Otyinepo Oku Tyatuka Netyi Tyalingilwa

1, 2. (a) Oñgeni otyinepo tyahimbika? (b) Oityi omulume wotete nomukai wotete ankho vapondola okuimbuka motyinepo? (Tala olutalatu pefo pahimbikila onthele.)

KATYAPENGELE inkha omunthu umwe uhanda okunepa ine okunepwa. Mahi oñgeni otyinepo tyahimbika iya omokonda yatyi tyalingilwa? Okunoñgonoka ovipuka ovio matyitukuatesako okukala nolusoke luaviuka konthele yotyinepo nouwa utundililako. Tete, Huku watunga Andau iya emuavela otyilinga tyokuluka ovinyama. Andau amono okuti ovinyama aviho ankho pena otyituei notyindema, “mahi omulume ankho utupu omukuatesiko wae.” Ngotyo, Huku alalesa Andau iya emupolo olupati lwae atungu nalo omukai. Jeova aeta omukai oo ku Andau, akala omukai wae. (Tanga Gênesis 2:20-24.) Otyo tyilekesa okuti otyinepo otyiwa tyatunda ku Jeova.

² Etyi palamba omanima amwe, Jesus apitulula etyi Jeova apopile mo Endene okuti: “Omulume masipo he na ina, eliwaneka nomukai wae, iya ovo vevali avakala vala ohitu ike.” (Mateus 19:4, 5) Mokonda Huku wapola olupati lwa Andau opo atunge nalo omukai wotete, ovalinepi ovo vaimbukile okuti ovanthu veke. Tunde ponthyimbi Jeova kahande ovalinepi velihenge ine okunepa ovanthu ovanyingi.

 3. Otyipuka patyi tyakolela otyinepo tyalingilwa?

³ Andau ahambukilwa omukai wae, iya konyima emuihana okuti o Eva. Ankho omukuatesiko wae. Andau na Eva ankho vapondola okukala nehambu motyinepo. (Gênesis 2:18) Otyipuka tyimwe tyakolela otyinepo tyalingilwa, opala okuyulisa ohi novanthu. (Gênesis 1:28) Ovana ankho vapondola okuhumba ovohe, mahi mokueenda kuomuvo navo vanepa iya avakakala novana vavo. Ovanthu ankho vena okuyulisa ohi iya avalingi ohi aiho ikale omphangu yombembwa.

 4. Oityi tyaendele notyinepo tyotete?

⁴ Otyinepo tyotete tyanyonwa etyi Andau na Eva vatyitukilapo Jeova. “Onyoka yokonthuko” Satanasi Eliapu, yayondya Eva iya aimupopila alie “komuti wenoñgonoko liotyivi notyiwa” opo akale nenoñgonoko lihuvisa. Satanasi wemupopila okuti inkha Eva ulia komuti, otyo matyimukuatesako okutokola okulinga otyiwa notyivi. Eva kalekesile onthilo ku Andau onkhalamutwe yombunga etyi atokola okulia kotyinyango mahi tete ahapulu ku Andau. Iya Andau ketavelele ku Huku etyi etavela okulia kotyinyango apewa nomukai wae.​—Revelação 12:9; Gênesis 2:9, 16, 17; 3:1-6.

 5. Oityi tulilongesila ku Andau na Eva monkhalelo vakumbulula Jeova?

⁵ Etyi Jeova evepula, Andau atatesila momukai wae. Wati: “Omukai wampha opo akale naame, wampha otyinyango tyomuti, moluotyo andyili.” Etyi Eva apulwa atatesila monyoka yemuyondya. (Gênesis 3:12, 13) Andau na Eva veliamena mokonda youmphuki wavo, iya Jeova akoyesa onomphuki ombo. Mahi, ongeleka yavo itulongesa tyi? Opo otyinepo tyikale nehambu, omulume nomukai vesukisa okutavela ku Jeova nokuhelitatesila.

 6. Oñgeni upondola okuhangununa Gênesis 3:15?

⁶ Namphila Satanasi alinga ovipuka ovio mo Endene, mahi Jeova walinga atyiho opo ovanthu vakale nekevelelo komutwe wandyila. Ekevelelo olio livahiwa meulo lio tete lio Mbimbiliya. (Tanga Gênesis 3:15.) Eulo olio lilekesa okuti Satanasi mamiangulwa “nombuto” “yomukai.” Onoandyu ononyingi mbuli keulu, mbuna oupanga wapama na Huku. Ombo mbukahi ngatyina omukai wa Jeova. Ñgeno ankho Huku upondola okutuma imwe po noandyu mbae, opo “imiangule” Eliapu. Ombuto yaavela omphitilo ovanthu vetavela opo vakale nombembwa ina ovalinepi votete vavombesile. Ovanthu vetavela Huku, pahe vena omphitilo yokukakala nomuenyo omuwa pano pohi, ngetyi Jeova ahandele.​—João 3:16.

 7. (a) Oityi tyimoneka motyinepo tunde poumphuki wa Andau na Eva? (b) Oityi Ombimbiliya iita ovalinepi?

⁷ Oumphuki wa Andau na Eva wanyona otyinepo tyavo muene novikuavo vialandulako. Mongeleka, Eva novakai aveho vatuka mwe pahe vaihamenwa tyina vakutula. Tupu ovakai vesukisa okuhumbwa nokupandwa novalume vavo, mahi ovalume vatekula onya ovakai vavo, otyipuka tyakaka unene hono. (Gênesis 3:16) Jeova ukevelela ovalume vakale ononkhalamutwe mbombunga mbuna oluembia iya ukevelela ovakai vetavele kovalume vavo. (Efésios 5:33) Tyina ovalinepi Ovakristau vaundapela kumue, vapondola okulityilika ovitateka ovinyingi.

 8. Oñgeni otyinepo ankho tyikahi pomuwo wa Andau alo pomuvo wa Noe?

⁸ Etyi Andau na Eva vehenenkhie vakalele novana. (Gênesis 5:4) Omona wavo wotete, Kaim wanepele omukai wo mombunga yae. Lameke watuka meimo lia Kaim, omulume wotete Ombimbiliya ipopia okuti wakalele no vakai vevali. (Gênesis 4:17, 19) Pomuvo wa Andau alo pomuvo wa Noe, ankho ovanthu vafenda Jeova kavehi. Povanthu ovo vekolelo vamwe puvo o Abele, na Enoke, na Noe no mbunga yae. Ombimbiliya ipopia okuti pomuvo wa Noe, “ovana va Huku yotyotyili avahimbika okutala okuti ovahikuena pano pohi ovawa unene. Iya aveya okunepa aveho vana vaholovonapo.” Otyo ankho katyaviukile iya onoandyu ambukala novana ovanene ovakalavi vaihanwa okuti ono Nefilin. Mokueenda kuomuvo oo, “ovivi viovanthu ankho ovinyingi unene kombanda yohi, neyembelo liomalusoke omitima viavo ankho evi vala omuvo auho.”​—Gênesis 6:1-5.

 9. Oityi Jeova alinga no nondingavivi pononthiki mba Noe? Oityi tulilongesila kuetyi tyaendele pononthiki ombo?

⁹ Jeova apopi okuti maeta ombila onene pala okuhanyako ovanthu onomphuki. “Noe, omuivisi wouviuki,” wapopila ovanthu okuti makuya Ombila Onene. (2 Pedro 2:5) Mahi avehetavela ku Noe mokonda ankho vesuka vali novipuka via kese nthiki, okukutinyamo otyinepo. Jesus waeleka ononthiki mba Noe no nonthiki mbetu. (Tanga Mateus 24:37-39.) Hono, ovanthu ovanyingi kavetavela onondaka tuivisa, onondaka onongwa konthele Youhamba wa Huku. Onthue tuivisa onondaka ombo tyina nkhele ouye uno wovivi wehenehanyueko. Oityi tulilongesila kuetyi tyaendele kononthiki mba Noe? Onthue katuyeke ovipuka vimwe ngotyinepo ine ovana, vikale ovipuka viakolela vali atulimbuiko okuti onthiki ya Jeova ili popepi.

10. (a) Kovilongo ovinyingi, oñgeni ovanthu vatala oundalelapo? (b) Oñgeni otyinepo tya Abraiau na Sara tyaava ongeleka ongwa?

¹⁰ Noe novana vae vetatu ankho kavanepele oluvale. Mahi konyima Yombila Onene, ovalume ovanyingi avahimbika okunepa ovakai ovanyingi. Kovilongo vimwe, oundalelapo ankho wakaka unene alo umwe ankho wakutikinyua mefendelo. Puetyi Abraiau na Sara vailukila ko Kanaa, avaimbuka okuti ovanthu ankho valinga oundalelapo tupu ankho vetupu onthilo notyinepo. Jeova wahanyeneko Epundaumbo lio Sodoma no Gomora, mokonda ovanthu ankho vakalamo valinga unene oundalelapo. Mahi Abraiau ankho welikalela novanthu ovo. Ankho onkhalamutwe ongwa yombunga, iya Sara ankho ongeleka ongwa yomukai utavela. (Tanga 1 Pedro 3:3-6.) Abraiau walingile atyiho opo omona wae Isake anepe omukai ufenda Jeova. Iya Isake nae alingi ngotyo nomona wae Jako, omu muatuka omihoko 12 vio Isilayeli.

11. Oñgeni Otyitumino tyapelwe Moisesi tyayakulilile ova Isilayeli?

¹¹ Konyima, Jeova alingi omphango nelongo lio Isilayeli. Movitumino apele Moisesi, ovitumino vimwe ankho muakutikinya tyimwe tyiamena ovalume novakai mefendelo valingila Jeova. Mongeleka, povitumino ovio tyimwe ankho tyipopia konthele yokunepa oluvale, otyikuavo ankho tyipopia okuti ova Isilayeli kavapondola okunepa ovanthu vafenda ovikahuku. (Tanga Deuteronômio 7:3, 4.) Putyina motyinepo ankho mukala ovitateka ovinene ovalinepi vaovola ekuateso kovakulu. Tupu, ovitumino ovio ankho vipopia oñgeni omulume ena okulinga tyina amalaviswa ine tyina omulume asoka okuti hamwe ukahi nokulaviswa nomukai wae. Ovalinepi ankho vapondola okulihenga, mahi ankho kuna otyitumino tyiveyakulila. Mongeleka omulume upondola okuhenga omukai wae putyina alinga “ovipuka ovivi.” (Deuteronômio 24:1) Ombimbiliya kaipopi “ovivi” patyi, mahi omulume ankho kapondola okuhenga nomukai wae mokonda yovipuka vihesilivila.​—Levítico 19:18.

12, 13. (a) Oñgeni ovalume vamwe pononthiki mba Malakia ankho valavisa ovakai vavo? (b) Hono, inkha omunthu wambatisalwa usapo omukai vae akanepa omukuavo, oityi alingwa?

¹² Pononthiki mbomuuli Malakia, ovalume ovanyingi ova Judeu ankho vahanda okuhenga ovakai vavo mokonda yovipuka vihasilivila. Ankho velihenga novakai vavo opo vakanepe ovafikuena ine ovakai vahafende Jeova. Pomuwo wa Jesus ova Judeu ankho vahenga ovakai vavo “mokonda ya kese tyimwe.” (Mateus 19:3) Jeova Huku uyele okulihenga.​—Tanga Malaquias 2:13-16.

¹³ Hono, okulavisa otyipuka tyihapondola okulingwa novalinepi vaumbila Jeova. Soka ñgeno omulume wambatisalua ulinga oundalelapo iya atokola okuhenga omukai wae anepe omukai omukuawo. Inkha kelivele mokonda yetyi alinga, upolwa mewaneno opo ewaneno litualeko tyasukuka. (1 Coríntios 5:11-13) Inkha mokueenda kuomuvo uhanda okukondoka mewaneno, “ovituwa viae vina okulekesa okuti welivela.” (Lucas 3:8; 2 Coríntios 2:5-10) Omunthu kanakelwa omuvo ena okukala kondye yewaneno. Mahi, papondola okulamba enima like ine alambapo opo atalwe inkha welivela umwe opo akondoke mewaneno. Namphila omunthu akondoka, nongotyo nkhele “makapulwa na Huku.”​—Romanos 14:10-12; Tala mo Sentinela 15 de Novembro de 1979, pefo 31-32.

14. Ovitumino viapelwe Moisesi ankho vialingilwa-tyi?

¹⁴ Ova Isilayeli valandulile Ovitumino Viapelwe Moisesi mokueenda kuomanima alamba po 1.500. Ovitumino ovio viakuatesileko ovanthu va Huku mo nonkhalelo ononyingi. Mongeleka, ovitumino ovio vievekuatesileko okutetulula ovitateka mombunga, iya avivehongolela ku Mesia. (Gálatas 3:23, 24) Etyi Jesus ankhia, ovitumino ovio avipu iya Huku alingi epongiyo epe. (Hebreus 8:6) Mokonda yomphango oyo, ovipuka vimwe ankho vipopiwa Novitumino Viapelwe Moisesi, pahe ankho vitupu vali esilivilo ko Vakristau.

15. (a) Otyipi otyitumino pala ovalinepi Mewaneno lio Vakristau? (b) Ovipuka patyi Ovakristau ena okutala nawa tyina asoka okulihenga?

¹⁵ Nthiki imwe, ova Faliseu avilingi epulo limwe Jesus konthele yotyinepo. Jesus akumbulula okuti Ovitumino Viapelwe Moisesi ankho viyeka ova Isilayeli velihenge, mahi hatyoko Huku ankho ahanda tunde ponthyimbi. (Mateus 19:6-8) Ekumbululo lia Jesus lialekesa nawa okuti Huku tunde ponthyimbi uhanda ovalinepi valandule ovitumino vio Vakristau. (1 Timóteo 3:2, 12) Okukala “ohitu ike,” tyihangununa okuti vena okukala kumwe. Ohole vena na Huku nohole vena poyavo tyivekuatesako okulikuata okapandi. Ovalinepi vapondola vala okulihenga putyina umwe puvo amalingi oundalelapo, opo upondola okunepa vali. (Mateus 19:9) Omunthu wokualaviswa oe utokola inkha memuevela ine kamemuevela tyina mukuavo alinga oundalelapo. Otyo tyaendele nomuuli Oseia waevelele omukai wae Gômer etyi ankho emulavisa. Iya Jeova nae tupu waevelele ova Isilayeli etyi velivela. (Oséias 3:1-5) Mahi, inkha omunthu utyii okuti ou velinepa nae walinga oundalelapo nongotyo alala nae, otyo tyilekesa okuti wemuevela. Ngetyi tyipopia Ovihonekwa, kapondola vali okumulihenga.

16. Oityi Jesus apopia konthele yokukala tyahanepele?

¹⁶ Jesus wapopia okuti Ovakristau votyotyili velihenga vala inkha umwe puvo walinga oundalelapo. Konyima apopi okuti: “Vana vetyivila,” vapondola okukala tyihanepele. Jesus wati: “Una upondola okulinga ngotyo, etyilinge.” (Mateus 19:10-12) Ovanthu ovanyingi vatokola okuhanepe mokonda vahanda okuundapa vali unene movilinga via Jeova tyihatalukwa. Vena okupandulwa mokonda yetokolo liavo!

17. Oityi tyipondola okukuatesako Omukristau okutokola inkha unepa ine kamanepe?

¹⁷ Oityi tyipondola okukuatesako omunthu okutokola inkha manepe ine kamanepe? Omunthu wesukisa okutokola inkha metyivili okukala tyihanepele. Apostolu Paulu wahinangelesa vana vahanepele. Apopi okuti: “Mokonda youndalelapo ukahi nokuliyawisa, kese mulume akale nomukai wae muene, iya kese mukai akale nomulume wae muene.” Ayawisako okuti: “Inkha kavetyivili okulikondola omutima, vanepe, mokonda hahe vali okunepa tyipona okukala vala nehando.” Ngotyo omunthu upondola okutokola okunepa opo elityilike ehando enene liokulinga otyihola ine okulikuata komapita ngatyina alala nomunthu ine okulala nomunthu vehelinepele nae. Mahi, vokuhanepele vena okutala nawa inkha vafuapo pala okunepa. Paulu wati: “Inkha umwe asoka okuti ukahi nokulinga etyi tyihaviukile noumphembela wae, inkha walambale momuvo woukuendye, inkha tyitavela, alinge etyi ahanda, anepe, kalingi onkhali.” (1 Coríntios 7:2, 9, 36; 1 Timóteo 4:1-3) Omunthu upondola okuhanda okunepa mokonda yokuhanda okulinga vala otyihola. Omunthu ukahi monkhalelo oyo kafuilepo opo akale onkhalamutwe yombunga.

18, 19. (a) Oñgeni otyinepo tyo Vakristau tyina okuhimbika? (b) Oityi matulilongesa monthele mailandulako?

¹⁸ Otyinepo tyo Vakristau tyihimbika nomulume nomukai vambatisalwa vehole Jeova nomutima wavo auho. Tupu vena okulekesa okuti velihole unene no nokuhanda okukala kumwe apeho. Jeova meveyambe mokonda vetavela otyitumino tyokulinepa “vala mu Tatekulu.” (1 Coríntios 7:39) Ankho ovalinepi vatualako okulandula onondonga Mbombimbiliya mavakala nehambu motyinepo.

¹⁹ Hono, tukahi “kononthiki mbahulilila” iya vanthu ovanyingi vetupu ovituwa vieta ehambu motyinepo. (2 Timóteo 3:1-5) Monthele mailandulako matulilongesa onondonga Mbombimbiliya mbukuatesako Ovakristau okukala notyinepo tyina ehambu namphila pamoneka ovitateka. Onondonga ombo mambukuatesako ovalinepi okutualako okuendela mondyila ituala komuenyo uhapu.​—Mateus 7:13, 14.