Jeova​—Epanga Lietu Liotyotyili

 1. Mokonda tualingwa otyifuika tya Huku, ounongo patyi tuna?

OVANTHU ovanyingi tyina vahanda okupopia konthele yovana velifwa novohe vati, “ou o he vala.” Tyotyili, kese omona ukala novituwa ngo via he novia ina. Jeova, Tate yetu keulu, oe Omuavi womuenyo. (Sal. 36:9) Mokonda tuvana vae, tuelifwa nae mononkhalelo ononyingi. Mokonda tualingwa “otyifuika” tyae, tuna ounongo wokusoka, no wokulinga omatokolo, nokulinga oupanga.​—Gên. 1:26.

 2. Okuti tyitavela Jeova akale Epanga lietu liotyotyili?

² Jeova upondola okukala Epanga lietu liotyotyili. Tyitavela okukala noupanga oo mokonda yoluembia Huku ena nonthue, nekolelo tuna mwe no Momona wae. Jesus wati: “Huku una oluembia olunene novanthu, waava Omona wae wongunga, opo kese omunthu ukala nekolelo mwe ahakanyimueko, mahi akakale nomuenyo wahapu.” (João 3:16) Kuna ovanthu ovanyingi vakalele noupanga omuwa na Jeova. Matulilongesa konthele yovanthu vevali.

3, 4. Oityi tyelikalela konthele youpanga wa Abraiau na Jeova noupanga wova Isilayeli?

³ Jeova wapopile konthele ya Abraiau he yova Isilayeli okuti “epanga liange.” (Isa. 41:8) Omukanda wa 2 Crônicas 20:7 nao upopia Abraiau okuti epanga lia Huku. Oityi tyakuatesileko Abraiau okukala noupanga oo omuwa Nomutungi wae? Ekolelo liapama lia Abraiau.​—Gên. 15:6; tanga Tiago 2:21-23.

⁴ Tupu, Jeova ankho o He iya Epanga liovana va Abraiau vakalele elongo lio Isilayeli kohale. Mahi, mokueenda kuomuvo, vayekapo okukala omapanga a Huku. Mokonda yatyi? Omokonda ankho vetupu vali ekolelo momilao via Jeova.

5, 6. (a) Oñgeni Jeova akala Epanga liove? (b) Tuesukisa okulilinga omapulo patyi?

⁵ Putyina ulilongesa vali konthele ya Jeova, ekolelo liove mwe likala vali tyapama, nohole yove mwe iliyawisa. Soka komuvo konyima etyi tete welilongesa okuti Huku Omunthu wotyotyili iya upondola okukala epanga liae. Welilongesa okuti atuho tuapiñgana onkhali mokonda youmphuki wa Andau. Tupu wanoñgonoka okuti ovanthu ovanyingi vetupu ombembwa na Huku. (Col. 1:21) Waimbuka okuti Tate yetu woluembia keulu, kekahi kokule nonthue iya wesuka nonthue. Etyi tuanoñgonoka okuti Jeova waava Omona wae ngotyilikutila, atuhimbika okukala nekolelo mofeto yeyovo, tuahimbika okukala noupanga na Huku.

⁶ Tyina tusoka oñgeni tuanoñgonoka Jeova, tuesukisa okulipula: ‘Okuti oupanga wange na Huku ukahi nokuenda nokomutue? Okuti onthumbi yange nohole mu Jeova ikahi nokukula ononthiki ambuho?’ Omunthu omukuavo ankho una oupanga omuwa na Jeova, o Gideau. Pahe matulilongesa konthele yae opo tutyivile okulandula ongeleka yae.

7-9. (a) Otyipuka patyi tyihuvisa tyaendele na Gideau, iya oityi tyatundililako? (Tala olutalatu pefo pahimbikila onthele ei.) (b) Oñgeni tupondola okukala omapanga a Jeova?

⁷ Omukoyesi Gideau waumbilile Jeova mokueenda kuomuvo umwe wepuiya etyi ova Isilayeli vanyingila Motyilongo Valaelwe. Ova Midiã ankho otyitateka pala ova Isilayeli, iya vanyingilile ovikando ovinyingi motyilongo tyavo. Moluotyo, Gideau ankho otiliku yae keityopela potyipale mahi opomphangu yaikwa opo etyivile okuiholeka liwa. Omukanda wa Juízes okapitulu 6, upopia okuti oandyu ya Jeova yakatalelapo Gideau ko Ofra. Gideau wahuvile etyi oandyu yamoneka aimuihana okuti ‘wepondolo nokuafwapo pala okulwa.’ Namphila Jeova ayovolele ova Isilayeli mo Egitu, Gideau ankho ketavela okuti otyikando etyi, Huku mevekuatesako. Oandyu yapopia menyina lia Jeova ailae okuti Huku makuatesako Gideau.

⁸ Gideau welipulile oñgeni metyivili “okuyovola o Isilayeli pomaoko ova Midiã.” Jeova wemuavelele ekumbululo liayandyuluka nawa, wati: “Mokonda ame ndyikahi nove, moipaa o Midiã ngatyina wiipaa omunthu wike vala.” (Juí. 6:11-16) Mokonda Gideau ankho ketyii oñgeni otyo matyikamoneka, waitile enyingilikilo ku Huku. Tala okuti metompho olio Gideau kakalele nondima yokuti Jeova Omunthu wotyotyili.

⁹ Etyi tyaendelepo, tyapamekele ekolelo lia Gideau nokumufueneka vali ku Huku. Gideau wateleka okulia ekuavela oandyu. Etyi oandyu yayamako nomphangoti yayo, okulia akuteme. Otyo ankho ehuviso. Gideau akala nowoma etyi aimbuka okuti oandyu oyo tyilityili yatumwa na Huku. Gideau apopi okuti: “Tatiei! Tatekulu Jeova o Hamba, hono namona oandyu ya Jeova komaiho ange!” (Juí. 6:17-22) Okuti etyi tyaendele na Gideau tyanyonene oupanga wae na Huku? Au! Gideau welitehelelele okuti una ombembwa na Huku. Tutyii mokonda omutala wovilikutila Gideau atungile pomphangu opo weulukile okuti “Jeová-Salom,” tyihangununa okuti “Jeova Ombembwa.” (Tanga Juízes 6:23, 24, onondaka pokatoi.) Inkha tusokolola kuetyi Jeova alinga pala onthue ononthiki ambuho, matuimbuka okuti oe Epanga limwe liotyotyili. Putyina tupopia apeho na Huku melikuambelo, matukala vali nombembwa iya oupanga wetu nae maupame vali.

10. Ngetyi tyapopia Salmo 15:3, 5, oityi Jeova aita kuvana vahanda okukala omapanga ae?

¹⁰ Opo tukale omapanga a Jeova tuesukisa okufuisapo ovitumino vimwe. Mo Salmo 15, David waimba konthele yetyi tuna okulinga opo tutavelwe okukala mondyuo ya Jeova, tyihangununa okukala omapanga a Huku. (Sal. 15:1) Pahe matupopi konthele yovitumino evi vivali: tete, okulityilika okutendeleya, vali, okukala omukuatyili. David wapopia onondaka ombu konthele yavana Jeova etavela vakale omapanga ae, wati: “Katendeleyile nelaka liae. . . . Ketavelele okupatekeswa opo awisile ondaka una wahalingile otyivi.”​—Sal. 15:3, 5.

11. Omokonda yatyi tuesukisila okulityilika okutendeleya?

¹¹ Mo salmu onkhuavo, David walondolele okuti: “Yunga elaka liove kovivi.” (Sal. 34:13) Inkha tutomba elondolo olio, matunyono oupanga wetu na Tate yetu keulu. Tyotyili, okutendeleya otyituwa tyondyale onene ya Jeova, Satanasi Eliapu. Ondaka “Eliapu” yatunda mondaka yo Gregu ihangununa okuti “omutendeleyi.” Inkha tuliyunga nawa konthele yovipuka tupopila vakuetu, netyi tupopia konthele yavo, matyitukuatesako okutualako tyafuena ku Jeova. Haunene tuesukisa okukala novituwa viaviuka konthele yavana vaholovonwa na Huku opo vakale komutwe weuaneno.​—Tanga Hebreus 13:17; Judas 8.

12, 13. (a) Omokonda yatyi tuesukisila okukala ovakuatyili movipuka aviho? (b) Oñgeni oukuatyili wetu maukalesa vakuetu?

¹² Ovaumbili va Jeova veiwe okuti ovanthu ovakuatyili. Apostolu Paulu wahoneka okuti: “Tualeiko okutuitilako momalikuambelo, mokonda tuayumba onthumbi yokuti tuna omutima waviuka, mokonda onthue tuhanda okukala ovakuatyili movipuka aviho.” (Heb. 13:18) Mokonda tuatokola ‘okukala ovakuatyili movipuka aviho,’ tulityilikei okuvaka ovakuatate vetu Ovakristau. Mongeleka, inkha ovakuatate vetu vetuundapela, tuhevetekulei nonya, iya tuna okuvefeta etyi tuelilaa. Mokonda Tuvakristau, tukalei ovakuatyili navana vetuundapela, navakuavo vali. Iya inkha omuhona wetu nae Omukristau, tuesukisa okukala ovaviuki, atuhakevela okutekulwa monkhalelo yelikalela.

¹³ Ovanthu mouye apeho vapanda Onombangi mba Jeova mokonda youkuatyili wavo! Mongeleka, onkhalamutwe imwe yovilinga wamona okuti Onombangi mba Jeova apeho valinga etyi vapopia, wati: “Onwe apeho mulinga etyi mulaa.” (Sal. 15:4) Oukuatyili oo utukuatesako okutualako noupanga na Jeova, iya otyo tyihivilika Tate yetu woluembia keulu.

14, 15. Movilinga viokuivisa, oñgeni tupondola okukuatesako ovanthu okukala omapanga a Jeova?

¹⁴ Namphila ovanthu tuvasa movilinga viokuivisa vetavela okuti kuna Huku, ovanyingi kavatale Huku ngatyina Epanga liavo liotyotyili. Oñgeni matuvekuatesako? Tala onondonga Jesus aavelele ovalongwa vae 70 etyi evetuma movilinga viokuivisa, wati: “Kese eumbo munyingila, tete popiei okuti: ‘Meumbo muno mukale ombembwa.’ Inkha muna omunthu wombembua, ombembwa yenyi maikala nae. Mahi inkha mutupu, ombembwa maikondoka kuonwe.” (Luc. 10:5, 6) Ovanthu mavahande okulilongesa vali konthele yotyili, inkha tupopia nawa navo. Inkha tukala noluembia navana vetuyele, tyipondola okuvekuatesako opo vatehelele nawa otyili tyina vamelivasi vali no Nombangi.

¹⁵ Tyina tuvasa ovanthu vena onongeleya mbavo ine valandula oviso vionongeleya mbomatutu, tuesukisa okutualako okupopia nawa navo. Tuesukisa okuliepesa aveho veya momaliongiyo etu, haunene vana vasoya mokonda yovipuka vilingwa mouye hono, iya vahanda okulilongesa vali konthele ya Huku tufenda. Mononthele mbokuati, “Ombimbiliya Ipilulula Omuenyo Wovanthu” tuvasamo onongeleka ononyingi onongwa konthele yotyo.

16. Omonkhalelo patyi tupondola okutalwa ngatyina tumapanga a Jeova “novaundapi kumwe nae”?

¹⁶ Ovanthu vokuundapa kumwe apeho vakala omapanga omawa. Aveho velipakula ku Jeova vena elao liokukala omapanga ae ‘nokuundapela kumwe nae.’ (Tanga 1 Coríntios 3:9.) Putyina tuivisa, nokulinga ovalongwa, tunoñgonoka vali nawa ovituwa oviwa via Tate yetu keulu. Tumona oñgeni ospilitu sandu yae itukuatesako opo tuivise onondaka onongwa.

17. Oñgeni ovionge vietu vitulekesa okuti Jeova Epanga lietu?

¹⁷ Okuundapa vali unene movilinga viokuivisa, tyitufueneka vali ku Jeova. Tuhole okumona oñgeni Jeova etuamena konondyale mbuhanda okutalameka ovilinga viokuivisa. Jeova utuhongolela monkhalelo yaviuka, iya onthue tuahambukwa mokonda uundapesa omikanda nomaliongiyo opo etulongese. Movionge vietu, tuimbuka okuti Jeova noluembia unoñgonoka ovitateka vietu, netyi tuesukisa. Konyima yotyonge tyimwe, ombunga imwe yahoneka okuti: “Etyi tyapopiwa motyonge tyilityili tyetuhika komutima. Tuelitehela okuti Jeova utuhole iya uhanda tukale nawa.” Konyima yotyonge tyimwe tyakolela (congresso especial) ko Irlanda, ovalinepi vamwe voko Alemanha vapandulile etyi vatambulwa nawa, avati: “Mahi tupandula vali unene Jeova na Jesus Kristu Ohamba yae, vetukonga opo tuliwaneke nelongo eli. Katukahi vala nokupopia ewaneko, mahi ehambu liokukala nonwe ononthiki ambuho. Onongeleka tuakala nambo motyonge tyakolela mo Dublin, mambutuhinangelesa apeho elao enene tuna liokuumbila Huku yetu omunene kumwe nonwe amuho.”

18. Oityi tuesukisa okulipula konthele yokutomphola na Jeova?

¹⁸ Ovanthu vakala vali omapanga omanene tyina vatomphola. Ovanthu hono vaundapesa unene o Internete notelefone opo vatomphole. Mahi, oñgeni otyo tyielekwa nokutomphola Nepanga lietu liotyotyili Jeova? Oe “Omuteheleli womalikuambelo.” (Sal. 65:2) Okuti tutomphola nae apeho?

19. Inkha katutyivili okuvasa onondaka opo tupopile Jeova oñgeni tulitehela, oityi matyitukuatesako?

¹⁹ Pala ovaumbili vamwe va Huku, katyapepukile okupopia omalusoke avo okohi. Mahi otyo Jeova ahanda tulinge tyina tulikuambela. (Sal. 119:145; Lam. 3:41) Inkha katutyivili okuvasa onondaka opo tupopie oñgeni tulitehela, tuna ombatelo. Paulu wahonekelele Ovakristau mo Roma okuti: “Mokonda katutyii okonthele yotyitateka patyi matuiti ngetyi tuesukisa. Mahi, ospilitu muene ituitilako nonkhemo ihena ondaka. Anthi, una utala nawa omitima, wii eyembelo liospilitu, mokonda ikahi nokuitilako onosandu ngetyi Huku ahanda.” (Rom. 8:26, 27) Okusokolola konondaka mbukahi momikanda Viombimbiliya ngetyi o Jó na Salmo, na Provérbios, matyitukuatesako okupopila Jeova omalusoke etu okohi.

20, 21. Onondaka mba Paulu mu Filipenses 4:6, 7 mbutuavela epameko patyi?

²⁰ Tyina tupita movitateka viepuiya, tuesukisa okuhinangela onondaka mba Paulu ahonekelele ova Filipu okuti: “Muhakalei notyiho notyipuka natyike, mahi, muaviho, itei unene ku Huku nomalikuambelo kumwe nolupandu.” Tyina tulikuambela ngotyo ku Jeova, tupondola okupamekwa, mokonda Paulu wayauisako okuti: “Iya ombembwa ya Huku, ipona onondunge nomalusoke aeho, maiyungu omitima vienyi nomalusoke enyi, menyina lia Kristu Jesus.” (Fil. 4:6, 7) Tyotyili, tuesukisa apeho okupandula mokonda ‘yombembwa onene ya Huku’ iyunga omitima, nomalusoke etu.

²¹ Elikuambelo litukuatesako okupameka oupanga wetu na Jeova. Ngotyo “tulikuambelei apeho.” (1 Tes. 5:17) Tuesukisa okutualako okupameka oupanga wetu na Huku, nokulinga etyi ahanda kuonthue. Tuovolei omuvo wokusokolola kononkhano onongwa tuna mokonda Jeova tyilityili o Tate yetu, o Huku yetu, iya Epanga lietu.