Omapulo Alingwa Novatangi

Mokueenda kuomanima omanyingi, omika­nda vietu ankho vihangununa okuti enyina Goge ya Magoge lipopia Satanasi konyima yetyi ataatwa keulu. Omokonda yatyi? Omokonda omukanda wa Revelação upopia okuti Satanasi onkhalamutwe wouye, makalwisa ovanthu va Huku. (Revelação 12:1-17) Ngotyo, ankho tuanoñgonoka okuti Goge enyina ekuavo lia Satanasi.

Mahi, ehangununo olio lina etyi liahayandyululile nawa. Soka konondaka ombu: Tyina tupopia konthele yehanyauno lia Goge, Jeova wapopia okuti maave Goge akale “okulia kuoviila aviho novinyama viomohika.” (Ezequiel 39:4) Jeova ayawisako okuti: “Monthiki omo mandyiavela Goge eendo mo Isilayeli.” (Ezequiel 39:11) Mahi oñgeni Satanasi, oandyu yahamonwa, apondola okuliwa noviila novinyama? Iya oñgeni apondola okuhihilwa pohi? Ombimbiliya iyandyulula nawa okuti Satanasi makapakwa mokaleya momanima 1.000. Kamakaliwa ine okuhi­hilwa.—Revelação 20:1, 2.

Ombimbiliya yapopia okuti konthyulilo yo­manima 1.000 Satanasi makapolwa mokaleya iya “aende okukayondya ovanthu kononthele ononkhuana mbo ohi, Goge na Magoge, opo e­veongiye pala ovita.” (Revelação 20:8) Mahi i­nkha Satanasi o Goge, tyilekesa okuti Satanasi mekeliyondya aike. Ngotyo, ondaka “Goge” kaipopi Satanasi tyilinge momukanda wa Ezekiele nowa Revelação.

Muaina Goge ya Magoge olie? Opo tukumbulule epulo olio, tuesukisa okuovolola mo Mbi­mbiliya opo tuvase olie makalwisa ovanthu va Huku. Ombimbiliya ipopia ovilwa via ‘Goge ya Magoge,’ novilwa “viohamba yo kokulio kuekumbi,” novilwa “vionohamba mba pano pohi.” (Ezequiel 38:2, 10-13; Daniel 11:40, 44, 45; Revelação 17:14; 19:19) Ovilwa ovio vielikalela? Otyo katyiiwe nawa. Pamwe Ombimbiliya yuundapesa omanyina elikalela opo ipopie ovilwa vieli­fwa. Omokonda yatyi tupopila ngotyo? Omoko­nda Ombimbiliya itupopila okuti omalongo aeho kombanda yohi maekelipaka mo nonkhumbi ononene mambuhimbika novilwa vio Armagedom.—Revelação 16:14, 16.

Tyina tueleka ono testu Mbombimbiliya mbupopia ononkhumbi mbahulilila ovanthu va Huku mavakamonesua, tyimoneka nawa okuti enyina Goge ya Magoge kalipopi Satanasi. Ngotyo, enyina Goge ya Magoge lipopia otyiku­ndyi tyomalongo. Okuti “Ohamba yo kokulio kuekumbi” oyo maikakala komutwe wotyiku­ndyi otyo? Katutyii nawa. Mahi ehangununo olio lielikuata netyi Jeova apopia konthele ya Goge okuti: “Mokatunda pomphangu yove, kono­nthele mbokokule mbo kokulio kuekumbi, ove nova­nthu ovanyingi, aveho vavelama kononkhambe, ovanthu ovanyingi, novita ovinyingi.”—Ezequiel 38:6, 15.

Tyelifwa notyo, omuuli Daniele, wakaleleko momuvo wike na Ezekiele, wapopia konthele yohamba yokokulio kuekumbi okuti: “Omaiviso maakatundilila koutundilo nokokulio kueku­mbi, iya mekeya nonyengo onene pala okuipaa nokuhanyauna ovanthu ovanyingi. Iya makapaka onthanda yae pokati kelunga enene no­mphunda ikola Yahiviswa; iya mekehika alo kontyhulilo, iya petupu nawike mekemukuatesako.” (Daniel 11:44, 45) Otyo tyelifwa netyi omukanda wa Ezekiele upopia etyi Goge makalinga.—Ezequiel 38:8-12, 16.

Oityi matyikamonekapo konyima yono­nkhumbi mbahulilila? Daniele utupopila okuti: “Mokueenda kuomuvo oo Mingeli [Jesus Kristu] makakatuka [mo Armagedon], omona omunene wohamba utai [okuhimbikila mo 1914] mokonda yovanthu vae. Iya tyotyili makukamoneka omuvo wononkhumbi [ononkhumbi ononene] mbuhenekalekuale, tunde etyi kuehimbika okukala omalongo alo pomuvo opo. Iya mokueenda kuomuvo oo, ovanthu vove mavakahupa, aveho vahonekwa momukanda.” (Daniel 12:1) Tutanga etyi tyelifwa notyo Jesus makalinga, mu Revelação 19:11-21.

Mahi olie “Goge na Magoge” vapopiwa mu Revelação 20:8? Enyina olio lilekesa ovanthu aveho vatyitukilapo Jeova, iya avalwisa ovanthu vae mokueenda kueheteko liahulilila konthyulilo yomanima 1.000. Ovanthu ovo mavakakala notyituwa otyivi ngo tya Goge ya Magoge, omalongo maakaluisa ovanthu va Huku konthyulilo yononkhumbi ononene. Ngomalongo makaha­nyua mo Armagedom, Goge na Magoge tupu navo mavakahanyuako. (Revelação 19:20, 21; 20:9) Tyimoneka nawa okuti tyaviuka okuihana “Goge na Magoge,” ovanthu aveho mavakatyitukilapo Huku konthyulilo yomanima 1.000.

Mokonda tulilongesa Ombimbiliya nombili, matuhande okunoñgonoka olie apa katutu ma­kakala “ohamba yo kokulio kuekumbi.” Mahi katyesukisile olie makakala onkhalamutwe yomalongo maakaluisa ovanthu va Huku, tuna onthumbi yovipuka vivali: (1) Goge ya Magoge, nomafualali ae, mavakafindwa iya avahanyuako. (2) Ohamba yetu, Jesus Kristu, makayovola ova­nthu va Huku iya evetuala mouye omupe wo­mbembwa nepamo liotyotyili.—Revelação 7:14-17.