Ongeleka ya Suau Batisita Itukuatesako Okutualako Nehambu

OKUTI pena otyilinga uhole mewaneno mahi pahe kupondola vali okutyilinga? Hamwe otyilinga tyikahi nokulingwa na mukuenyi ine hamwe otyilinga walingile-ale. Hamwe pahe wetyiyekapo mokonda wakulupa, nokuhavete-mo, nokuhena onombongo, nokutekula ombunga. Ine hamwe wetyiyekapo mokonda yomapiluluko alingwa meongano. Otyo tyipondola okukusokesa okuti kukahi nokulinga atyiho uvila movilinga vya Huku. Tyina ovipuka ovio viamamoneka-po, pamwe upondola okusoya. Ngotyo, oityi tyipondola okukukuatesako okuhanumana, nokuhasoyo? Iya oityi tyipondola okukukuatesako okutualako nehambu?

Ongeleka ya Suau Batisita ipondola okutukuatesako okutualako nehambu. Suau Batisita waundapele movilinga vya Siovaa iya ovilinga ovio viemuetele ehambu. Mahi no ngotyo ovipuka vimwe kaviaendele ngetyi ankho akevelela. Mongeleka, wakalele vali ehimbwe mokaleya tyipona omuvo akalele nokuivisa. No ngotyo watuaileko okulinga ovilinga viae nehambu. Oityi tyemukuatesileko? Iya oñgeni tupondola okutualako nehambu alo umwe tyina pamoneka ovipuka vitusoyesa?

Pondyovo yenima 29 P.K., Suau ahimbika otyilinga tyae tyokufuika ovanthu opo vatambule Mesiya. Ankho wivisa okuti: “Livelei, mokonda Ouhamba wo keulu ukahi popepi.” (Mat. 3:2; Luka 1:12-17) Ovanyingi avetavela onondaka mba Suau. Alo umwe ovanthu ankho vakala kokule, aveya okumutehelela iya ovanyingi puvo avelivele avambatisalwa. Tupu Suau wapopilile ononkhalamutwe mbonongeleya ovipuka ankho mavivemonekela inkha kavapiluluka. (Mat. 3:5-12) Iya etyi ambatisala Sesusi menima 29, pahe ovipuka ankho ena okulinga wevifuisapo-ale. Okutuka opo, Suau ahimbika okupopila ovanthu opo valandule Sesusi, Mesiya walaelwe. — Suau 1:32-37.

Mokonda yovilinga Suau alingile, Sesusi apopi okuti: “Povanthu aveho vokuali-ko kapenekale nawike omunene vali tyipona Suau Batisita.” (Mat. 11:11) Tyotyili, Suau wahambukililwe unene ovilinga viae! Tupu ovakuatate ovanyingi hono vayambwa unene na Siovaa nga Suau. Tala ongeleka ya Terry nomuhikuena wae Sandra. Terry na Sandra vaundapele movilinga viomuvo auho omanima alamba po 50. Terry wati: “Nali novilinga oviwa meongano. Naundapele ngomukokoli-ndyila, no mo Mbetele, andyikala omukokoli-ndyila wavilapo, andyikala omutalelipo womawaneno, andyikala omutalelipo wono sirkuitu iya pahe nakondoka vali kovilinga vioukokoli-ndyila wavilapo.” Otyiwa okupewa ovilinga meongano, mahi ngetyi matulilongesa mongeleka ya Suau, tyesukisa okulinga ononkhono opo tutualeko nehambu tyina omuenyo wetu upiluluka.

Suau Batisita watuaileko nehambu mokonda ankho upandula ovilinga Siovaa emuavela. Mongeleka, etyi Sesusi ambatisalwa, ovalongwa va Suau avahimbika okutepuluka iya va Sesusi aveliyawisa. Mokonda yotyo, ovalongwa va Suau avasukalala iya avemupopila okuti: “Una ankho upopia-popia, ukahi nokumbatisala iya ovanthu aveho vekahi nokuenda no kwe.” (Suau 3:26) Suau evekumbulula okuti: “Ou una omphunga oe omphunga. Mahi epanga liomulume omphunga, tyina likatuka iya aliivi ondaka yomphunga, likala nehambu enene. Ngotyo, ehambu liange liafuapo.” (Suau 3:29) Suau ankho kahande okulityutya na Sesusi, iya ankho kasoko okuti ovilinga viae vitupu esilivilo mokonda vya Sesusi ankho viakolela vali. Suau watuaileko nehambu mokonda ankho upanda unene otyilinga tyae tyokukala “epanga liomulume omphunga.”

Ovituwa vya Suau viemukuatesileko okutualako nehambu namphila otyilinga tyae ankho katyapepukile. Mongeleka, Suau ankho omu Nazireu tunde etyi atyitwa. Otyo tyilekesa okuti ankho kapondola okunwa ovinyu. (Luka 1:15) Sesusi wapopia konthele yonkhalelo Suau ankho atyinda omuenyo wae okuti: “Suau ankho kali, kanu.” Mahi Sesusi novalongwa vae ankho kavailikilwe otyipuka natyike iya ankho vapondola okulinga ovipuka ovanthu ovakuavo valinga. (Mat. 11:18, 19) Tupu, Suau Batisita kalingile omahuviso, mahi ankho utyii okuti ovalongwa va Sesusi ankho vena epondolo liokulinga omahuviso, okukutikinyamo vamwe vokuali ovalongwa vae. (Mat. 10:1; Suau 10:41) Okuti otyo tyemusoyesile? Au. Watuaileko okuundapa nombili movilinga Siovaa emuavelele.

Inkha tupanda otyilinga Siovaa etuavela pahetyino meongano liae, nonthue matutualako nehambu. Terry wapopiwa konyima, wati: “Ankho ndyipanda unene kese tyilinga ndyipewa.” Terry tupu wapopia okuti tyina ahinangela onkhalelo aundapesa omuenyo wae movilinga viomuvo auho, kelivele. Uhinangela vala ovipuka oviwa.

Opo tuyawise kehambu lietu, tupondola okusoka omokonda yatyi otyilinga tulingila Siovaa tyakolela. Omokonda tyituavela omphitilo ‘yokuundapela kumwe na Huku.’ (1 Kol. 3:9) Inkha tupewa otyipuka otyiwa, matyikalako vala ehimbwe inkha tutyikuata nawa. Tupu matutualako vala nehambu, inkha apeho tuhinangela okuti elao limwe enene okuundapa na Huku. Iya kamatueleka etyi onthue tulinga movilinga vya Siovaa, netyi vakuetu valinga. Tupu kamatusoko okuti ovilinga vya vakuetu viakolela vali tyipona vietu. — Gal. 6:4.

Suau tyafuile ankho utyii-ale okuti kamaundapa ehimbwe. Mahi tyafuile ankho ketyii okuti ovilinga viae mavipu monkhalelo ombi. (Suau 3:30) Etyi palamba onohanyi epandu, tunde etyi Sesusi ambatisalwa, Suau apakua mokaleya Nohamba Helode menima 30. Mahi no ngotyo Suau atualako nokuivisa. (Malu. 6:17-20) Oityi tyemukuatesileko okutualako nehambu? Okuhinangela etyi tyakolela vali.

Etyi Suau ankho eli mokaleya, eivi ovipuka Sesusi ankho ekahi nokulinga. (Mat. 11:2; Luka 7:18) Suau ankho utyii nawa okuti Sesusi o Mesiya, mahi tyafuile welipulile inkha Sesusi ankho metyivili okufuisapo ovipuka aviho viaulilwe konthele ya Mesiya. Hamwe welipulile okuti: ‘Mokonda Mesiya makala ohamba, okuti mahimbika okutumina pahetyino? Okuti mandyovola mokaleya?’ Mokonda Suau ankho uhanda okunoñgonoka vali konthele yovilinga vya Sesusi, atumu ovalongwa vevali opo vakapule Sesusi okuti: “Ove Una wapopilue okuti Moya ine tukevela omukuavo?” (Luka 7:19) Sesusi ahakula ovavei iya atumu ovalongwa va Suau vekemupopile okuti: “Ovamphoki veete-po, ovilema vikahi nokueenda, vokuna otyilundu vekahi nokuveluka, onompholo mbukahi nokuiva-ko, vokuankhia vekahi nokututiliswa iya onondaka onongwa mbukahi nokuiviswa kovahepi.” Tyafuile Suau watehelele nawa etyi ovalongwa vae vemupopila ovipuka ovio. — Luka 7:20-22.

Onondaka ombo tyotyili mbapamekele unene Suau mokonda ankho mbulekesa okuti Sesusi ukahi nokufuisapo omaulo apopile konthele ya Mesiya. Sesusi ankho kamayovola Suau mokaleya. Mahi no ngotyo Suau ankho utyii okuti ovilinga alingile hanonkhono-puila. Namphila ankho eli mokaleya, mahi ankho una ehunga liokuhambukwa.

Inkha nonthue tusuka novilinga vya Siovaa nga Suau, matutualako okukoleleya noumphua-lundo nehambu. (Kolo. 1:9-11) Matukoleleya vala inkha tutanga Ondaka ya Huku nokusokolola kuyo. Okulinga ngotyo, matyituhinangelesa okuti ovilinga tulingila Siovaa hanonkhono-puila vala. (1 Kol. 15:58) Sandra wati: “Okutanga okapitulu ko Mbimbiliya kese nthiki, tyinkhuatesako okupameka oupanga wange na Siovaa. Tupu tyinkhuatesako okusoka ku Siovaa, anahasoko vala ku ame.” Otyipuka otyikuavo tyipondola okutukuatesako, okusoka ku etyi ovakuatate no nomphange vekahi nokulinga mouye auho. Sandra wati: “O JW Broadcasting^® ya kese hanyi itukuatesako okunoñgonoka vali nawa eongano, nokutualako nehambu movilinga vietu.”

Suau waivisile omuvo uhehi. Mahi mokueenda kuomuvo oo, ankho una “omutima nononkhono ngo mba Eliya.” Iya nga Eliya, Suau Batisita nae “ankho omunthu ngo onthue.” (Luka 1:17; Tia. 5:17) Inkha tuhetekela ongeleka yae yokupandula ovilinga Siovaa etuavela, nokuhinangela ovipuka viakolela vali, matutualako nehambu movilinga vya Siovaa alo umwe tyina tuna ovitateka.