Evi Twaava Pala Ovilinga Vya Huku

ONOMBANGI mba Siovaa vekahi umwe nokulinga otyilinga Sesusi apopile, vekahi nokwivisa oviwa ovipe Viouhamba “kombanda yohi aiho.” (Ovil. 1:8; Mat. 24:14) Velikwatehila umwe vetyivile okupopila vakwavo oviwa ovipe Viouhamba. Vesuka umwe vali unene novilinga vya Huku mokonda vetyii okuti Siovaa meveavela atyiho mavesukisa. (Mat. 6:25-34; 1 Kol. 3:5-9) Ngwe tyina valinga ngootyo, Siovaa uvepa oviwa.

² Tyina ovanthu ovanyingi vetumona twaava Ombimbiliya nomikanda omikwavo vali, vehole okulipula okuti: “Oñgeni vetyivila okulinga omikanda evi aviho?” Tyili okulinga Ombimbiliya nomikanda omikwavo vali tyisukisa umwe onombongo. Okutunga ono Mbetele, nokuviukaisa ovipuka vikahi-mo, nokulanda onomakina mbokulinga omikanda, nokutekula vana vakala-mo, nokutala nawa etyi tyesukisa opo oviwa ovipe Viouhamba viiviswe umwe atee kokule, tyisukisa umwe onombongo. Ovatalelipo vomawaneno, no nomisionaliu novakokoli-ndyila vavilapo novanthu ovakwavo vali veli movilinga viomuvo auho, vapewa kapii oumbongo opo vetyivile okulinga nawa ovilinga ovio. Naina, okwivisa oviwa ovipe Viouhamba mononthiki mbuno, tyilinge momawaneno etu, tyilinge ouye auho, tyesukisa umwe onombongo. Opi patunda onombongo ombo?

³ Vana vehole ovilinga Onombangi mba Siovaa valinga viokulongesa, pamwe navo vehole umwe okwaava etyi vena-tyo vakwateseko ovilinga evi. Mahi mwene ovilinga evi viokwivisa oviwa ovipe vikwateswako vali unene no Nombangi mba Siovaa. Vamwe vatuma umwe vala onombongo mbatyo ko Mbetele. Ovo valinga umwe ngeetyi ankho tyilinga ovanthu va Huku kohale, okwaava etyi vena-tyo opo vakwateseko ovilinga viokutunga Onondywo mbokufendela Huku. (Oku. 35:20-29; 1 Ehi. 29:9) Ovanthu vamwe tyina vehenenyime, vahoneka omukanda, avapopi okuti ovipuka viange tyina namanyimi, viavelei o Mbetele. Ombu onombongo ononkhwavo ovanthu veli momawaneno vembwaava. Onombongo ombo kambuhi-ale, mahi tyina mbuhonyekwa mbulinga umwe ononyingi, ya mbukwatesako ovilinga viokwivisa.

⁴ Onombangi mba Siovaa vahambukwa unene tyina vaava onombongo mbavo vakwateseko ovilinga viokwivisa. Sesusi novalongwa vae ankho vena otyikasa tyimwe omu vapaka oumbongo, tyilekesa okuti ankho vapewa oumbongo uvekwatesako moupuka vesukisa. (Swau 13:29) Ombimbiliya ipopia ovakai vamwe ankho vakwatesako Sesusi novalongwa vae. (Malu. 15:40, 41; Luka 8:3) Omutumwa Paulu nae ankho upandula unene oumbongo ovanthu vamwe ankho vemupa opo vemukwateseko movilinga viae viokwivisa. (Fili. 4:14-16; 1 Tes. 2:9) Onombangi mba Siovaa hono, navo vahetekela umwe ovanthu vokohale, ankho vati ovo vena ombili novilinga vya Huku, ovo vena otyali. Tyina valinga ngootyo ongatyina vekahi nokwaava “omeva omwenyo otyali” kovanthu aveho vesuka notyili. — Ehol. 22:17.

⁵ Ovipuka vili momawaneno navio vilandwa umwe nonombongo ovanthu vaava. Mewaneno kamwiitwa onombongo, kamupopiwa otyiñgapi omunthu ena okwava. Monondywo mbokulingila Omaliongiyo muna oukasa omu omunthu apondola okupaka okambongo, opo omunthu na munthu “alingile omu mwene omutima wae wetavelela.” — 2 Kol. 9:7.

⁶ Onombongo ombo ovanthu vaava opala umwe okulanda ovipuka vyo Mondywo Yomaliongiyo nokulandela-po evi viateka-teka. Ovakulu vewaneno pamwe vapola ponombongo ombo, avatumu ko Mbetele opo mbukakwateseko ovilinga viokwivisa ouye auho. Mahi ovanthu aveho mewaneno vena okutyitavela. Tyina ovanthu aveho momawaneno vaava umwe etyi vena-tyo onohanyi mbatyo ambuho, opo katyisukisa vali okupopila ovanthu okuti avei onombongo.

⁷ Kukoywa ovanthu vamwe vevali vapola onombongo motyikasa, eliongiyo ngaliapwa. Ovo pahe avahoneka otyiñgapi vavasa-mo. (2 Oha. 12:9, 10; 2 Kol. 8:20) Ovakulu vewaneno vapaka umwe nawa onombongo ombo, pahe haa avembutumu ko Mbetele, okuti hatyo avalande ovipuka viesukisa mewaneno. Omunthu wokukwata nawa onombongo mbewaneno, onohanyi mbatyo ambuho uhoneka otyiñgapi vena-tyo, otyiñgapi vapola-po valande ovipuka vimwe, ya otyiñgapi tyahupapo, pahe atyipopilwa ewaneno. Omukulu wokululika ovakulu vewaneno utala umwe nawa etyi onombongo mbalanda, tyina pamalambe onohanyi ononthatu embutale vali, otyo umwe alinga ngootyo enima aliho.

⁸ Pana palingilwa ovionge napo pakala oukasa umwe omu omunthu apondola okupaka okambongo opo akwateseko otyonge. Tupu pamwe ovanthu vaava umwe etyi vena-tyo vakakwateseko otyonge, mahi vetyilinga tyina nkhele otyonge tyatyo tyehenehikepo-ale.

⁹ Mwene ñgeno omawaneno aeho omo silikwitu imwe, oo umwe aava etyi vena pala okulanda ovipuka mavesukisa. Ine ponombongo ombo pahupa, avembutumu ko Mbetele opo mbukakwateseko ovilinga viokwivisa ouye auho. Tyina pehena onombongo mbokulanda ovipuka mavisukisa potyonge, ngeetyi hamwe okufetela omphangu mapalingilwa otyonge, omutalelipo womawaneno upondola okupopila ovakulu vomomawaneno vapopile ovanthu vomawaneno vaave etyi vena. Ovakulu vewaneno vena okuliongiya opo velipakaile-mo vatale otyiñgapi kese ewaneno lina okwaava vakwateseko otyonge. Pahe avapopi otyiñgapi kese ewaneno lina okwaava.

¹⁰ Tyina vamatale okuti petupu onombongo pala okulanda otyipuka tyimwe, ovakulu vewaneno vena okulinga eliongiyo otyonge nga tyapwa velipakaile-mo navakwavo. Ovipuka aviho mavilandwa motyonge otyo vina okutavelwa novakulu aveho, okutalela kweetyi vapopia peliongiyo olio. Pahe ovipuka aviho valanda avihonekwa.

¹¹ Apeho patalwa onombongo osilikwitu ina.

¹² Onombongo mbuna ovo Sesusi novalongwa ankho vapewa, mbumwe ankho opala okukwatesako nambo vana vehena apa vakwatelela. (Malu. 14:3-5; Swau 13:29) Otyipuka otyo na hono nkhele tuna umwe okutyilinga. Otyo Sesusi apopila okuti: “Onwe mamukala-le novahepi apeho.” (Malu. 14:7) Hono oityi Onombangi mba Siovaa navo valinga vakwateseko vana vehena-tyo?

¹³ Pamwe ovanthu vana tufenda navo, vesukisa umwe onombongo mokonda yokwakulupa nomauvela novipuka vali ovikwavo. Pamwe vamwe mombunga yae novanthu vala ovakwavo vei otyitateka tyae vapondola umwe okumukwatesako. Otyo valinga, otyo tyapopile omutumwa Swau etyi ati: “Mahi ou una olumono lwouye uno, amono mukwavo una etyi akamba, emunumina ehemulingi okankhenda, opo ngootyo onthyole ya Huku ili umwe mwe? Vana vange, onthwe tulingei volwembia, ha tyo komulungu vala, atyehe-tyelaka, mahi o mweevi tulinga, no motyili.” (1 Swau 3:17, 18; 2 Tes. 3:6-12) Matuti umwe vala tuli nokufenda Siovaa tyina tukwatesako vakwetu vehena apa vakwatelela. — Tia. 1:27; 2:14-17.

¹⁴ Momukanda wo tete Paulu ahonekela Timotiu, wapopia oñgeni tupondola okukwatesako vana vehena-tyo. Ovipuka apopia tuvivasa momukanda 1 Timotiu 5:3-21. Onkhalamutwe yombunga oyo umwe ina okukwatesako ombunga yae mweetyi vesukisa. Vana vakulupa na vana vavela vena okukwateswako novana vavo novatekula vavo, novanthu ovakwavo vali mombunga yavo, tupu pamwe vapondola okukwateswako novatumini. Vamwe mombunga yavo vapondola okuvekwatesako okulinga omikanda opo vakwatesweko novatumini. Tupu pamwe ovanthu mewaneno vapondola okukwatesako omunthu umwe ufenda-le Siovaa omanima omanyingi. Ine petupu vali omunthu mombunga wahanda okumukwatesako, tupu ketyivilile okukaita kovatumini vemukwateseko, ovakulu vewaneno vena okutala nawa etyi mavalingi vemukwateseko. Ovanthu va Huku vahambukwa unene okwaava etyi vena-tyo vakwateseko vana vesuka.

¹⁵ Vamwe tufenda navo vesukisa umwe okupewa oupuka umwe mokonda yokumoneswa ononkhumbi, novilwa novinimawe, no nombila pamwe mbunyona etyi vena, novipuka ovikwavo vali vimoneka mononthiki mbuno mbokwepwiya. (Mat. 24:7-9) Pamwe ovanthu mewaneno liae navo vetupu onombongo vemukwateseko. Otyo pamwe Ononkhalamutwe Mbo Nombangi mba Siovaa vatumina novanthu vomomawaneno omakwavo vaave etyi vena-tyo vemukwateseko. Otyo tyelifwa neetyi ovalanduli va Kilisitu vo ko Asiya Menole valingile, okwaava etyi vena opo vakwateseko vakwavo voko Sundaa pomuvo wondyala. (1 Kol. 16:1-4; 2 Kol. 9:1-5) Tyina tulinga umwe ngeetyi valingile, tulekesa okuti tuhole vakwetu ya tuvalanduli va Sesusi Kilisitu. — Swau 13:35.

¹⁶ Ombimbiliya nomikanda vietu omikwavo viesukisa unene tyina twivisa oviwa ovipe Viouhamba. Ovakulu vewaneno vakoya omukwatesiko umwe wovakulu vewaneno opo aundape komikanda. Omunthu wapewa otyilinga otyo, una umwe okutyilinga nawa. Uhoneka umwe nawa omikanda mavesuku navio, opo aveho mewaneno vatambule omikanda.

¹⁷ Onthwe mokonda twelipakula-le ku Siovaa, tutyii umwe okuti omuvo wetu, novilinga vietu, novipuka aviho tuvila okulinga, novipuka aviho tuna, atee umwe nomwenyo wetu, atyiho twetyipewa na Siovaa. Tuna umwe okulingila Siovaa novipuka ovio twapewa. (Luka 17:10; 1 Kol. 4:7) Tyina twaava etyi tuna-tyo, tulekesa umwe okuti tuhole Siovaa. Twahanda okuhilivika Siovaa novipuka aviho tuna mokonda tyimuhambukiswa unene tyina tulikwatehila movilinga viae nomutima wetu auho. (Omih. 3:9; Malu. 14:3-9; Luka 21:1-4; Kolo. 3:23, 24) Sesusi wati: “Mwetyipewa otyali, tyaavei otyali.” (Mat. 10:8) Tyina tuundapa unene movilinga vya Siovaa, na tyina twaava etyi tuna-tyo, tuhambukwa. — Ovil. 20:35.