Otyilinga ‘Tyomupika Omukuatyili Nokualunguka’

Ovanthu vatyo aveho va Huku, ohongoi yavo wevekalela komutwe, o Sesusi. (Ova Efesu 5:23) Mahi opo tyina Sesusi eli keulu, oñgeni alulika ovanthu veli pano pohi? Wapa otyilinga tyimwe otyinene “omupika omukuatyili nokualunguka.” (Tanga Mateusi 24:45.) “Omupika” oo una ovipuka ovinyingi alinga, mahi apeho tyina ati pokuvilinga, uhinangela okuti otyilinga tyae okuundapela Sesusi nonondenge mba Sesusi. Omupika watyo oo olie? Oñgeni etutekula?

1. Olie “omupika omukuatyili nokualunguka”?

Nkhele tya kohale, Siovaa ukoya-le ovalume vamwe valulike ovanthu vae. (Malaquias 2:7; Ova Hebeleu 1:1) Etyi Sesusi apita keulu, pahe ankho valulika ovanthu va Huku, ono apositolu, novakulu vewaneno vakala mo Selusalei. (Ovilinga 15:2) Na hono ongotyo. Valulika ovanthu va Huku pano pohi, ovakulu vamwe vewaneno vatiwa Ononkhalamutwe mbo Nombangi mba Siovaa. Ovakulu ovo otyilinga tyavo okutwavela omikanda, no novidiu, novipuka ovikwavo vipameka oupanga wetu na Siovaa. Tupu vena otyilinga otyinene tyokululika ovilinga viokulongesa ovanthu Ombimbiliya mouye auho. Ononkhalamutwe mbo Nombangi mba Siovaa, ovo vatiwa “omupika omukuatyili nokualunguka, una [Sesusi] aholovona.” (Mateusi 24:45a) Ovakulu ovo aveho ovalembulwa. Tyina vanyima, venda keulu vakatumine na Sesusi.

2. Ovipuka patyi omupika etuavela?

Sesusi wapopile okuti omupika ‘mape okulia [ovanthu va Huku] momuvo wanakwa.’ (Mateusi 24:45b) Onthwe tulia ovikulia vikahi nawa opo olutu luetu lukale nawa, atukala nekongoko, ine hatyo? Omupika omukuatyili nae utuavela okulia kutukuatesako tulinge omapanga a Siovaa, atulingi nawa otyilinga Sesusi etutuma tyokulongesa vakuetu Ondaka ya Huku. (1 Timotiu 4:6) Okulia oko, ovipuka ovinyingi tulongesiwa momaliongiyo onosimanu ambuho, no momaliongiyo omanene, no momikanda vietu, nomo novidiu. Onondunge ombo ambuho tulongesiwa mbapolwa mo Mbimbiliya, mbutukuatesako okunoñgonoka etyi Siovaa ahanda, nokupameka oupanga wetu nae.

KUHANDE OKUNOÑGONOKA VALI?

3. Ovanthu va Huku vena okuundapela kumwe

Ononkhalamutwe mbo Nombangi mba Siovaa, valulika ovilinga vyo Nombangi mouye auho. Mahi atyiho valinga, valinga umwe vala etyi Sesusi evetuma. Novakilisitau vo tete navo vali umwe novanthu vevelulika. Talei OVIDIU.

OVIDIU: Siovaa Ululika Ovanthu Vae (6:18)

Tangei 1 Ova Kolindu 14:33, 40, amutomphola epulo eli:

• Ngetyi tuatanga mono velesikulu ombo, oityi tutila Siovaa uhanda ovanthu vae vemufende tyaongana nawa?

4. Omupika omukuatyili uli nokululika ovilinga viokulongesa ovanthu Ombimbiliya

Otyilinga otyinene vali Ovakilisitau vo tete ankho valinga, okulongesa ovanthu Ondaka ya Huku. Tangei Ovilinga 8:14, 25, amutomphola omapulo aa:

• Povakilisitau vo tete, ovalie ankho vena otyilinga tyokululika ovilinga viokulongesa ovanthu Ondaka ya Huku?

• Oityi ovo Petulu na Suau valingile etyi ono apositolu vakwavo vevetuma vakaundape ko Samaliya?

Otyilinga Ononkhalamutwe mbo Nombangi vesuka vali natyo, okulongesa ovanthu Ombimbiliya vakale omapanga a Huku. Talei OVIDIU.

OVIDIU: Otyilinga Tyetu Okulongesa Ovanthu Ombimbiliya (1:24)

Sesusi watile otyilinga tyokulongesa ovanthu Ombimbiliya, tyesukisa unene. Tangei Maluku 13:10, amutomphola omapulo aa:

• Oityi Ononkhalamutwe mbo Nombangi vesukila unene notyilinga etyi tyokulongesa ovanthu Ombimbiliya?

• Oityi tyesukisila umwe Ononkhalamutwe mbo Nombangi valulike ovilinga viokulongesa ovanthu Ombimbiliya vili nokulingwa ouye auho?

5. Omupika omukuatyili nokualunguka utuhongolela

Ononkhalamutwe mbo Nombangi mba Siovaa, ovo vapopia oñgeni ovanthu va Huku mouye auho vena okulinga ovipuka. Mahi valinga ñgeni vapopie otyipuka matyeetela ouwa ovanthu aveho? Valinga ngetyi ankho tyilinga ovakulu valulika Ovakilisitau vo tete. Nkhele tutale oñgeni ovakulu ovo ankho valinga ovipuka. Tangei Ovilinga 15:1, 2, amutomphola omapulo aa:

• Oityi ankho tyili nokuyapaula Ovakilisitau vo tete?

• Ovo Paulu na Balanabe no vakwavo vali, vekelipopile ku valie?

Tangei Ovilinga 15:12-18, 23-29, amutomphola epulo eli:

• Tyina nkhele ovakulu ovo vehenepopie etyi Ovakilisitau aveho vena okulinga, tete vaovolele okunoñgonoka etyi Huku asoka. Mahi pahe vetyilingile ñgeni? — Tala povelesikulu 12, 15 no 28.

Tangei Ovilinga 15:30, 31; 16:4, 5, amutomphola omapulo aa:

• Pahe etyi ovakulu vapopia etyi ankho tyina okulingwa, okuti Ovakilisitau vaanyene?

• Oityi tyatundilika-ko etyi vetavela kovakulu?

Tangei 2 Timotiu 3:16 na Tiaku 1:5, amutomphola epulo eli:

• Tyina Ononkhalamutwe mbo Nombangi vati pokulipakela-mo tyimwe, tete valinga-tyi?

ETYI WELILONGESA

Welilongesa okuti “omupika omukuatyili nokualunguka,” Sesusi apa otyilinga tyokululika ovanthu va Huku, nokuvepa etyi vesukisa vapameke oupanga wavo na Huku, Ononkhalamutwe mbo Nombangi mba Siovaa.

Okupitulula

• Olie wakoya “omupika omukuatyili nokualunguka”?

• Ovipuka patyi omupika etulingila?

• Ove utavela okuti Ononkhalamutwe mbo Nombangi mba Siovaa, ovo “omupika omukuatyili nokualunguka”?

KUHANDE OKUOVOLA VALI?

Tala oñgeni Ononkhalamutwe mbo Nombangi valinga otyilinga tyavo.

“Ovalie Ononkhalamutwe mbo Nombangi mba Siovaa?” (Mo jw.org)

Tala ovilinga vilinga Ononkhalamutwe mbo Nombangi, opo omikanda vietu vipopie umwe vala otyili.

Ovilinga Vikala-po Tukale Nomikanda Vipopia Otyili (17:18)

Oñgeni Ononkhalamutwe mbo Nombangi vatala otyilinga Sesusi eveavela?

Tuapewa Otyilinga Tyimwe Otyinene (7:04)

Etyi tulongesiwa momaliongiyo no movionge, tyimoneka umwe okuti Siovaa uli nokukuatesako Ononkhalamutwe mbo Nombangi.

Siovaa Uli Nokulongesa Ovanthu Vae (9:39)