Likuambela Apeho opo Ulinge Oupanga Omunene na Huku

1, 2. Elikuambelo elao limue enene mokonda yatyi? Iya omokonda yatyi tuesukisila okulilongesa konthele yelikuambelo?

OOHI okuiheteka nouye auho onthutu unene. Komaiho a Jeova wokualinga eulu no ohi, ovanthu vekahi vala ngeeta liomaande mombaliti. (Salmo 115:15; Isaías 40:15) Ombimbiliya yati: Jeova ukahi popepi novanthu aveho vemuihana. Ukahi popepi na vana vemuihana tyotyili. Jeova makafuisapo ehando liavana vena onthilo nae. Mevetehelela putyina vemuita ekuateso. (Salmo 145:18, 19) Soka oityi otyo tyihangununa! Omupakeko wetu wepondolo aliho ukahi popepi nonthue, iya metutehela inkha tumuita tyotyili. Tuna elao limue enene liokulikuambela ku Huku!

² Inkha tuhanda Jeova atehelele omalikuambelo etu, tuna yokulikuambela monkhalelo Huku ahanda. Matutyivili okulikuambela ngotyo, inkha tunoñgonoka etyi Ombimbiliya ilongesa konthele yelikuambelo. Tyakolela unene okunoñgonoka etyi Ombimbiliya ilongesa konthele oyo. Mokonda okulikuambela matyitukuatesako okulinga oupanga omunene na Jeova.

 3. Omokonda yatyi tuna yokulikuambela ku Jeova?

³ Tuna yokulikuambela, mokonda Jeova utuita tutyilinge. Ondaka yae itupopila okuti: ‘Muahakalei notyiho notyipuka natyike, mahi itei apeho ku Huku nomalikuambelo nolupandu. Iya ombembwa ya Huku, ipona onondunge nomalusoke aeho, maipamesa omitima vienyi nomalusoke enyi, menyina lia Kristu Jesus. (Filipenses 4:6, 7) Tyotyili, tuhatombei elao olio ewa tuapewa no Mutumini Omunanene Wouye auho!

 4. Oñgeni okulikuambela apeho ku Jeova matyipameka oupanga wetu nae?

⁴ Tupu tuna yokulikuambela, opo tupameke oupanga wetu na Jeova. Omapanga otyotyili kaatomphola vala tyina vena etyi vesuka natyo. Anthi, omapanga otyotyili ena esuko kese umue namukuavo. Iya oupanga wavo upama vali tyina vatomphola, okulipopila omasuka-suka nomahando avo. Tupu, okulinga oupanga na Jeova Huku otyipuka tyike. Nombatelo yomukanda ou, ove wanoñgonoka ovipuka ovinyingi Ombimbiliya ilongesa konthele ya Jeova nehando liae. Ove wanoñgonoka nawa okuti Jeova tyotyili omunthu. Okulikuambela matyikuavela omphitilo yokupopila Tate yove keulu omahando ove nomalusoke ove. Okulikuambela matyipameka vali oupanga wove na Jeova.—Tiago 4:8.

 5. Oityi tyilekesa okuti Jeova ketavela omalikuambelo aeho?

⁵ Okuti Jeova utehelela omalikuambelo aeho? Tala etyi Jeova apopilile ova Isilayeli onondingavivi kononthiki mbomuuli Isaia. Oe wati: ‘Namphila mulinga omalikuambelo omanyingi, ame himutehelela. Mokonda omaoko enyi anengula unene ohonde.’ (Isaías 1:15) Otyo tyilekesa okuti inkha tulinga ovivi, Huku kamatehelela omalikuambelo etu. Moluotyo, opo Huku atehelele omalikuambelo etu, tuna yokutavela etyi ahanda, netyi etutuma.

 6. Otyipuka patyi tyakolela tuesukisa opo Huku etavele omalikuambelo etu? Iya oñgeni matutyilekesa?

⁶ Otyipuka tyimue tyakolela okukala nekolelo. (Marcos 11:24) O apostolu Paulu wahoneka okuti: ‘Tyihena ekolelo katupondola okuhambukiswa nawa Huku. Mokonda vana vafuena ku Huku vena yokutavela okuti okuekahi, iya oe mayambe vana vemuumbila nomutima auho.’ (Hebreus 11:6) Ekolelo liotyotyili hakunoñgonoka vala okuti Huku okuekahi, nokuti oe utehelela omalikuambelo etu. Tupu, tuna yokulekesa novilinga vietu okuti tuna ekolelo. Ononthiki ambuho ovituwa vietu vina yokulekesa nawa okuti tuna ekolelo mu Huku.—Tiago 2:26.

 7. (a) Omokonda yatyi tuna yokulekesa onthilo onene pokupopia na Huku melikuambelo? (b) Oñgeni matulekesa omutima weliola nokupopia otyili tyina tulikuambela ku Huku?

⁷ Tupu, Jeova uhanda vana velikuambela kue, vetyilinge nomutima weliola, nokupopia otyili. Okuti katuesukisile okuliola omutima putyina tupopia na Jeova? Ovanthu vehole okulekesa onthilo tyina vapopia nohamba ine o nomutumini umue. Mokonda vetyii okuti omunthu oo, omunene. Tupu, putyina tupopia na Jeova tuna yokukala vali unene nonthilo! (Salmo 138:6) Mokonda Jeova, o ‘Huku Wepondolo aliho’. (Gênesis 17:1) Tyina tulikuambela ku Huku, tuna yokuliola omutima, okulekesa okuti tuvatutu komaiho ae. Iya okukala nonthilo matyitukuatesako okulinga omalikuambelo atunda tyotyili komutima, nokulityilika omalikuambelo okupalaukununa.—Mateus 6:7, 8.

 8. Oñgeni matulingi ngetyi tuaita melikuambelo lietu?

⁸ Otyipuka otyikuavo tyesukisa opo Huku atehelele omalikuambelo etu, okulinga etyi tyelikuata kumue nomalikuambelo etu. Jeova uhanda tulinge ngetyi tuaita. Ankho tuaita okuti ‘etuavele okulia pala onthiki yo hono’, tuna yokuundapa unene opo tumone okulia. (Mateus 6:11; 2 Tessalonicenses 3:10) Inkha tuaita okuti tukuateseko opo tuhalinge onkhali, tuna yokulityilika kuatyiho tyipondola okutulingisa onkhali. (Colossenses 3:5) Tupu, kuna omapulo omakuavo konthele yelikuambelo, esukisa okukumbululwa.

 9. Okulie tuna yokulikuambela? Iya omenyina lia lie?

⁹ Okulie tuna yokulikuambela? Jesus walongesa ovalongwa vae velikuambele ku ‘Tate yetu ukahi keulu’. (Mateus 6:9) Otyo, tyilekesa okuti omalikuambelo etu ena yokuviukiswa vala ku Jeova. Mahi, Jeova uhanda tunoñgonoke otyilinga tyo Mona wae wongunga Jesus Kristu. Ngetyi tuelilongesa mokapitulu 5, Jesus watuminue pano pohi opo ayovole ovanthu monkhali no mononkhia. (João 3:16; Romanos 5:12) Jesus waholovonua opo akale o Saserdote omunene no Mukoyesi. (João 5:22; Hebreus 6:20) Moluotyo, Ombimbiliya itulongesa okulinga omalikuambelo menyina lia Jesus. Muene Jesus wati: ‘Ame ndyila, ame tyili, ame muenyo. Nawike uya ku Tate ahapiti puame.’ (João 14:6) Opo omalikuambelo etu atehelelwe, tuna yokulikuambela ku Jeova menyina lio Mona wae.

10. Omokonda yatyi Huku kaiti oñgeni tuna yokukala tyina tulikuambela?

¹⁰ Oñgeni tuna yokukala tyina tulikuambela? Jeova kapopile oñgeni tuna yokukala pokulikuambela. Ombimbiliya ilongesa okuti tupondola okulikuambela tyapumphama, nokulinyongamena, nokuikila konongolo, ine okukala lutai. (1 Crônicas 17:16; Neemias 8:6; Daniel 6:10; Marcos 11:25) Mokonda tyakolela vali hamukalelo. Mahi, tyakolela okukala nomutima omuwa. Kese apa tukahi, movilinga vietu via kese nthiki ine o putyina tutumbukilwa novitateka, tupondola okulinga elikuambelo lio momutima. Huku utehelela omalikuambelo atyo oo, namphila ovanthu vekahi ponthele yetu kaveetuete tyina tulikuambela.—Neemias 2:1-6.

11. Ovipuka patyi tuesukisa momuenyo wetu tuna yokuita momalikuambelo?

¹¹ Oityi tuna yokuita melikuambelo? Ombimbiliya yati: ‘Kese etyi tuita inkha tyelikuata nehando liae, oe metutehelela’. (1 João 5:14) Tupondola okulikuambela konthele ya kese tyipuka tyelikuata nehando lia Huku. Okuti tupu tupondola okulikuambela konthele yomasuko etu muene? Yoo, tupondola! Okulikuambela ku Huku ongatyina tutomphola nepanga lietu enene. Tupondola okupopia notyili, okuikulila Huku omutima wetu. (Salmo 62:8) Otyiwa okuita ospilitu sandu opo itukuateseko okulinga etyi tyaviuka. (Lucas 11:13) Tupu, tupondola okuita Huku etuhongolele, nokuita ononkhono tyina tuvasiwa novitateka. (Tiago 1:5) Putyina tualinga onkhali, tuna yokuita ku Huku opo etuevele menyina liotyilikutila tya Kristu. (Efésios 1:3, 7) Mahi, kamatuiti vala ovipuka onthue tuesuka navio. Tupu, tuna yokuitilako vakuetu, nombunga yetu novakuatate vetu tufenda navo.—Atos 12:5; Colossenses 4:12.

12. Pokulikuambela oñgeni matulekesa okuti tuavela esilivilo ovipuka viayemba ku Tate yetu keulu?

¹² Mahi, ovipuka viayemba ku Jeova ovio tuesukisa okuita tete momalikuambelo etu. Tuna ehunga liokunkhimaneka Huku nokumupandula nomutima auho, mokonda yovipuka aviho oviwa alinga. (1 Crônicas. 29:10-13) Melikuambelo Jesus alongesa likahi mu Mateus 6:9-13, wetulongesa okuita opo enyina lia Huku linkhimanekwe. Nokuita Ouhamba wa Huku uye, nehando liae lilingwe pano pohi ngetyi lialingwa keulu. Etyi Jesus amana okuita ovipuka ovio viakolela vali konthele ya Jeova, konyima aiti pahe evi ovanthu vesuka navio. Nonthue inkha tulikuambela tete konthele yovipuka viayemba ku Huku, matulekesa okuti katuasukile vala nomahando etu.

13. Ombimbiliya yati elikuambelo lina okulingwa momuwo ulifuepi?

¹³ Pokulikuambela tuna yokulinga omuwo ulifuepi? Ombimbiliya kaipopi omuwo tuna yokulinga momalikuambelo etu muene, nomalikuambelo opounyingi. Tupondola okulinga elikuambelo liahasete pokulia. Mahi, tyina tulikuambela atuike, elikuambelo lietu lipondola okueenda ehimbwe, mokonda matupopila Jeova etyi tuna momutima wetu. (1 Samuel 1:12, 15) Jesus wayalele omalikuambelo ovanthu vamue kononthiki mbae. Ovanthu ovo, ankho valinga omalikuambelo aenda ehimbwe pala okulilekesa kuvakuavo, ngatyina ovaviuki. (Lucas 20:46, 47) Jeova katehelela omalikuambelo atyo oo. Tyakolela vali, okulinga omalikuambelo atunda komutima. Ngotyo, omuwo tulinga pokulikuambela utei kuetyi tuesukisa okuita na apa tukahi.

14. Tyina Ombimbiliya iti tualeiko nokulikuambela, otyo tyihangununa tyi? Iya oityi tyituhambukiswa konthele yotyo?

¹⁴ Ovikando viñgapi tuesukisa okulikuambela? Ombimbiliya ituavela ondundo yokutualako okulikuambela, okulikuambela tyahatalama. (Mateus 26:41; Romanos 12:12; 1 Tessalonicenses 5:17) Otyo katyilekesa okuti kese nthiki tuna yokulikuambela tunde komuhuka alo likanyingila. Mahi, Ombimbiliya itulunda tulipilike okulikuambela, okupandula apeho Jeova mokonda yoviwa etulingila. Tupu, nokumuita ehongolelo nononkhono. Otyo katyituhambukiswa? Tyituhambukiswa mokonda Jeova kaavele omuwo tuna yokulinga pokupopia nae, novikando tuna yokulikuambela kese nthiki. Inkha tyili tuapanda elao olio, matulikuambela apeho ku Tate yetu keulu.

15. Omokonda yatyi tutavelela okuti “Amem” konthyulilo yelikuambelo lietu ine o momaliongiyo?

¹⁵ Omokonda yatyi tutila “Amem” konyima yelikuambelo? Ondaka “amem”, ihangununa okuti otyo yatyo ine tyilingwe ngotyo. Ombimbiliya ilongesa okuti otyiwa okuti “amem” konthyulilo yomalikuambelo etu muene no momaliongiyo. (1 Crônicas 16:36; Salmo 41:13) Tyina tuamati “Amem” konyima yelikuambelo lietu muene, tyilekesa okuti etyi tuapopia otyotyili. Tyina mukuetu alinga elikuambelo iya konyima yelikuambelo onthue atukumbulula okuti “Amem”, tyilinge tuapopila peulu ine omomutima, tyilekesa okuti tuetavela etyi aita.—1 Coríntios 14:16.

16. Onthumbi patyi tuna konthele yomalikuambelo?

¹⁶ Okuti Jeova ukumbulula umue omalikuambelo etu? Enga, ukumbulula! Tuna ehunga liokuyumba onthumbi yokuti ‘Omuteheleli womalikuambelo’, matehelela omalikuambelo ana ovanthu ovanyingi valinga nomutima auho. (Salmo 65:2) Jeova ukumbulula omalikuambelo etu mononkhalelo mbelikalaila.

17. Omokonda yatyi tupopila okuti Jeova utuma onoandyu novanthu vae opo akumbulule omalikuambelo etu?

¹⁷ Jeova uundapesa onoandyu novanthu vae opo akumbulule omalikuambelo. (Hebreus 1:13, 14) Kuna onongeleka ononyingi, mbovanthu velikuambela ku Huku okuita ekuateso opo vanoñgonoke Ombimbiliya. Iya konyima avatumbukilwa no Nombangi mba Jeova. Otyo tyilekesa okuti onoandyu mbukahi nokuhongolela ovilinga viokuivisa Ouhamba wa Huku. (Revelação [Apocalipse] 14:6) Opo Jeova akumbulule omalikuambelo etu putyina tuna otyitateka, pamue ututuma Ovakristau opo vetukuateseko.—Provérbios 12:25; Tiago 2:16.

18. Oñgeni Jeova aundapesa ospilitu sandu, Nondaka yae opo akumbulule omalikuambelo ovanthu vae?

¹⁸ Tupu, Jeova Huku uundapesa ospilitu sandu yae, Nondaka yae Ombimbiliya opo akumbulule omalikuambelo ovaumbili vae. Putyina tulikuambela okuita etukuateseko pala okulwisa ovitateka, Huku upondola okutuavela ehongolelo nokutupameka nospilitu sandu yae. (2 Coríntios 4:7) Pamue ekumbululo liomalikuambelo etu tulipewa putyina tutanga Ombimbiliya. Nonondonga ombo, Jeova utukuatesako okulinga omatokolo aviuka. Tupu, pamue tuvasa onotestu mbutukuatesako putyina tulinga elilongeso lietu muene lio Mbimbiliya. Pamue o putyina tutanga omikanda omikuavo viatunda mo Mbimbiliya, ngomukanda uno. Ekuateso ekuavo tuesukisa pamue tulipelwa momaliongiyo, ine o nomukulu umue weuaneno.—Gálatas 6:1.

19. Oityi tuesukisa okuhinangela, inkha tutala ngoti Huku kekahi nokukumbulula omalikuambelo etu?

¹⁹ Pamue tutala ngoti Jeova waseta okukumbulula omalikuambelo etu. Otyo katyilikesa okuti Jeova ketyivili okukumbulula omalikuambelo etu. Otyiwa okunoñgonoka okuti Jeova ukumbulula omalikuambelo momuvo ahanda. Jeova wii vali nawa etyi tuesukisa tyipona onthue muene. Mahi, pamue Jeova uhanda tutualeko nokuita, nokuovola, nokutotola. (Lucas 11:5-10) Inkha tutualako nokuita, Huku matale okuti etyi tuita tyotyili tuetyihanda umue, tupu, tuna onthumbi yokuti Oe tyotyili metukumbulula. Mahi, pamue Jeova ukumbulula omalikuambelo etu monkhalelo onthue tuahaimbuka. Pamue tulikuambela ku Huku mokonda yotyitateka tyimue tuna. Iya Huku pokutukumbulula ketupolo otyitateka otyo komahuviso. Mahi, utuavela ononkhono opo tutyivile okulikuatehila.—Filipenses 4:13.

20. Omokonda yatyi tuesukisila okulikuambela apeho ku Jeova?

²⁰ Tupandulei unene Omupakeko wouye auho, mokonda ukahi popepi na vana velikuambela kue nomutima auho! (Salmo 145:18) Tutualeiko okuundapesa unene elao liakolela liokulikuambela. Inkha tulinga ngotyo, matukala noupanga omunene na Jeova, Omuteheleli womalikuambelo.