Wafwapo Ulipakule ku Siovaa?

1-2. Oityi omunthu ena okulinga tyina ehenembatisalwe?

MOMANIMA aa etano okwalamba, ovanthu ovanyingi velipakula avambatisalwa vakale Onombangi mba Siovaa. Ovanyingi pwoovo, valongeswa-le otyili pweetyi nkhele ovatutu nga Timotiu. (2 Tim. 3:​14, 15) Ovakwavo vanoñgonoka vala Siovaa etyi vekula-le. Omanima okonyima oku, kuna omukulu umwe wati etyi ahimbika okulongeswa Ombimbiliya no Nombangi mba Siovaa wakulupa-le, ambatisalwa etyi ena omanima 97!

² Okuti ove ukahi nokulongeswa Ombimbiliya? Okuti wekulila-le motyili? Okuti una nokusoka okumbatisalwa? Ine otyo uli nokusoka otyo, wasoka nawa! Mahi tyina nkhele wehenembatisalwe una okulipakula ku Siovaa. Onthele ei maipopi umwe nawa oityi tyitiwa okulipakula. Tupu maikukwatesako okutala otyityi tyihandela okuti tyina wahanda okumbatisalwa ya wafwapo, olingi umwe otyo wapanga ohelikondaula vali.

OITYI TYITIWA OKULIPAKULA?

 3. Popia-po vamwe vapopiwa m’Ombimbiliya velipakulile ku Siovaa.

³ M’ombimbiliya ondaka okupakulwa, ipopia otyipuka tyapambulwa povikwavo. Ova Isilayeli vali ovanthu velipakula ku Siovaa. Mahi pova Isilayeli pena vali vamwe velipakulile opo valinge ovilinga ovikwavo vya Siovaa. Umwe pwoovo yatyo, o Alau. Alau wali ‘notyilimbo tyikola tyokwelipakula, omulami woolu’ ulaima. Omulami oo, ankho ulekesa okuti wapungwa pu vakwavo alingile Siovaa otyilinga tyikola, okukala Omunene-nakwa wova Isilayeli. (Lev. 8:9) Ova Nasileu navo ankho ovanthu velipakula ku Siovaa valinge ovilinga viae. Ondaka “Nasileu,” yatuka mondaka yo Hembeleu nazir’ otyo okuti “Omunthu Wakoywa-po, Wapungwa ku Vakwavo, Wapakulwa.” Ova Nasileu ankho vena ovipuka vimwe vahalingi viailikwa Movitumino vya Mwisesi. — Onob. 6:​2-8.

 4. (a) Oityi tutila vokwelipakula ku Siovaa vapungwa pu vakwavo? (b) Ondaka “okulilimbwa” ipopia-tyi? (Tala olutalatu.)

⁴ Tyina ove welipakula ku Siovaa, ngootyo wakoya okukala omulongwa wa Sesusi Kilisitu, ya utyii okuti okulinga etyi Huku ahanda otyo tyesukisa vali. Omunthu wokwelipakula oityi ena okulinga? Sesusi wati: “Ou wahanda okundandula, una okulilimbwa.” (Mat. 16:24) Apa ondaka yo Ngeleku yatiwa, “una okulilimbwa,” tupu ipondola okweendwa ñgaa: “Una okuliti au.” Omunthu wa Siovaa welipakula una ovipuka vimwe ena okuliti au hipondola okuvilinga, tyina vihahambukiswa Huku. (2 Kol. 5:​14, 15) Ovipuka vimwe omunthu wokwelipakula ena okuliti au, ovievi viatiwa “ovilinga viohitu,” ouhayo wokulihanda, novikwavo vali. (Ngal. 5:​19-21; 1 Kol. 6:18) Okuti okutavela kovitumino ovio matyikutyika-tyika? Au. Etyi ove una okulinga okuhumba Siovaa, nokunoñgonoka okuti okutavela etyi apopia tyikweetela ouwa. (Ovii. 119:97; Isa. 48:​17, 18) Umwe utiwa o Nikolau wati: “Ovitumino vya Siovaa vitei vala kwoonthwe, upondola okuvitala ngatyina otyimato tyokaleya tyikutyika kokulinga etyi wahanda, tupu upondola okuvitala ngatyina ongandyo yakelela ononkheyama mbehekulie.”

 5. (a) Oityi omunthu alinga pokulipakula ku Siovaa? (b) Oityi tutila okulipakula tyelikalela nokumbatisalwa? (Tala olutalatu.)

⁵ Oityi omunthu alinga pokulipakula ku Siovaa? Umupopila melikwambelo okuti oe vala mafende kwapwa, etyi Huku ahanda otyo mapake komutwe movipuka aviho alinga. Naina tyina ulipakula ku Siovaa, una nokumuti apeho momuhumbu “nomutima wove auho, nohande yove aiho, nonondunge mbove ambuho, nononkhono mbove ambuho.” (Malu. 12:30) Tyina ulipakula ukala vala awike, otyenyi vala na Siovaa. Pahe pokumbatisalwa opovanyingi, ulekese okuti welipakula-le ku Siovaa. Okulipakula hatyipuka tyokunyana, mokonda Siovaa uhanda pahe ove ulinge etyi wapopia pokulipakula. Noove mwene otyo wahanda. — Omup. 5:​4, 5.

OITYI TYITWALA OMUNTHU KOKULIPAKULA KU SIOVAA?

 6. Oityi tyitwala omunthu kokulipakula ku Siovaa?

⁶ Otyipuka otyinene vali tyitwala omunthu kokulipakula ku Siovaa, okumuhole. Okuhole kwove Siovaa hatyotyindywe vala tya vakwenyi weete. Mahi tyituka ‘kenoñgonoko liotyotyili,’ no kokukungunyika “evi vituka komphepo yae.” Ovio yatyo, ovievi wanoñgonoka viyemba ku Siovaa viekutwala kokumuhumba vali. (Kolo. 1:9) Etyi welilongesa Ovihonekwa wanoñgonoka okuti, (1) kouye kuna Huku, Siovaa, (2) Ombimbiliya Ondaka yae, (3) uli nokululika eongano liae afwisepo etyi ahanda.

 7. Ovipuka patyi tuna okulinga tyina twehenelipakule ku Huku?

⁷ Ovanthu vokwelipakula ku Siovaa vena okunoñgonoka etyi Ondaka yae ipopia, avalandula ovitumino viae. Velikwatesila umwe vapopile vakwavo evi valongeswa m’Ombimbiliya. (Mat. 28:​19, 20) Pahe vehole vali Siovaa ya vapanga okumufenda vala aike kwapwa. Okuti noove otyo ukahi ngootyo? Ine ove tyili uhole umwe Siovaa, okulipakula nokumbatisalwa kumetyitale ngatyina otyipuka una okulinga opo uhambukiswe ou ukulongesa Ombimbiliya, ine hamwe ovo tate yove. Nii kumetyilingi vala mokonda omapanga ove otyo veli nokulinga.

 8. Oityi tutila okupandula natyo tyitwala omunthu kokulipakula ku Siovaa? (Oviimbo 116:​12-14)

⁸ Ine usoka umwe nawa kovipuka oviwa Siovaa ekulingila, matyikupe okumupandula, osuku nokulipakula kwe. (Tanga Oviimbo 116:​12-14.) Ombimbiliya yapopia umwe otyili yati, ku Siovaa oko kutunda “otyali otyiwa, otyali tyaoya umwe.” (Tia. 1:17) Otyali otyinene vali Siovaa etulinga, okwetwavela otyilikutila Tyomona wae Sesusi. Otyo, tyotyili otyali otyinene! Otyilikutila otyo, otyo tyaikula ondyila opo ove ukale epanga enene lya Siovaa. Pahe ove ukevelela okukakala-ko apeho nomwenyo wahapu. (1 Swau 4:​9, 10, 19) Okulipakula ku Siovaa tyilekesa okuti tuli nokupandula olwembia olunene etulinga novipuka aviho oviwa ena nokutulingila. (Epal. 16:17; 2 Kol. 5:15) Otyipuka otyo tyapopiwa vali unene momukanda Kalako Nomwenyo Apeho! Pelongeso 46 ponthele ya 4, pena ovindiu ina onominutu 3 yati: Avelei Huku Oviawa.

OKUTI WAFWAPO OPO ULIPAKULE OMBATISALWA?

 9. Hatyiwa-ko omunthu okulikuluminya okulipakula mokonda yatyi?

⁹ Tyipondola hamwe tyina ulitala ñgaa, nkhele kwafwilepo opo ulipakule ombatisalwa. Hamwe nkhele wesukisa okuyekapo ovipuka vimwe opo ulandule umwe nawa ovitumino vya Siovaa, okuti hatyo hamwe nkhele wesukisa ononthiki na upameke vali onthumbi yove mwe. (Kolo. 2:​6, 7) Ovanthu haveho vekulila kumwe motyili. Tyiti umwe ou ukuluminya ou ulipulukwa, ou ulipakula liwa ambatisalwa ou useta. Tala oñgeni oupanga wove na Siovaa ukahi. Mahi olitale omu ukahilile, ohelieleka na vakwenyi. — Ngal. 6:​4, 5.

10. Oityi una okulinga ine ulitala ñgaa nkhele kwatele-mo mokulipakula nokumbatisalwa? (Tala okakasa kati: “Opala Ava Vekulila Motyili.”)

¹⁰ Ine ulitala ñgaa nkhele kwatele-mo mokulipakula ku Siovaa, no ngootyo omphango yatyo oyo kala umwe nayo. Ita ku Siovaa ekuyambe mononkhono uli nokulinga mbokuyeka-po evi vikutyika. (Fili. 2:13; 3:16) Yumba-ko onthumbi, Siovaa meivi elikwambelo liove, ekupe etyi wesukisa. — 1 Swau 5:14.

OITYI VAMWE VELITYINKHILA?

11. Oityi Siovaa malingi etukwateseko twehemuyeke-po?

¹¹ Vamwe, pamwe vata-mo umwe mokulipakula nokumbatisalwa, mahi otyo nkhele velityinkha. Tyipondola pamwe vasoka ñgaa: ‘Pahe andyimbatisalwa vala, hamwe haa andyilingi onkhali, andyipolwa mewaneno?’ Ine otyo tyikutilisa owoma otyo, yumba-ko onthumbi okuti Siovaa mekupe atyiho wesukisa, ‘weendele omu ahandela omuhambukiswa umwe nawa-nawa.’ (Kolo. 1:10) Tupu mekupe ononkhono utyivile okulinga etyi tyaviuka. Walingaila-le vakwenyi ovipuka ovinyingi vilekesa okuti noove mekupe ononkhono. (1 Kol. 10:13) Siovaa ukwatesako ovanthu vae opo vehemuyeke-po. Otyo hono tutalela ñgaa ovanthu vapolwa mewaneno kavehi.

12. Oityi tuna okulinga twahatokele monkhali onene?

¹² Ovanthu atuho tuvakwankhali, twayemba kokulinga evi viapenga. (Tia. 1:14) Mahi tyokulinga onkhali, otyipuka ove mwene upondola okukoya. Aviho molingi vitei vala kwoove. Namphila vamwe vehole okuti omunthu kutyivili-ale okuliyunga kovipuka aviho viya komutima, mahi otyo omatutu. Tyitavela umwe okuliyunga kokulinga evi viapenga. Na tyina vakwenyi vekuhindila, no ngootyo upondola umwe okutyivila okuliyunga kokulinga etyi tyapenga. Mahi opo utyivile, una okulikwambela ononthiki ambuho, nokulilongesa apeho Ondaka ya Huku, nokwenda komaliongiyo no movilinga viokwivisa. Okulinga ovipuka ovio apeho, matyikupe ononkhono olingi etyi wapopile pokulipakula. Wahalimbweko okuti Siovaa nae mekukwatesako opo utyivile. — Ngal. 5:16.

13. Oityi tulilongehila ku Susee?

¹³ Matyikupepukila vali okulinga etyi wapopile pokwelipakula, tyina usokela-po liwa etyi haa molingi tyina wamatumbukilwa na tyimwe tyihanda okukulingisa onkhali. Ombimbiliya yapopia ovanthu ovanyingi valingile ngootyo avetyivili umwe, ngwe navo ankho ovakwankhali. Umwe pwoovo o Susee, wakalele ononthiki ononyingi nokuhindilwa nomukai wa Potifale alinge onkhali. Mahi Susee ankho utyii etyi ena okulinga. Ombimbiliya yati “waanyene” ati: “Oñgeni ndyipondola okulinga otyivi otyinene ngootyo andyilingi onkhali ku Huku?” (Ehim. 39:​8-10) Mokutala Susee ankho wetyipanga-le etyi malingi ine haa nthiki imwe uhindilwa okulinga onkhali. Etyi pahe tyeya-po atyimupepukila okulinga etyi tyaviuka.

14. Oñgeni molilongo okwaanya etyi tyikulingisa onkhali?

¹⁴ Oityi una okulinga, ulinge nga Susee? Soka pehepano etyi haa molingi ine utumbukilwa na tyimwe tyihanda okukulingisa onkhali. Lilongesa okwaanya liwa ovipuka Siovaa eyele, nokuti tyina viameya momutwe, ovipolo-mo liwa. (Ovii. 97:10; 119:165) Ine otyo ulinga ngootyo, tyina wamatumbukilwa neetyi tyahanda okukulingisa onkhali kumatatayala, mokonda ove utyii-ale etyi molingi, wetyipanga-le.

15. Oityi omunthu ena okulinga matyilekesa okuti wesuka umwe nokwovola Siovaa? (Ova Hembeleu 11:6)

¹⁵ Ove tyipondola wetyimona umwe okuti wavasa otyili, ya wahanda okulingila Siovaa nomutima wove auho. Mahi nkhele pena etyi tyiya nokukutyika kokulipakula umbatisalwe. Ine ongootyo, linga ngeetyi tyalingile Ohamba Ndaviti, likwambela ku Siovaa oti: “Nthale-vo nawa Huku yange onoñgonoka-vo omutima wange. Nyingila-vo mokati kange onoñgonoka-vo evi vindingisa otyiho. Nthale-vo nawa ine ndyina olusoke lwayemba kovivi, nthyongolele-vo mondyila inkhalesa-ko apeho.” (Ovii. 139:​23, 24) Siovaa uyamba ava “vesuka umwe nokumwovola.” Ine ove uli nokututumba ulipakule opo umbatisalwe, tyilekesa okuti una “nokumwovola.” — Tanga Ova Hembeleu 11:6.

TWALAKO OKUFWENA KU SIOVAA

16-17. Oñgeni Siovaa aeta no kwe ava vekulila-le motyili? (Swau 6:44)

¹⁶ Sesusi wati ovalongwa vae vaetwa kwe na Siovaa. (Tanga Swau 6:44.) Otyipuka otyo otyiwa, ya tyitala umwe no mwoove. Siovaa una otyipuka otyiwa amona movanthu aveho aeta no kwe. Ovanthu aveho Siovaa aeta no meongano liae, munthu na munthu umuti, ‘omunthu wae akoya, omunthu wae ehole.’ (Epal. 7:6; okatoi) Noove umunthu wae ehole.

¹⁷ Tyipondola hamwe ove wekulila-le motyili. Pahe upondola okusoka okuti mokonda ovo tate yove vafenda-le Siovaa, noove ngootyo upanga lya Siovaa. Mahi Ombimbiliya yati: “Fwenei ku Huku nae na afwene kwoonwe.” (Tia. 4:8; 1 Ehi. 28:9) Tyina ove uhimbika-ko okufwena ku Siovaa, nae mekweeta kwe. Siovaa kati vala mokonda ove uli-ale pu vakwenyi vemufenda, ngootyo noove upanga liae. Mahi wahanda munthu na munthu afwene kwe, nou umwe wekulila-le motyili. Ngeetyi tyapopia Tiaku 4:​8, putyina ove uhimbika-ko okufwena ku Siovaa, ngwe nae meya no kwoove. — Tala etyi tyapopia 2 Ova Tesalonika 2:13.

18. Oityi matulilongesa monthele ilandula kweei? (Oviimbo 40:8)

¹⁸ Tyina wamelipakula ku Siovaa ombatisalwa, ngootyo uli nokuhetekela Sesusi. Ngwe welipakulile ku Tate yae alinge atyiho Tate yae ahanda. (Tanga Oviimbo 40:8; Hemb. 10:7) Monthele ilandula kweei, matupopi etyi matyikukwatesako wahayekeko okufenda Siovaa tyina wamambatisalwa.