“Andyihimbika Okusoka Nawa Komwenyo Wange”

Nekulila kotyilongo tyimwe tyitiwa Warialda, otyilongo otyo otyitutu vala tyili mepundaumbo lyo Nova Gales do Sul. Ko Warialda kulingwa ovipuka ovinyingi, kutekulwa onongi nonongombe. Tupu kulimwa unene. Epunda-umbo likahi nawa liehena onongangala.

Onthwe twatyitwa 10, ame tyiveli tyatyo. Etyi ndyina omanima 13 andyihimbika okuundapa, opo ndyikwatese-ko ovo tate meumbo. Mokonda ame hatangele unene mosikola ankho ovilinga viatyo navasa okuundapa vala momapia. Pahe etyi ndyina omanima 15 andyipewa otyilinga tyokulongesa ononkhambe.

Okuundapa momapia nthele imwe tyikahi umwe nawa, mahi pamwe katyikahi nawa. Ankho ndyihole ovilinga viange na ava tuhimama navo. Kongulohi ankho tunthiakana okatupia ngapo tuhungila tyina okamphepo kafila nawa, eulu liehiwa nawa kuna omwii, ankho tyihiwa. Tyina ankho ndyitala ovipuka vina ndyisoka umwe okuti tyafwa pena ou wevitunga. Mahi tupu ankho ndyina omapanga omavi, atukana nokusipa. Naame pahe andyitokela mokusipa no mokutukana.

Etyi ndyina omanima 18, andyiilukila ko Sydney. Ankho nahanda okukala efwalali, mahi anehetavelwa mokonda hatangele unene kosikola. Andyivasi ovilinga vimwe andyiundapa-mo enima. Pomuvo opo, opo nanoñgonoka Onombangi mba Siovaa. Avankhongo ndyende keliongiyo liavo andyitavela. Etyi napita-ko andyitale umwe ñgaa tyina valongesa, andyiti: ‘Ovanthu ava valongesa umwe otyili.’

Etyi pakala andyiilukila kepunda-umbo lyo Goondiwindi, ko Queensland, ngako nkhakala. Andyivasi-ko ovilinga, pahe andyinepe. Andyihimbika okunwa unene.

Atukala novana vevali, ngapo umwe ndyisoka nawa kweetyi ndyina okulinga. Andyihinangela etyi neivile meliongiyo Lionombangi mba Siovaa ko Sydney, andyiti hipondola okukala vala ñgaa.

Nthiki imwe andyivasi Omutala Womulavi, wahonekwa apa palingilwa ovilinga vyo Nombangi mba Siovaa ko Austrália. Andyitumu-ko omukanda. Ndyikati vala ñgana omukulu umwe Ombangi ya Siovaa weya peumbo liange, ahimbika okundongesa Ombimbiliya.

Pokuna nokulilongesa Ombimbiliya andyimono okuti pena ovipuka vimwe nesukisa okuyeka-po. Omukanda wa 2 Ova Kolindu 7:1, wankhwatesileko unene, wati: ‘Lisukulei onkhako aiho mohitu.’

Andyiyeke-po okusipa nokunwa unene. Mahi tyemphwiyile unene mokonda ankho netyihimbika-le kohale. Andyilikwatehila umwe mokonda nahanda okuhambukiswa Huku. Omukanda Ova Loma 12:2, wankhwatesile-ko unene, wati: “Yekei-po okukala novituwa viouye uno, mahi pilululei omalusoke enyi aakala omape.” Andyiimbuka okuti nesukisa okutala ovipuka vinyona olutu lwetu ngetyi Siovaa evitala. Siovaa ankhwatesako umwe andyiyeke-po okusipa, nokunwa unene.

Okutukana tyempwiyile vali unene okutyiyeka-po. Ombimbiliya yati: “Momulungu wenyi muhatunde ondaka naike yasila.” (Ova Efesu 4:29) Soka otyipuka otyo ankho ndyityii umwe, mahi nongotyo anehetyiyeke-po liwa-liwa. Etyi nasoka umwe nawa kweetyi tyipopia omukanda wa Isaías 40:26, atyinkhwatesako unene. Omukanda oo upopia ononthungululu meulu, wati: “Katulei peulu omaiho enyi iya amutale. Olie watunga ovipuka evi? O youna utundisa embamba liambo nokumbuvalula, embuihana ambuho kenyina. Mokonda yononkhono ononene, nepondolo enene, naimue pumbo ikambapo.” Andyisoko andyiti: Ine o Huku watunga ovipuka ovio aviho ame ndyihole unene, opo naame mankhwatesako andyityivili okumuhambukiswa. Andyilikwatehila otyo ndyilikwambela, andyityivili umwe okuyeka-po okutukana.

Momapia muna ankho ndyiundapa, ankho hipopi unene mokonda mutupu ovanthu ovanyingi, pahe ankho ndyitupu ou ndyipopia nae. Mahi okwenda komaliongiyo Onombangi mba Siovaa tyandongesa okupopia. Tupu omaliongiyo ankhwatesako okupopila ovanthu ovipuka oviwa Huku meketulingila komutwe wandyila. — Mateusi 6:9, 10; 24:14.

Pahe ndyimukulu-ale wewaneno, ndyikwatesako vakwetu tufenda navo Huku. Etyi ndyihole vali tyinthyambukiswa umwe unene, okulinga ovilinga vya Siovaa kumwe nomukai wange, novana vetu.

Ndyipandula umwe Siovaa wakwatesako omunthu ngaame wahalongesilwe unene kosikola akala epanga liae. (Isaías 54:13) Omukanda wa Provérbios 10:22, wapopia umwe otyili. Wati: “Oviwa vituka ku Siovaa, ovio vieeta ouhona.” Ame no veumbo liange tuhole unene Siovaa kamatuyeke-po okumufenda.