna okuhinangela tyina onombunga mbetu mbutuyele?

⁶ Inkha ombunga yetu ituyele mokonda yokufenda Jeova, no ngotyo tuna okutualako okukala nohole navo. Mahi onthue, tuesukisa okunoñgonoka okuti ohole yetu na Huku na Kristu ina okukala otyipuka tyotete momuenyo wetu. (Mateus 10:37) Tupu tuna okuhinangela okuti Satanasi upondola okuundapesa ohole tuna nombunga yetu, opo alole oukuatyili wetu ku Jeova. Moluotyo, matulilongesa ovitateka vimwe viepuiya no ñgeni tupondola okukoleleya.

 7. Oityi una okulinga inkha ou muelinepa nae kaumbila Jeova?

⁷ Ombimbiliya ipopia okuti ovalinepi “mavakala novitateka.” (1 Coríntios 7:28) Inkha wanepua na umwe uhaumbila Jeova, otyo tyipondola vali okuyawisa kovitateka nokukala notyiho otyinene motyinepo. Mahi tyakolela, okutala otyitateka otyo monkhalelo Jeova etyitala. Jeova wati, katupondola okuliyapuka ine okulihenga nou tuelinepa nae mokonda kaumbila Jeova. (1 Coríntios 7:12-16) Inkha omulume wove kaumbila Jeova iya kesukile nefendelo liotyotyili, no ngotyo wesukisa okumulinga onthilo mokonda oe onkhalamutwe yombunga yove. Inkha omukai wove kaumbila Jeova, no ngotyo wesukisa okumuhumba nokumutekula nawa.​—Efésios 5:22, 23, 28, 29.

 8. Omapulo patyi ove una okulipula inkha ou muelinepa nae utyika efendelo liove?

⁸ Oityi una okulinga inkha ou muelinepa nae wovola okutyika efendelo liove? Omulume womphange umwe wemupopila opo ahaye movilinga viokuivisa mononthiki mbumwe mokati kosimanu. Ankho nove una otyitateka ngotyo lipula okuti: ‘Omulume wange wanthyilika opo nahaumbile vali Jeova? Inkha kanthyilikile, omokonda yatyi nehetavelela etyi andyita okulinga?’ Inkha upola pokati, matyikukuatesako okutepulula ovitateka motyinepo.​—Filipenses 4:5.

 9. Oñgeni Ovakristau vapondola okulongesa ovana vavo okuhumba ou velinepa nae uhaumbila Jeova?

⁹ Tyipondola okupuiya unene okulongesa ovana inkha ou muelinepa nae kaumbila Jeova. Mongeleka, ove wesukisa okulongesa ovana vove okutavela otyitumino tyo Mbimbiliya tyati: “Humba ho na nyoko.” (Efésios 6:​1-3) Mahi inkha omulume wove kaumbila Jeova? Una okuava ongeleka ongwa kovana vove mokuhumba omulume wove. Soka konthele yovituwa oviwa viou muelinepa nae iya omupandula mokonda yovipuka aviho oviwa ekulingila. Uhapopile ovana vove ovipuka omulume wove alinga vihaviukile. Mahi vepopila okuti kese wike, oe muene una okuholovona inkha uhanda okuumbila Jeova ine kahande

10. Oñgeni ovohe Ovakristau vapondola okulongesa ovana vavo okukala nohole na Jeova?

¹⁰ Pamwe, omulume ine omukai uhaumbila Jeova ukuluminya ovana okulinga ovipito Ombimbiliya iilika. Ovalume vamwe vatyilika ovakai vavo Onombangi opo vahalongese ovana Ombimbiliya. No ngotyo, omukai una okulinga etyi evila opo alongese ovana vae otyili tyo Mbimbiliya. (Atos 16:1; 2 Timóteo 3:14, 15) Mongeleka, hamwe omulume kayeke omukai wae alongese ovana vavo Ombimbiliya ine okuenda komaliongiyo. No ngotyo, omukai una okulala nonthilo nomulume wae, nokuovola onomphitilo ambuho opo alekese ekolelo liae kovana nokuvekuatesako okulilongesa konthele ya Jeova nokulinga etyi tyaviuka. (Atos 4:19, 20) Konyima, omona oe muene maholovona inkha uhanda okuumbila Jeova ine kahande.a (Tala okatoi.)​—Deuteronômio 30:19, 20.

11. Oityi tyipondola okueta ovitateka pokati kove nombunga yove ihafende Jeova?

¹¹ Tyipondola hamwe etyi potete wehimbika okulilongesa Ombimbiliya no Nombangi mba Jeova, kuapopilile ombunga yove. Mahi etyi oupanga wove na Jeova wehimbika okukula, oimbuka okuti wesukisa okuvepopila-tyo. (Marcos 8:38) Oukuatyili wove na Jeova pamwe upondola okueta ovitateka pokati kove nombunga yove. Matulilongesa ovipuka vimwe upondola okulinga opo utualeko okukala nombembwa nokutualako okupameka ekolelo liove mu Jeova.

12. Omokonda yatyi vamwe mombunga yetu vetuyele, mahi oñgeni tupondola okulekesa okuti tuesuka netyi vasoka?

¹² Ovola okunoñgonoka oñgeni ombunga yove ihafende Jeova ilitehelela. Onthue tuahambukwa unene etyi tuanoñgonoka otyili tyo Mbimbiliya. Mahi hamwe ombunga yetu kavahande tulilongese otyili mokonda vapondola okusoka okuti tukahi nokukembwa ine tukahi nokulipaka motyikundyi tyimwe tyonongeleya. Vapondola okusoka okuti katuvehole vali mokonda katulingi vali ovipito vimwe navo. Mokonda yomatavelo ongeleya yavo, vapondola okusoka okuti tyina tuamankhi matumonekelwa notyitateka tyimwe. Mahi tuna okuovola okuvenoñgonoka nawa nokutehelela tyina vapopia nokuimbuka omokonda yatyi vasukalalela nonthue. (Provérbios 20:5) Apostolu Paulu ankho wovola okunoñgonoka “ovanthu vomihoko aviho” opo evelongese onondaka onongwa Mbouhamba. Inkha tuovola okunoñgonoka etyi ombunga yetu isoka, matyitukuatesako okutala oñgeni matuvelongesa otyili.​—1 Coríntios 9:19-23.

13. Oñgeni tuna okupopia nombunga yetu vahaumbila Jeova?

¹³ Popia nouwa-tima. Ombimbiliya ipopia okuti onondaka mbetu mbuna “okuhingwa nawa omongwa.” (Colossenses 4:6) Mahi pamwe katyapepukile. Tuna okuita ku Jeova opo etuavele ospilitu sandu itukuateseko okupopia nombunga yetu monkhalelo ikahi nawa. Onthue katupondola okuveyayesa konthele yomatavelo avo ahaviukile ine ounkhembi. Inkha tulitehelela okuti ovipuka vetulinga ine vetupopia vituihama komutima, tuna okuhetekela apostolu Paulu wati: “Tyina tupopiwa omapita, tuava ononkhano onongwa, tyina tuyalwa, tukoleleya. Tyina tutendeleyua, tukumbulula nawa.”​—1 Coríntios 4:12, 13.

14. Ouwa patyi utundilila kokukala notyituwa otyiwa?

¹⁴ Kala notyituwa otyiwa. Omokonda yatyi tyakolela? Namphila okupopia monkhalelo ikahi nawa tyipondola okutukuatesako okukala nombembwa nombunga yetu, mahi ovituwa vietu vina vali epondolo. (Tanga 1 Pedro 3:1, 2, 16.) Pokati kongeleka yove, ombunga yove mainoñgonoka okuti Onombangi mba Jeova vena ehambu motyinepo, vatekula nawa ovana vavo, vaendela monondonga Mbombimbiliya iya vena ehambu liotyotyili. Namphila ombunga yetu kavetavela okulilongesa otyili, mahi tuhambukwa tyina tunoñgonoka okuti onongeleka mbetu onongwa mbuhambukiswa Jeova.

15. Oityi tyipondola okukukuatesako okuhelivele onombei tyina ombunga yove vanumana mokonda yokuumbila Jeova?

¹⁵ Lityilika onondyaya. Soka konthele yovipuka vipondola okukuetela onondyaya nombunga yove, konyima otokola etyi molingi. (Provérbios 12:16, 23) Omphange umwe ukala ko Austrália wati: “Tate-ivi ankho uyele unene ono Mbangi mba Jeova. Iya ame nomulume wange tyina matuende keumbo lia tate-ivi, tete tulikuambela opo Jeova etukuateseko okukala nomapole. Tyina tutomphola nae konthele yongeleya, opo etompho lihavitukile kokutañguna, tete ankho tusoka oityi matupopi iya nokuhapopi ehimbwe.

16. Oñgeni upondola okufinda omalusoke okulivela onombei konthele yokunumanesa ombunga yove?

¹⁶ Tyotyili, ombunga yove ihafende Jeova kamaihambukilwa ovipuka aviho ulinga. Pamwe tyina vekuyayesa upondola okulitehelela okuti walinga etokolo liapenga, mokonda uhole ombunga yove iya kuhande okuvenumanesa. Mahi hinangela okuti: Oukuatyili wove mu Jeova una okulamba ohole una nombunga yove. Tyina ombunga yove vetyinoñgonoka, mavetyimono okuti okuumbila Jeova otyipuka tyimwe tyakolela. Hinangela okuti ove kupondola okukuluminya nawike opo anoñgonoke otyili. Mahi, tupu upondola okutala oñgeni Jeova akuatesileko ovalanduli vae iya nove upondola okukukuatesako. Ngetyi Jeova ekuavela omphitilo yokuholovona, tupu wavela ombunga yove omphitilo yokuholovona oñgeni mavatyindi omuenyo wavo.​—Isaías 48:17, 18.

17, 18. Oityi tyipondola okukukuatesako okukoleleya inkha umwe mombunga wayekapo okuumbila Jeova?

¹⁷ Tyina umwe pombunga yetu apolwa mewaneno ine kahande vali okuumbila Jeova, tyipondola okupuiya unene. Tyipondola okukuihama unene olitehelela ngatyina ukahi nokutomwa nomutunga. Oñgeni upondola okukoleleya motyitateka otyo?

¹⁸ Tualako okuumbila Jeova. Tyina una oluihamo, wesukisa okupameka ekolelo liove. Tanga Ombimbiliya apeho, pongiya omaliongiyo, tualako novilinga viokuivisa iya likuambela ku Jeova opo ekuavele ononkhono opo utyivile okukoleleya. (Judas 20, 21) Mahi inkha ukahi nokulinga ovipuka ovio aviho otyo oluihamo luhalambe? Tualako okukoleleya! Tualako okuumbila Jeova. Mokueenda kuomuvo, otyo matyikukuatesako okutepulula oluihamo luove. Otyo, otyo tyamonekele nomuhoneki wo Salmu 73. Ankho una olusoke luahaviukile konthele yovipuka vimwe iya otyo atyimungwangwanesa. Mahi oupanga wae na Jeova aumukuatesako okutala ovipuka monkhalelo yaviuka. (Salmo 73:16, 17) Tupu otyo tyipondola okumoneka nove.

19. Oñgeni ove upondola okulekesa onthilo nonkhalelo Jeova aviyula ovanthu vae?

¹⁹ Kala nonthilo nonkhalelo Jeova aviyula. Huku utyii okuti omaviyu ae aetela ouwa ovanthu aveho okukutikinya-mo una wapolua mewaneno. Namphila tyiihama unene tyina umwe tuhole amapolwa mewaneno, mahi otyo tyipondola okumukuatesako okukondoka ku Jeova. (Tanga Hebreus 12:11.) Mongeleka Jeova wati ‘muhaliei nomunthu wapolua mewaneno.’ (1 Coríntios 5:11-13) Namphila katyapepukile, mahi katupondola okulia na umwe mombunga wapolua mewaneno. Alo umwe katyaviukile okupopia navo kotelefone, okulituma ono mesase no mononkhalelo ononkhuavo.

20. Oityi tuna okutualako okukevelela?

²⁰ Uhayekepo okukala nekevelelo! Ohole “ikevelela ovipuka aviho,” tupu tukevelela okuti vana vapolwa mewaneno mavakondoka ku Jeova. (1 Coríntios 13:7) Inkha waimbuka okuti umwe mombunga wapolua mewaneno ukahi nokulinga omapiluluko, upondola okulikuambela opo otyili tyo Mbimbiliya tyihike komutima wae etavela etyi Jeova emukonga okuti: “Kondoka kuame.”​—Isaías 44:22.

21. Oityi una okulinga inkha ombunga yove ikuyele mokonda yokulandula Jesus?

²¹ Jesus wati tuna okukala vali nohole nae tyipona omunthu. Iya Jesus ankho una onthumbi yokuti ovalongwa vae vapondola okutualako okukala ovakuatyili namphila mavayalwa nombunga yavo. Inkha ove una ovitateka nombunga mokonda watokola okulandula Jesus, yumba onthumbi mu Jeova, nokumuita opo ekukuateseko okukoleleya. (Isaías 41:10, 13) Jeova na Jesus vahambukwa netokolo walinga iya mavekuyambe.