“Namphila Ankhia, Nkhele Upopia”

 1. Oityi ankho tyityilika ombunga ya Andau na Eva okunyingila motyikunino tyo Endene, iya oityi ankho Abele ahanda unene?

ABELE ankho utala onongi mbae mbulia nawa mombuelo yotyipunda. Iya tyafuile atale vali kokule amono otyipuka tyaliaima. Oe ankho utyii okuti pomphangu oyo pena omutunga uliseta-seta ononthiki ambuho, okutyilika ondyila yokunyingila motyikunino tyo Endene. Ovohe ankho vakalelemoale, mahi pahe tyilinge ovohe ine ovana, nawike vali upondola okunyingilamo. Soka kokamphepo kokekumbi kafila konohuki mba Abele putyina atala peulu otyo asoka Komupakeko wae. Ankho ulipula okuti ovanthu nthiki imwe mavakakala vali noupanga na Huku? Abele ankho otyo ahanda.

2-4. Oñgeni Abele apopia nonthue hono?

² Abele hono upopia nove. Okuti umuiivite? Upondola okuti katyitavela. Mokonda omona oo wavali wa Andau wankhiale kohale. Olutu luae luahanyaukale omanima omanyingi kohale. Konthele yo vokuankhia Ombimbiliya itulongesa okuti: “Kavei vali natyike.” (Ecl. 9:5, 10) Tupu Abele utupu etyi apopia tyahonekwa Mombimbiliya. Ngotyo, oñgeni apopia nonthwe?

³ Apostolu Paulu kononkhono mba Huku wapopia konthele ya Abele okuti: “Namphila ankhia, oe nkhele upopia.” (Tanga Hebreus 11:4.) Abele upopia ñgeni? Upopia nekolelo. Abele ankho omunthu wotete wali notyituwa otyo otyiwa. Walekesile ekolelo monkhalelo imoneka nawa, ongeleka yae itualako nomuenyo, iya ongeleka ongwa tupondola okuhetekela hono. Inkha tulilongesila kekolelo liae atuovola okumuhetekela, ngotyo Abele ukahi nokupopia nonthue monkhalelo ipameka.

⁴ Oityi tulilongesila ku Abele no kekolelo liae tyina apopiwa vala katutu Mombimbiliya? Tutalei.

 5. Etyi Jesus ati Abele wakaleleko konthyimbi youye, ankho uhanda okuti wii? (Tupu tala okatoi.)

⁵ Abele watyitwa konthyimbi yehipululo liovanthu. Konyima, Jesus apopi konthele ya Abele okuti waliko “ponthyimbi youye.” (Tanga Lucas 11:50, 51.) Jesus tyafuile ankho ukahi nokupopia ouye wovanthu vena ekevelo liokuyovolwa monkhali. Namphila Abele wali omunthu wakuana wakaleleko, atyiho tyilekesa okuti wali omunthu wotete Huku amona okuti watokala okuyovolwa.a Tyimoneka nawa okuti, Abele kekulilile povanthu vena ovituwa oviwa.

 6. Ovohe ya Abele ankho ovanthu patyi?

⁶ Namphila ovanthu ankho vekahi konthyimbi youye mahi ankho vetupu ehambu. Andau na Eva ovohe ya Abele, tyafuile ankho ovawa nokuapama. Mahi ankho valinga onkhali onene, iya otyo ankho vetyii nawa. Tete ankho ovanthu vehena ononkhali, nekevelelo liokukala nomuenyo wahapu. Mahi vatyitukilapo Jeova Huku iya avatewa meumbo liavo omphangu yombembwa motyikunino tyo Endene. Mokonda vapakele tete omahando avo komutwe, tyipona avakuavo aveho, alo umwe omasuka-suka ovana vavo, avapumbwa omuenyo waapeho uhena onkhali. —Gên. 2:15–3:24.

7, 8. Oityi Eva apopia etyi Kaim atyitwa iya tyafuile ankho ukahi nokusoka tyi?

⁷ Kondye yotyikunino, Andau na Eva vavasa onkhalelo yepuiya yomuenyo. Ngotyo, etyi omona wavo wotete Kaim atyitwa, Eva apopi okuti: “Namona omona womulume nekuateso lia Jeova.” Onondaka mba Eva ankho mbulekesa okuti uhinangela omulao Jeova alinga motyikunino, okupopia okuti omukai umwe makatyita omona ine “ombuto” makahanyako ondingavivi yayapula Andau na Eva. (Gên. 3:15; 4:1) Okuti Eva ankho usoka okuti oe omukai wapopiwa meulo iya Kaim oe “ombuto” yalawa?

⁸ Inkha otyo ankho asoka, waponya. Tupu inkha etyi Kaim omona Andau na Eva vemupopila okuti oe “ombuto,” ngotyo ankho vahindila Kaim okulipakako.Mokueenda kuononthiki akutula omona omukuavo, mahi kapopile ngetyi alinga pu Kaim. Anthi vemuluka okuti o Abele, tyihangununa okuti: “Omuniko Omuvi ine Otyipuka Tyihasilivila.” (Gên. 4:2) Okuti enyina olio vaholovona ankho vasoka okuti Kaim wakolela vali tyipona Abele? Katutyii.

 9. Oityi ovohe hono vapondola okulilongesila ku Andau na Eva?

⁹ Hono ovohe vapondola okulilongesila unene ku Andau na Eva. Okuti onondaka mbenyi neevi mulinga, vilongesa ovana venyi okukala nelungavi nonkhi? Ine mbuvelongesa okukala nohole na Jeova Huku nokukala noupanga nae? Tyotyili, Andau na Eva vaponyene motyilinga tyavo. Mahi, ankho ovana vavo vena ekevelelo.

10, 11. Kaim na Abele ankho valinga ovilinga patyi iya otyituwa patyi Abele akalele natyo?

¹⁰ Putyina ovakuendye ovo vevali vekula, tyafuile Andau wevelongesa okuundapa opo vakuateseko ombunga. Kaim ankho omulimi, iya Abele ankho omunthita wonongi.

¹¹ Tupu, Abele walingile otyipuka tyimwe tyakolela unene. Mokueenda kuomanima omanyingi, wakalele nekolelo otyituwa tyimwe otyiwa, Paulu ahonekele komanima okonyima! Nkhele soka. Ankho kutupu omunthu wali novituwa oviwa Abele apondola okuhetekela. Mahi, oñgeni akalele nekolelo mu Jeova Huku? Tala ovipuka vitatu viakuatesileko Abele okukala nekolelo liapama.

12, 13. Oñgeni okutala ovipuka Jeova atunga tyakuatesako ekolelo lia Abele?

¹² Ovipuka Jeova atunga. Tyotyili, Jeova wahingana ohi, moluotyo aihimbika okumena omankhondo nomakete vipuilisa pokulima. Nongotyo, ohi nkhele ankho yaava okulia kuatekula ombunga ya Abele. Mahi ovinyama, noviila, no nombisi, no nomphunda, nomatala, no nondongi, nelunga, neulu, nekumbi, nohanyi nomakaka no nonthungululu, kaviahinganenwe. Kese oku Abele ankho atala umona elekeso lioluembia olunene nounongo nouwa wa Jeova Huku watunga ovipuka aviho. (Tanga Romanos 1:20.) Tyotyili, okusokolola kovipuka ovio aviho tyapamekele ekolelo lia Abele.

¹³ Abele ankho wovola omuwo opo asoke ku Jeova. Nkhele soka Abele ukahi nokulisa ovipako viae. Ovilinga viomunthita viesukisa okueenda unene. Abele ankho utuala ovipako ovio monomphunda, nokuyauka omanyana, okuovola eholi liatalala nawa no nonyombo mbuna omeva ekahi nawa no nomphangu onongwa mbo kupululukua. Ovinyama aviho Huku atunga onongi ankho ngoti ombo mbesukisa vali ehongolelo nokuamenwa novanthu. Okuti na Abele waimbukile okuti wesukisa okuhongolelwa, nokuamenwa, nokutekulwa nomunthu umwe omunongo nokuna vali epondolo tyipona ovanthu aveho? Tyotyili, ovipuka ovio aviho ankho uvipopia momalikuambelo ae, moluotyo ekolelo liae alitualako okuliyawisa.

14, 15. Omilao via Jeova viakuatesako Abele okukala novipuka ovinyingi pala okusokolola?

¹⁴ Omilao via Jeova. Andau na Eva tyafuile ankho vapopila ovana vavo etyi tyevetaatesa motyikunino tyo Endene. Ngotyo, Abele ankho una ovipuka ovinyingi pala okusokolola.

¹⁵ Jeova wapopile okuti ohi maihinganwa. Abele ankho umona okuti omankhondo nomakete alekesa okuti onondaka ombo ombotyotyili. Tupu Jeova wapopile okuti Eva makakala nomaluihamo pokukutula. Abele wamona etyi onondaka ombo mbafuisuapo puetyi onondenge mbae mbakutulwa. Jeova wapopile okuti Eva makakala nohole onene nomulume wae nokuhanda okupandwa unene, mahi Andau mekemutumina. Abele wamuene ovipuka ovio aviho. Ovipuka ovio vialunda Abele okuimbuka okuti etyi Jeova apopia otyili. Moluotyo, Abele ankho una omahunga amanyingi opo ayumbe onthumbi momulao wa Huku konthele “yombuto” maiya okumanako ovivi viahimbikila mo Endene.—Gên. 3:15-19.

16, 17. Oityi Abele elilongesila kono kelubim mba Jeova?

¹⁶ Ovaumbili va Jeova. Namphila Abele kavahile nawike una ekolelo mombunga yovanthu, mahi pano pohi ankho pena ovitungwa ovikuavo via Huku pomuwo opo. Etyi Andau na Eva vatewa motyikunino, Jeova watuma okuyunga Omphangu oyo Yombembwa, opo muhanyingile omunthu nawike. Ngotyo, pala okuyunga ombundi yokunyingila motyikunino Jeova apakepo ono kelubim, onoandyu mbumwe mbokuna otyilinga tyakolela unene, nomutunga wotupia uliseta-seta.—Tanga Gênesis 3:24.

¹⁷ Nkhele soka tyina Abele atala ono kelubim ombo puetyi nkhele omona. Mokonda ankho mbapilulula omalutu ambo ambukala ngovanthu, Abele etyimono okuti mbuna epondolo enene. Iya “omutunga” una wotupia ankho utualako nokuliseta-seta, tupu ankho umuavela ondundo. Okuti puetyi Abele ekahi nokukula wamuene ono kelubim ombo mbasapo otyilinga tyambo mokonda mbaponwa? Au. Otyitenya notyinthiki, enima nanima, omuwo watyo auho onoandyu ombo apeho ankho mbutualako notyilinga tyambo, pana ankho mbapakwa. Abele ngotyo, welilongesile okuti Jeova Huku una ovaumbili ovaviuki novakuatyili. Abele wamona kono kelubim ombo, oukuatyili nokutavela Jeova, ovituwa ankho ahamono mombunga yae. Ongeleka yo noandyu ombo tyotyili yapameka ekolelo lia Abele.

18. Ovipuka patyi ovinyingi hono tuna pala okupameka ekolelo lietu?

¹⁸ Okusokolola kuatyiho Jeova alekesa konthele yae muene nevi atunga, nomilao via Huku, nongeleka yonoandyu Mbae mbumuumbila, Abele wapamekele vali ekolelo liae. Okuti ongeleka Yae kaitulongesa natyike? Haunene ovakuendye vapondola okupamekwa okunoñgonoka okuti ovo vapondola okukala nekolelo liotyotyili mu Jeova Huku, namphila vahatekulilue nombunga ina ovituwa oviwa. Novipuka aviho vihuvisa Huku atunga, Nombimbiliya tuna, no nongeleka ononyingi onongwa mbovanthu vekolelo, hono tuna ovipuka ovinyingi pala okupameka ekolelo lietu.

19. Otyili patyi tyakolela Abele aimbuka?

¹⁹ Putyina Ekolelo lia Abele mu Jeova litualako okuliyawisa, aovola ononkhalelo mbokulilekesa. Ngotyo, oityi omunthu apondola okuavela Omupakeko wouye auho? Tyayandyuluka nawa okuti Huku kesukisa okupewa natyike ine okukuatesuako novanthu. Mokueenda kuomuwo, Abele weya okuimbuka otyili tyimwe tyakolela: inkha nehunga liaviuka wavela Jeova etyi ena, Tate yae keulu woluembia uhambukwa.

20, 21. Kaim na Abele valingila Jeova ovilikutila patyi iya oñgeni Jeova akumbulula?

²⁰ Abele elifuiika opo aave imwe ponongi mbae. Aholovona onamuenyo poviveli, nokuanina nawa. Iya Kaim nae, aovola okukanenwa nokuapandwa na Huku ataindya ovikuna vimwe opo aave. Mahi ankho omahando ae kaelifuile no Abele. Otyo tyeya okumoneka nawa puetyi aveho valinga ovilikutila viavo.

²¹ Ovana ovo vevali va Andau tyafuile vatungile omitala avapakeko otupia opo vayoke ovilikutila viavo, tyafuile otyo ono kelubim mbutala, mokonda ankho ombo vala mbuumbila Jeova pano pohi pomuwo opo. Jeova etavela! Ombimbiliya yati: “Iya Jeova apande Abele notyilikutila tyae.” (Gên. 4:4) Ombimbiliya kaityipopi oñgeni Huku alekesa okuti wetyipanda.

22, 23. Oityi Jeova apandelele otyilikutila tya Abele?

²² Oityi Jeova ankho apandela Abele? Okuti omokonda yotyilikutila tyae? Abele waavele otyipako tyifima, amomesa ohonde yatyo yakolela. Okuti Abele ankho utyii okuti otyilikutila ngotyo tyakolela unene? Konyima yomanima omanyingi tunde pomuwo wa Abele, Huku wetavela ovilikutila viongi yasukuka ngo tyilekeso, tyotyilikutila Tyomona Wae “Ongi ya Huku” uhena onkhali ankho meiya okumomesa ohonde yae opo ayovole ovanthu. (João 1:29; Êxo. 12:5-7) Mahi, tyafuile Abele ankho kei ovipuka ovinyingi konthele yotyo.

²³ Onthwe tutyii okuti: Abele waavele otyipuka otyinamuenyo ankho ena. Iya Jeova kapandele vala otyiawa otyo, mahi tupu wapandele una wetyiava. Abele walingile ngotyo mokonda ankho walundua nohole ena na Jeova nekolelo liotyotyili.

24. (a) Oityi tutila otyilikutila tya Kaim ankho hatyoko tyapenga? (b) Oñgeni Kaim ankho ekahi ngovanthu ovanyingi hono?

²⁴ Otyo ankho tyelikalela na Kaim. Jeova “kapandele Kaim notyilikutila tyae.” (Gên. 4:5) Otyilikutila tya Kaim ankho hatyoko tyapenga. Ovitumino via Huku, konyima vieya okupopia okuti tyitavela okuava ovilikutila viovikuna. (Lev. 6:14, 15) Mahi Ombimbiliya yapopia konthele ya Kaim okuti: “Ovituwa viae ovivi.” (Tanga 1 João 3:12.) Ngetyi ovanyingi hono vasoka, Kaim wasokele okuti okufenda vala Huku mo mulungu tyatuuka. Ovituwa Viae liwa-liwa vialekesa okuti ankho utupu ekolelo liotyotyili nohole na Jeova.

25, 26. Elondolo patyi Jeova avelele Kaim, iya Kaim alingi ñgeni?

²⁵ Etyi Kaim amona okuti kapandelwe na Jeova okuti waovolele okulilongesila ku Abele? Au. Wakalele nonkhongo nondenge yae. Jeova wamona etyi tyikahi momutima wa Kaim, iya noumphua-lundo emuviyula, okumulekesa okuti ovituwa viae vipondola okumutuala kokulinga onkhali. Tupu emupopila okuti inkha apilulula onkhalelo yae nae ‘mapandwa’.—Gên. 4:6, 7.

²⁶ Kaim ketavelele elondolo lia Huku. Iya mokonda ankho ondenge yae wemuyumba onthumbi emukongo opo vaye kepia. Iya oko Kaim autukila Abele emuipaa. (Gên. 4:8) Ngotyo, Abele wakala omunthu wotete wayalwa nokuipawa mokonda yokufenda Huku. Abele wankhia, mahi Jeova kemulimbilwe.

27. (a) Omokonda yatyi tuna onthumbi yokuti Abele makatutiliswa? (b) Oñgeni tupondola okukala nonthumbi yokukelivasa na Abele?

²⁷ Ohonde ya Abele ikahi ngatyina iliyavela ku Jeova Huku okuita ekoyeso. Iya Huku walinga ekoyeso, etyi ahitisa ondingavivi Kaim mokonda yokuaipa mukuavo. (Gên. 4:9-12) Tyakolela vali, ehipululo liekolelo lia Abele litulongesa unene hono. Abele wakaleleko otyita tyomanima, mahi omanima ae kaehi okueleka na vakuavo vakaleleko pomuvo opo, mahi omuenyo wae wakolela unene. Oe wankhia otyo etyii okuti Tate yae keulu, Jeova, wemupanda no kumuhole. (Heb. 11:4) Tupondola okukala nonthumbi yokuti Jeova utualako okuhinangela Abele, iya ukevelela okututiliswa opo akale nomuenyo momphangu yombembwa pano pohi. (João 5:28, 29) Okuti ove mokelivasa nae? Upondola okukelivasa nae inkha utokola okutehelela etyi Abele apopia nokuhetekela ekolelo liae enene.