Onombongo Nokulongeswa Matyikekukalesa Nawa?

Ovanthu ovanyingi vasoka okuti vana vokuatanga unene novo kuna onombongo, ovo mavakala nomuenyo ukahi nawa. Vasoka okuti okulongeswa unene tyitukuatesako okukala omuundapi ukahi nawa, omunthu ulivila na vakuavo mombunga, omunthu wonondunge. Tupu vati omunthu watanga unene mavasi ovilinga vifeta nawa, akala nehambu.

Tala etyi tyapopia omunthu umwe ukala ko China utiwa o Zhang. Wati: “Ame ankho ndyisoka okuti, nesukisa okulongeswa mosikola onene opo nahahepe. Tupu ankho ndyisoka okuti, ine ndyivasa ovilinga vifeta unene mandyikala nehambu.”

Ovanthu ovanyingi mokonda vahanda okukala nomuenyo ukahi nawa, vakalongeswa umwe monosikola ononene kovilongo ovikuavo. Momanima okualamba ovanthu ankho vatualako okuenda kovilongo ovikuavo, mahi pahe tyevetyika omukihi COVID-19. Menima lyo 2012 eongano limwe litiwa Organização para a Cooperação e Desenvolvimento Econômico liatile: “Ovanthu ovanyingi vakatanga kovilongo ovikuavo ovo ko Asia.”

Ovohe yovana pamwe velipaa umwe nokuundapa, opo ovana vavo vakatange kovilongo ovikuavo. Qixiang ukala ko Taiwan, wati: “Ovo tate ankho vetupu onombongo ononyingi mahi no ngotyo avelikuatehila, avetutumu atuho vekuana tukalongeswe mosikola onene ko Estados Unidos.” Ovohe vamwe opo vafeteleko ovana vavo valevala onombongo.

Okulongeswa tyipondola umwe okukuatesako omunthu movipuka vimwe, mahi no ngotyo kavakala novipuka ankho vahanda. Soka pamwe omunthu ukala omanima omanyingi nokulongeswa otyo alevala onombongo, mahi konyima ahakaundapa movilinga ankho ahanda. Rachel Mui woko Singapura wati: “Ovanthu valongeswa umwe unene mahi no ngotyo ovilinga kavevivasi. Otyipuka otyo tyiliyawisa vala.” Omulume umwe walongeswa unene utiwa o Jianjie, ukala ko Taiwan, wati: “Ovanthu ovanyingi namphila vatanga umwe unene, mahi kavaundapa movilinga viata mondongeso yavo.”

Vana vavasa ovilinga viata mondongeso yavo, no ngotyo pamwe kavakala ngetyi ankho vahanda. Otyo tyaendele na Niran woko Tailândia. Etyi alongeswa mosikola onene ko Reino Unido, konyima pahe avasi umwe ovilinga viata mondongeso yae. Ngwe wati: “Tyili okualongeswa tyankhuatesako umwe okuvasa ovilinga vifeta nawa. Mahi ankho opo ndyifetwe vali unene tupu ankho ndyina okuundapa vali unene. Movilinga vamwe avataatwamo, atee umwe na ame. Otyo tyankhuatesako okutala okuti, mouye uno tyiti vala, hono tuundapa apa, muhuka tuundapa apa.”

Atee umwe vena onombongo ononyingi, tyina tuvetala ngoti vena omuenyo ukahi nawa, mahi navo vena ovitateka mombunga, vavela, pamwe vakala tyihena onombongo. Katsutoshi ukala ko Japão, wati: “Ankho namona umwe, mahi ankho hikala nawa mokonda ovanthu vandinga onkhi nokumphopia omapita.” Lam, omukai umwe ukala ko Vietnã wati: “Ovanthu ovanyingi ndyimona vaovola ovilinga vifeta nawa vakale nomuenyo ukahi nawa, mahi nii tyitupu-ale, kavakala nehambu ngetyi ankho vahanda, vavela, vasukalala, iya otyipuka otyo atyivesoyesa.”

Nga Franklin, ovanthu ovanyingi vamona okuti pena ovipuka viesukisa vali tyipona okulongeswa vala unene nokukala nonombongo. Vamwe povanthu ovo valinga ononkhono mbokukuatesako vakuavo, tyipona okuovola vala okukala nomalumono. Naina oityi una okulinga ukakale nomuenyo ukahi nawa? Onthele ilandulako otyo maipopi.