Onthyulilo Youye Itilisa Owoma, Nokuhuvisa, Nokulimbililiswa

Oñgeni ulitehela tyina usoka konthiki 21 ya Kayovo yo 2012, onthiki ovanyingi vapopia okuti omo mamuya epiluluko liouye? Tyitei kuetyi ukevelela, ove upondola okuhambukwa, ine okusoya ine okulimbililwa. Okuti olo olusoke vala olukuavo luahaviukile konthele yonthyulilo youye?

Iya “onthyulilo youye” yapopiwa Mombimbiliya? (Mateus 24:3 , Bíblia Sagrada) Ovanyingi vena owoma wokuti ohi maiya okuyokua. Ovakuavo vahanda unene okutala oityi matyikamoneka konthyulilo youye. Ovanyingi pahe vepuila mokonda tunde pouna vapopilwa okuti onthyulilo ikahi popepi. Mahi okuti etyi ovanthu vasoka tyihuvisa vali tyipona etyi matyikamoneka?

Ove upondola okuhuva tyina wamelilongesa etyi Ombimbiliya tyilityili ipopia konthele yonthyulilo youye. Ombimbiliya kaipopi vala omahunga tuna okukevelela onthyulilo youye, mahi tupu ihangununa okuti vamwe vasoya mokonda vasoka okuti onthyulilo ikahi nokuseta unene. Tukahi nokukukonga opo utale oñgeni Ombimbiliya ikumbulula omapulo amwe akaka konthele yonthyulilo youye.

EKUMBULULO LIOMBIMBILIYA: “[Huku] watunga ohi pomphangu yaviuka nawa; kamaikatengaiswa, omuvo uhapu ine apeho, apeho.”—SALMO 104:5.

Ohi kamaikahanyaunuako tyilinge notupia ine ona tyimwe vali. Anthi, Ombimbiliya ilongesa okuti ohi eumbo liovanthu pala apeho. Salmo 37:29 yati: “Ovaviuki mavakapiñgana ohi, avakakalako apeho.”—Salmo 115:16; Isaías 45:18.

Etyi Huku alinga ohi, wati “yaviuka nawa unene” iya na hono ongotyo eitala. (Gênesis 1:31) Kapangele okuihanyako, oe walaa okuti “mahanyeko vana vekahi nokuhanyauna ohi,” nokuiiamena ku vana vahanda okuihanya.—Revelação 11:18.

Ove hamwe upondola okusoka ku 2 Pedro 3:7. Oversikulu oyo Yombimbiliya yati: “Eulu nohi vikahiko hono, viapakwa pala otupia.” Otyo katyilekesa okuti ohi maiya okuyokua? Pamwe Ombimbiliya ipopia “eulu,” “nohi” “notupia” ngotyilekeso. Mongeleka, tyina Gênesis 11:1 ipopia okuti: “Ohi aiho ankho itualako nelaka like vala,” “ohi” ilekesa ovanthu.

Onoversikulu mbulilandula na 2 Pedro 3:7 mbulekesa okuti, eulu, nohi, notupia viapopiwamo tupu ovilekeso. Oversikulu 5 no 6 mbati eulu nohi viahanyenueko Nombila Onene kononthiki mba Noe, mahi alo hono ohi nkhele oko ikahi. Anthi, Ombila Onene, yaipaeleko vala ovanthu onondingavivi, ine “ohi.” Tupu yahanyeneko vana velifwa “neulu” ine ovanthu vana ankho vatumina ovanthu ovo. (Gênesis 6:11) Ngotyo 2 Pedro 3:7 yapopia otupia pala okulekesa okuti ovanthu onondingavivi novatumini ononkhembi, mavakahanyaunuako apeho.

EKUMBULULO LIOMBIMBILIYA: “Ouye ukahi nokulamba, kumwe nepeleyo liao, mahi una ulinga etyi Huku ahanda makakalako apeho.”—1 JOÃO 2:17.

“Ouye” ukahi nokulamba hakuti ohi, mahi ovanthu aveho mouye vatyinda omuenyo wehelikuatele nehando lia Huku. Ngetyi omunthu wokutanda apondola okupola omunthu ouvela opo emuhupise, na Huku “makapolako” ovanthu onondingavivi opo ovanthu onondalawa vakale nomuenyo apeho kombanda yohi. (Salmo 37:9) Monkhalelo oyo, “onthyulilo youye” otyipuka otyiwa.

Okupopia monkhalelo yaviuka “onthyulilo youye,” Onombimbiliya mbumwe mbupopia okuti “okumanuhuka kuovipuka,” ine “onthyulilo yomuvo.” (Mateus 24:3; Nova Versão Internacional) Inkha onondingavivi vala mambuya okuhanyuako, otyo tyilekesa okuti makukahupa ovanthu mavakakala apeho kombanda yohi nomuenyo umwe welikalela. Tyotyili, Ombimbiliya ityitavela, mokonda ipopia konthele “youye ukahi nokuya.”—Lucas 18:30.

Jesus waihanene omuvo oo wokomutwe okuti “epiluluko liovipuka aviho.” Momuvo watyo oo, Jesus makapilulula ovanthu avakakala nonkhalelo Huku ahandele ponthyimbi. (Mateus 19:28, Nova Tradução na Linguagem de Hoje) Matukakala novipuka evi oviwa:

• Omphangu yombembwa, nepamo, novipuka oviwa pala aveho.—Isaías 35:1; Miquéias 4:4.

• Ovilinga oviwa vihambukiswa.—Isaías 65:21-23.

• Omauvela aeho maakahakulwa.—Isaías 33:24.

• Vokuakulupa mavakakondoka koukuendye.—Jó 33:25.

• Vokuankhia mavakatutiliswa.—João 5:28, 29.

Inkha tulinga “ehando lia Huku,” ine etyi aita kuonthue, katuesukisile okukala nowoma nonthyulilo. Mahi, tupondola okuikevela nehambu.

EKUMBULULO LIOMBIMBILIYA: “Tyina muamatale okuti ovipuka evi vikahi nokumoneka, noñgonokei okuti ouhamba wa Huku ukahi popepi.”—LUCAS 21:31.

Omulongesi Richard Kyle wahoneka momukanda The Last Days Are Here Again, (Ononthiki Mbonthyulilo Mbukahi Vali Pano) okuti: “Omapiluluko omanene, novilwa ovanthu vekahi nokulinga vikahi nokueta ovitateka vituala konthyulilo youye,” haunene tyina omapiluluko novilwa ovio vimoneka ngoti vipuilisa okuvihangununa.

Mahi, ovauli Vombimbiliya kavatokolele okuhoneka konthele yonthyulilo opo vahangunune omokonda yatyi ankho kuamonekela ovipuka ovivi. Anthi, vatumwa na Huku opo vahoneke ovipuka ankho mavikeya komutwe mavikalekesa okuti onthyulilo youye ikahi popepi. Tala omaulo amwe, nokusoka ove muene inkha ekahi umwe nokufuiswapo hono.

• Ovita, nondyala, novinimawe, nomauvela, nomikihi vikahi nokuipaa unene.—Mateus 24:7; Lucas 21:11.

• Eliyawiso lioungangala.—Mateus 24:12.

• Ovanthu vekahi nokuhanyauna oohi.—Revelação 11:18.

• Ovanthu velihole ovo muene, nokuhole onombongo, nomalia-alia mahi kavehole Huku.—2 Timóteo 3:2, 4.

• Ehanyauno lionombunga.—2 Timóteo 3:2, 3.

• Ovanthu vahasukile nokuti onthyulilo ikahi popepi.—Mateus 24:37-39.

• Onondaka onongwa Mbouhamba wa Huku mbukahi nokuiviswa mouye auho.—Mateus 24:14.

Ngetyi Jesus apopile, okutala “ovipuka ovio aviho” tyitunoñgonokesa okuti onthyulilo youye ikahi popepi. (Mateus 24:33) Onombangi mba Jeova vetavela okuti omalekeso oo otyotyili, iya eveavela ondundo yokuivisa nombili movilongo 236.

EKUMBULULO LIOMBIMBILIYA: “Putyina vamapopi okuti: “Ombembwa nepamo!” ehanyauno maliya otyiuhulukila, ngetyi onongembia mbuuhulukila omukai omulemi, iya kamavakahupa.”—1 TESSALONICENSES 5:3.

Ombimbiliya yeeleka onthyulilo youye nonongembia mbomukai ukutula. Omukai kapondola okutyilika onongembia ombo. Omuvo utuala konthyulilo waelekua nomukai omulemi, tyina omulemi amatale okuti onongembia mbukahi nokuliyawisa, wimbuka okuti uhungi kokukutula. Ondotolo yae ipondola okumupopila onalupi makutula, mahi namphila hamwe ahakutula monthiki yapopiwa nondotolo, oe nkhele una onthumbi yokuti apa katutu makutula. Tyelifwa notyo, namphila onthyulilo yeheile momuvo ankho ovanthu veikevela, otyo katyipilulula otyili tyokuti tukahi “mononthiki mbahulililako.”—2 Timóteo 3:1.

Ove hamwe upondola okulipula okuti: ‘Inkha enyingilikilo lionthiki yonthyulilo limoneka nawa, omokonda yatyi ovanthu vehetyiimbukila?’ Ombimbiliya ilekesa okuti, tyina onthyulilo yamehiki popepi ovanthu ovanyingi mavatombo omalekeso. Kamaveketavela okuti onkhalelo youye ikahi nokuvilapo, nokuti tukahi mononthiki mbahulililako, mahi mavakakuela vana vetavela, iya avati: “Tunde onthiki ovakuakulu vetu vankhia ovipuka vikahi nokutualako ngetyi ankho vikahiale konthyimbi yovipuka aviho.” (2 Pedro 3:3, 4) Monondaka ononkhuavo, enyingilikilo liononthiki mbonthyulilo limoneka nawa, mahi ovanyingi kavetavela.—Mateus 24:38, 39.

Monthele ei tuelilongesa vala onotestu mbumwe mbo Vihonekwa mbulekesa okuti onthyulilo ikahi popepi.a Kuhande okunoñgonoka vali? Inkha uhanda, omokonda yatyi uhapopila no Nombangi mba Jeova opo vekulongese Ombimbiliya otyali? Mupondola okulilongesila peumbo liove ine opomphangu onkhuavo uhanda, ine oko telefone. Etyi wesukisa vala, okuava omuvo wove, iya oviwa mopoloko kavifetelua.