Oityi Tyipita Pononkhia?

Onkhalelo yovanthu vokuankhia. Ononkhia mbelifua notumphoki. (João 11:11-14) Ovanthu vokuankhia kavapondola okutehelela, okutala, okupopia no kusoka. (Eclesiastes. 9:5, 10) Ongeleya yomatutu ilongesa okuti vokuankhia vaiya kouye omukuavo opo vakakale novakwaukulu vavo. Anthi, Ombimbiliya kailongesa ngotyo.

Ovanthu vokuankhia kavapondola okutukuatesako nokutulinga omapita. Ovanthu ovanyingi vaovola okuhambukiswa vana vokuankhia. Vevelingila oviso novilikutila. Ovituwa ovio kavihambukiswa Huku. Tupu kavihambukiswa vana vokuankhia, mokonda vetupu vali omuenyo. Onthue katuesukisile okukala nouoma ine okufenda kovanthu vokuankhia. Onthue tuna yokufenda vala Huku.—Mateus 4:10.

Vokuankhia mavakakala vali nomuenyo. Yehova makapindulapo vokuankhia opo vakale nomuenyo mouye omupe. Omuvo oo nkhele ukahi komutue wandyila. (João 5:28, 29; Atos 24:15) Yehova upondola okupindulapo vana vokuankhia ngetyi ove upondola okupahulapo omunthu ukahi kotumphoki.—Marcos 5:22, 23, 41, 42.

Olusoko luokuti onthue katunkhi ounkhembi wayandyanekua na Satanasi Eliapu. Satanasi nonoandyu mbae onombi vatuala ovanthu kokusoka okuti vokuankhia nkhele vena omuenyo. Vaetela ovanthu omauvela no vitateka. Pamue Satanasi uyapula ovanthu nonondyoi. Yehova uyele ovanthu vokuovola okupopia novanthu vokuankhia.—Deuteronômio 18:10-12.