Otyituwa Tyakolela Vali Tyipona Ondiamandi

Haykanush, omuivisi umwe uhenembatisalwe ko Armenia, wakoya o passaporte popepi neumbo liae. Mokati kayo ankho muna ovikalatau viokulanda ovipuka no nombongo ononyingi. Etyipopila omulume wae, tupu nae ankho omuivisi uhenembatisalwe.

Ovalinepi ovo ankho vetupu onombongo tupu ankho vena onongele. Mahi avatokola ukutuala onombongo peumbo lia hekulu okutalela kuetyi tyahonekwa mo passaporte. Hekulu yonombongo nombunga yae avahuvu. Haykanush nomulume wae avapopi okuti ovakuatyili mokonda yetyi velilongesa Mombimbiliya. Otyo atyiveavela omphitilo yokupopia konthele Yonombangi mba Jeova iya avaavela omikanda ombunga oyo.

Ombunga oyo ankho ihanda okumufeta, mahi Haykanush ehetavela. Onthiki onkhuavo, omukai womulume wakoyelwa ovipuka viae akatalelapo Haykanush peumbo liae, iya akapandula vali, emukuluminya opo atambule onela yondiamandi.

Ngombunga oyo, ovanthu ovanyingi vapondola okuhuva noukuatyili Haykanush nomulume wae valekesile. Mahi okuti Jeova wahuvile? Oñgeni atala oukuatyili wae? Okuti oukuatyili wae wemuetela ouwa?

Ekumbululo liepulo olio kalialemene. Omokonda yatyi? Mokonda ovaumbili va Huku vetyii okuti okuhetekela ovituwa via Jeova tyakolela vali tyipona ondiamandi, nopalata, nomalumono. Enga, onkhalelo Jeova atala ovipuka viakolela vali, yelikalela nonkhalelo ovanthu vatala ovipuka ovio. (Isaías 55:8, 9) Iya ovaumbili va Huku vetyii okuti okuhetekela ovituwa via Jeova otyo tyakolela vali.

Onthue tutyiimbuka tyina tutala oityi Ombimbiliya ipopia konthele yokupunga ovipuka nokukala nounongo. Provérbios 3:13-15 yati: “Omuna-mbembwa omunthu una wavasa ounongo, nomunthu uvila okupunga ovipuka. Okukala nounongo otyiwa vali tyipona okumona opalata noolu. Ounongo wakolela vali tyipona onomphande, ovipuka aviho uhole, kavipondola okuelekwa nao.” Tyimoneka nawa okuti, Jeova upanda vali ovituwa tyipona omalumono.

Iya konthele youkuatyili?

Jeova omukuatyili. “Kapondola okukemba.” (Tito 1:2) Watuma apostolu Paulu ahonekele Ovakristau ova Hebreu okuti: “Tualeiko okutuitilako momalikuambelo, mokonda tuayumba onthumbi yokuti tuna omutima waviuka, mokonda onthue tuhanda okukala ovakuatyili movipuka aviho.”—Hebreus 13:18.

Jesus Kristu waava ongeleka ongwa youkuatyili. Mongeleka, etyi Omunene-nakwa wavilapo Kaifá emupopila okuti: “Ame ndyikuita waane inkha ove Kristu Omona wa Huku!,” Mokonda Jesus omukuatyili elipopi okuti ame Mesiya. Wapopile otyili namphila etyii okuti Ombonge Onene ipondola okumuhunga okuti ukahi nokuvetangunina iya otyo atyivelundu okumuipaa.​—Mateus 26:63-67.

Iya onthue? Inkha tukala motyitateka tyimwe iya atusoko okuti okuholeka ovipuka vimwe ine okukemba matyitukuatesako, okuti matulingi ononkhono mbokukala ovakuatyili?

Tyipondola okupuiya okukala omukuatyili kononthiki mbuno mbahulilila tyina ovanthu ovanyingi “velihole ovo muene, nokuhole onombongo.” (2 Timóteo 3:2) Tyina onombongo ine ovilinga viahamoneka, ovanthu ovanyingi vakala ovimphulu, nokuyondya ine okuhakala ovakuatyili. Ovipuka ovio viakaka unene iya ovanthu ovanyingi vasoka okuti mavakala vala nomalumono inkha kavakala ovakuatyili. Alo umwe Ovakristau vamwe valinga omatokolo ahaviukile iya “avayekepo okukala ovakuatyili” tupu avayekepo okukala nenyina ewa mewaneno.—1 Timóteo 3:8; Tito 1:7.

Mahi Ovakristau ovanyingi vahetekela Jesus. Vaimbuka okuti okukala novituwa ngo via Huku tyakolela vali komalumono aeho. Otyo ovakuendye Ovakristau vahalingila o kabula kosikola. (Provérbios 20:23) Okukala ovakuatyili hapeho upewa ondyambi ngetyi tyaendele na Haykanush. Nongotyo, Huku wapopia okuti okukala omukuatyili otyo tyaviuka, iya tyitukuatesako okukala nomutima wasukuka, otyipuka tyimwe tyakolela vali.

Ongeleka ya Gagik yetyilekesa nawa. Wati: “Etyi nkhele nehenekale Omukristau, ame ankho ndyiundapa movenda imwe onene iya hekulu yovenda ankho kafete onombongo ambuho mbuitwa kelilimu. Mokonda ankho ndyitumina movenda, ame ankho ndyikevela ‘ovatanthi vomalilimo’ veye okuliyava. Mokonda yotyo, ame ankho ndyiiwe okuti himukuatyili. Etyi nelilongesa otyili, andyianye okutualako okuundapa movilinga ovio, namphila ankho ndyifetwa onombongo ononyingi. Mahi, andyiikula ovenda yange. Iya monthiki imwe, andyiihonekesa ku kaputu nokufeta omalilimu.”—2 Coríntios 8:21.

Gagik Wati: “Ovenda yange ankho kaikahi nokulinga onombongo mbutuuka iya atyimphuiya okutekula ombunga yange. Mahi, pahe ndyina vali ehambu. Ndyina omutima wasukuka komaiho a Jeova. Andyiavela ongeleka ongwa kovana vange vevali tupu napewa ovilinga mewaneno. Ovanthu vokutantha elilimu novanthu ovakuavo naundapele navo kohale, pahe vetyii okuti ndyimunthu omukuatyili.”

Jeova uhole ovanthu vemuetela omunkhima putyina vahetekela ovituwa viae, okukutikinyamo oukuatyili. (Tito 2:10) Iya tyina tulinga ngotyo, Jeova ulaa okutukuatesako. Watuma Ohamba David okuhoneka okuti: “Ame nali omukuendye, pahe nakulupa, mahi hinemone omuviuki wasiwapo, ine ovana vae vaita okulia.”​—Salmo 37:25.

Ongeleka yomukai wekolelo Rute ityilekesa nawa. Noukuatyili watuaileko okukala na inaivi, Noemi, ehemusipo namphila ankho akulupa. Rute ailukila ko Isilayeli, oku ankho apondola okufenda Huku yotyotyili. (Rute 1:16, 17) Ankho omukuatyili iya aundapa movilinga viokupupulula, alandula nawa Otyitumino tyovanthu vahepa. Tupu David wakalele nongeleka ngoyo, Jeova nalumwe ayekelepo Rute na Noemi. (Rute 2:2-18) Kaavelele vala Rute okulia tupu wemuavelele ovipuka ovikuavo. Wemuholovona opo akale mombunga muatuka Ohamba David alo umwe Mesiya walaelue!—Rute 4:13-17; Mateus 1:5, 16.

Katyapepukile kovaumbili vamwe va Jeova okuvasa onombongo mbokulanda ovipuka vesukisa. Nongotyo, kavayekelepo oukuatyili opo valinge etyi vahanda, mahi vaundapa unene iya vena ombili. Tyina valinga ngotyo, valekesa okuti ovituwa oviwa via Huku okukutikinyamo oukuatyili, viakolela vali tyipona omalumono.​—Provérbios 12:24; Efésios 4:28.

Nga Rute, Ovakristau mouye auho vena onthumbi yokuti Jeova mevekuatesako. Vayumba onthumbi momulao alinga wati: “Himekuyeke nalumwe, himekusipo nalumwe.” (Hebreus 13:5) Ovikando aviho, Jeova ulekesa okuti upondola iya makakuatesako ovanthu ovakuatyili ononthiki ambuho. Omulao wae wokukuatesako ovaumbili vae movipuka vesukisa nkhele utualako.​—Mateus 6:33.

Tyotyili, ovanthu vapanda unene ondiamandi nomalumono. Mahi onthue tuna onthumbi yokuti Tate yetu keulu upanda oukuatyili wetu novituwa ovikuavo oviwa, tyipona omalumono!