Navasa Otyipuka Tyakolela Vali Tyipona Omunkhima

Etyi palamba enima, andyihimbika okuundapa mosinema, ovikando ovinyingi nakalele komutwe wovilinga ovio. Ovahipululi ankho vahanda ehipululo liange, vomalutalatu ankho vahanda okumphola omalutalatu, iya ovanthu ovanyingi ankho vahanda okunthala, nokulia name apeho. Ovanthu apeho ankho vanthaindya.

Mokueenda kuomuvo, andyiimbuka okuti ovipuka ovio aviho, haviwa-ko unene ngetyi ankho ndyisoka. Nankhimanene vali unene mosinema, iya otyo ankho tyipondola okundyetela oviponga. Tyina wamankhimana vali movilinga ovio, mo Hong Kong, ove muene una okulinga atyiho, kulingilwa-ko ngetyi valinga mo nosinema ononene mbo Hollywood. Ngotyo, ankho ame muene ndyina okutaha onomota nomatuku-tuku pala okuhambukiswa ovanthu.

Mo 1995, andyinepwa nomulume ankho uundapa mosinema. Namphila ankho ndyina ovipuka aviho vipondola okumpha ehambu, ngomunkhima, nolumono, nomulume unthyole unene, mahi ankho ndyitupu ehambu.

Andyihimbika okuhinangela ekolelo nali nalio etyi ndyimukainthu. Mo Vityasapalo ame nomukulu wange, ankho tukatalelapo ombunga imwe yo Nombangi mba Jeova. Joe McGrath he yavo, ankho utulongesa Ombimbiliya kumwe novana vae vetatu ovakainthu. Ombunga yavo, ankho ina unene oluembia. Tupu “Manthu Joe” ankho utekula omukai wae novana vae nehumbilo. Ankho ndyihambukwa unene okuenda navo komaliongiyo avo. Ovikando vimwe naile navo kovionge. Ankho omivo viehambu enene. Ankho ndyilitehelela nawa pokati ko Nombangi mba Jeova.

Mahi, meumbo lietu, ankho muna ovitateka ovinene. Omuenyo tate ankho atyinda, aukalesa me tyaunga unene, iya atyimuetela okuvela. Puetyi ndyina omanima ekwi, Me ayekepo okuliongiya no Nombangi mba Jeova. Ame andyitualako namphila ankho hesukile unene, iya andyimbatisalwa nomanima 17. Etyi pakala katutu andyihimbika okulinga ovipuka vihaviukile, iya andyitundu mewaneno.

Etyi nanepwa pakala katutu, ovakulu vevali vewaneno lio Nombangi mba Jeova, aveya okunthalelapo. Vankhuatesako okutala oñgeni mandyikondoka ku Jeova Huku. Tupu vapopia nomisionalia utiwa Cindy, opo ankhuateseko. Pomuvo opo ekolelo liange ankho kalihi vali. Moluotyo, andyiiti Cindy andekese oityi tyilekesa okuti Ombimbiliya tyili Ondaka ya Huku. Oe andekesa omaulo Ombimbiliya afuiswapo. Katutu-katutu, atukala omapanga omanene, iya Cindy andyiti opo tulilongese nae Ombimbiliya. Andyitavela. Otyo, otyikando tyotete nahimbika okupanda okuti Jeova o Huku woluembia, uhanda ndyikale nehambu.

Etyi nahimbika okuenda vali komaliongiyo, andyiimbuka okuti ndyina vali ehambu pokati ko Nombangi mba Jeova, tyipona okukala novanthu ankho ndyiundapa navo. Mahi, mokonda yonkhalelo yomuenyo natyindile poututu, ankho hiyumbu onthumbi momunthu nawike, iya ame muene ankho ndyiliyele. Mahi, umwe mewaneno ankhuatesako, mokundekesa mo Mbimbiliya oñgeni ndyipondola okufinda omalusoke ahaviukile. Tupu andyililongesa okukala nomapanga otyotyili.

Mo 1997, ame nomulume wange atuilukila ko Hollywood, California, ko Amelika. Oko, andyiundapa vali unene okukuatesako ovanthu okunoñgonoka Ondaka ya Huku. Okulongesa ovanthu Ombimbiliya, tyampha vali ehambu, tyipona omunkhima auho ankho ndyina mo nosinema. Mongeleka, mo 2002, atulivasi na Cheri, ankho tulii nae ko Hong Kong. Ovipuka vimwe viaenda momuenyo wae, vielifwa no viange. Cheri oe watetekela okukala omuhikuena Omuwa vali mo Hong Kong, iya enima lialandula-ko, ame. Etyi naholovonwa, oe wamphaka ekolowa. Tupu, ankho una omunkhima mosinema, iya konyima aundapa mosinema kumwe novanthu vankhimana unene. Nae tupu ailukila ko Hollywood.

Andyikala nokankhenda na Cheri, etyi neiva okuti omphunga yae wanyima nouvela womutima. Mongeleya yae o Budisimu, ankho mutupu natyike tyimuungumanesa. Nga ame, Cheri nae akala nomunkhima omunene ovanthu aveho vapeleya. Mahi, ankho utupu ehambu, ankho kayumbu onthumbi momunthu nawike. Andyihimbika okupopia nae etyi ndyikahi nokulilongesa mo Mbimbiliya. Mahi, mokonda yetyi alongeswa mo Budisimu, ankho tyimupuiya okupanda etyi ndyimupopila.

Onthiki imwe mo 2003, Cheri andyihana kotelefone, puetyi ankho alinga osinema mo Vancouver ko Canada. Nehambu, amphopila okuti wakaendaile netuku-tuku mohika ahuvu unene, iya ahimbika okulikuambela okukaluluka okuti: “Mphopile, olie Huku yotyotyili? Enyina liae Olie?” Etyi atunda opo, ondyila akuata ilambela Pondyuo Yomaliongiyo, iya amono enyina Jeova. Asoko okuti, otyo ankho ekumbululo lia Huku, aovola liwa-liwa okuliongiya no Nombangi mba Jeova. Ame, andyipopi novakuatate, mononthiki mbehehi, ahimbika okuliongiya newaneno lielaka liova China mo Vancouver.

Konyima Cheri ati: “Ovanthu ava tyotyili vesuka name. Tyitavela okuvepopila oñgeni ndyiliivite.” Andyihambukwa unene na Cheri, mokonda movilinga vio nosinema, ankho utupu omapanga. Cheri, watualako okuenda komaliongiyo. Mahi mo 2005, etavela okukalinga onosinema onombali ko China. Ngotyo, ankho wesukisa okukondoka ko Hong Kong. Andyihambukwa vali, etyi mo 2006 Cheri elipakula ku Jeova ambatisalwa motyonge tyimwe mo Hong Kong, akala Ombangi ya Jeova. Ankho uhanda okuumbila unene Jeova, mahi ankho tyimupuiya mokonda yovilinga viae vio nosinema. Iya otyo, ankho tyimunumanesa unene.

Mo 2009, onkhalelo ya Cheri aipiluluka. Watokola okuyekapo ovilinga viae, opo aumbile unene Jeova. Pahe ankho una omapanga omanyingi mewaneno. Cheri ahimbika ovilinga viokuivisa onondaka onongwa Mbouhamba wa Huku omuvo auho, ahambukwa unene okukuatesako ovanthu okuvasa ondyila ongwa yomuenyo.​—Mateus 24:14.

Konyima, Cheri atokola okulilongesa elaka lio Nepale, opo akuateseko otyikundyi tyo Nombangi mba Jeova mo Hong Kong, tyovanthu vapopia o Nepale. Ova Hong Kong, ankho kavesukile no va Nepale. Ankho vevepenyenyeka mokonda vapopia vala katutu o Ingelesi ine elaka lio va China, no mokonda yovituwa viavo vielikalela. Cheri antholela okuti wahambukua unene etyi ekahi nokukuatesako ovanthu ovo okunoñgonoka Ombimbiliya. Onthiki imwe, etyi akaivisa umbo na umbo, wavasa omukai omu Nepale, ankho wii vala katutu konthele ya Jesus, mahi uhei natyike konthele ya Huku yotyotyili Jeova. Cheri emulekesa mo Mbimbiliya okuti Jesus welikuambelele ku Tate yae keulu. Etyi omukai oo aimbuka okuti upondola okulikuambela ku Huku yotyotyili Jeova, etavela onondaka onongwa. Pakala katutu, omulume womukai oo nomona wae, avetavela okulilongesa Ombimbiliya.​—Salmo 83:18; Lucas 22:41, 42.

Etyi namona okuti Cheri una ehambu movilinga viokuivisa omuvo auho, andyilipulu okuti: ‘Oityi nahalingila ngetyi Cheri ekahi nokulinga?’ Pomuvo opo, ankho nakondoka vali mo Hong Kong. Andyitokola okuonganeka nawa onkhalelo yange, opo ndyivile okuundapa vali movilinga viokulongesa otyili tyo Mbimbiliya. Naimbuka okuti okutehelela ovanthu nokuvekuatesako okunoñgonoka Ondaka ya Huku, tyimpha vali ehambu liotyotyili.

Mongeleka, nelilongesa Ombimbiliya nomukai umwe omu Vietename, ankho ukala apeho tyaunga nokuna apeho ononkhuka momaiho. Pahe omukai oo, umoneka okuti una ehambu, utyihole unene okuliongiya newaneno.

Ame na Cheri, tuavasa otyipuka otyiwa unene, tyipona omunkhima. Namphila onosinema mbetuetelele omunkhima, mahi okulongesa ovanthu konthele ya Jeova Huku tyihambukiswa vali, mokonda oe tyinkhimaneka. Tuamona otyili Jesus apopia etyi ati: “Okuava tyihambukiswa vali tyipona okupewa.”​—Atos 20:35.