Vatyitukilapo Jeova

Etyi ova Isilayeli vekahi moluhandya, Koraa na Datan, na Abirau novanthu 250 avatyitukilapo Moisesi. Vapopila Moisesi okuti: ‘Katukuhande vali! Omokonda yatyi ove vala una okukala onkhalamutwe yetu iya Arau akala omunakwa? Jeova tupu ukahi nonthue, kekahi vala nove na Arau.’ Jeova anumana unene. Aimbuka okuti oe vatyitukilapo!

Moisesi apopila Koraa kumwe novanthu vae okuti: ‘Endyuei muhuka mekaka liefendelo, etelelei ovilikutila vienyi opo tuviyoke. Jeova malekesa olie akoya opo akale onkhalamutwe.’

Onthiki onkhuavo, Koraa novalume 250 avelivasi na Moisesi mekaka liefendelo. Avahimbika okuyoka ovilikutila vilingwa vala novanakwa. Jeova apopila Moisesi na Arau okuti: ‘Lipungei ku Koraa no kovanthu vae.’

Namphila Koraa aile na Moisesi kekaka liefendelo, Datan, na Abirau, no nombunga mbavo avaanye okuenda. Jeova apopila ova Isilayeli vahakale popepi nekaka lia Koraa no lia Datan, no lia Abirau. Liwa-liwa ova Isilayeli avatundupo. Datan, na Abirau, no nombunga mbavo avalupuka mo makaka avo avakala komutwe ao. Pakala vala katutu, Jeova aikula etoto limwe enene pohi avankhila-mo! Tupu Koraa novalume 250 vekahi kekaka liefendelo Jeova eveyoko notupia!

Jeova apopila Moisesi okuti: ‘Ovola ovimuti 12, kese tyimwe honeka-ko enyina lia kese eanda lio Isilayeli. Mahi kotyimuti tyeanda lia Levi honeka-ko enyina lia Arau. Vipaka mekaka liefendelo. Ame mandyiyovesa onthemo otyimuti tyahonekwa enyina liomunthu nakoya.’

Monthiki onkhuavo Moisesi aende mekaka liefendelo akapola-mo ovimuti aviho vialekesa olie wakoyua. Otyimuti tya Arau otyo tyayova ononthemo . Monkhalelo oyo ovanthu aveho avaimbuka okuti Jeova wakoya Arau akale omunene-nakwa.