Kuame Ankho Kouye Kutupu Huku

Ame natyitilwa mepunda-umbo lio Saxony, ko República Democrática Alemã (RDA). Meumbo lietu ankho muna ombembwa, ovo tate ankho vandongesa onondunge. Mo República Democrática Alemã ankho kamulingwa okapungulula, (Estado Comunistas.) Ngotyo ovanthu ovanyingi ko Saxony, kavesukile nongeleya. Kuame kouye kutupu Huku. Kuna ovipuka vivali viantyongiliya alo natuukisa omanima 18: Okuhetavela okuti kuna Huku (ateismo) nokuhalingi okapungulula (comunismo).

Omokonda yatyi ankho nahalingila okapungulula? Omokonda ame ankho nahanda ñgeno ovanthu vakala vala otyipuka tyike. Tyehe-tyo vala, kuame ovipuka ovanthu vapewa ñgeno vena okulitepulila pokati-nakati. Ngotyo etyi nkhele ndyimona andyilipake motyikundyi tyokuhalingi Okapungulula. Puetyi ankho ndyina omanima 14, andyuundapa unene movenda yundapa no liso yovipapelo. Andyipandulwa unene mepundaumbo lio Aue.Mokonda yovilinga nalinga andyifetwa. Namphila nkhele ankho ndyimukuendye, mahi andyinoñgonokwa okuti ndyiumwe motyikundyi tyovakuendye mo RDA mopulitika. Andyilitehelela okuti etyi ndyikahi nokulinga otyiwa unene iya matyinkhuatesako komutwe wandyila.

Pakala vala katutu ovipuka aviho avipiluluka. Menima 1989 Otyimato tyo ko Berlim atyivu-po. Mokonda yotyo ko Europa Yokoutundilo akuhimbika okulingwa Okapungulula. Omapiluluko atualako nokulilandaula. Apakala vala katutu, andyiimbuka okuti mo RDA mulingwa okapungulula. Mongeleka, ovanthu vana vokulinga Okapungulula, ankho vatalwa okuti veli momutete wa vali. Andyihimbika okulipula okuti: Omokonda yatyi ankho valingila ngotyo? Onthue vokuhalingi Okapungulula, katutavela okuti ovanthu aveho otyipuka tyike vala? Okuti muaina ankho tuvityova? Andyihimbika okukala notyiho.

Ngotyo andyitokola okulinga ovipuka ovikuavo, ngo kuiimba, nokunthinda omalutalatu. Etyi nahimbika okulilongesa mosikola yokuimba, pahe andyiende mosikola onene, andyipeleya okukala wokuimba nokunthinda omalutalatu. Pomuvo opo andyiyekepo okukala novituwa oviwa ankho nalongeswa etyi ankho ndyimukuendye. Pahe, otyipuka ankho ndyihanda ovipito vala, novahikuena ovanyingi. Mahi, okuiimba nokunthinda omalutalatu, nomuenyo una ndyityinda, kaviampholele otyiho ankho ndyina. Alo umwe omalutalatu ankho ndyinthinda atilisa owoma. Ankho ndyihole okulipula okuti: Oityi matyikamoneka komutwe wandyila? Omokonda yatyi ovanthu vena omuenyo?

Etyi navasa omakumbululo omapulo ankho ndyikahi nokuovola, antyinthyuvisa unene. Nthiki imwe kongulohi etyi ankho tuli kosikola, andyipumphama na vana ankho tulongeswa navo vekahi nokutomphola etyi matyikamoneka komutwe wandyila. Umwe ankho tulongeswa nae o Mandya Ombangi ya Jeova. Monthiki yatyo oyo, amphakailamo nawa. Amphopila okuti: “Andreas, inkha uhanda okuvasa omakumbululo omapulo konthele yomuenyo, netyi matyikamoneka komutwe wandyila, katale Mombimbiliya.”

Ankho hayumbilekwa-le onthumbi, mahi andyikatala Mombimbiliya. Mandy ati katange Daniel okapitulu 2. Etyi natanga-mo atyinthyuvisa unene. Muapopiwa omautumini maatumina ouye auho mononthiki mbetu. Mandy andekesa omaulo omakuavo Ombimbiliya apopia etyi matyikamoneka komutwe wandyila. Konyima andyivasi omakumbululo omapulo ange! Mahi andyilipulu okuti, olie wahoneka omaulo aa? Olie upondola okupopia nawa-nawa etyi matyimoneka komutwe wandyila? Okuti muaina kouye kuna umwe Huku?

Mandy apopila ovalinepi vamwe Horst na Angelika, Onombangi mba Jeova opo vankhuatesako okunoñgonoka nawa Ondaka ya Huku. Liwa-liwa andyiimbuka okuti Onombangi mba Jeova ovo vala vapopia enyina lia Huku, Jeova. (Salmo 83:18; Mateus 6:9) Andyinoñgonoka okuti Jeova Huku makaavela ovanthu omuenyo uhapu momphangu yombembwa pano pohi. Salmo 37:9 ipopia okuti: “Vana vakevelela ku Jeova ovo mavakapingana ohi.” Atyinthyiki komutima etyi nanoñgonoka okuti, ovanthu aveho valinga ononkhono mbokulandula ovitumino via Huku, viapopiwa Mombimbiliya mavakakala-mo.

Mahi, andyilingi ononkhono mbokupilulula omuenyo wange opo ndyiendele muetyi Ombimbiliya ipopia. Mokonda yokuimba ankho ndyilipakako unene. Ngotyo, ankho nesukisa okulilongesa okuliola omutima. Ankho katyapepukile okuyekapo omuenyo ankho natyinda. Ndyipandula unene Jeova wapwa-elundo na ame, una okankhenda, wii nawa vana vekahi nokulinga ononkhono mbokuendela muetyi Ombimbiliya ilongesa!

Nalinga onthele yo kuhalingi okapungulula no kuhetavela okuti kuna Huku omanima 18, mahi Ombimbiliya yapilulula omuenyo wange auho. Etyi nahimbika okulilongesa Ombimbiliya anahakala vali notyiho netyi matyiya komutwe wandyila. Nambatisalwa menima 1993, andyikala Ombangi ya Jeova, menima 2000, atulinepe na Tabitha, omukristau umwe una ombili. Pahe tukuatesako ovanthu okunoñgonoka Ombimbiliya. Ovanthu ovanyingi tuvasa vekahi ngetyi ankho ndyikahi, vahanda ñgeno ovanthu vakala vala otyipuka tyike, vamwe vati kouye kutupu Huku. Ame tyinthyambukiswa tyina ndyivelekesa oñgeni vapondola okunoñgonoka Jeova.

Etyi nahimbika okuliwaneka no Nombangi mba Jeova, ovo tate avanumana unene. Mahi, okutuka opo avetyimono okuti okuliwaneka no Nombangi mba Jeova, tyapilulula omuenyo wange. Pahe vatanga Ombimbiliya tupu vaya komaliongiyo Onombangi mba Jeova, otyipuka otyo tyinthyambukiswa unene.

Ame na Tabitha tuna ehambu limwe enene mokonda tulandula onondonga mbo Mbimbiliya mbupopia etyi ovalinepi vena okulinga. Mongeleka, okukala omukuatyili, otyo tyitualako okupameka otyinepo tyetu.​—Hebreus 13:4.

Pahe ndyitupu vali owoma notyiho novipuka mavikamoneka komutwe wandyila. Ame ndyilitehelela okuti ndyili mombunga ikahi nawa, ina ehambu nombembwa iya yelikuata okapandi. Mombunga oyo, atuho tulitekula nawa. Otyo, otyipuka tyimwe ankho ndyihanda tunde tya kohale.