Umbila Jeova Tyina Nkhele Ononthiki Onombi Mbuheneye

1, 2. (a) Elondolo patyi Salomau atumwa okuhonekela ovakuendye? (b) Ovakristau vena omanima 50 navana valambapo tupu vena okusuka nelondolo olio mokonda yatyi?

JEOVA watumine Ohamba Salomau apopile ovakuendye okuti: “Hinangela Omupakeko wove Omunene tyina nkhele umukuendye, tyina nkhele ononthiki onombi mbuheneye.” “Ononthiki onombi” ombupi? Onondaka ombo mbulekesa omunthu tyina akulupa. Salomau waundapesa onondaka ombo pala okupopia ovitateka viavana vakulupa: okuteketa omaoko, novikalo, nomayo atokamo, nokuhamonopo nawa, nokuheiviko nawa, no nohuki mbutuela, nokuvototela. Otyo Salomau etupopilila tuhinangele Omutungi wetu Omunene tyina nkhele tuvakuendye.​—Tanga Eclesiastes 12:1-5.

² Ovakristau ovanyingi vena omanima 50 navana valambapo nkhele vapama. Hamwe vena katutu onombi, mahi nkhele vetupu ovitateka viekongoko Salomau apopia. Okuti ovakulu ovo Ovakristau vapondola okupola ouwa kelondolo Salomau apopila ovakuendye liokuati: “Hinangela Omupakeko wove Omunene”? Oityi elondolo olio lihangununa?

 3. Okuhinangela Omutungi wetu Omunene tyilekesa tyi?

³ Namphila ukahiale nokuumbila Jeova omanima omanyingi, mahi pamwe otyiwa okusoka nawa kounene Womutungi wetu. Omuenyo otyipuka tyimwe otyiwa tuapewa. Onkhalelo ovipuka viatungwa ovanthu kavetyivili okuinoñgonoka nawa. Ovipuka oviwa vielikalela Jeova atunga vitukalesa nehambu mononkhalelo ononyingi. Tyina tusokolola kovipuka Jeova atunga, vituhinangelesa okuti una oluembia, nounongo, nepondolo. (Sal. 143:5) Mahi, okuhinangela Omutungi wetu Omunene, tupu tyilekesa okuhinangela etyi ahanda kuonthue. Okusokolola kovipuka ovio aviho, tyitulunda okulekesa olupandu luetu pokulinga atyiho tuvila movilinga Viae tyina nkhele tuna omuenyo.​—Ecl. 12:13.

 4. Oityi Omukristau wii ovipuka ovinyingi apondola okulipula, iya omokonda yatyi?

⁴ Inkha walingale ovipuka ovinyingi momanima omanyingi, lipula okuti: ‘Oityi ndyipondola okulinga pahetyino, putyina nkhele ndyina ononkhono nokuapama?’ Mokonda Umukristau omunongo, una onomphitilo vakuenyi vehena. Mongeleka, upondola okulongesa ovakuendye etyi wii konthele ya Jeova. Upondola okupopila vakuenyi ovipuka oviwa welilongesa omuvo ukahi nokuumbila Huku. Ohamba David welikuambelele opo akale nomphitilo yokulinga ngotyo. Wahoneka okuti: “Huku yange, ove wandongesa tunde poukuendye . . . Na tyina namakulupa nokuna onombi, uhandyekepo, Huku yange. Ndyeke ndyipopile ovanthu aveho ounene wove. Na aveho vana maveya okutehelela ounene wove.”​—Sal. 71:17, 18.

 5. Oñgeni Ovakristau ovakulu vapondola okupopila vakuavo etyi vei?

⁵ Oñgeni upondola okupopia ounongo wakala nao omanima omanyingi? Okuti upondola okukonga ovakuendye veye keumbo liove? Upondola okuveita vakaivise nove opo vatale ehambu una movilinga via Jeova? Eliu wati: “Yeka ononthiki mbupopie, nokuyeka omanima omanyingi apopie ounongo.” (Jó 32:7) Apostolu Paulu wapopilile ovakai Ovakristau ovanongo vaavele ondundo vakuavo nonondaka mbavo no nongeleka. Wahoneka okuti: “Ovakai ovakulu vakale . . . ovalongesi vovipuka oviwa.”​—Tito 2:3.

 6. Omokonda yatyi tuesukisila Ovakristau vei ovipuka ovinyingi?

⁶ Inkha Umukristau omunongo, una ovipuka ovinyingi upondola okulinga opo ukuateseko vakuenyi. Soka kovipuka wii pahetyino ankho uhei momanima 30 ine 40 konyima. Wanoñgonoka oñgeni upondola okulandula nawa onondonga Mbombimbiliya momuenyo wove. Una ounongo wokuhika komutima wovanthu notyili Tyombimbiliya. Inkha umukulu weuaneno, utyii oñgeni mokuatesako ovakuatate valinga omatokolo ahaviukile. (Gál. 6:1) Hamwe wanoñgonoka oñgeni tyihongolelwa ovilinga mewaneno, novionge, ine okutunga Onondyuo Mbomaliongiyo. Hamwe utyii oñgeni tyipewa ondundo onondotolo opo vahakule ovanthu avehevepake ohonde. Alo umwe inkha wambatisalua pahetyino, wanoñgonoka ovipuka ovinyingi. Mongeleka, inkha una ovana, mokala nounongo maukukuatesako unene. Ovakulu Ovakristau ondyivi-ndyivi onene yepameko yovanthu va Jeova pala okulongesa, nokuhongolela, nokuavela ondundo ovakuatate nonomphange.​—Tanga Jó 12:12.

 7. Oityi ovakulu vapondola okulongesa ovakuendye?

⁷ Omononkhalelo patyi ononkhuavo upondola okuundapesa ounongo wove opo uvatele vakuenyi? Hamwe upondola okulekesa ovakuendye oñgeni tyihimbikwa okulongesa ovanthu Ombimbiliya. Inkha umphange, okuti upondola okukuatesako ovahikuena vena ovana oñgeni vapondola okutualako novilinga viavo na Jeova putyina vatekula ovana ovatutu? Inkha umukuatate, okuti upondola okulongesa ovakuendye okulinga omalongomona noundyandyi, nokuivisa vali nawa onondaka onongwa? Okuti upondola okuvelekesa oñgeni wavela ondundo ovakuatate ovakulu, nonomphange tyina ukevetalelapo? Namphila wehena vali ononkhono ankho una, nkhele una onomphitilo onongwa mbokulongesa ovakuendye novahikuena. Ondaka ya Huku yati: “Omunkhima wovakuendye ononkhono mbavo, ouwa wovakulu onombi mbavo.”​—Pro. 20:29.

 8. Oityi apostolu Paulu alinga alo umwe etyi akulupa?

⁸ Apostolu Paulu watuaileko okuundapa unene movilinga via Huku alo umwe etyi akulupa. Etyi ayovoka mokaleya mo Roma menima 61 P.K., ankho wafuapo pala okuundapa unene nokukoleleya ovitateka ovinyingi movilinga vioumisionaliu. Ankho upondola okuholovona okukala vala mo Roma. (2 Cor. 11:23-27) Ovakuatate mo Roma tyipondola hamwe ankho vahanda Paulu akale vala mo Roma opo evekuateseko. Mahi Paulu ankho wamona okuti kovilongo ovikuavo nako ankho kuesukisa ovaivisi. Ngotyo, atokola okulinga oungendi wae wakuana woumisionaliu. Avaende noko Efesu na Timoteo na Titu, alo ko Kreta, tyafuile alo ko Masedonia. (1 Tim. 1:3; Tito 1:5) Katutyii inkha waile alo ko Espanha, mahi ankho wapanga okuendako.​—Rom. 15:24, 28.

 9. Onalupi Petulu ailuka opo akaundape kuna kuesukisa vali ovaivisi? (Tala olutalatu pefo pahimbikila onthele ei.)

⁹ Apostolu Petulu tyafuile ankho una omanima alamba po 50 etyi ailukila kuna kuesukisa vali ovaivisi. Oñgeni tutyii? Inkha wali nomanima ngo a Jesus ine omukulu vali, otyo tyilekesa okuti ankho una omanima 50 etyi elivasa nono apostolu ononkhuavo mo Jelusalei menima 49 P.K. (Atos 15:7) Konyima yeliongiyo olio, pakala vala katutu, Petulu akakala mo Mbambilonia, opo aivise ova Judeu ovanyingi ankho vakalamo. (Gál. 2:9) Ankho omo akala etyi ahoneka omukanda wae wotete, menima 62 P.K. (1 Ped. 5:13) Okuilukila kuna kuesukisa vali ovaivisi katyapepukile, mahi Petulu kayekele okuekula tyimutyilike okukala nehambu liokuumbila vali nawa Jeova.

10, 11. Oityi Robert nomukai wae valinga?

¹⁰ Hono, Ovakristau ovanyingi vena omanima 50 vatala okuti onkhalelo yavo yomuenyo yapiluluka iya vapondola okuumbila Jeova mononkhalelo ononkhuavo. Vamwe vailukila kuna kuesukisa vali ovaivisi. Otyo tyalinga Robert nomukai wae. Ankho vena omanima 55 etyi vanoñgonoka okuti vena onomphitilo ononyingi mbokuumbila Jeova. Ankho vena vala omona wike mahi ankho kakala vali meumbo, iya ankho vetupu ovohe vakulupa pala okutekula. Epingo vapelwe ankho kalihi, avasoko okuti inkha valandesa ondyuo yavo mavakala nonombongo mbokufeta onongele mbavo, nokulitekula alo Robert apewa onombongo mbae kovilinga. Veiva okuti ko Bolívia ovanthu ovanyingi vekahi nokutavela otyili iya ha tyilongoko tyepuiya okukala. Ngotyo avatokola okuiluka. Robert wati: “Okutyiliya kotyilongo oko katyapepukile. Ovipuka aviho vielikalela unene nevi ankho tuetyiliya ko América yoko Norte. Mahi, ononkhono tualinga mbayambwa unene.”

¹¹ Robert ayawisako okuti: “Pahe omuvo wetu tuumanena movilinga via Huku mewaneno. Ovanthu vamwe tualongesa Ombimbiliya vambatisalwa. Tualongesa ombunga imwe, yahepa ikala mepundaumbo limwe kueendwa ehimbwe pala okuhika ko. Mahi kese simano, ombunga oyo, ilinga oungendi wepuiya opo veye komaliongiyo. Tuahambukwa unene okutala ombunga ikahi nokulongoka motyili nomona wavo omukulu wanyingila movilinga vioukokoli-ndyila.”

12, 13. Etyi Brian ahaundapa vali, oityi valinga nae nomukai wae?

¹² Omawaneno omalaka omakuavo apondola okupola ouwa konongeleka mbovakuatate nonomphange ovakulu. Tupu povilongo ovio petavela okuundapa. Mongeleka, Brian woko Grã-Bretanha wahoneka okuti etyi atuula omanima 65 ankho kaundapa vali ukahi vala pondyuo nokutambula onombongo, oe nomukai wae ankho velitehela okuti kavekahi nokuundapesa nawa omuenyo wavo. Brian wati: “Ovana vetu ankho kavakala vali meumbo, iya ankho katuvasi ovanthu vesuka nokulongeswa Ombimbiliya. Konyima, navasa omukuendye woko China mosikola onene ukahi nokuovolola. Etyi nemukonga eye keliongiyo lietu etavela, andyihimbika okumulongesa Ombimbiliya. Etyi palamba onosimano mbumwe, ahimbika okuya nepanga liae nae woko China. Etyi palamba vali onosimano onombali, aeta watatu, iya aeta vali wakuana.

¹³ “Pomuvo opo, ova China vetano vaita ndyivelongese Ombimbiliya, andyisoko okuti: ‘Mokonda yomanima 65 ndyina, katyilekesa okuti hipondola okuundapa vali unene movilinga via Jeova.’ Ngotyo, andyipulu omukai wange omona kuame omanima evali, inkha uhanda okulilongesa elaka liova China. Atuhimbika okulilongesa elaka olio. Palambale omanima ekwi. Okuivisa kuna kupopiwa omalaka omakuavo tulitehela ngatyina tuvakuendye. Alo hono, tuelilongesale Ombimbiliya nova China 112! Ovanyingi puvo veya komaliongiyo. Umwe puvo pahe uundapa nonthwe movilinga vioukokoli-ndyila.”

14. Oityi Ovakristau vakulupa vena okuhinangela? Oñgeni ongeleka ya Paulu ipondola okuvepameka?

¹⁴ Haveho Ovakristau vena omanima 50 ina alambapo vetyivila vali okulinga ovipuka ovipe movilinga via Jeova. Vamwe vena ovitateka viekongoko, ovakuavo vena ovana vatekula ine ovohe vakulupa. Mahi hinangela okuti Jeova upanda kese etyi uvila okulinga movilinga viae. Ngotyo, inkha pamwe kuhambukwa mokonda yetyi uhevili okulinga, hambukilwa etyi uvila. Soka ku apostolu Paulu. Wakala mokaleya omanima omanyingi ehetyivili okutualako novilinga viae vioumisionaliu. Mahi ovanthu aveho ankho vekemutalelapo, upopia navo konthele Yovihonekwa nokuvekuatesako okuumbila Huku nekolelo.​—Atos 28:16, 30, 31.

15. Omokonda yatyi ovakulu Ovakristau vapandelwa unene?

¹⁵ Tyotyili, Jeova tupu upanda unene etyi ovakulu valinga opo vemuumbile. Namphila Salomau apopia okuti ononthiki onombi hamuvo wapepuka, mahi Ombimbiliya ituhinangelesa okuti Jeova uluete etyi ovakulu Ovakristau valinga opo vemuhivilike. (Luc. 21:2-4) Omawaneno apanda unene onongeleka mbekolelo, nekoleleyo liovakuatate ovo, nonomphange ovakulu.

16. Elao patyi tyafuile Ana ankho ehena, mahi oityi alingile opo afende Huku?

¹⁶ Mombimbiliya tutangamo ekolelo liomukai omukulu utiwa o Ana. Ankho una omanima 84 etyi Jesus atyitwa. Mokonda ankho omukulu, ankho utupu vali ononkhono mbokuumbila Jeova nga vakuavo. Tyafuile Ana kakalele omulongwa wa Jesus opo alembulwe nospilitu sandu, ine okukaivisa. Mahi ankho uhambukilwa okuumbila Jeova mononkhalelo ononkhuavo. Mongeleka, apeho komuhuka no kokangulohi, ankho wenda pepata liondyuo ya Huku elikuambela oola nomeya putyina omunakwa ankho alingila Jeova oisesu. Ombimbiliya ipopia okuti “ankho ukahi apeho mondyuo ya Huku okulinga ovilinga via Huku otyinthiki notyitenya.” (Luc. 2:36, 37) O pomuvo opo amona omona Jesus. Apopila ovanthu aveho okuti ou omona makala Mesiya, maeta eyovo mo Jelusalei.​—Luc. 2:38.

17. Oñgeni ewaneno lipondola okukuatesako Ovakristau ovakulu ine vavela okutualako nefendelo liotyotyili?

¹⁷ Hono, tuesukisa okuovola onomphitilo mbokukuatesako ovakuatate nonomphange ovakulu ine vavela. Kuna ovakulu ovanyingi vahanda okukala nonthue pomaliongiyo ine povionge ovinene, mahi kavetyivili. Oñgeni ewaneno lipondola okuvekuatesako? Kovilongo vimwe, omawaneno akuatesako ovakulu ovo opo vatehelele omaliongiyo motelefone. Kovilongo ovikuavo, otyo hamwe katyitavela. Namphila ovakulu Ovakristau kavetyivili okuenda komaliongiyo, nkhele vapondola okuvatela efendelo liotyotyili. Mongeleka, vapondola okulikuambela pala ouwa weuaneno.​—Tanga Salmo 92:13, 14.

18, 19. (a) Oñgeni Ovakristau ovakulu vapameka vakuavo? (b) Olie upondola okulandula elondolo liati: “Hinangela Omupakeko wove Omunene”?

¹⁸ Ovakulu Ovakristau hamwe kavaimbuka okuti vekahi nokupameka vakuavo. Soka ku Ana, ankho wenda kondyuo ya Huku omanima aeho. Tyafuile ankho ketyii okuti ongeleka yae nohole mu Jeova mavihonekwa Mombimbiliya, nokutulunda hono. Tupu, ovakuatate vove nonomphange kamavalimbwi ohole yove na Huku. Otyo Ondaka ya Huku ipopila okuti: “Onohuki onongonga otyaka tyouwa tyina mbukahi mondyila youviuki!”​—Pro. 16:31.

¹⁹ Atuho pena etyi tupondola okulinga movilinga via Jeova. Mahi putyina nkhele una ononkhono, tokola “okuhinangela Omupakeko wove Omunene . . . tyina nkhele ononthiki onombi mbuheneye.”​—Ecl. 12:1.