Mamukala “Ovanakwa Vouhamba”

1, 2. Ombuto yomukai ankho yesukisa ondyakulilo patyi, iya omokonda yatyi?

EULO liotete likahi Mombimbiliya, liakolela pala okunoñgonoka oñgeni ehando lia Huku malikafuisuapo. Etyi Huku alinga omulao mo Endene, wati: “Mandyipake oundyale pokati kove [Satanasi] nomukai, no pokati kombuto yove nombuto yomukai.” Okuti oundyale oo ankho maukala umwe omunene? Jeova wati: “Oe [ombuto yomukai] mekekumiangula omutwe, iya ove [Satanasi] mokemunumata kotyikomeko.” (Gênesis 3:15) Oundyale pokati ka Satanasi nomukai maukalinga omunene, ngotyo Eliapu malilingi ononkhono ononene opo lihanyeko ombuto oyo.

² Otyo omuhoneki wono salmu elikuambelele konthele yovanthu va Huku okuti: “Onondyale mbove mbalungala. Vana vekuyele unene vakatula omutwe wavo. Veliongiya opo velipakelemo omatutu konthele yovanthu vove. Vasoka okulwisa vove vaholama. Ovo vati: ‘Endyuei tuvenyimeko opo vahakale vali elongo.’” (Salmo 83:2-4) Satanasi ankho uhanda okuhanyako ombunga omu mamutundu ombuto. Opo Jeova ayakulile ombuto, nokulekesa okuti Ouhamba wa Mesiya owotyotyili, walinga omphango ononkhuavo.

3, 4. (a) Onalupi Omphango Yovitumino yahimbika okufuisuapo, iya oityi elongo lio Isilayeli lietavelele okulinga? (b) Omphango Yovitumino ankho yalingwa pala okuyakulila tyi?

³ Etyi ovana va Abraiau, nova Isake, nova Jako vakala ovanyingi, Jeova wevelinga elongo lio Isilayeli yokohale. Huku alingi omphango imwe yakolela nelongo olio, aholovona Moisesi opo akale onkhala-kati yavo. Jeova eveavela Ovitumino, iya ova Isilayeli avevitavela. Ombimbiliya ipopia okuti Moisesi “apolo omukanda womphango eutangela ovanthu. Iya avati: ‘Atyiho Jeova apopia matutyilingi, nokutyitavela.’ Ngotyo, Moisesi apolo ohonde [yonongombe mbalingwa ovilikutila] iya einyanyena kovanthu, iya ati: ‘Ei ohonde yomphango Jeova alinga nonwe konthele yonondaka ombu ambuho.’”​—Êxodo 24:3-8.

⁴ Omphango Yovitumino, yahimbika okufuisuapo menima 1513 etyi Kristu eheneye. Mokonda yomphango oyo, Jeova waholovona elongo lio Isilayeli yokohale opo afuisepo ehando liae. Huku ankho makala Ohamba yavo, Nomukoyesi, Nomuavi wovitumino.” (Isaías 33:22) Ehipululo liova Isilayeli, lilekesa nawa etyi ankho tyimonekapo tyina ovanthu vetavela, natyina vehetavela ovitumino viaviuka via Huku. Okutavela Ovitumino via Huku, ankho tyilekesa okuti ova Isilayeli kavapondola okulinepa novanthu vahafende Jeova. Ovitumino ankho vialingwa pala okuyakulila ombuto ya Abraiau kovipuka ovivi.​—Êxodo 20:4-6; 34:12-16.

 5. (a) Omphitilo patyi omphango Yovitumino yaavelele elongo lio Isilayeli? (b) Omokonda yatyi Huku aanyena ova Isilayeli?

⁵ Momphango Yovitumino, ovanakwa ankho vaholovonwa opo vaundape mo Isilayeli. Ovanakwa ovo ankho, otyilekeso tyotyikundyi otyikuavo tyovanakwa mavakaundapela ovanthu komutwe monkhalelo ikahi vali nawa. (Hebreus 7:11; 10:1) Tyotyili, omphango Yovitumino yaavelele elongo lio Isilayeli omphitilo yokukala “ovanakwa vouhamba.” Opo ova Isilayeli vakale nelao olio, ankho vena okutavela ovitumino via Jeova. (Tanga Êxodo 19:5, 6.) Mahi, kavevitavelele. Ova Isilayeli kavetavelele Mesiya, omunthu wakolela mombuto ya Abraiau. Ngotyo, kavetavelele Jesus iya na Huku ehevetavela.

 6. Ovitumino ankho vialingilwa tyi?

⁶ Mokonda ova Isilayeli kavatuaileko nekolelo mu Huku, kavakalele ovanakwa vouhamba. Mahi otyo katyilekesa okuti Ovitumino ankho kaviaviukile. Ovitumino viayakulilile ombuto, nokukuatesako ovanthu okuimbuka Mesiya. Ovitumino viafuiswapo etyi Kristu eya pano pohi, iya ovanthu avemuimbuka okuti oe o Kristu. Ombimbiliya yati: “Kristu oe onthyulilo Yovitumino.” (Romanos 10:4) Ngotyo, ovalie mavakala nomphitilo yokukala ovanakwa vouhamba? Jeova walinga omphango opo aonganeke elongo epe.

 7. Oityi Jeova aulile menyina liomuuli Jeremia?

⁷ Etyi nkhele omphango Yovitumino yehenepwe, Jeova waulile menyina liomuuli Jeremia okuti malingi “omphango omphe” nelongo lio Isilayeli. (Tanga Jeremias 31:31-33.) Omphango oyo ankho yelikalela nomphango Yovitumino mokonda ankho ovanthu kavesukisile vali okulinga ovilikutila viovinyama opo vaevelwe ononkhali. Ñgeni ngotyo?

8, 9. (a) Ohonde ya Jesus yaikula ondyila pala tyi? (b) Vana vekahi momphango omphe vena elao patyi? (Tala olutalatu pefo pahimbikila onthele ei.)

⁸ Konyima yomanima omanyingi, monthiki 14 ya Nisã yenima 33, Jesus ahimbika Ondalelo ya Tatekulu. Konthele yokopo yovinyu, Jesus wapopilile ono apostolu mbae 11 vekolelo okuti: “Okopo ei otyilekeso tyomphango omphe mokonda yohonde yange maikamomeswa pala ouwa wenyi.” (Lucas 22:20) Ngetyi tyapopia Mateus, Jesus wati: “Ei ihangununa ‘ohonde yange yomphango’, maimomeswa pala ovanthu ovanyingi, opo vaevelwe ononkhali.”​—Mateus 26:27, 28.

⁹ Ohonde yotyilikutila tya Jesus ilekesa okuti omphango omphe yahimbika okufuisuapo. Ohonde oyo yanengulwa vala like, iya yaikula ondyila opo ovanthu ovanyingi vaevelwe ononkhali apeho. Jesus kekahi momphango omphe. Mokonda utupu onkhali, kesukisile okuevelwa. Mahi, Huku upondola okuundapesa otyilikutila tya Jesus opo akuateseko ovanthu okupolako ouwa. Tupu upondola okulembula ovanthu vekolelo nospilitu yae, avakala “ovana” vae. (Tanga Romanos 8:14-17.) Jeova wafwapo opo evetale ngetyi atala Omona wae, Jesus, uhena onkhali. Ovalembulwa ovo mavakala “onomphinga kumwe na Kristu.” Tupu ankho mavakala nelao elongo lio Isilayeli vavombesa, elao liokukala “ovanakwa vouhamba.” Apostolu Petulu wapopia konthele yavo okuti: “Onwe ‘mumbunga yaholovonwa, no vanakwa vouhamba, elongo liasukuka, ovanthu vae vakolela, opo muivise enkhimano’ lia Una wemuihana menthiki opo muye motyitei tyae otyiwa unene.” (1 Pedro 2:9) Tyotyili, omphango omphe yakolela! Yaikula ondyila opo ovalongwa va Jesus vakale onthele yavali mombuto ya Abraiau.

10. Onalupi omphango omphe yahimbika okufuisuapo, iya omokonda yatyi yahimbikila okufuisuapo vala pomuvo opo?

¹⁰ Omphango omphe kayahimbikile okufuisuapo Pondalelo ya Tatekulu. Omokonda yatyi? Omokonda, opo omphango oyo ihimbike okufuisuapo, Jesus ankho una okukondoka keulu, opo akalekese ku Huku esilivilo liotyilikutila tyae. Tupu, vana mavakala “onomphinga kumwe na Kristu” ankho vena okulembulwa nospilitu sandu. Ngotyo, omphango omphe yahimbika okufuisuapo po Pendekoste menima lio 33 etyi ovalongwa va Jesus vatambula ospilitu ya Huku.

11. Oñgeni omphango omphe yaikula ondyila opo ova Judeu nava vehe va Judeu vakale o Isilayeli ya Huku? Iya oñgeni ovanyingi ankho mavanyingila momphango omphe?

¹¹ Etyi Jeova aula pokati ka Jeremia okuti malingi omphango omphe no Isilayeli, ankho tyilekesa okuti omphango Yovitumino kamaisukisa vali. Omphango Yovitumino yapwa etyi omphango omphe yahimbika okufuisuapo. (Hebreus 8:13) Mokonda yomphango omphe, ova Judeu nava veheva Judeu ankho vena omphitilo ike vala yokukala onomphinga Mbouhamba wa Huku, mokonda ankho “vapita ekuendye komutima nospilitu, hangetyiko tyahonekwa.” (Romanos 2:29) Huku ankho mapake ovitumino viae momitima viavo. (Hebreus 8:10) Omphango omphe yakutikinya vo 144.000, ovalembulwa. Ovo vakala elongo epe liihanwa okuti “o Isilayeli ya Huku.”​—Gálatas 6:16; Revelação 14:1, 4.

12. Oñgeni omphango Yovitumino yelifwa nomphango omphe?

¹² Oñgeni omphango Yovitumino yelifwa nomphango omphe? Omphango Yovitumino o Jeova weilingile nelongo lio Isilayeli, iya omphango omphe, o Jeova weilinga no Isilayeli ya Huku. Moisesi ankho onkhala-kati yomphango Yovitumino, iya Jesus Onkhala-kati yomphango omphe. Omphango Yovitumino yahimbika okufuisuapo nohonde yovinyama, iya omphango omphe yahimbika okufuisuapo nohonde yotyilikutila tya Jesus. Momphango Yovitumino, o Moisesi wahongolelele elongo lio Isilayeli. Jesus, Omutwe weuaneno, oe ukahi nokuhongolela vana vekahi momphango omphe.​—Efésios 1:22.

13, 14. (a) Oñgeni omphango omphe yelikuata Nouhamba? (b) Oityi tyesukisa opo o Isilayeli ya Huku ikatumine na Kristu keulu?

¹³ Oñgeni omphango omphe yelikuata Nouhamba? Omphango oyo, yaikula ondyila opo kuonganenkwe elongo liasukuka lina omphitilo yokukala onohamba, novanakwa Mouhamba wo keulu. Elongo olio, liakala onthele onkhuavo mombuto ya Abraiau. (Gálatas 3:29) Ngotyo, omphango omphe ilekesa okuti omphango Huku alingile na Abraiau maikafuiswapo.

¹⁴ Omphango omphe, yaikula ondyila opo kuonganenkwe o Isilayeli ya Huku. Mokonda yomphango oyo, ovalembulwa mavakala “onomphinga kumwe na Kristu.” Mahi oñgeni ovalembulwa mavakakala onohamba, novanakwa keulu avakatumina na Jesus? Pena omphango onkhuavo yeveavela omphitilo oyo.

15. Omphango patyi Jesus alingile nono apostolu mbae vekolelo?

¹⁵ Etyi Jesus alinga Ondalelo ya Tatekulu, walinga omphango novalongwa vae vekolelo iihanwa okuti omphango Youhamba. (Tanga Lucas 22:28-30.) Omphango oyo yelikalela no nonkhuavo, mokonda Jeova kekahi momphango oyo. Omphango oyo o Jesus weilinga novalembulwa. Etyi Jesus ati, “ngetyi Tate alinga naame omphango,” tyafuile ankho ukahi nokupopia omphango Jeova alingile nae opo akale “omunakwa omuvo auho, nga Melkisedeke.”—Hebreus 5:5, 6.

16. Omphango Youhamba yaavela omphitilo patyi Ovakristau ovalembulwa?

¹⁶ Ono apostolu 11 vekolelo kavayekelepo Jesus mokueenda kuovitateka viae aviho. Omphango Youhamba ilekesa okuti ono apostolu mavakapumphama kovipundi vioutumini, avakala ovatumini, novanakwa kumwe na Jesus keulu. Mahi ono apostolu vana vokuna 11 ankho havo vala mavakala nelao olio. Jesus wamonekelele apostolu João emupopila okuti: “Una wafinda, makapumphama naame koutumini wange, ngetyi ame nafinda andyipumphama na tate yange koutumini wae.” (Revelação 3:21) Ngotyo, omphango Youhamba, yalingwa novo 144.000, Ovakristau ovalembulwa. (Revelação 5:9, 10; 7:4) Mokonda yomphango oyo, ovalembulwa mavakatumina na Jesus keulu. Otyo tyelifwa nomuhikuena manepwa nohamba. Tyina vamelinepe nae utumina kumwe nohamba. Ombimbiliya ipopia okuti ovalembulwa “ondombwa” ya Kristu, “omumphembela omusukuki” manepwa na Kristu.​—Revelação 19:7, 8; 21:9; 2 Coríntios 11:2.

17, 18. (a) Pitulula onomphango epandu tuelilongesa mbelikuata Nouhamba. (b) Tupondola okukala nekolelo liapama Mouhamba mokonda yatyi?

¹⁷ Onomphango ambuho tuelilongesa mononthele ombu onombali, mbelikuata kumwe Nouhamba. (Tala okakasa kati “Oñgeni Huku Makafuisapo Ehando Liae.”) Tyayandyuluka nawa okuti, mokonda yonomphango ombo, Ouhamba maukalinga ovipuka ovinyingi. Tupondola okukala nonthumbi yokuti Huku makaundapesa Ouhamba wa Mesiya opo afuisepo etyi ahandela ohi, novanthu.​—Revelação 11:15.

¹⁸ Tyotyili, Ouhamba oo, oo vala maukamanako ovitateka viovanthu. Tuna onthumbi yokuti Ouhamba, maukaetela ovanthu aveho oviwa viahapu. Ngotyo, tupopilei vakuetu nombili konthele yotyili otyo!​—Mateus 24:14.