‘Tyilingei Opo Munthyinangele’

1, 2. Oityi hamwe ono apostolu mbasokele etyi Jesus nkhele ehenelinge oungendi wahulililako wokuenda ko Jelusalei?

‘KEULU kutupu omakaka, ohanyi imoneka nawa. Motyinthiki tyokualamba, omulavi mo Jelusalei tyafuile nae wetyimuene. Etyi vo Mombonge Onene Yova Judeu vetyimona, vapopia okuti ohanyi omphe ya Nisã ikahi nokuhimbika. Iya ovatumwa avayandyanesa liwa onondaka ombo, ovanthu aveho avetyiivi. Tyotyili, Jesus ankho uhanda okutunda mo Jelusalei opo etyivile okuhika tyina nkhele Opasikwa yehenehimbike.’

² Otyo hamwe, otyo ono apostolu mbumwe mbasokele etyi ankho vekahi na Jesus moungendi wae wahulililako wokuenda ko Jelusalei. Pomuvo opo, ankho vekahi mo Pereia, onthele onkhuavo Yenyana Jordau. (Mateus 19:1; 20:17, 29; Marcos 10:1, 32, 46) Mokonda ova Judeu ankho vetyii onalupi onthiki 1 ya Nisã maihimbika, vakevelela vali ononthiki 13 iya avali Opasikwa etyi ekumbi lianyingila monthiki 14 ya Nisã.

 3. Ovakristau vesuka nonthiki Yopasikwa mokonda yatyi?

³ Onthiki Yondalelo ya Tatekulu yelikuata nonthiki ankho Opasikwa ilingwa, maihinangelwa mu 14 ya Tyikukutu yo 2014, tyina ekumbi liamanyingila. Oyo maikala onthiki yakolela pala Ovakristau votyotyili, novanthu ovakuavo. Mokonda yatyi? Mokonda yetyi tutanga mu 1 Coríntios 11:23-25 okuti: “Jesus, motyinthiki apakulwa, wapola ombolo, iya, etyi amana okupandula, wavembaula ombolo iya ati: ‘Ombolo ei ilekesa olutu luange mandyiave mokonda yenyi. Tualeiko okutyilinga opo munthyinangele.’ Iya tupu, alingi ngotyo nokopo.”

 4. (a) Omapulo patyi upondola okulilinga konthele Yehinangelo? (b) Oñgeni tunoñgonoka onthiki Ehinangelo malilingwa kese enima? (Tala okakasa “Ehinangelo lia Tatekulu mo 2014.”)

⁴ Ehinangelo olio, olio vala Jesus apopilile ovalanduli vae okuti vena okutyilinga kese enima, iya tyilityili nove mohande okukalapo. Tyina nkhele onthiki oyo yehenehikepo, lipula: ‘Oñgeni mandyilipongiya pala Ehinangelo? Ovipuka patyi maviundapeswa Pehinangelo? Malilingwa ñgeni? Ehinangelo novipuka maviundapeswapo viakolela kuame mokonda yatyi?’

 5. Oityi Jesus atumine ono apostolu opo vapongiye Opasikwa?

⁵ Etyi Jesus apopilile ono apostolu vaovole ondyuo mavalila Opasikwa, kevepopilile vahivisuemo unene. Mahi ankho uhanda vala ondyuo yasukuka nawa nokuna omphangu makala nono apostolu mbae. (Tanga Marcos 14:12-16.) Tupu, ono apostolu vaetele atyiho tyesukisa pala ondalelo, okukutikinyamo onombolo novinyo yotindu. Etyi vamana okulia Opasikwa, Jesus apopi konthele yombolo novinyu.

 6. (a) Etyi vamana okulia Opasikwa, oityi Jesus apopile konthele yombolo? (b) Ombolo patyi yuundapeswa Pehinangelo lia Tatekulu?

⁶ Apostolu Mateus ankho ukahipo, konyima wahonekele okuti: “Jesus wapola ombolo elikuambela, iya eivembula pokati, eiyavela ovalongwa vae ati: ‘Tambulei liei.’” (Mateus 26:26) “Ombolo” ankho kayapakelwe onkhiso, ankho yelifwa nei ankho yuundapeswa Popasikwa. (Êxodo 12:8; Deuteronômio 16:3) Ombolo ankho ilingwa nohinde yotiliku nomeva, ankho kaipakwa onkhiso, nomongwa, novikuavo vali. Ankho ombolo onthutu yakukuta itavela okuivembaula. Hono, tyina nkhele Ehinangelo liehenehimbike, ovakulu vewaneno vapondola okuita omunthu umwe alinge ombolo ngoyo. Yesukisa okulingwa nohinde yotiliku, nomeva, aiyokua. Ombolo ova Judeu ankho valia Popasikwa itiwa matzotes, yahapakelwe ovikunwa vikoleswa, nomayiyi, ine osapola nayo ipondola okuundapeswa. Kovilongo kuhena ohinde yotiliku, vapondola okuundapesa ohinde yoluoso, no yosevata, no yovilia.

 7. Ovinyu patyi Jesus aundapesile Pondalelo ya Tatekulu? Ovinyu patyi ipondola okuundapeswa Pehinangelo lia Tatekulu?

⁷ Mateus tupu wapopile okuti Jesus “wapola okopo, iya etyi elikuambela, eveavelayo ati: ‘Nueiko amuho.’” (Mateus 26:27, 28) Jesus ankho wakuata okopo yovinyu yotindu. (Ankho ha sumuko yono uva, mokonda ankho omuvo wono uva walambale.) Mopasikwa yotete yalingilwe mo Egitu ankho mutupu ovinyu, mahi Jesus kapopile okuti tyapenga okunwa ovinyu Popasikwa. Alo umwe waundapesile katutu ovinyu Mondalelo ya Tatekulu. Ngotyo, Ovakristau hono tupu vaundapesa ovinyu Pehinangelo lia Tatekulu. Ovinyu patyi yesukisa okuundapeswa? Ngetyi ohonde ya Jesus ankho yehesukisile okupakwa natyike opo ikale vali nesilivilo, tupu Pehinangelo lia Tatekulu kapapondola okuundapeswa ovinyu yotindu yahonyaikwa novipuka ovikuavo. Ngotyo, tyesukisa okuundapesa ovinyu yotindu yalingwa vala nono uva, yalingilwa peumbo, ine okulanda ei ikahi nawa, ngetyi o Beaujolais, Burgundy, Chianti ine o Dão.

 8. Omokonda yatyi Ovakristau vahandela okunoñgonoka etyi tyilekesa ovinyu, nombolo?

⁸ Apostolu Paulu wapopile okuti hano apostolu vala ankho vena okulinga Ondalelo ya Tatekulu, mahi tupu Novakristau ovakuavo. Paulu wahonekelele ovakuatate mo Korintu okuti: “Ame natambula ku Tatekulu etyi tupu nemutolela okuti Tatekulu Jesus . . . wapola ombolo, etyi amana okupandula, wavembaula ombolo ati: ‘Ombolo ei ilekesa olutu luange mandyiave mokonda yenyi. Tualeiko okutyilinga opo munthyinangele.’” (1 Coríntios 11:23, 24) Mokonda Ovakristau hono vatumwa okuhinangela ononkhia mba Jesus kese enima, vahanda unene okunoñgonoka etyi tyilekesa ovinyu, nombolo.

 9. Olusoke patyi luahavikile vamwe vena konthele yombolo Jesus aundapesile?

⁹ Ovanthu vamwe vokuenda konongeleya, vetavela okuti Jesus ankho ukahi umwe nokupopia okuti ‘ombolo ei olutu luange.’ Ngotyo vetavela okuti palingilwe ehuviso iya ombolo aikala olutu lwa Jesus. Mahi otyo hatyoko tyamonekelepo.a Ono apostolu mbekolelo ankho veluete olutu lwa Jesus nombolo yahapakelwe onkhiso. Tyimoneka nawa okuti Jesus ankho ukahi nokupopia okuti ombolo ilekesa olutu lwae. Jesus ankho apeho uundapesa omalekeso tyina alongesa.​—João 2:19-21; 4:13, 14; 10:7; 15:1.

10. Ombolo Pehinangelo lia Tatekulu ilekesa tyi?

¹⁰ Ombolo ono apostolu ankho veluete iya mavali, ankho ilekesa olutu lwa Jesus. Ankho Ovakristau votyotyili vasoka okuti ombolo ilekesa ewaneno Liovakristau ovalembulwa, Ombimbiliya iihana okuti “olutu lwa Kristu.” Ankho vasoka ngotyo mokonda Jesus wavembaulile ombolo mahi pomankhipa ae nalike liatyokelwe. (Efésios 4:12; Romanos 12:4, 5; 1 Coríntios 10:16, 17; 12:27) Mahi etyi velilongesa vali nawa, vanoñgonokele okuti ombolo ilekesa olutu lwa Jesus etyi ankho eli pano pohi. Ovihonekwa vipopia oñgeni Jesus “amonesilue ononkhumbi” alo umwe apapelwa momuti wemone. Ngotyo, ombolo Pehinangelo lia Tatekulu ilekesa olutu Jesus aavele pala ononkhali mbetu.​—1 Pedro 2:21-24; 4:1; João 19:33-36; Hebreus 10:5-7.

11, 12. (a) Oityi Jesus apopile konthele yovinyu? (b) Ovinyu Pehinangelo lia Tatekulu ilekesa tyi?

¹¹ Otyo tyitukuatesako okunoñgonoka etyi Jesus apopile konthele yovinyu. Tutanga okuti: “Tupu alingi ngotyo no kopo, etyi vamana okulia ondalelo, ati: ‘Okopo ei ilekesa omphango omphe mokonda yohonde yange.’” (1 Coríntios 11:25) Onombimbiliya ononyingi mbupopia ngetyi tyipopia Ombimbiliya ya Robert Young, yati: “Ei ilekesa omphango omphe yohonde yange.” (Onthue tueiyendameka.) Okuti Jesus walingile omphango omphe nokopo? Au. Jesus ankho ukahi nokupopia ovinyu ikahi mokopo. Jesus wapopile okuti ovinyu ilekesa tyi? Ilekesa ohonde yae.

¹² Mo Evandyeliu ya Marku, tuvasamo onondaka mba Jesus, wati: “Etyi tyilekesa ‘ohonde yange yomphango,’ maimomeswa pala ovanthu ovanyingi.” (Marcos 14:24) Tyotyili, ohonde ya Jesus ankho “maimomeswa pala ovanthu ovanyingi, opo vaevelwe ononkhali.” (Mateus 26:28) Ngotyo, ovinyu yotindu ilekesa ohonde ya Jesus. Ohonde ya Jesus oyo iikula ondyila opo tuevelwe ononkhali mbetu.​—Tanga Efésios 1:7.

13. Ehinangelo liononkhia mba Kristu lilingwa ñgeni?

¹³ Inkha moende Kehinangelo lia Tatekulu no Nombangi mba Jeova otyikando tyotete, oityi ukevelela? Ehinangelo lia Tatekulu malilingilwa mondyuo yasukuka, muna omphangu opo ovanthu aveho vapumphame nawa, nokutehelela nawa eliongiyo. Mavafiwisamo no nonthemo mbumwe, mahi kamamuhiwa unene ngoti mulingilwa otyipito. Omukulu umwe weuaneno walongoka nawa malingi elongomona liapolwa Mombimbiliya lipopia konthele Yondalelo ya Tatekulu. Mahangununa okuti ononkhia mba Kristu mbaikula ondyila opo tuyovolwe atukala nomuenyo wahapu. (Tanga Romanos 5:8-10.) Omulongomoni tupu mapopi konthele yomakevelelo evali apopiwa Mombimbiliya.

14. Omakevelelo patyi evali maapopiwa melongomona Liehinangelo lia Tatekulu?

¹⁴ Vamwe vena ekevelelo liokukatumina na Kristu keulu. Vena ekevelelo olio, ono apostolu vekolelo, Novakristau ovakuavo vehehi. (Lucas 12:32; 22:19, 20; Revelação 14:1) Ekevelelo ekuavo opala Ovakristau ovanyingi vekolelo mavakakala nomuenyo wahapu momphangu yombembwa pano pohi. Ngotyo, ehando lia Huku malikalingwa pano pohi ngetyi likahi nokulingwa keulu, otyipuka Ovakristau vaita apeho. (Mateus 6:10) Ovihonekwa vipopia omuenyo omuwa ovanthu mavakakala nao apeho.​—Isaías 11:6-9; 35:5, 6; 65:21-23.

15, 16. Oityi tyilingwa nombolo Mehinangelo lia Tatekulu?

¹⁵ Konyima yokupopia omakevelelo oo evali, omulongomoni mapopi okuti pahe omuvo wehikapo wokulinga ngetyi Jesus alingile Mondalelo ya Tatekulu. Ponthele yae mapakala omesa maipakwa ombolo yahapakelwe onkhiso novinyu yotindu. Omulongomoni matange Ombimbiliya, ahangununa etyi Jesus alingile nombolo. Matange ehipululo lia Mateus liati: “Jesus wapola ombolo elikuambela, iya eivembula pokati, eiyavela ovalongwa vae, ati: ‘Tambulei liei. Ombolo ei ilekesa olutu luange.’” (Mateus 26:26) Jesus wavembulile ombolo eiyavela ono apostolu ankho vekahi nae. Pehinangelo lia Tatekulu mu 14 ya Tyikukutu, matumono ombolo yahapakelwe onkhiso yavembulwa aipakwa pomalonga.

¹⁶ Tyina nkhele omalonga ehenelambeswe, omukuatate umwe malingi elikuambelo esupi. Mapakala omalonga atuuka opo ombolo ilambeswe kovanthu aveho momuvo wehehi, nomonkhalelo yaongana nawa. Kamapalingwa otyiso natyike. Hamwe mapakala umwe mali kombolo ine petupu nawike maliko, ngetyi tyamonekele momawaneno omanyingi Mehinangelo lia Tatekulu mo 2013.

17. Pehinangelo lia Tatekulu, oñgeni tulandula ehongolelo lia Jesus konthele yovinyu?

¹⁷ Konyima, omulongomoni matange etyi Jesus alingile novinyu: “Wapola okopo, iya etyi elikuambela, eveavelayo ati: “Nueiko amuho. Mokonda ilekesa ‘ohonde yange yomphango,’ maimomeswa pala ovanthu ovanyingi, opo vaevelwe ononkhali.’” (Mateus 26:27, 28) Okulandula ehongolelo olio lia Jesus, mapalingwa elikuambelo ekuavo, iya apalambeswa ovinyu yotindu.

18. Inkha mavali kombolo nokunwa kovinyu kavehi, nongotyo tyakolela okukala Pehinangelo lia Tatekulu mokonda yatyi?

¹⁸ Ovanyingi mavakalapo, kamavali kombolo nokunwa kovinyu, mokonda ngetyi Jesus alekesile, mavaliko ovo vana vala vena ekevelelo liokukatumina Mouhamba wa Kristu keulu. (Tanga Lucas 22:28-30; 2 Timóteo 4:18) Namphila Ovakristau ovanyingi kamavali kombolo ine okunwa kovinyu, nongotyo tyakolela okukala Pondalelo ya Tatekulu mokonda tyilekesa okuti vapanda unene esilivilo liotyilikutila tya Jesus. Mokueenda kuehinangelo, vapondola okusoka kononkhano ambuho onongwa ofeto yeyovo yeveetela. Mongeleka, vena ekevelelo liokukakala “otyinyingi tyovanthu” matyikahupa “kononkhumbi ononene.” Mokonda yekolelo vena motyilikutila tya Jesus, mavakakala ovaviuki komaiho a Huku, ngatyina “vakoha ovikutu viavo ovile, nokuviyelesa mohonde yo Ndyona.”​—Revelação 7:9, 14-17.

19. Oñgeni tupondola okulipongiya opo tupole ouwa Kehinangelo?

¹⁹ Oñgeni Onombangi mba Jeova mouye auho velipongiya pala Ehinangelo lia Tatekulu? Tyina nkhele kuakambela onosimano ononyingi pala Ehinangelo, tukonga ovanthu aveho opo navo vakalepo. Tyina kuamakambela ononthiki mbumwe, tutanga omahipululo Ombimbiliya apopia konthele yetyi Jesus alingile, netyi tyamonekele etyi Ondalelo ya Tatekulu nkhele yehenelingwe menima 33 P.K. Tulionganeka nawa opo tukale Pehinangelo. Tuhika tyina eliongiyo nkhele liehenehimbike, opo tutambule vana tuakonga, atuahapumbwa onthele naike yeliongiyo olio. Atuho, ovakuatate no nomphange, novaenda, matupoloko ouwa inkha tulandula mo Nombimbiliya mbetu tyina omulongomoni atanga, nokuhangununa onotestu. Haunene, tyina tuenda Kehinangelo tulekesa okuti tupandula unene otyilikutila tya Jesus, nokutavela otyitumino etyi: “Tualeiko okutyilinga opo munthyinangele.”​—1 Coríntios 11:24.