Huku Ukahi Ñgeni?

Omunthu tumwii vali nawa tyina tuamanoñgonoka ovituwa viae iya otyo tyitukuatesako okukala omapanga. Tyelifwa notyo, tyina tuamanoñgonoka ovituwa vya Siovaa, tunoñgonoka oñgeni atuwa iya oupanga wetu nae upama. Povituwa ovinyingi vya Huku vikuana ovievi: Epondolo, ounongo, ouviuki, iya nohole.

“Tatekulu Hamba Siovaa! Ove muene walinga nepondolo liove enene eulu nohi.” — JEREMIAS 32:17.

Epondolo lya Huku litalelwa kovipuka atunga. Mongeleka, tyina ukahi pondye pokuenye, oityi ove wiiva? Outokotwe wekumbi. Otyo tyilekesa epondolo lya Siovaa. Oñgeni ekumbi likahi? Ekumbi litokota unene (15. 000.000°C). Mo kamuvo kehehi outokotwe utunda kekumbi ulamba po nombomba mbulamba po nomiliau otyita.

Mahi, ekumbi okulieleka no nonthungululu, etutu vali. Ovanongo vamwe vapopia okuti, ike pononthungululu ononene vali, itiwa UY Scuti. Ekumbi okulieleka nonthungululu oyo, linyingila-mo ovikando 1.700. Inkha onthungululu oyo yapingile pekumbi, ñgeno yanyona ohi iya tupu ñgeno yahika o planeta Júpiter. Omuuli Jeremia utukuatesako okunoñgonoka okuti Siovaa Huku kepondolo liae enene, watunga eulu, nohi, nouye.

Oñgeni epondola lya Huku litukuatesako? Omuenyo wetu utei kovipuka Huku atunga ngetyi, ekumbi, novipuka aviho vihuvisa tuvasa pano pohi. Moluotyo, Huku uundapesa epondolo liae opo akuateseko ovanthu mononkhalelo mbelikalaila. Ñgeni ngotyo? Kohale, Huku wavelele epondolo liae Sesusi, opo alinge omahuviso. Ombimbiliya yati: “Ovamphoki vekahi nokutala vali, iya ovilema vikahi nokueenda, vovilundu vekahi nokuveluka, iya onompholo vekahi nokutehelela. Vokuankhia vekahi nokupinduluapo.” (Mateusi 11:5) Iya hono? Ombimbiliya yati: “Oe ukahi nokuavela epondolo una wepuila.” Tupu yati: “Vana vakevelela ku Siovaa mavakakala vali nononkhono.” (Isaías 40:29, 31) Huku upondola okutuavela “epondolo liavilapo” opo tutyivile okukoleleya mononkhumbi tukala nambo. (2 Ova Kolindu 4:7) Tyotyili onthue tuhanda okukala noupanga na Huku woluembia una uundapesa epondolo liae opo etukuateseko movitateka vietu.

“Ovilinga viove ovinene Siovaa! Aviho wevitunga nounongo.” — SALMO 104:24.

Tyina tulilongesa vali ovipuka Huku atunga, tukala vali tyahuva novipuka atunga. Ovanongo velilongesila kovipuka Siovaa atunga iya avevihetekela. Tyina vamelilongesila kovipuka Huku atunga, avalingi ovipuka vahanda. Otyo valinga etyi vahinda oaviyau.

Ounongo wa Huku utalelwa konkhalelo omunthu atungwa. Tala ongeleka ei, tala ononkhalelo mbelikalela omunthu ekula. Ono selula mbalingwa monkhalelo yesukisa opo mbukule. Ono selula mbayapulwa monkhalelo yelifwa. Mahi mokuenda kuomuvo, ono selula mbuhimbika okulikalela mononkhalelo ononyingi. Ngetyi ono selula mbohonde, no mbomihipa, no mbomankhipa. Pakala vala katutu, ovipuka ovio avihimbika okuundapa aviho. Monohanyi etyive, o selula ike vala aikala okalukembe. Otyipuka otyo, tyiavela ondundo ovanthu ovanyingi okutavela onondaka mbomuhoneki Wombimbiliya wati: “Ame mandyikuhivilika mokonda natungwa monkhalelo ihuvisa unene.” — Salmo 139:14.

Oñgeni tupondola okupola ouwa kounongo wa Huku? Huku wii etyi tuesukisa opo tukale nehambu. Mokonda ngwe omunongo, iya utwii nawa, utuavela onondonga onongwa Mondaka yae Ombimbiliya. Mongeleka, Ombimbiliya itupopila okuti: “Tualeiko . . . nokulievela nomutima auho.” (Ova Kolosu 3:13) Okuti elondolo olio likahi nawa? Yoo. Ovanongo vamwe vetyimona okuti okuevela omunthu wekulinga tyimwe, ulala onthumphoki otuwa, nohononde yove momihipa ikala vali nawa. Tupu tyiyakulila omunthu komauvela okuliunga. Huku ukahi ngepanga lietu utualako okutukuatesako unene. (2  Timotiu 3:16-17) Ove kuhande okukala nepanga ngo olio?

“Siovaa uhole ouviuki.” — SALMO 37:28.

Huku apeho ulinga etyi tyaviuka. Tyotyili, “Huku yotyotyili nalumwe malingi etyi tyahaviukile, Wepondolo Aliho nalumwe malingi etyi tyapenga!” (Jó 34:10) Omakoyeso ae aviuka. Omuhoneki wo no Salmo wapopia konthele ya Siovaa okuti: “Ove mohongolela ovanthu vekahi pohi.” (Salmo 67:4) Mokonda Siovaa utala etyi tyikahi momutima, ngwe katale vala kolupe luomunthu. Apeho wii otyili, malingi omakoyeso ekahi nawa. (1 Samuel 16:7) Tupu, Huku weete ovivi aviho vilinga pano pohi, iya wati, apa katutu, “onondingavivi mavakanyimuako kombanda yohi.” — Provérbios 2:22.

Mahi, Huku hamukoyesi-ko uhanda vala okumonesa ononkhumbi ovanthu. Ngwe pamwe-pamwe ukala nokankhenda. Ombimbiliya yati: “Siovaa omuna-kankhenda nomuna-tyieve.” Ulingila okankhenda alo umwe vana velivela nomutima auho. Okuti otyo hauviuki wotyotyili? — Salmo 103:8; 2 Petulu 3:9.

Oñgeni tupondola okupola ouwa kouviuki wa Huku? Apostolu Petulu wati: “Huku utupu okapungulula. mahi momalongo aeho omunthu una onthilo nae nokulinga etyi tyaviuka umutavela.” (Ovilinga 10:34, 35) Okunoñgonoka okuti Huku omuviuki iya utupu okapungulula, tyituetela ouwa. Ngwe upondola okututavela iya atukala omapanga ae, ahatale opi tuatuka, na apa tukala, na ankho katuatangele mosikola.

Mokonda Huku uhanda tunoñgonoke ouviuki wae atupoloko ouwa, wetuavela ounongo wokupunga otyiwa notyivi. Ombimbiliya ipopia okuti ounongo oo ukahi ngotyitumino ‘tyahonekwa momitima vietu, vitunoñgonokesa’ inkha etyi tualinga otyiwa ine otyivi. (Ova Loma 2:15) Oñgeni tupolako ouwa? Inkha tulongesa nawa omutima wetu upondola okutulunda okuhalingi ovipuka ovivi. Iya inkha tupengesa, otyipuka otyo matyitulundo okulivela iya atuliviyula onthue muene. Tyotyili, inkha tunoñgonoka ounongo nouviuki wa Huku matyitukuatesako iya atufuene vali kwe

“Huku oluembia.” — 1 SUAU 4:8.

Huku ulekesa epondolo liae, nounongo wae iya nouviuki wae. Mahi no ngotyo Ombimbiliya kaipopi okuti Huku epondolo, ounongo ine ouviuki. Mahi ipopia okuti Huku oluembia. Mokonda yatyi? Mokonda tyotyili ipopia okuti epondolo lya Huku kalielekwa, ovilinga viae ouviuki iya epondolo liae limuhongolela movipuka aviho alinga. Mahi oluembia lwa Siovaa luemulunda movilinga alinga. Oluembia lwa Huku lutalelwa kovipuka aviho alinga.

Namphila Siovaa ehena etyi esukukisa, mahi oluembia lwae luemulunda okutunga ovanthu pano pohi, no noandyu keulu, novipuka tuesukisa opo tukale nehambu. Huku una oluembia iya ututekula. Oe walinga oohi monkhalelo ikahi nawa opo mukale ovanthu novipuka atunga. Iya utualako okulekesa oluembia lwae kovanthu aveho, “utundisa ekumbi liae pala onondingavivi nonondalawa, nokulokesa ombila pala ovaviuki na vana vehevaviuki.” — Mateusi 5:45.

Tupu, “Siovaa una oluembia olunene nokankhenda.” (Tiaku 5:11) Ngwe ulekesa oluembia lwae ku vana vaovola okukala omapanga ae. Huku weete kese omunthu. Tyotyili, “ngwe wesuka no onwe.” — 1 Petulu 5:7.

Oñgeni tupola ouwa koluembia lwa Huku? Tuna ehambu limwe unene. Tyituhambukiswa okutala olukembe tyina luyola. Tutyihole tyokukala noupanga nombunga yetu. Namphila ovipuka ovio viehesukisile unene, mahi vitukuatesako okukala nomuenyo omuwa.

Tupu otyipuka otyikuavo tyitukuatesako okutala okuti Huku utuhole: Elikuambelo. Ombimbiliya itupopila okuti: “Muhakalei notyiho notyipuka natyike, mahi, muaviho, itei unene ku Huku nomalikuambelo kumwe nolupandu.” Ngetyi tyilinga he una oluembia, Huku nae wesuka nonthue iya uhanda tumupopile atyiho tyikahi momutima wetu. Siovaa una otyali noluembia iya wati metuavela ‘ombembwa yae, ipona enoñgonoko aliho.’ — Ova Filipu 4:6, 7.

Alo apa, tuelilongesa ovituwa vimwe vya Huku, ngetyi epondolo, nounongo, nouviuki iya noluembia. Okuti okulilongesa ovituwa ovio tyekukuatesako okunoñgonoka oñgeni Huku ekahi? Opo ulekese okuti wapandula Huku, tukuavela ondundo ulilongese vali opo unoñgonoke etyi Huku alinga, netyi makalinga komutwe pala ouwa wove.