Jesus Weendela Kombanda Yomaande

Jesus ankho kahakula vala ovanthu vokuavela nokututilisa ovanthu vokuankhia, mahi tupu ankho utyivila okutuliya omphepo nombila. Konyima, etyi Jesus amana okulikuambela komphunda, atale Kelunga lio Galileia amono omphepo onene. Ono apostolu mbae ankho mbuli mombapolo, otyo vahetekela okutaha ombapolo ikahi nokutahulwa nomphepo. Jesus ahimbika okuendela kombanda yomaande otyo aviuka kuvo. Etyi ono apostolu mbae vamona omunthu ukahi nokuendela kombanda yomaande, avatili owoma. Mahi Jesus evepopila okuti: ‘Ame umwe. Muhatilei owoma.’

Petulu ati: ‘Tatekulu inkha tyili-tyili ove umwe, nthume ndyiye nokuove.’ Jesus emupopila okuti: ‘Endyu.’ Ngotyo namphila ankho kuna omphepo onene mahi Petulu atuluka mombapolo aendela kombanda yomaande okuenda noku Jesus. Mahi etyi ehika ponthele ya Jesus, Petulu atale komphepo iya atili owoma. Ahimbika okunyingila kohi yomaande. Petulu ati: ‘Tatekulu, ndyovole!’ Jesus emukuate menkhanya ati: ‘Omokonda yatyi watilila owoma? Ekolelo liove lili-pi?’

Jesus na Petulu avanyingila mowato iya liwa-liwa omphepo aitalama. Oñgeni ono apostolu velitehelela? Ngwe avati: ‘Tyili-tyili ove umona umwe wa Huku.”

Otyo ha tyikando tyo tete Jesus alinga ehuviso olio. Monthiki imwe, etyi Jesus no no apostolu vekahi nokuyauka elunga nowato, Jesus alala. Puetyi elele, akuya omphepo imwe onene. Omaande otyo aveta mowato iya mowato auyula omaande. Ono apostolu ambupahula-po Jesus, ambuti: ‘Mulongesi, onthue matunkhi! Tukuateseko!’ Jesus akatuka apopila elunga okuti: “Hiliya!” Liwa-liwa, omphepo nelunga avihiliya. Jesus apulu ono apostolu okuti: ‘Ekolelo lienyi lili-pi?’ Avelipopila okuti: “Alo umwe omphepo nelunga vimutavela.” Ono apostolu avelilongesa okuti inkha vayumba onthumbi mu Jesus, kavesukisile okutila owoma otyipuka natyike.