Omapulo Ombimbiliya Akumbululwa
Onthiki Yekoyeso Oityi?
Onthiki yekoyeso maikala onthiki yehambu omokonda yatyi?
Kohale, Huku watumine ovakoyesi opo vayovole ovanthu kovivi. (Juízes 2:18) Tyina Ombimbiliya ipopia Onthiki Yekoyeso maiya komutwe, ipopia okuti, omuvo umwe wehambu. Iya monthiki omo, Jeova, Omukoyesi wohi aiho, makayovola ovanthu kovivi.—Tanga Salmo 96:12, 13; Isaías 26:9.
Huku wanaka Jesus opo aetele ouviuki vana vena omuenyo, no vokuankhia. (Atos 10:42; 17:31) Kuna ovanthu ovanyingi vankhia tyihei Huku. Mokueenda Kuonthiki Yekoyeso, Jesus makatutilisa ovanthu ovo, opo vanoñgonoke Huku yotyotyili, nokukala nohole nae.—Tanga Atos 24:15.
Onthiki Yekoyeso maikala omanima ovityita ekwi mokonda yatyi?
Vokuankhia, mavakatutiliswa mokueenda kuomanima ovityita ekwi. (Revelação 20:4, 12) Mavekesukisa omuvo pala okunoñgonoka Huku, nokumutavela. Tyelikalela netyi ovanthu ovanyingi vasoka, Ombimbiliya ilekesa okuti ovanthu mavakakoyeswa okutalela kuetyi mavakalinga tyina vamatutiliswa.—Tanga Romanos 6:7.
Tupu, Ombimbiliya ipopia okuti onthiki yekoyeso maikeya onthyuuhulula, tyina omanima ovityita ekwi ehenehimbike. Ngetyi tyapopia ononthele mbokuatetekela momukanda ou, onthiki yekoyeso, tupu iihanwa okuti onthyulilo. Monthiki omo, Huku makahanyako ovanthu aveho vehena onthilo nae, no nondingavivi. (2 Pedro 3:7) Moluotyo, tuesukisa okulinga ononkhono opo tulekese okuti tuhole Huku.—Tanga 2 Pedro 3:9, 13.