Oityi Twiila Kehinangelo Liononkhia mba Sesusi?

1-2. (a) Onalupi onthue haunene tuhinangela vali unene wetu tuhole wanyima? (b) Oityi Sesusi apopilile ovalongwa vae motyinthiki tyahulililako etyi eheneipawe?

NAMPHILA pamwe palambale omanima omanyingi tundee apa umwe tuhole anyima, no ngotyo pamwe tumusoka. Mahi tumusoka vali unene tyina omuvo anyimine wamehikipo.

² Omanima aeho onthue tukala pokati kovanthu ovanyingi-nyingi mouye auho vasoka kononkhia mba umwe tuhole unene. Omunthu oo o Sesusi Kilisitu. (1 Pet. 1:8) Onthue tuliongiya atuho na tuhinangele ononkhia mba una waava omuenyo wae ngotyilikutila, etuyovole konkhali no kononkhia. (Mat. 20:28) Sesusi uhanda ovalanduli vae vahinangele ononkhia mbae. Motyinthiki tyahulilila-ko etyi eheneipawe, Sesusi walingile ondalelo, apopila ovalongwa vae okuti: “Tualeiko okutyilinga opo munthyinangele.”b — Luka 22:19.

 3. Oityi matulilongesa monthele ei?

³ Povanthu vakala Pehinangelo lya Sesusi Kilisitu, mavaende keulu kavehi. Mahi ovanyingi-nyingi vatyo mavakakala pano pohi. Monthele ei, matulilongesa omokonda yatyi vana venda keulu na vana mavakakala pano pohi, vahinangelela ononkhia mba Sesusi omanima aeho. Tupu matutale ouwa tupolako tyina tuenda kehinangelo. Mahi nkhele matulilongesa omokonda yatyi wokuenda keulu vaila kehinangelo liononkhia mba Sesusi.

 4. Oityi ovalembulwa valila kombolo nokunwa kovinyu Pehinangelo?

⁴ Omanima aeho, tyina ovalembulwa vakala pehinangelo, valia ombolo nokunwa kovinyu. Omokonda yatyi otyiwa valinge ngotyo? Opo tukumbulule epulo olio, nkhele soka kuetyi tyamonekele-po motyinthiki tyahulilila tyomuenyo wa Sesusi pano pohi. Etyi Opasikwa yapwa, Sesusi alulika etyi hono twii okuti Ehinangelo Liononkhia mba Tatekulu. Waavela ombolo novinyu ono apostolu mbae 11, evepopila valie, nokunwa. Sesusi evepopila onomphango onombali. Imwe omphango omphe, onkhuavo omphango Youhamba.c (Luka 22:19, 20, 28-30) Onomphango ombo, mbaikula ondyila opo ono apositolu ovo novanthu ovakuavo vehehi vakakale onohamba novanakwa keulu. (Ehol. 5:10; 14:1) Ngotyo, ovalembulwa vala vokuahupapod valia kombolo nokunwa kovinyu Pehinangelo, mokonda valinga onthele yonomphango ombo onombali.

 5. Ekevelelo patyi ovalembulwa vena iya vesukisa okulinga?

⁵ Tala tyimwe tyitukuatesako okunoñgonoka omokonda yatyi ovalembulwa vaila Pehinangelo: Okuenda Pehinangelo tyivekuatesako okusoka kekevelelo liavo. Siovaa weveavela omphitilo yokukala nomalutu ahavolo vali keulu, avakatumina na Sesusi Kilisitu kumwe na vakuavo vo 144,000. Mahi tyivehambukiswa vali unene, okukakala ponthele ya Siovaa Huku! (1 Kol. 15:51-53; 1 Suau 3:2) Ovalembulwa vetyii okuti okukongwa opo vende keulu, elao limwe enene. Mahi tupu vetyii okuti opo vakapewe umwe omuenyo oo keulu, vena okutualako okukala ovakuatyili ku Siovaa atee kononkhia. (2 Tim. 4:7, 8) Tyina ovalembulwa vasoka kekevelelo vena liokuenda keulu, vahambukwa unene. (Titu 2:13) Iya pahe “onongi ononkhuavo”? (Suau 10:16) Oityi vaila Pehinangelo?

 6. Oityi onongi ononkhuavo navo vaila Pehinangelo omanima aeho?

⁶ Onongi ononkhuavo venda pehinangelo, mahi kavali kombolo tupu kavanu kovinyu. Mo 1938, vana mavakala pano pohi vapopililwe okuti navo vena okuenda Pehinangelo liononkhia mba Sesusi. Omutala Womulavi 1 ya Março yo 1938, wapopile okuti: “Tyaviuka onongi ononkhuavo navo vakale peliongiyo olio avatale etyi tyilingwa-po. . . . Eliongiyo olio tupu omuvo wehambu enene pala avo.” Ngetyi monthiki yotyinepo vokuakongwa vahambukua unene, onongi ononkhuavo navo vahambukua unene okukala Pehinangelo.

 7. Omokonda yatyi onongi ononkhuavo vatehelela nehambu elongomona lilingwa Pehinangelo?

⁷ Onongi ononkhuavo navo vetyihole unene okusoka kekevelelo liavo. Vetyihole unene okutehelela elongomona lilingwa Pehinangelo, mokonda elongomona olio livekuatesako okusokolola kovipuka oviwa Kilisitu novo 144,000 mavakalingila ovanthu ovakuatyili mokueenda kuomanima 1000. Tyina ovalembulwa vamahimbika okutumina na Sesusi keulu, mavakapilulula ohi aikala ouye omupe, tupu avakuatesako ovanthu vokutavela okuahakala vali nonkhali. Ovanthu ovanyingi-nyingi hono vakala Pehinangelo mavakahambukwa unene okutala oñgeni omaulo Ombimbiliya, ngaa tuvasa mu Isaías 35:5, 6; 65:21-23; nomukanda Eholololo 21:3, 4 afuiswapo. Tyina velisokela mouye omupe kumwe nonombunga mbavo, ekevelelo liavo lipama vali, iya otyo tyivekuatesako okuahayekepo okuumbila Siovaa. — Mat. 24:13; Gal. 6:9.

 8. Otyipuka patyi otyikuavo tyaavela ondundo onongi ononkhuavo okuenda Pehinangelo?

⁸ Nkhele pena vali otyipuka otyikuavo tyaavela ondundo onongi ononkhuavo okuenda Pehinangelo. Onongi ononkhuavo vehole ovalembulwa iya vahanda okuvekuatesako. Ondaka ya Huku kohale yapopile-ale okuti ovalembulwa nonongi ononkhuavo mavakaundapela kumwe. Omokonda yatyi? Matulilongesa omaulo etatu.

 9. Ngetyi tyipopia eulo livasiwa mu Zacarias 8:23, oñgeni onongi ononkhuavo velitehela konthele yovalembulwa?

⁹ Tanga Zacarias 8:23. Eulo eli liyandyulula umwe nawa onkhalelo onongi ononkhuavo vatala ovalembulwa. Onondaka “omu Sundeu” nondaka “onwe” ipopia vala ovanthu veke, ovalembulwa nkhele veli pano pohi. (Loma. 2:28, 29) “Ovalume ekwi vomalaka aeho ovilongo,” onongi ononkhuavo. Onongi ononkhuavo “vakuata motyikutu” tyovalembulwa, tyilekesa okukakatela muvo, aveliwaneka navo mefendelo liotyotyili. Ngotyo, motyinthiki Tyehinangelo, onongi ononkhuavo valekesa okuti velikuata-po kumwe novalembulwa tyina navo vakala-po.

10. Oñgeni Siovaa nokufwisapo eulo livasiwa mu Ezequiel 37:15-19, 24, 25?

¹⁰ Tanga Ezequiel 37:15-19, 24, 25. Opo Siovaa afuisepo eulu olio, wawaneka kumwe ovalembulwa nonongi onkhuavo, monkhalelo imwe ihevilwa okuyapulwa. Eulo liapopia ovimuti vivali. Vana mavaende keulu, vekahi ngotyimuti “tya Sunda,” (omuhoko ankho mutunda onohamba mbo Isilayeli), iya vana mavakakala pano pohi, vekahi ngotyimuti “tya Efraim”e. Siovaa ankho mahonyeka ovanthu ovo, avakala ngatyina “otyimuti tyike.” Otyo tyilekesa okuti ankho mavaumbila Siovaa tyelikuatapo kumwe, tyihongolelwa Nohamba yavo, Sesusi Kilisitu. Omanima aeho, ovalembulwa nonongi ononkhuavo, venda Kehinangelo, hangatyina ovikundyi vivali vieliyapuka, mahi vekahi ngatyina “otyunda tyike” tyikahi nokuliswa “nomunthita wike vala.” — Suau 10:16.

11. Oñgeni “onongi” mbapopiwa mu Mateusi 25:31-36, 40 mbukuatesako onondenge mba Kilisitu?

¹¹ Tanga Mateusi 25:31-36, 40. Ovalie onongi vapopiwa monthele-popia ei? “Onongi” ombo, ovanthu ovaviuki momuvo wonthyulilo mavakakala pano pohi. Vakuatesako onondenge mba Kilisitu, tyina vaundapa navo motyilinga vapewa tyokuivisa onondaka onongwa nokulinga ovalongwa. — Mat. 24:14; 28:19, 20.

12-13. Ombupi ononkhalelo ononkhuavo, onongi ononkhuavo vakuatesako onondenge mba Kilisitu?

¹² Omanima aeho, tyina kuakamba katutu opo onthiki Yehinangelo ihikepo, onongi ononkhuavo vakuatesako onondenge mba Kilisitu, tyina vakonga ovanthu mouye auho, opo veye Kehinangelo. (Tala okakasa kati “Ove Ukahi Nokulifuiika Pala Omuvo Wehinangelo?”) Tupu onongi ononkhuavo vakuatesako onondenge mba Kilisitu, mokulinga atyiho opo Ehinangelo lilingwe momawaneno aeho mouye auho, namphila pamwe momawaneno atyo mwehena ovalembulwa. Onongi ononkhuavo vahambukwa unene okukuatesako onondenge mba Kilisitu monkhalelo oyo. Vetyii okuti tyina valinga ngotyo, Sesusi utyiete, iya ongatyina oe vekahi nokutyilingila. — Mat. 25:37-40.

¹³ Tyilinge matuende keulu, tyilinge matukakala pano pohi, oityi tuiila Kehinangelo?

14. Oñgeni Siovaa na Sesusi vakala noluembia olunene nonthwe?

¹⁴ Tupandula Siovaa na Sesusi mokonda yoluembia vakala nalo nonthue. Siovaa una oluembia nonthwe mononkhalelo ononyingi. Mahi pena onkhalelo imwe etyilekesa yavilapo vali ko nonkhuavo. Opuetyi atuma omona wae ehole unene pano pohi, opo ankhile ononkhali mbetu. (Suau 3:16) Na Sesusi nae wakala no luembia olunene nonthwe, etyi etavela okuava omuenyo opo tuyovoke. (Suau 15:13) Onthue kamatutyivili-ale okukondolela Siovaa na Sesusi, otyipuka otyo vetulingila. Mahi tupondola okuvepandula movipuka tulinga nthiki na nthiki. (Kol 3:15) Tupu tuenda Kehinangelo mokonda tuhanda okusokolola koluembia Siovaa na Sesusi vena-lo nonthwe, nokulekesa okuti tuvehole.

15. Omokonda yatyi tyilinge ovalembulwa, tyilinge onongi ononkhuavo vapandela unene otyilikutila tyeyovo?

¹⁵ Onthwe tupandula unene otyilikutila tyeyovo. (Mat. 20:28) Ovalembulwa mavaende vala keulu mokonda yotyilikutila tyeyovo. Mokonda vena ekolelo motyilikutila tya Sesusi, Siovaa uvetala okuti ovaviuki iya tupu ovana vae. (Loma. 5:1; 8:15-17, 23) Onongi ononkhuavo navo vapandula unene otyilikutila otyo. Mokonda yonthumbi vena mohonde ya Sesusi, Huku uvetala okuti vasukuka, vemulingila ovilinga oviwa, iya vakevelela okukayovolwa “mononkhumbi ononene.” (Ehol. 7:13-15) Tyina ovalembulwa nonongi ononkhuavo venda Kehinangelo omanima aeho, otyo umwe matyilekesa okuti vapandula otyilikutila tyeyovo.

16. Oityi vali onthue tuiila Kehinangelo?

¹⁶ Otyipuka otyikuavo tyitutuala Kehinangelo, omokonda onthwe tuhanda okutavela Sesusi. Tyilinge matuende keulu, tyilinge matukakala pano pohi, onthwe tutavela otyitumino Sesusi apopile tyokuati: “Tualeiko okutyilinga opo munthyinangele.” — 1 Kol. 11:23, 24.

17. Oñgeni Ehinangelo litukuatesako okukala vali noupanga wapama na Siovaa?

¹⁷ Tukala vali omapanga a Siovaa. (Tia. 4:8) Ngetyi tuelilongesa monthele ei, Pehinangelo tukala nomphitilo yokusoka kekevelelo Siovaa etuavela, no koluembia olunene ena nonthwe. (Jer. 29:11; 1 Suau 4:8-10) Tyina tusoka kovipuka oviwa Siovaa meketulingila komutwe wandyila, no koluembia olunene ena nonthwe, tupanda vali Siovaa atukala noupanga wapama nae. — Loma. 8:38, 39.

18. Okusokolola kuetyi Sesusi alinga, tyitulunda okulinga-tyi?

¹⁸ Tupewa ondundo yokuhetekela Sesusi. (1 Pet. 2:21) Tyina kuakamba ononthiki mbumwe opo Ehinangelo lihike-po, tutanga onotesitu mbo Mbimbiliya mbupopia evi Sesusi alingile mosimanu yahulililako etyi eli pano pohi, nononkhia mbae, netutilo liae. Monthiki Yehinangelo, elongomona lituhinangelesa oluembia Sesusi ena nonthwe. (Efe. 5:2; 1 Suau 3:16) Tyina tutanga etyi Sesusi alingile atusokolola umwe nawa, nonthwe ‘matueende ngetyi ngwe aendele.’ — 1 Suau 2:6.

19. Oityi tuna okulinga opo apeho tukale omapanga a Siovaa?

¹⁹ Onthwe tuhanda okukala apeho omapanga a Siovaa. (Sunda 20, 21) Onthwe matukala vala omapanga a Siovaa tyina tumutavela, na tyina tulinga ovipuka viahasilisa enyina liae, na tyina tulinga evi vimuhambukiswa. (Prov. 27:11; Mat. 6:9; 1 Suau 5:3) Okuenda Kehinangelo matyituavela ondundo yokulinga ovipuka ngatyina tukahi nokupopila Siovaa okuti ‘ame nahanda okukala apeho-apeho epanga liove!’

20. Ovipuka patyi oviwa vituavela ondundo yokuenda Kehinangelo?

²⁰ Tyilinge matukala pano pohi, tyilinge matuende keulu, tuna ovipuka ovinyingi tuiila Kehinangelo. Omanima aeho tyina tuliongiya Pehinangelo, tuhinangela ononkhia mbomunthu umwe tuhole unene. Omunthu oo o Sesusi Kilisitu. Mahi haunene tusokolola koluembia olunene Siovaa akala nalo nonthwe etyi aava omona wae etuyovole. Enima lino, Ehinangelo malilingwa Mutano, 15 ya Abril yo 2022. Onthwe tuhole unene Siovaa Nomona wae, ngotyo, monthiki yokuhinangela ononkhia mba Sesusi, kuonthwe petupu otyipuka otyikuavo tyesukisa vali tyipona okukala Pehinangelo.