Ove Utyihole ‘Tyokutavela’?

 1. Oityi pamwe tyitupwiyila okutavela?

OKUTI ove tyihole okukupwiya okutavela? Nohamba Ndaviti ankho tyimupwiya, pahe elikwambela ku Huku ati: “Paka mokati kange omutima wokukutavela.” (Sal. 51:12) Ndaviti wali omunthu uhole Siovaa, mahi no ngootyo pamwe tyemupwiyile okutavela. Noonthwe hono haityo ñgoo. Omokonda yatyi? Tyo tete, omokonda tuvakwankhali, tutyitwa-le vala nokuyemba kokuhetavela. Tya vali, omokonda Satanasi uli nokututumba na etuyapule twehetavele ku Siovaa ngeetyi ngwe alinga. (2 Kol. 11:3) Tya tatu, omokonda tuli pokati kovanthu vehetavela, vatuminwa ‘nononkhono mbuli pokati kovanthu vokwehetavela.’ (Efe. 2:2) Twesukisa umwe okulikwatehila unene tulipole olusoke olwo lutuka konkhali, opo twehetavele oku kuhanda okutuyembehila Eliapu nouye ou, kokukala ovanthu vokuhetavela. Otyo matutyivili vala tyina tutavela ku Siovaa no kovanthu apa otyilinga tyokutululika.

 2. Omunthu utiwa wafwapo pala okutavela oyou ulinga ñgeni? (Tiaku 3:17)

² Tanga Tiaku 3:17. Tiaku watuminwe na Huku ahoneke okuti omunthu omunongo wafwapo “pala okutavela.” Mahi otyo okutiwi? Otyo okuti, tuna okukala tyafwapo pala okutavela ku vana Siovaa apa otyilinga tyokutululika. Mahi tupu Siovaa kahande tutavele komunthu ututuma tulinge etyi ngwe ahahande. — Ovil. 4:18-20.

 3. Omokonda yatyi Siovaa ahandela tutavele ava vetukalela komutwe?

³ Mwene tyipepuka vali okutavela ku Siovaa, tyipona okutavela komunthu mukwetu, mokonda apeho evi Siovaa etupopila viaviuka. (Sal. 19:7) Tyilema tupu omokonda ava Siovaa apa otyilinga tyokutululika ovakwankhali. Mahi no ngootyo wapa otyilinga otyo vokuna ovana, novakulu vomawaneno, novatumini. (Pro. 6:20; 1 Tes. 5:12; 1 Pet. 2:13, 14) Tyina tuvetavela, ngootyo tukahi nokutavela Siovaa. Monthele ei matupopi oñgeni tuna okutavela ku vana Siovaa apa otyilinga tyokululika vakwavo, namphila pamwe tyipwiya okutavela etyi vapopia.

 4. Omokonda yatyi ovana ovanyingi vehetavelela kovohe?

⁴ Ovana vehimama na vakwavo “vehetavela kovohe.” (2 Tim. 3:1, 2) Omokonda yatyi ovana ovanyingi vehetavelela kovohe? Vamwe vati evi ovohe vevelonga ngwe havioko valinga. Ovakwavo vati ouye wapiluluka unene, ovohe vena vala tyokohale. Pamwe tupu avati evi vipopia ovohe vialema unene. Ine noove nkhele umona, okuti otyo usoka otyo? Ovanyingi vati tyalema unene okutavela otyitumino tya Siovaa tyokwati: “Tavelei ko votate yenyi monkhalelo Tatekulu etavela, mokonda okulinga ngotyo, otyo tyaviuka.” (Efe. 6:1) Oityi matyikukwatesako utyivile okutavela?

 5. Oityi tutila Sesusi wali omona utavela kovohe? (Luka 2:46-52)

⁵ Upondola okulongokela kweetyi tyalingile omunthu umwe kokutavela wapona povanthu vatyo aveho, Sesusi. (1 Pet. 2:21-24) Ngwe ankho hamukwankhali-ko mahi ovohe ovakwankhali. No ngootyo wevelingile onthilo na tyina pamwe vapengesa, na tyina vahanoñgonokele nawa etyi alinga. (Êxo. 20:12) Tala vala etyi valingile pweetyi ena omanima 12. (Tanga Luka 2:46-52.) Sesusi novo tate yae vaile ko Selusalei, pokukondoka no keumbo Sesusi nkhele esala-ko mahi ovohe avehetyimono liwa okuti wesala. Etyi ovo Susee vati pokati vakati ñgaa Sesusi kepo, avai mokumwovola atee vekemuvasa. Etyi vemusa, Maliya emuti wetupwilisa navi. Sesusi ankho upondola okuti noonwe mwalinga omapita ñgeno ankho muti vala tyina mukatuka muno mutala ine opondyili. Mahi Sesusi hatyo-ko apopile, wevekumbululile vala nawa nonthilo. Ovo Susee na Maliya ‘avahanoñgonoka etyi ankho eli nokupopia,’ mahi Sesusi “atwalako nokuvetavela.”

6-7. Oityi matyikwatesako ovana vetavele kovohe?

⁶ Ya ove? Tyihole okukupwiya okutavela kovo tate yove tyina vena etyi valinga tyahaviukile na tyina vahanoñgonokele nawa etyi wahanda okulinga? Oityi matyikukwatesako? Tyo tete, soka oñgeni Siovaa makala. Ombimbiliya yati tyina ove utavela kovo tate yove, “tyihambukiswa Tatekulu.” (Kolo. 3:20) Siovaa utyii okuti pamwe ovo tate yove kamavanoñgonoka-le nawa etyi wahanda okulinga, pamwe tupu mavailika vala ovipuka vimwe tyina uvitala ñgaa ngoti vitupu-ale oku viapilukila. Mahi no ngootyo ine ove utavela kovo tate yove mohambukiswa unene Siovaa.

⁷ Tya vali, soka oñgeni ovo tate yove mavakala. Tyina uvetavela, ngwe vahambukwa noove avekuyumbu vali onthumbi. (Pro. 23:22-25) Tupu mukala vali omapanga. Omukwendye umwe ukala ko Bélgica utiwa o Alexandre wati: “Etyi nahimbika okulinga evi ovo tate vamphopila pahe ovipuka aviviuku umwe, atukala vali omapanga, atukala vali nehambu.”b Tya tatu, soka oñgeni okutavela pehepano matyikekulasa komutwe. Umwe utiwa o Paulo ukala ko Brasil wati: “Tyokwelilonga umwe okutavela kovo tate tyankhwatesako andyitavela ku Siovaa no kovanthu ovakwavo apa otyilinga tyokululika vakwavo.” Omu mutyipopila Ondaka ya Huku tyesukisa umwe unene ove utavele kovo tate yove. Yati: “Opo ukale nomuenyo omuwa iya otualako omuvo omunyingi kombanda yohi.” — Efe. 6:2, 3.

 8. Omokonda yatyi ovana vamwe vetavelela kovohe?

⁸ Ovanyingi vetyimona okuti otyipuka tyikahi vali nawa vena okulinga, okutavela kovo tate yavo. Omuhikwena umwe utiwa o Luiza ukala ko Brasil, tyemupwiyile okunoñgonoka omokonda yatyi ovo tate yae ankho vehemulandelela otelefone. Ankho upopila ovohe okuti aveho veti liae vena-le onotelefone. Mahi pahe etyimono okuti ovohe vahanda vala okumukwatesako ehelipake mweevi viahaviukile. Pahe wati: “Okutavela kovo tate ame hityitale ngatyina uti otyikutu tyinthona. Mahi ndityitala ngatyina uti osindu yometuku-tuku indyamena ndyihupe.” Elizabeth ukala ko Estados Unidos no hono pamwe tyimupwiya ukutavela kovo tate yae. Mahi wati: “Tyina namatale ñgaa hanoñgonokele nawa etyi ovo tate vati ñgeno otyo tuna okulinga, ndyisoka kovipuka vamphopailile-ale viandyamenene.” Monica ukala ko Armênia, wetyimona okuti apeho vala tyina ametavela kovo tate yae etyi alinga tyiviuka.

 9. Oñgeni ovanthu vamwe vakala tyina vasoka okutavela ovitumino viovatumini?

⁹ Ovanthu ovanyingi vetyimona okuti otyiwa umwe okukala novatumini motyilongo, nokutavela ovitumino vimwe vapaka-ko. (Loma 13:1) Mahi vamwe kavetavela ovitumino vahahandele, neevi vati kaviaviukile. Tala vala etyi vamwe vapopia tyiyemba kokufeta elilimu. Mo Europa muna otyilongo tyimwe tyina ovanthu ovanyingi vati, “tyina utala ñgaa elilimu waitwa ngoti kaliatelemo hahe wahafete.” Pahe ovanthu vakala motyilongo tyatyo omo kavafete omalilimu aeho ovatumini vaita.

10. Omokonda yatyi onthwe tutavelela novitumino umwe twahahandele?

¹⁰ Ombimbiliya yati ovanthu vokutumina vamonesa emone vakwavo, vatuminwa na Satanasi, ya apa kapii mavahanywa-ko. (Sal. 110:5, 6; Ecl. 8:9; Luka 4:5, 6) Mahi tupu yati: “Una wehetavela kovatumini ketavela etyi Huku apakako.” Nkhele pehepano Siovaa wayekela-ko ovatumini opo ovipuka vieendele momululi, ya wahanda onthwe tuvetavele. Naina atuho tuna okuvepa atyiho vena okupewa, otyo tyati umwe nokufeta elilimu, nokuvelinga onthilo, nokuvetavela. (Loma 13:1-7) Pamwe tupondola umwe okutala ñgaa otyitumino tyimwe atuti ngoti katyaviukile tyalema, mahi onthwe tutavela kovatumini mokonda otyo twatumwa na Siovaa ou onthwe tutavela. Apa twahetavela vala oputyina vetutuma tulinge etyi Huku ati mwehetyilingei. — Ovil 5:29.

11-12. Oityi ovo Susee na Maliya valingile vetavele etyi tyapopia ovatumini, atyiveende ñgeni? (Luka 2:1-6) (Tala omalutalatu.)

¹¹ Tupondola okulilongesila unene kweetyi tyalingile ovo Susee na Maliya ankho vetyihole tyokutavela kovatumini, no putyina tyalema. (Tanga Luka 2:1-6.) Onthiki tyevepwiyile umwe unene opweetyi Maliya omulemi. Omutumini wo Loma Angusitu apake-ko otyitumino tyipopia okuti ovanthu aveho vena okukondoka komapunda-umbo vatyitilwa vekelihonekese. Pahe ovo Susee na Maliya ankho vena okwenda ko Mbelei. Okutunda oku veli okwenda ko Mbelei ankho pena onokilometulu mbulamba po 150. Ngwe ondyila yatyo ikwata vala monomphunda. Mokutala tyevelemenene umwe okukatuka mokonda Maliya ankho omulemi, uhungi-ale kokupululukwa. Ine pahe upululukilwa pokati? Mokutala tyevelingisile umwe otyiho okusoka ku Maliya yatyo no kolukembe. Ngwe ou makutulwa oe haa makalinga Mesiya. Ankho vapondola ngamo umwe omo vatatehila avehetavela etyi tyapopia omutumini.

¹² Ovo Susee na Maliya kavatatehilile movipuka ovio, vetavelele umwe komutumini. Siovaa ahambukwa unene etyi vetavela. Evekwatesako avehiki umwe nawa ko Mbelei, Maliya akutula olukembe lwakongoka vala nawa. Valingile vetavelele, atyiendela umwe omu Ombimbiliya yetyipopilile! — Miq. 5:2.

13. Oityi tutila onthwe okutavela matyikwatesako na vakwetu tufenda navo?

¹³ Okutavela kovatumini otyiwa pala onthwe na vakwetu. Oityi tupopila ngootyo? Otyiwa mokonda tyina onthwe tutavela kovatumini kamatulingwa ngeetyi tyilingwa ava vehetavela ovitumino viotyilongo. (Loma. 13:4) Tupu tyipondola okutwala ovatumini kokuhapolo-po vala omapita Onombangi mba Siovaa. Tala vala etyi tyalingilwe ko Nigéria. Nthiki imwe omatolopa ankho eli nokwovola vana vokupopia okuti okufeta elilimu katyaviukile, aanyingila mondywo yomaliongiyo poola yeliongiyo namo akaovole-mo. Omunene watyo womatolopa eveti omo lupukei-mo vala, “Onombangi mba Siovaa apeho vafeta elilimu.” Tyina ove utavela ovitumino, upopisa nawa ovanthu va Siovaa, ya tyipondola nthiki imwe atyihupisa umwe vakwetu tufenda navo. — Mat. 5:16.

14. Oityi tyakwatesako Joanna etyivili “okutavela” kovatumini?

¹⁴ Mahi no ngootyo pamwe ulitehela umwe ñgana katyapepukile okutavela kovatumini. Joanna ukala ko Estados Unidos wati: “Ame ankho tyimphwilisa unene okutavela mokonda vamwe mombunga yetu, vamonehilwe onkhumbi novatumini.” Mahi Joanna etyimono okuti otyipuka otyo eli nokusoka katyikahi nawa, una okutyiyekapo. Otyipuka tyo tete alinga, okwatalama okutanga evi ovanthu vapaka mo internete vipopia ovatumini. (Pro. 20:3) Tya vali, welikwambela ku Siovaa aiti emukwateseko ayumbe vala onthumbi mwe, ahakevela ovatumini vaviukise ovipuka. (Sal. 9:9, 10) Tya tatu, atange omikanda vietu vipopia okwehelipake po viovatumini. (Suau 17:16) Pahe pehepano Joanna wati, okulinga onthilo ovatumini nokuvetavela tyimukalesa nomutima upumphi, tyimukalesa nehambu.

15. Omokonda yatyi pamwe tyipwiyila okutavela etyi tupopilwa neongano lya Siovaa?

¹⁵ Siovaa wati tuna okutavela kwaava vetukalela komutwe meongano. (Heb. 13:17) Namphila Omutumini wetu Sesusi ahapengesa, mahi ava apa otyilinga tyokululika ovanthu vae pano pohi, navo ovakwankhali vapengesa. Pamwe tyipondola okupwiya okuvetavela, haunene umwe tyina vetutuma okulinga etyi twahahandele. Nthiki imwe omu apositolu Petulu tyemulemenene okutavela. Wapopililwe noandyu alie ovinyama ankho vitiwa viasila, viailikwa Novitumino vya Mwisesi. Petulu nkhele aanye, kaanyene vala like waanyene umwe tutatu. (Ovil. 10:9-16) Mahi oityi Petulu anyenene? Tyina atala ñgana otyipuka otyo ankho eli nokupopilwa ngoti katyaviukile, tyelikalela unene neetyi mwene ankho etyiliya-le. Ine Petulu tyemulemenene okutavela koandyu yahapengesa, ya pahe onthwe tuli umwe nokululikwa novanthu ovakwankhali vapengesa!

16. Oityi Paulu alingile namphila etyi ankho apopilwa ngoti tyehena-le oku tyapilukila? (Ovilinga 21:23, 24, 26)

¹⁶ Omu apositolu Paulu ankho wafwapo umwe “pala okutavela.” Nthiki imwe wapopililwe otyipuka tyimwe, tyina etyitala ngoti ankho tyitupu oku tyapilukila, mahi etavela. Ovakilisitau ova Sundaa ankho veiva okuti Paulu uli nokutwala ovanthu nohika, uli nokulongesa evi viahaviukile “vieheliwatele Novitumino vya Mwisesi,” utupu onthilo navio. (Ovil. 21:21) Ovakulu vokululika ovanthu va Huku mo Selusalei avapopila Paulu tyitie nae, na vakwavo vali vekwana vende mondywo ya Huku vekelisukule, ngeetyi ankho tyipopia Ovitumino, na tyimoneke okuti Paulu una onthilo Novitumino. Paulu ankho utyii okuti Ovakilisitau kavesukisa-le okulandula ovitumino vina, nae utupu-ale etyi alinga tyapenga. Mahi etavela umwe vala ehelipula-pula-le vali ehimbwe. Aende ‘novalume ovo vekwana vekelisukukise ngeetyi ovitumino vipopia.’ (Tanga Ovilinga 21:23, 24, 26.) Ovanthu va Huku avelikwate-po mokonda ya Paulu wetavelele. — Loma 14:19, 21.

17. Oityi tulilongesila ku Stephanie?

¹⁷ Omukai umwe Ombangi utiwa o Stephanie, nthiki imwe tyemupwiyile okutavela kovakulu valulika ovilinga viokwivisa motyilongo tyavo. Nae nomulume wae ankho veli motyikundyi tyelaka liehe-liotyilongo tyavo, ankho vahambukwa unene okuundapa motyikundyi otyo. Mahi etyi pakala o Mbetele aitalameka otyikundyi otyo, ovo Stephanie avatiwa, vakondoke mewaneno lielaka liavo. Stephanie wati: “Atyinumanesa unene otyipuka otyo mokonda tyina ndyitala ñgaa melaka lietu ankho ovaivisi veli-mo ovanyingi-ale.” Mahi no ngootyo Stephanie etavela umwe, wati: “Pahe netyimona omokonda yatyi ovakulu vasokela ngootyo. Tuli nokukwatesako ovanthu ovanyingi mewaneno lietu vehena vavo motyili. Pahe vakala umwe ngatyina uti ovana vetu. Tupu ndyina nokulongesa omuhikwena umwe wayekele-po okwivisa. Pahe ndyina vali omuvo omunyingi wokulilongesa Ombimbiliya. Omutima wange upumphi mokonda nelikwatehila umwe andyitavela.”

18. Oityi tutila otyiwa okutavela?

¹⁸ Okutavela tyililongwa umwe. Sesusi “welingesile okutavela,” hakuti omokonda ankho ukahi vala nawa, mahi welilongehilile “mononkhumbi amwene.” (Heb. 5:8) Noonthwe pamwe ovitateka ovio vitulongesa okutavela. Ongeetyi umwe twamona etyi omukihi wokolona wahimbika, twatilwe tuna okutalama okuliongiyila Monondywo Mbomaliongiyo, nokwivisa umbo na umbo. Tyipondola tyekupwiyile okutavela, mahi etyi wetavela tyekuhupisa, tyakwatesa-ko ewaneno alitwalako tyelikwata-po, wahambukiswa Siovaa. Pahe twafwapo umwe, matuketyivila okutavela atyiho tutolelwa mononkhumbi ononene. Okutavela otyo matyiketuhupisa! — Jó 36:11

19. Omokonda yatyi ove wahandela okutavela?

¹⁹ Twetyimona okuti kokutavela kutuka oviwa ovinyingi. Mahi mwene onthwe tutavela tupu Siovaa omokonda tumuhole unene, twahanda okulinga etyi ahanda. (1 Suau 5:3) Siovaa wetulingila ovipuka ovinyingi katutyivili-ale okumufeta. (Sal. 116:12) Mahi etyi tuvila, okumutavela nokutavela ava apa otyilinga tyokutululika. Ine tutavela, matyimoneka umwe okuti tuvanongo. Ngwe omunthu omunongo uhambukiswa omutima wa Siovaa. — Pro. 27:11.